Dezembro

Mulopwana ole a w’Ethiyope neereke ari olikanene weera abatiziwe? Nkamuupuwelani: Mulopwana a w’Ethiyopia “arwenle omulapela Muluku o Yerusalemu.” (Mit. 8:27) Tthiri eyo enoonihera weera aahaakhulela ettiini ya aYuda. Mwaha woosoma soolepa sa eHeeberi, owo aaxuttera itthu sintxipale woohima sa Yehova. Nnaamweera vareene hiiho, owo aatthuna oxuttera itthu ikina. Owo eera asomaka iroolu sa eprofesiya ya Yesaya. (Mit. 8:28) Mulopwana ole aatthuna oxuttera itthu sintxipaleOle aatthuna ovarela muteko ele aaxutteraawe. Nto mwaha wa yeeyo, yaamweeriha weetta ekwaha yoorakama okhuma w’Ethiyopia mpaka o Yerusalemu. Filipe aamuxuttiha mulopwana ole aari a w’Ethiyopia ikhaikhai sootthuneya ohela mpuwa taani aari Mesiya. (Mit. 8:34, 35) Nsivelo nawe ni Yehova ni Yesu naahaatxeerereya. Mulopwana ole aalakela opaka matxentxo matokotoko mweekumini mwawe, weera abatiziwe ni okhala mutthareli a Yesu Kristu. Filipe aahoonelela weera mwitiyope ole aari oolikaneene, ni owo ambatiza. w23.03 epax. 8-9 eparag. 3-6

Muulumeke ekhaikhai. Hiyo khaninwera omusiveliha Yehova wakhala weera nnimootha. (Mir. 6:16, 17) Nnaamweera atthu antxipale olelo va yoonaka weera wootha kheiyono etthu yootthekeya, mene hiyo nri akristu ninnamuhela mpuwa Yehova woohima sa mwaheene yowo. (Nsal. 15:1, 2) Mweekhaikhai hiyo ninnasempa wuuluma itthu soowootha, nave-tho, ninnasempa owuuluma atthu akina moohireerela. Musepeke orakama nlumi. (Mir. 25:23; 2 Ates. 3:11) Wakhala weera nyuwo munimoonelela weera matthekulelo anyu toonanara, mutxentxeke mwaha owo ni muulumeke masu ooreera. Mwaha wookhala elapo ela enlamuleliwa ni Satana, atthu ahinoonaaya okhala yoottheka wuuluma moohirerela, nto hiyo nri makristu onnatthuneya wiilipihera weera nuulumeke masu ammuhakalaliha Yehova. Owo ononreeliha wiilipihera wahu wakhala weera nimmuuluma masu ooreera naalaleeraka, noonelaka mithukumano ni naatthekulaka mahuku ootheene. Wakhala weera elapo ela enilamuleliwa ni Satana enoophiya okhwipi, oneereke okhweya onvuwiha Yehova ni masu ahu. — Yuda 15. w22.04 epax. 9 eparag. 18-20

Wuupuwelela nsivelo Yehova ni Yesu ekhalannaaya wa hiyo ninnaneeriha waasivela tho awo. (1 Yoh. 4:10) Vaavo ninsuwela ahu weera Yesu okhwiiye weera onoopole, nsivelo nraahuno ni Yehova ni Yesu ninnalipa. Murummwa Paulo aahoonihera weera annaxukurela mukuttho wa Yesu vaavo alenpawe ha: “Mwaana a Muluku, okitthunne miyo ni ìvelenle nthowa na miyo.” (Agal. 2:20) Mwaha wa mukuttho, Yehova oowiittanani nyuwo weera mukhale nthamwene awe. (Yoh. 6:44) Oosuwela weera Yehova ohoona etthu yooreera wa nyuwo ni ooliva weera awoopoleni, nyuwo khamunhakalala mwaha wa yeeyo? Neereke eyo khenwerihani nyuwo nsivelo mukhalannaanyu ni Yehova ni Yesu olipa? Hiyo ninnitthuneya wiikoha weera ‘nsivelo nna ninkeeriha opaka eheeni?’ Nsivelo nrahuno wa Muluku ni Yesu ninnaneriha owonihera atthu akina. — 2 Akor. 5:14, 15; 6:1, 2. w23.01 epax. 28 eparag. 6-7

Nto ti vaavo ninhimaahu weera Biblya etthu yootepa otthuneyaxa, mwaha wooweera Yehova onnanvarihela muteko weera aakhavihere atthu awe “ni emurumele etexaka ekolope emosaru mmakhatani.” Iparte sintxipale sa Biblya silempwale weera ale oowiiyeviha yiiwexexeke. (Luka 10:21) Atthu a elapo yootheene pooti omusoma Biblya. Nto atthu oowiiyeviha paahi anamwiiwexexa ni tantthara miruku sawe. (2 Akor. 3:15, 16) Biblya onnanixuttiha osuwela wa Yehova wa moota mukina. Yehova onanvarihela muteko Biblya weera anixuttihe ntoko egrupu, nave owo tho, pooti onivaha miruku ni onimaaliha mutthu ti mutthu a hiyo. Vaavo mummusomaanyu Biblya, neereke munnoonelela weera Yehova onnoopwatthani? Aani! (Yes. 30:21) Nyuwo munasoma yoolepa ya mBiblyani avinyaka muneera: “Mweekhaikhai eversu ela kilepelinwe yoomi.” Mene Biblya onnalopola imiliyau saatthu. Vano onwereya hayi Biblya okhalano miruku soororomeleya seiyo nyuwo munhaawelaanyu? Ennawereya eyo mwaha wooweera mwaneene Biblya Yehova, mutthu ootepaxa osuwela mwa elapo yootheene. — 2 Tim. 3:16, 17. w23.02 epax. 4-5 eparag. 8-10

Ntoko makristu eekhaikhai, hiyo, ninnamusivela vantxipale Yehova. Nave nintthuna weera muteko nnanvarelaahu owo, okhaleke woorehereya. Mwa yeeyo, wakhala weera nintthuna okwanihera sootthuna sahu, nintthuneya olepa sooluluwanya soomunepani ni okhalano mikhalelo sa ekristu ni oxuttera itthu soovareleya muteko, nave waasaasera itthu soowaakhavihera atthu akina. Mwaha wa heeni nintthuneyaahu opwatthela opaka itthu soomunepani? Etthu yoopatxera, ori weera nintthuna omuhakalaliha tiithaahu oosivela a wiirimu. Yehova onnahakalala vaavo onnoonaawe nivarelaka muteko itthu sahu ni itthu ninweraahu weera ninvarele muteko. Opwaha mwa yeeyo, nintthuna weera mukhalelo ahu woomunepani waakhavihereke asinna ni asirokora. (1 Ates. 4:9, 10) Nihipwatthaka ehuhu nivirinhaahu nreene mweekhaikhaini, ootheene hiyo nnoowera opaka etthu weera nunnuwe moomunepani. w22.04 epax. 22 eparag. 1-2

Ntoko noonnahu yoosoma evinre, anamahoolela a ipoliitika a elapo ela, anoorowa omutuphela Babilonia Mutokweene yoowo onthonyera ittiini sootheene soowotha. Otupheliwa iwo onrowa weeriha opatxeriha yoohoxa etokotoko. Neereke eyo enooweriha atthu otthunaka onvarela muteko Yehova? Hooye. Mwaha wooweera, eliivuru ya Apokalise ekapiitulu 6, enoonihera weera atthu ahimmukokhorela Yehova, anrowa waasaka nikhavihero ni mareherero a epolitika ni a nakoso a elapo ela anlikanxeriwa ni mwaako. Mwaha woohikhavihera Omwene wa Muluku, atthu awo anrowa okhala amwiittani a Muluku. (Luka 11:23; Apok. 6:15-17) Ehuhu ya yoohoxa etokotoko, arumeyi a Yehova anoorowa wooneya. Ni awo, anrowa okhala ekhurupu emoha enanvarela muteko Yehova, ni enakhotta “okhavihera enama.” — Apok. 13:14-17. w22.05 epax. 16-17 eparag. 8-9

Atthu a Muluku khoiyono yaakela olaleya paahi mitthenka sooreera. (Math. 24:14) Awo tho yaakela otthuneyaka okhavihera muteko wa malaika, yoowo onhimmwa eliivuru ya Apokalise ekapiitulu 8 mpaka 10. Malaika awo ennalaleya mitthenka sinhima onyaanyiwa wa atthu yaale ehiniiwelela masu a Muluku. Anamoona a Yehova, ennalaleya mitthenka seiyo sinhima sa ophukela, seiyo sinlikanxeriwa ni “maralala ni mooro.” Seiyo sinthoonyera othoriha wa Muluku wa atthu a elapo yootheene enlamuleliwa ni Satana. (Apok. 8:7, 13) Atthu antthuneya wiiwa weera emalihero yohaattamela nave opaka matxentxo mweekumini weera ewere okhalano ekumi nihuku na onyoonyiwa wa Yehova. (Sof. 2:2, 3) Mene olaleya mitthenka iyo khoiyono ti wookhweya. Mene hiyo nri makristu ontthuneya okhala oolipa murima. Mpuwa mwa ehuhu ya yoohooxa etokweene, mutthenka owo onkela okhala wootepaxa olaleiwa ehuhu yoomalihera. — Apok. 16:21. w22.05 epax. 7 eparag. 18-19

Anamathelana anayaraaya anamwane aya,pooti weeraka ehinaaye waayara anamwane, yanniiwa naari neere aatoko wiiwa nyaha sintxipale voohima sa moota woowaahuwa anamwane. Mene vaavo anayaraaya anamwane eneereke woona moota sinvareleyaaya muteko miruku iyo. Mene nto awo, aakhalano muritti woowaahuwa anamwane. Nto owo muritti mutokotoko! Moohihovela, matxentxo makina a mBiblyani pooti oneeriha woona moota mukina miruku sa mBiblyani. Mweekhaikhai, ela etthu enneeriha hiyo nri arumeyi a Muluku osoma masu awe ni, opaka ele Yehova aalenlaawe mamwene a wisrayeli. Niphimelelaka ‘mahuku ootheene’ mweekumini a ekumi ahu (Ola. 17:19) Asitiithi, nyuwo mookhalano eparakha etokotoko yeeyo makristu antxipale akhalannaaya. Yoowaaxuttiha anamwane anyu woohima sa Yehova. Mene nto nyuwo muntthuneya opaka etthu. Ohiya paahi waaxuttiharu, muntthuneya waaxuttiha anamwane anyu omusivela Yehova ni murima wootheene. w22.05 epax. 26 eparag. 2-3

Ottharuwa ontaphulela otxentxa mukhalelo onttharana ni oripiwa murima mwaha wa mukhalelo wa ekumi ya khalayi mwaha wa yoottheka naari mwaha wa itthu saatthuneya opakiwa nto ihipakiwa. Ottharuwa weekhaikhai onnakumihera mireerelo naari moota woopaka itthu. Etthu ekina yootthuneya Yehova onhelaawe mpuwa, ori emaara namattheka onttharuwaawe naari neere mutthu vaavo “onhiyaawe opaka itthu soottheka” apakaka matxentxo mweekumini. Nave anapaka itthu seiye Yehova onhimaawe weera ti sooreera. Mutthu ontthuneya otxentxa muupuwelo awe weera eettihiweke ni nyuupuwelo sa Yehova. (Yes. 55:7) Mutthu onnatthuneya opaka itthu sootheene weera, ohiya paahi ohiya opaka itthu soottheka, mene weera ahiye okhalano minyuupuwelelo soonanara. (Arom. 12:2; Aef. 4:23) Ekhaikhai weera mukuttho wa Yesu, Yehova tonvarelaawe muteko weera anlevelele ni onitteeliha yootthekaahu. (Akol. 3:7-9) Yehova onrowa ovarela muteko mukuttho, wakhala weera owo ohoona weera hiyo ninnilipihera ohiya mukhalelo woonanara. — 1 Yoh. 1:7. w22.06 epax. 6 eparag. 16-17

Atthu aakhalano sooweereya sinnoonihera weera atthu annahasulana. (Koh. 8:9) Mwa ntakihero, anamalamulela khantthara malamulo aya, ikrime ni ohixariya, Buuly mmaxikolani, [oveehana wa ale ansoma ekaalaase emoha] atthu akina khaanaathokorora nnene amusi aya. Khennantikiniha weera atthu annawoova atthu akina! Moota heeni Satana oneereraawe ovarela muteko owoova atthu? Satana onnavarela muteko woopopiha wa atthu weera anihiihe olaleera. Yeettihiwaka ni Satana anamalamulela annakhoottiha muteko ahu ni annansontta. (Luka 21:12) Atthu antxipale olelo va aneettihiwa ni Satana annamwaramwara itthu soowootha woohima sa Anamoona a Yehova. Atthu aniiwelela sowootha iyo, pooti oniveeha ni onimana. (Math. 10:36) Neereke ninnahovela miraakho sa Satana? Hooye. Mwaha wooweera, owo ootoko ovarela muteko miraakho eseekulu yoopatxera. — Mit. 5:27, 28, 40. w22.06 epax. 16 eparag. 10-11

Atthu heeni “antxipale” ankela okuxiwa mwa exariya? Ale ankela ovinyererihiwa ni ale ankela ovuluwa mwa Harmagedoni naari mwaana ori poo-the onkela oyariwa elapo enyowani. Sivinreene iyaakha 1.000 atthu ootheene a elapo ya vathi anrowa okhala oomalela. Onnatthuneya wuupuwelela weera omalela khommweeriha mutthu okhalano okumi woohimala. Nkuupuwelani weera Adamu ni Heva yaari atthu oomalela, Mene weera awo evirelele okhalano ekumi yoohimala waatthuneya ovirelela omwiiwelela Yehova. Mene ehiyakaru omwiiwelela Muluku awo yaayeleela eparakha yookhalano okumi woohimala. Mooripiha murima awo yaahiya omwiiwelela. (Arom. 5:12) Savira iyaakha 1.000 atthu ootheene mulaponi anrowa okhala oomalela. Neereke atthu ootheene oomalela anrowa omwiiwelelaka Yehova wa mahiku ootheene? Naari neereke atthu akina anrowa okhala ntoko Adamu ni Heva yaawo yaahiyale omwiiwelela Yehova? Makoho ala ankela waakhuliwa, mene moota heeni? w22.09 epax. 22-23 eparag. 12-14

Atthu yaawehaka vale itthu sineereeya mahukwaano, antxipale a yaawo, onnaaxupa ororomela weera itthu sinoorowa oreera muhoolo, mwaha wooweera imusi sinnakawanyeya, atthu anoovirelela okhala oowali ni oowiitthuna. Ni atthu antxipale onnaaxupa waaroromela ale anlamulela. Menento ekhaikhai ti yooweera, itthu sootheene iya sineereeya, sinoonihera weera itthu sihanle vakhaani oreera. Mwaha wa heeni? Mwaha wooweera atthu ampaka itthu seiye Biblya ahimmaawe weera saamweereya “mahiku òmalihera.” (2 Tim. 3:1-5) Yoole ori mutthu oneemela anaweha moota itthu iraaya mahukwaano, onnasuwela weera iprofesiya woohima sa mahuku oomalihera sinnakwanela. Etthu eyo ennoonihera weera Yesu oopatxera olamulela Omwene wa Muluku. Ohiya paahi eprofesiya emphwanyeya va Timotheyo, sookhala tho iprofesiya ikina sinuuluma woohima sa Omwene wa Mulukuiprofesiya iyo sinkhala ntoko ipeesa sohimoontariwa, mene vaavo nimmontaraahu ipeesa iyo ninnawera woona etthu eneera ekhumelele. w22.07 epax. 2 eparag. 1-2

Mpuwa mwa eretta COVID-19 hiyo naahaakhela miruku sooluluwanya sa moota nneerahu nivireleleke woonela mithukumano ni ovara muteko woolaleera. Moowaakuveya naahaakhela miruku sa woonela mithukumano sahu sa assembleya ni kongresu moorweela nviidiyu conferência. Nave-tho hiyo ninnavirelela olaleera moorweela mwa ikarta ni telefoni. Nave Yehova onnareeliha wiilipihera wahu. Ifiliyaale ikina sinnahima waatxeerereya wa anamalaleera mmuttettheni mwaya nave-tho atthu antxipale annahima soowereya sooreera. Etempu ekina atthu akina pooti wuupuwela weera mareherero a Yehova annoova vantxipale mpuwa mwa eretta ela ya coronaviru mene miruku awo anvahaaya ti sooreera. Hiyo nuupuwelelaka vale moota Yesu onaahoolelaawe atthu awe mwa nsivelo, hiyo ninnaroromela weera nihixikhaka etthu eneera ekhumelele muhoolo Yesu ni Yehova enrowa okhala ni hiyo. — Aheb. 13:5, 6. w22.07 epax. 13 eparag. 15-16

Ohiya paahi onvuwiharu Yehova munivekeloni mwahu, nintthuneya weera nimuxukureleke mwa itthu sootheene owo onnipakelaawe. Hiyo pooti omuxukhurela Yehova mwaha wa ikoore sooreera nnoonahu mulaponi, mwaha wa sootxa soohiyana-hiyana opankaawe ni mwaha wookhalano asinthamwene a nsivelo. Tiithaahu Yehova a nsivelo owo onnanivaha itthu sootheene iya, mwaha wooweera owo ontthuna weera hiyo nihakalaleke. (Nsal. 104:12-15, 24) Opwaha mwa yeeyo, hiyo ninneera asantte vantxipale wa Yehova mwaha wa yootxa ya omunepani owo onnivahaawe ni-tho mwaha wa yooweherera yooreera yookhalano ekumi yooreera muuhoolo. Ikwaha ikina hiyo pooti ottiwala weera asantte wa Yehova mwaha wa itthu sootheene sooreera onnivahaawe. Munaapake eheeni weera muhittiwale omuxukhurela Yehova? Aani, nyuwo pooti opaka elista wa itthu munvekenlaanyu Yehova munivekeloni mwanyu. Yavira etempu nyuwo pooti orowela elista eyo weera moone moota Yehova aakhunlaawe mavekelo anyu, avinyaka vaavo, nyuwo pooti opaka nivekelo mmuxukhurelaka Yehova mwaha wa nikhavihero oovanhaaweni. — Akol. 3:15. w22.07 epax. 22 eparag. 8-9

Oxuttera ikhaikhai sa mBiblyani, mene onnatthuneya ovirelela opaka eyo, nave onnatthuneya okhala movarihana ni ekhaikhai naari neere ha ovarela muteko ele munxutteranyu neera haawo nnowera okhalano ohakalala wekhaikhai. (Yak. 1:25) Mene ninkela osuwela moota heeni weera ninnetta mwekhaikhaini? Munna mmoha ohimme weera ontthuneya wiiwehexexa weera noone nipuro heeni nintthuneyaahu oreherera. Nivarihelaka muteko ele ninsomahu, murummwa Paulo enre: “Wakhala siso, yeeyo niphiyerahu’mo mwemmo, ene nètteleke’mo.” (Afil. 3:16) Nyuwo muhemela mupuwelela moota mukhavihereñyaanyu mwaha “woovirelela weetta mwekhaikhaini!” Ekumi ahu ti yootepa oreera, opwaha mwaha yeeyo, hiyo ninnaweera ohakalaliha murima wa Yehova naahiyaka asinna ohakalala. (Mir. 27:11; 3 Yoh. 4) Mohihovela hiyo nookhalano mathowa mantxipale anneriha osiveliwa ekhaikhai ni ovirelela weetta mwekhaikhaini. w22.08 epax. 18-19 eparag. 16-18

Moota heeni asitokweene ammulokoni enrowaaya woonihera weera ennamusivela Yehova ni Yesu? Ori vaavo enkosoopaaya sookukhula sa Muluku siri variyari vaya. (1 Ped. 5:1, 2) Yesu ahoonihera eyo wa murummwa Pedru. Noomala omukhootta ikwaha ttharu, Pedru aaxupeya moota woowoonihera waari weera annamusivela Yesu. Nto noomala ovinyererihiwa Yesu owo aamukoha Pedru: “Simoni mwana a Yohani onnakitthuna?” Nto moohihovela Pedru ampaka ele aaweraawe weera oonihere omusivela wawe Yesu. Nto Yesu aamweerela Pedru “okukhule iputtiputthi saka.” (Yoh. 21:15-17) Nto mpaka okwipi wa ekumi awe Pedru aakosoopa mwansivelo iputtiputthi sa Yesu. Ooniheraka veettiitthuni weera annamusivela owo. Asitokweene, moota heeni nyuwo munrowaanyu woonihera weera ele Yesu aamulenlaawe Pedru ti yootthuneya wa nyuwo? Nto nyuwo pooti woonihera omusivela wanyu Yehova ni Yesu vaavo munihiiyeraanyu etempu weera mwaalipihe asinna ni waakhavihera ale ehiñye omukokhorela Yehova weera etthike. — Ez. 34:11, 12. w23.01 epax. 29 eparag. 10-11

Muhimorele mmurakhoni muupuwelaka weera khaavo onoona maxupo munvirihaanyu. Nto muupuwelo ntoko ola pooti oweerihani wuupuwelela weera khamunkela oviriha maxupo ni oweerihani wuupuwelela weera khamunwera ovilela soowinlela sa murima. Nkoonani ele Biblya onhimmaawe: “Siso mowereriwani mwanyu Muluku onimovahani ntthawelo, wera nwere ovilela.” Eyo entthuna ohima weera nnaamwi mikhalelo soonanara sooweelakani ikwaha sintxipale, nyuwo pooti owina mukhaviheriwaka ni Yehova.Mwaha woohimalela hiyo khaninkela ohiya wuupuwelela mikhalelo soonanara moomalela, mwakhalano vale soowinlela sa murima musepeke moowakuveya. Hiihaale ntoko Yosefe aatthanwaawe amwaarawe Potifari. (Eph. 39:12) Nyuwo muhihiye sootthuna sa murima anyu sootthekihakani. w23.01 epax. 12-13 eparag. 16-17

Mukhalelo mukina Yehova oraaweno ti exariya. (Ola. 32:4) Exariya eyo ennavarihana ni mukhalelo mukina wa Yehova, ohikhalano nthalu. (Mit. 10:34, 35) Hiyo ninnoonelela weera Yehova khaiyene a nthalu mwa moota Biblya olempwalaawe. Yehova aalaihera weera mwa etempu yoomalihera “osuwela wekhaikhai” nimphwanyaahu mBiblyani “onimwìnnuwa” naari neere atthu antxipale yaamwiiwexexa. (Dan. 12:4) Moota mukina eprofesiya ela enkwanelaaya olelo va, ori mwaha wa otaphuleliwa wa Biblya ni iliivuru ikina ni okawiwa. Moovirikana ni awo, atthu a Yehova aamutaphulela Biblya ootheene naari eparte vakhaaneene a muulumo ookwana 240. Mahikwaano mutthu ori poothe onoowera okhalano Biblya woohiliva etthu. Yookhumelela aya ti yooweera atthu a mahimo ootheene annaakhulela mitthenka sa Omwene ehinaakuve omala elapo ela. (Math. 24:14) Yehova Muluku ahu a exariya, ontthuna waavaha eparakha atthu ootheene weera emusuwele, moorwela mwa omusoma Biblya. Yehova onnapaka eyo mwaha wooweera onnaasivela vantxipale atthu. w23.02 epax. 5 eparag. 11-12

Nyuwo ennoosivelani exariya ni etthu yooreera vamaithoni va Muluku? Mohihovela, ootheene hiyo naatthu ohimalela wakhala weera khannikosopa vamaithoni va elapo woohima sa yooreera ni yoonanara, hiyo pooti opaka itthu soonanara. (Yes. 5:20) Vaavo atthu anuulumaaya woohima sa exariya animuupuwela mutthu owiisunnuwiha onathoriha atthu akina ni oniisona okhala ootthuneyaxa waapwaha atthu akina. Mene Muluku khammutthuna nnakhala vakhanene mutthu ntoko ola. Yesu emaara araawe valaponi ahaximwela ahooleli a ittiini mwaha woowera awo yanakumihera malamulo woohima sa yooreera ni yoonanara. (Koh. 7:16; Luka 16:15) Naxariya khanisona okhala ootthuneyaxa wapwaha akina ni khampaka malamulo woohima sa yooreera ni yoonanara. Mukhalelo wa exariya ti wootepa otthuneya, weera niwanyeihe naxariya tuule ompaka yooreera vamaithoni va Muluku. Masu oweera exariya onihimmwa mutthu onkhala moovarihana ni malamulo a Yehova. w22.08 epax. 27 eparag. 3-5

Yesu annaaroromela atthareli awe nnaamweera awo yaari oohimalela. (Yoh. 15:16) Emaara yeeyo Yohani ni Yakobe yanvenkelaaya Yesu weera ephwanye otokweene momweneni, Yesu khaathorinhe mwaha wa etthu ele yaatthunaaya okhalano weera envarele muteko Yehova nnakhala khaakhontte okhala atthareli awe. (Mar. 10:35-40) Evinreene etempu atthareli ootheene a Yesu yaamutthawa ohiyu ole ni atthukiwa. (Math. 26:56) Nnaamweera vareene hiiho Yesu khahinye waaroromela awo. Yesu aasuwela weera yaari oohimalela nnaamweera vareene hiiho owo ahaasivela “mpaka okhwipi.” (Yoh. 13:1) Avinyererihiwakaru Yesu aahaavaha atthareli awe 11 oororomeleya muritti wootepa otthuneya wa oholela muteko woolaleera ni othokorora iputtiputthi. (Math. 28:19, 20; Yoh. 21:15-17) Nroromelo Yesu akhalannaawe ni alopwana ale oohimalela naari nootepa oreera. Avinyaka awo yaakhala oororomeleya mpaka okhwipi wa ekumi aya yootheene. Moohihovela Yesu ahiya matakihero ootepa oreera a waaroromela atthu oohimalela. w22.09 epax. 6 eparag. 12

Naaroromelaka weera Yehova onnansivela ni ori ni hiyo nnoowera osepa miraakho sa Satana. Mwa ntakihero, namalepa a Nsalmu 118 aakumanano maxupo yaawo yaamuriipiha murima. Owo aakhalano amwittani yaawo yaatepa omusontta (eversu 9, 10). Atthu antxipale yannamusontta (eversu 13). Ikwaha sintxipale owo annalakiwa ni Yehova (eversu 18). Nnaamweera aalakiwa veeli veeli, nasalimu aahiipa eeraka: “Nkinrowa wova etthu onakèrelaiye mutthu.” Eheeni yaamweerinhe Owo aasuwela weera, nnaamweera aalakiwa veeli-veeli owo aahoona weera Yehova amulaka mwaha wooweera annamusivela vantxipale. Nasalimu annaroromela weera nnamweera aaviriha maxupo Tiithaawe awiirimu ammukhavihera. (Nsal. 118:29) Nintthuneya ororomela weera Yehova, onnamusivela yoole ori mutthu. Ororomela iwo onoonikhavihera owina maxupo ala mararu oowoova: (1) woova woohiwera otxiha emusi; (2) owoova atthu ni (3) woova okhwa. w22.06 epax. 15 eparag. 3-4

Muheleke nipuro noopatxera mweekumini mwanyu omukokhorela Yehova. Yehova mpattuxaahu ni onnaphwanela okokhoreliwa. (Apok. 4:11; 14:6, 7) Mwa yeeyo, etthu yootthuneya mweekumini mwahu, okhaleke omukokhorela Yehova moophwanelela, eyo tiiyo, “mwa munepa ni ekhaikhai.” (Yoh. 4:23, 24) Etthu eyo entaphulela weera okokhorela wahu weettihiweke ni munepa wootteela wa Muluku ni ovarihaneke ni ikhaikhai simphwanyeya mBiblyani. Omukokhorela Yehova okhaleke nipuro noopatxera mweekumini mwahu, nnamweera nikhalaka elapo yeeyo muteko ahu onkhottihiwaaya. Asinna aniphwaha 100 ni asirokora aatthukeliwa mwaha wookhala Anamoona a Yehova. Nnamweera vaareene hiiho, awo annahakalala mwaha woopaka ele anweraaya weera evekele, emusome Biblya ni waaleela atthu akina mitthenka sooreera sa Muluku ni Omwene awe! Etempu yeeyo ninsonttiwaahu, ninnahakalala mwaha woosuwela weera Yehova ori moono ahu ni onookela ontthuvela. — 1 Ped. 4:14. w22.10 epax. 9 eparag. 13

Othene, ninavarela muteko eliivuru ya Miruku, Yehova onnanivaha miruku sootthuneya otthara ni sinvareleya muteko. Ninrowa woona matakihero maxexe. Muhakalaleke ni itthu muraanyuno. Onnavaha miruku eeraka: “Muhetetele muhakhu . . . sinolakaseya vohilekela, sivavelaka wirimu ottaiwene ntoko xaka. Nnaamweera vaareene hiiho, olelo va ninnawoona anamuhakhu ni atthu oohaawa yaasaseraka musurukhu. Ti yeeyo enaweeriha opaka itthu sinnanariha nsina naya, makhalelo aya ni mpaka ekumi aya. (Mir. 28:20; 1 Tim. 6:9, 10) Muupuwele muhinaakuve wuuluma. Naahikosoope, hiyo pooti onanariha itthu sintxipale ni itthu nnuulumaahu. Miruku 12:18 oneera: “Muhorahora onetha ntoko mwalo, nto nlumi na anaxariya ninalamiha. Nnookhalano muretthele vaavo nihinuulumaahu soottheka sa atthu akina. — Mir. 20:19. w22.10 epax. 21 eparag. 14; epax. 22 eparag. 16-17

Ezekiyeli waatthuneya weera iwexexeke nnenesene masu eraawe alaleere. Owo waatthuneya weera aroromeleka masu ala ni awereke wuuluma moohihovela. Nto yaaheereya etthu mootutuxera, Ezekiyeli aahoonelela weera eroolu ele “yàri yosiva ntoko oravo.” (Ez. 3:3) Wa moonelo wa Ezekiyeli ohelela onamoona yaari eparakha etokweene ntoko osiva wa oravo. (Nsal. 19:8-11) Ezekiyeli anneera asantte wa Yehova mwaha woothanliwa ni Yehova weera akhale mprofeti awe. Avinyaka Yehova amweerela Ezekiyeli: “Masu othene kinkelaka wohimera wakhele mmirimani mwa ni wiwe phama mmirimani mwa.” (Ez. 3:10) Ni masu ala, Yehova aatthuna omulela Ezekiyeli weera wakhala weera owo onnuupuwela yeele elempwale murooluni ni ophimelela ele elempwale, eyo yaamweeriha nroromelo na Ezekiyeli okhala noolipa. Emaara emoharu, ala yaari masu owo eraawe aalaleereke atthu. (Ez. 3:11) Ni masu a Muluku va murimani va Ezekiyeli ni mmwanoni mwawe, Ezekiyeli aari oolikaneene waakhulela ni ovara yoothanleliwa awe. w22.11 epax. 6 eparag. 12-14

Wakhala weera akhumelela matxentxo yawo muhiniwexexanyu a mareherero munkela opaka heeni? Mukhavihereke matxentxo ootheene mmarehereroni. Etempu Ana a Israeli yaaraaya moothakoni, irukulu sa ana a Kehathi eyo tiiyo macoatita, yaathanleliwa muteko woothanleya. Emaara yootheene Ana a Israeli yaathaamaya, macoatita makina yaathanleliwa otexa nivuku na onthamwene ohoolo wa muloko. (Nam. 3:29, 31; 10:33; Yeh. 3:2-4) Eyo yaari eparakha tthiri! Mene muhoolo mwaya itthu saatxentxeya, vaavo Ana a Israeli yaaphiñyaaya elapo yoolaiheriwa. Nivuku na onthamwene khanatthuneya-tho weera nthaamihiwe. Ntoko hiihale macoatita makina yaathanleliwa muteko mukina (1 Sow. 6:31-33; 26:1, 24) Kiyaavo enoonihera weera macoatita yannikhupanyera, mwaha wa eparakha yaaraayano khalayi yootexa nivuku na onthamwene. Eheeni ninxutteraahu? Emaara mareherero a Yehova ampakaya matxentxo, hiyo nintthuneya weera nikhavihereke, ohela mpuwa wakhala weera eyo ennatapha yoothanleliwa ahu. Etthu yootepa otthuneya ori ovirelela ohakalala mwa yoothanleliwa eri poothe. Ni muupuweleke weera etthu yootepa okhala mwiitti vamaithoni va Yehova, khaiyene yoothanleliwa anyu. Yehova onnahela mwiitti vantxipale wiiwelela wanyu. Ni omwiiwelela wahu Yehova tenoonihera etthu yootepa otthuneya wa hiyo. w22.11 epax. 23 eparag. 10-11

Onisiforo aamwaasasa Paulo ni amphwanyakaru, aaheerera omukhavihera mwa itthu owo ahawelaawe. Vaavo Onisiforo aapakaawe eyo annahela ekumi awe veerisani. Ninxuttera eheeni? Nihihiyeke woova onootxelihaka waakhavihera asinna yaawo enttharatthariwa. Opwaha mwa yeeyo, nintthuneya weera niwaakiheke ni naakhavihereke mwa itthu awo antthunaaya. (Mir. 17:17) Asinna awo enttharatthariwa ennatthuna vantxipale nsivelo nahu ni nikhavihero nahu. Nwehe ntakihero nasinna enkhala oRussia. Awo khehiñye waakhavihera asinna ni asirokora etthukelinwe. Vaavo asinna akina enkelihiwaaya otripunaale weera yaaphukeliwe mwaha aya, asinnihu ni asirokorihu annapaka ele enweraaya weera erowe otripunaale iwo weera yaakhavihere asinna awo. Ninxuttera heeni ni ntakihero nasinna ala? Vaavo asinna enhoolela mareherero a Yehova ennyemuliwaaya, antthukiwaaya ni anttharatthariwaaya nihikhaleke owoova. Opwaha mwa yeeyo, nintthuneya weera navekeleleke, nakhavihereke amusi aya nave tho nuupuweleke moota mukina hiyo nneeraahu naakhavihere. — Mit. 12:5; 2 Akor. 1:10, 11. w22.11 epax. 17 eparag. 11-12

Ovaha nikhavihero na omunepani ni nammuupuweloni onneerela eparte muteko wa sitokweene ammulokoni. (1 Ped. 5:2) Yakhumelela vale erisa, etthu yoopatxera asitokweene ammulokoni ampakaaya, waasaasera weera yoone waari weera asinna ari oovareleleya, aakhalano yootxa, soowara ni nipuro nookhala. Nto yavira etempu asinna awo ephwanyinwe ni erisa ennatthuna nikhavihero na mmuupuweloni ni noomunepani. (Yoh. 21:15) Harold yoowo ori mmoha a eKomisau ya eFiliyaale ni aasuwenle asinna antxipale yintale ophwanyiwa ni irisa sa ephattu ohimme ha: “Ennavira etempu weera mutthu atthikele moota aaraawe. Vakhaani-vakhaani asinna ennatthikela ekumi yaaraayano mene winkheliwa araayano ni mutthu ole okhwiiye veerisani, ni etthu ayelenlaaya mpaani mwaha wa erisa ni muupuwelo arayano mmuru weera yaahanle okhwaru veerisani vale, siri minyuupuwelo ahinweraaya okumiha mmuru mwaya. Minyuupuwelo sene tiseiya sinwiiniha murima asinna. “Okhalano muupuwelo ntoko ola, khaiyene ohikhalano nroromelo, iya minyuupuwelo paahi sinkhumelela wakhala weera mutthu ooviriha erisa ya ephattu. Asitokwene a mmulokoni annahela mwiiti miruku soweera mwinleke naale aninla.” — Arom. 12:15. w22.12 epax. 22 eparag. 1; epax. 24-25 eparag. 10-11

Mene khavankhweya opaka itthu sooreera, nto Yehova onnanivaha munepa awe woottela weera onikhavihere. Naamusomaka Biblya, ninnoonihera weera ninnaakhulela munepa woottela weera onikhavihere, etthu emoha-emoharu ennereya vaavo ninrowaahu woonela mithukumano. Omithukumanoni, hiyo ninnaviriha etempu ni asinna ni asirokora, eniilipihera ntoko hiyo weera epake yoothuna ya Muluku, nto eyo ennanilipiha tthiri. (Aheb. 10:24, 25; 13:7) Emaara yeeyo hiyo ninvekelaahu Yehova weera nihiye mukhalelo woonanara, owo onoonivaha munepa awe woottela weera nivirileleke owana ni mikhalelo soonanara. Omusoma Biblya ni woonela mithukumano ni ovekela khonkela omaliha mikhalelo soonanara, mene nto itthu iya sinkela onikhavihera owanano. Nakhalano sookhovelela sooreera sa opaka ittthu soomunepani, ti wootthuneya wiilipihera weera nihihiye mikhalelo iyo. Nto onnatthuneya opaka. w23.01 epax. 11 eparag. 13-14

Biblya khaiyene liivuru onnivaha miruku sa moota wookhalano ekumi yooreera naari wa moota wootxa. Menento onnanoonihera moonelo wa Yehova woohima sa itthu iya. Mwa ntakihero, Yehova onneerela weera nintthuneya wiirakameliha itthu [“sohawa”] sinnanariha ekumi ahu. (Koh. 11:10) Biblya onnahima weera khanintthuneya opaka itthu sinhela ekumi ahu veerisani, ntoko wiipeliwa naari owura mpaka ohapaliwa. (Mir. 23:20) Yehova onweherera weera mutthu ori poothe a hiyo, akhalekeno wiihiiha woohima sa moota onkelaawe otxa ni owura. (1 Akor. 6:12; 9:25) Moota heeni ninrowaahu opaka yoothanla enoonihera weera ninnavaha mwiitti ekumi? Nuupuwelaka ni nivarihelaka muteko miruku sahu. (Nsal. 119:99, 100; Mir. 2:11) Mwa ntakihero, hiyo pooti wuupuwela mooreerela etthu heeni nintthuneyaahu otxa. Wakhala weera ennanisivela otxa etthu ninsuwelaahu weera natxa vale ennanitannyera onivoreya mmirimani waamukhala wa miruku ohiya otxa yootxa eyo. Hiyo tho ninnoonihera weera nookhalano miruku nikonaka mookwanela, nipakaka exercício físico veeli-veeli, nikhalaka ooratta ni nikwesaka vaate ninkhalaahuvo. w23.02 epax. 21 eparag. 6-7

Moota heeni nyuwo munrowaanyu ophwanya mihakhu sa masu a Muluku vaavo mummusomaanyu Biblya? Nwehe ele onhimaawe 2 Timotheyo 3:16, 17. Yoolepa ela ehimme ha: “Yolempwa eri yothene . . . muteko aya ti”: (1) wohusiha, (2) wovanya, (3) wolaka ni ya (4) wolela mwa exariya. Ipontu iya ixexe sinnavareleya muteko mpaka mwa iliivuru sa mBiblyani iye muhinsomaanyu ikwaha sintxipale. Musome moomaaleleya sooweereya iyo sa mBiblyani ni nwehe itthu heeni sinooxuttihaayani woohima sa Yehova ni yootthunaawe, ni mweerere wiiwexexa moota heeni sooweereya iyo sinrowaaya woottaruxani. Iversu sa mBiblyani pooti onikhavihera woonelela mikhalelo sahu soonanara ni sootthuna sahu, nave tho sinoonikhavihera otthawa mikhalelo iyo ni ovirelela okhala oororomeleya wa Yehova. Mweerere woona moota sooweereya iyo sinrowaaya wookola ni oreherera mikhalelo sanyu soonanara, naari wa mutthu muninphwanyaanyu mmutekoni woolaleera. Mwa yoosomaanyu ya Biblya mwiilipihere woonelela ipontu sinrowa woottaruxani ni wookhaviherani woona itthu moota Yehova onoonaiye. Wakhala weera ipontu iya ixexe sinookhala mmuupuweloni mwanyu munoorowa okhalano mihakhu sa masu a Muluku emaara munrowaanyu omusoma Biblya. w23.02 epax. 11 eparag. 11

Eprofesiya ekina ya Daniyeli, yaalaihenre weera Yesu aakela opatxera olamulela okwipi wa ehuhu yeeyo Biblya oniitthanaawe ihuhu ithanu ni piili. Neereke tthiri vannawereya osuwela liini Yesu okhanlaawe mwene?. (Dan. 4:10-17) “Ihuhu ithanu ni pili” entaphulela ehuhu ya iyaakha 2.520 ehuhu eyo epatxenre eyaakha ya 607 A.E.C. Yesu ahiwiiye, vaavo aBabilonia yaamwankhaaya omwene mwene oomalihera athanliwe ni Yehova oYerusalemu. Ihuhu ithanu ni Piili simanle liini? Simanle eyaakha ya 1914 E.C. vaavo Yehova anvanhaawe omwene Yesu “yoowo orino edireitu yookhala mwene” a Omwene wa Muluku. (Ez. 21:25-27, Tradução do Novo Mundo.) Mwaha wa heeni eprofesiya ela eraaya yootthuneya wa hiyo? Wiiwexexa eprofesiya woohima sa “ihuhu ithanu ni piili,” onnalipiha nroromelo nahu weera Yehova onimwaakwanihera anatiri ootheene alaihenraawe. Yehova aathanla etempu yoophwanelela weera Yesu akhale mwene. Vamoha-moharu, iprofesiya sootheene ikina sa Yehova sinookwanela etempu enamphwanelela Yehova. Nroromeleke weera nihuku na Yehova ‘nnoophiya moohipisa.’ — Hab. 2:3. w22.07 epax. 3 eparag. 3-5