Olipa murima

Etthu Yesu aapankaawe

EVIIDIYU: Yesu aamulaleera Zakeyo

1. Moone EVIIDIYU, naari mmusome Luka 19:1-7. Avinyaka mwaakhule makoho enttharelana:

1. Etthu heeni apaale yaaweerinhe atthu akina ohiya wuuluma ni Zakeyo?

2. Nnaamweera vareene hiiho, etthu heeni yaamweerinhe Yesu otthuna omulaleera mitthenka sooreera owo?

Ntakihero na Yesu ninnixuttiha eheeni?

2. Nintthuneya okhala oolipa murima weera naalaleere atthu ootheene mitthenka sa Omwene nihikhalakano nthalu.

Mutthareke ntakihero na Yesu

3. Mmuroromeleke Yehova. Waari munepa wootteela wa Muluku wanvanhe ikuru Yesu weera awere olaleera, nave-tho munepa owo wootteela, onimookhaviherani nyuwo. (Math. 10:19, 20; Luka 4:18) Wakhala weera nyuwo munnoova omulaleera mutthu, munvekeleke Yehova weera oovaheeni olipa murima weera nwere omulaleera mutthu owo. — Mit. 4:29.

4. Muhaaphukeleke atthu. Apaale hiyo pooti ohitthuna omulaleera mutthu mwaha wa mikhalelo sawe, mihakhu araaweno, aareene oottittimiheya naari hooye, ekumi oraaweno naari sookhovelela sa ettiini awe. Mene muupuweleleke weera:

1. Yehova ni Yesu ennawera woona mirima sa atthu, onipwaha hiyo.

2. Yehova Muluku aawooniheraka ikharari atthu, khammuthanla mutthu.

5. Mukhale oolipa murima, mene oovara murima ni mwiikosoopeke. (Math. 10:16) Muhiivoleihereke onyakulihana. Wakhala weera mutthu khantthuna wiiwa mitthenka sooreera, naari nyuwo moona weera nipuro muraanyu khaiyene ti noovareleleya, muhiye otthekula ni mutthu owo mwa nttittimiho. — Mir. 17:14.