SOOWEEREYA SA MWEEKUMINI
Nooxuttera Ohimukhoottela Yehova
AVIRAKARU tufão, mooloko waasareya ittoko ni maluku ene. Hiyo naatthuna ovira nipuro nikina mene eponti yaaphwatiwa. Miyo ni aiyaka ni namataphulela nuulumo na Amis naahova nihoonaka yoopaka. Asinna akina yaari moono mukina wa mooloko yaari oothanana. Weera nivirihe ekaaro ahu waatthuneya, okhaviheriwa ni ekaaro etokweene. Nto khanaakhanleno mikoyi weera ntthukelele ekaaro ahu. Vakhaani-vakhaani yaapatxera ovolowa mmoolokoni ni noona weera khayaarowa okhumamo. Hiyo navekela Yehova weera anikhavihere, nto okhwipi waya naawera ophiya moono mukina ni naavuluwa. Itthu iya seereñye eyaakha ya 1971. Naari nipuro nnakhuma nsuwa na oTaiwan, woorakamelanaxa ni elapo ahu. Miyo kinoohima itthu vakhaaneene sineerenle.
KIXUTTERAKA OMUSIVELA YEHOVA
Aiyaka Harvey, yaari mwaana opatxera oyariwa wa asinnaya axexe. Amusi aya axuttenre ekhaikhai elapo ya Midland Junction, wEstado ya Austrália Ocidental, ehuhu yoothowa musurukhu mwa iyaakha 30. Nsivelo na Harvey naapatxera wuunnuwa. Mwaha wa yeeyo emaara araweno iyaakha 14 aaBatiziwa. Owo aaxuttera ohimukhottela Yehova. Mwa ntakihero, ekwaha emoha, munna mmoha aanvekela omusoma Nwehereri, nto owo aakhootta, mwaha wooweera oona weera khaawera. Vano munna ole, amweerenle há: “asinna a mulokoni yoovekelani opaka etthu, aasuwela weera nyuwo munoowera!”—2 Akor. 3:5.
Kixuttenre ekhaikhai wInglaterra, vamoha ni ameyaka ni murokoraka mutokweene. Apapaka exuttenre ekhaikhai othana-thanaru. Woopatxerani awo yannaasontta Anamoona a Yehova. Ehitthunaka, miyo kaabatiziwa kihikwanihe iyaakha 10. Yoolakelaaka waari okhala piyoneira avinyaka missionaria. Mene apapaka khayaarowa okaakhulela okhala piyoneira kihikwanihe iyaakha 21, ni miyo nkaatthuna oweherera iyaakha sintxipale. Mwa yeeyo kikwanihakaru iyaakha 16 apapaka yaakeemihera othaamela wa murokoraka mutokweene akhala wAustraliya. Kikwanihakaru iyaakha 18, kaapatxera ovara muteko wa opiyoneira.
Nihuku nthelannaahu eyaakha ya 1951
Waustraliya, miyo kaamusuwela Harvey. Owo aatthuna tho okhala missionario. Hiyo nthelanne eyaakha ya 1951. Nivirihakaru iyaakha piili nrene mapioneiro naathanliwa weera nikhale mutokweene a esirkwiitu. Esirkwiitu naathanleliwaahu ya Austrália Ocidental yaari etokotoko. Nannaviriha ehuhu yiintxipale neettaka mutuphini moohimakiwa.
YOOTTHUNAAHU YAAHEEREYA
Eformatura ya oGiladi wEstádio Yankee, eyaakha ya 1955
Eyaakha ya 1954 naawompwa orowela exikola ya Giladi eturma 25, yootthunaahu yookhala mamissionariyu yaaheereya. Nanwenle naviyu nrowaka oNova York ni naapatxera omusoma Biblya moowixera. Mwa yoosomaahu eyo, nannatthuneya oxuttera nuulumo na espanhol. Eyo yaahaxupa vantxipale aiyaka. Mwaha wooweera khayaawera omuromola nnene “r”.
Mpuwa mwa ekurso anamasomiha yaahima weera atthu antthuna oxuttera ejaponês antthuneya wiilepiha. Hiyo naalakela weera mareherero a Yehova enithanlele muteko ahu, muhoolo mwaya munna mmoha anisomiha aahonelela weera hiyo khaniilepinhe. Nto owo aneerela weera onnatthuneya weera niilepihe, mene hiyo naakhootta. Munna Albert Schroeder aahimme weera hiyo nohoolepani. Muupuwele weera mwaxuttere nuulumo na ejaponês. Harvey, naamukhweela oxuttera nuulumo nne.
Hiyo niphiñye ojapao eyaakha ya 1955, ehuhu ele elapo yootheene yaari anamalaleera 500. Harvey arinono iyaakha 26 nto miyo karinono iyaakha 24. Hiyo naathanleliwe ecidade ya oKobe, ni noovarawo iyaakha ixexe. Naahakalala niwompwakaru okhala mutokweene a esirkwiitu. Yoothanleliwa ahu yaattamenle ecidade ya Nagoya. Mene itthu soothesene saari sooreera, asinna, yootxa ni mapuro ooreera oweha. Muhoolo mwaya naavahiwa yoothanleliwa ekina nave-tho khanaamukhottenle Yehova.
YOOTHANLELIWA ENYOWANI NI MAXUPO MANYOWANI
Harvey ni miyo vamoha ni mamisionario makina oKobe ojapao eyaakha ya 1957
Nivarakaru muteko wa esirkwiitu iyaakha 3 nahiwompwa eBetheli ya ojapao weera navareke oTaiwan nihimo na amis. Atthu akina a nihimo nne, yaathatuwa anamavirikanyiha nto asinna eFiliyaale, yaamuhawela munna aawera wuuluma nnene ejaponês weera aakhavihere asinna ale oviriha maxupo aya.a Nto hiyo wannasivela ovara muteko ojapao, mene khawaakhweñye waakhulela yooathanleliwa ele. Mwaha wooweera Harvey aaxuttera ohimukhoottela Yehova, hiyo naahakhulela.
Hiyo niphiñye oTaiwan Novembro a 1962. Ehuhu ele oTaiwan anamalaleera yaari 2.271. Antxipale a yaawo yaari a nihimo na amis. Etthu yoopatxera naatthuneyaahu opaka waari oxuttera nuulumo na echines. Weera nxuttere nuulumo nne, naamwasa buukhu mmoha ni nnikhavihero na prusoora ahuuluma enkeleexi. Naamwi vareene hiiho hiyo naawera oxuttera echines.
Niphiyakaru oTaiwan, Harvey aathanleliwa weera ahooleleke muteko woolaleera elapo ele. okhala weera eFiliyaali yaari ekhaanene Harvey anwera ovara muteko wa miritti sootheene aathanleliwaawe ni ovara muteko vamoha ni asinna a nihimo na amis, isemana 3 vamweerini. Ehuhu ekina owo annavara muteko wa esirkwiitu, wahela mmpuwa opaka nyaha sa wAsembleya, wakhala weera Harvey ampaka mwaha ni nuulumo na ejaponês asinna yaahereke wiiwexexa, nto anamalamulela yaakhulela paahi opakiwa mithukumano sa ittiini ni nuulumo na echines. Mwaha wa yeeyo naamwi eera oxuttera echines, Harvey waatthuneya opaka mwaha ni nuulumo na echines, munna mukina ataphulelaka ni nuulumo na amis.
Ehuhu ele oTaiwan waaweehawehiwa ni atoropa, hiyo waatthuneya okhalano edukumento weera nimpake Asembleya. Ni wannaxupa ophwanya edukumentu, emaara ekina yannapisihiwa okumihiwa. Mapolisia yaapisaka okumiha edukumentu ya Asembleya mpaka ophiya nihiku na Asembleya, Harvey annaviriha nihiku awehereraka. Etthu ela yannavara muteko, mwaha wooweera mapolisia wannawuula muru omoona mutthu a elapo ekina akilantheene.
EKWAHAAKA YOOPATXERA
Nlapuwaka mooloko oTaiwan nrowaka olaleera
Mpuwa mwa isemana naakhaviheraahu asinna anuulumo na amis, nannetta iwoora sintxipale weera niphiye muttetthe naarowaahu niviraka mmwaako ni nilapuwaka nyooloko. Miyo kinnuupuwela nihiku noopatxera kaawenlaka mwaako. Nihiku nne, hiyo naatxiiye etthu vakhaanene wooixelo, avinyaka emaara naarowaahu eviila yoorakamela naanwela maxipompo 5h 30. Naalapuwa mooloko woowunnuwa niparaaruwa, avinyaka nnavira vamwaako. Mwaako ole waari woosokowa, mpaka munna aari ohoolo waka inaani sawe saakettela vayuutxi.
Wooixelo ole Harvey avara muteko ni asinna a muttetthe ole, miyo kaahala kilaleeraka nipuro nuulumwa ejaponês. Oxekuwa miyo kaakhulumuwa mwaha wa etala. Emaara naakumannahu ni Harvey, owo eera atxentxaniiheene irevista ni mootxe mararu oohaapeiwa. Owo aakuxa nimoha anakoonihera moota kaarowaaka owura. Harvey aathorola osulu ni vathi, miyo kinapatxera onuula. Ekhaikhai weera khanaasiva, mene naamwi vareene hiiho, miyo kaahikhanyerera. Vano-nto taani aarowa owuura nootxe na naararu? Miyo, mwaha wooweera Harvey uupuwela weera khaarowa oweera okiteexa kikomonkeene.
NIPURO NOORAPA NOOVIRIKANA
Nihiku naarowaahu ompaka Asembleya a esirkwiitu, kaahona etthu kahaakhovelenlaka. Naalukamenle vaate va munna attamenle empa ya omwene. Atthu a nihimo na amis orapa etthu yootthuneya, mwa yeeyo mwaara a mutokweene a esirkwiitu akuttiha maahi weera nrape. Nto Harvey aakivekela weera kapatxere orapa, mwaha wooweera owo aahaatteliwa miteko. Nipura naarampwa sannakhalawo miyaapu miraru, mwaapu mmoha yaaheliwa maahi oorira, mukina maahi ooviha ni mukina tho woohikhala maahi. Nto emaara kaarowaaka orapa katikinihiwa. Mwaara a mutokweene a esirkwiitu areherenre itthu sootheene vanlakani ni waawehana ni empa ya omwene moono yaarayawo asinna yaakhavihera omurehera Asembleya. Miyo kaamukoha wakhala weera ookhalano ekortina weera akoolihe, nto aakinyale ekortina ya palastiku owooneela. Kaahupuwela orowa orapa opithela wa empa, ni opithela iwe yaakhalawo apaattha ni kannoova okitova. I Nto kaahiserela munneenaaka ‘asinna ahatteliwa miteko sa Asembleya, khanrowasa okoona kaarapaka. Mene kaahupuwela weera kaahirapa vale kaanwulihiha muru aiyaka. Nto kaalakela orapa!
Niwanrene ikuwo sa nihimo na amis
IBUUKHU SA NUULUMO NA AMIS
Harvey, aahoonelela weera asinna a nuulumo na amis khayaarowa vahoolo woomunepani mwaha wooweera kayaawera osoma ni khasaakhanle ibuukhu sa nuulumo naya. Neera naakhuleliweene vaanaanoru olempwa wa nuulumo na amis. Waakhala ntoko ti voorerela waaxuttiha asinna osoma nuulumo naya. Opaka etthu eyo waari muteko mutokotoko, mene evirakaru ehuhu vakhaanene asinna yaapatxera osoma ikhaikhai sa Yehova ni nuulumo naya. Okhuma eyaakha ya 1966 seera itaphuleliweene ibuukhu ikina sa nuulumo na amis. Ni eyaakha ya 1968 apatxera okaiwa erevista Nwehereri.
Mene anamalamulela yaatthuna paahi weera ikaiweke paahi ibuukhu sa nuulumo na echines. Weera mareherero esepe onyakulihana ni anamalamulela, erevista Nwehereri yaakaiwa yoopwexereriwa ni nuulumo na echines. Nto atthu yoona, yuupuwela weera naxuttiha atthu nnuulumo na echines. Muhoolo mwaya mareherero a Yehova yaahakhulela otaphuleliwa ibuukhu sintxipale weera saakhavihere atthu oxuttera itthu sintxipale sa Yehova.—Miteko 10:34, 35.
EHUHU YOOREHERERA
Mpuwa mwa iyaakha 1960 ni 1970, asinna a nuulumo na amis, khayeettela malamulo a Yehova. Okhala weera awo khayaaiwexexa nnene ikhaikhai sa mBiblyani, akina yaari anamararuwa, anamuhapaliwa ni oompaha soona ni omutxa bétele. Harvey aaxekura miloko sintxipale akhaviheraka asinna, moota Yehova onelaawe itthu iye yapakaaya. Saari ikwaha sene seiyo naalapunwahu mooloko avirakaru tufao ntoko kihimmaka woopatxerani.
Asinna oowiyeviha yaahiya opaka itthu iye, mene mooripiha murima akina khayaahiñye. Mwaha wa yeeyo, mpuwa mwa iyaaka 20 nummeru naari 2.450 na anamalaleera naavukuwa mpaka 900. Etthu eyo yaanikhulumula, nto naasuwela weera Yehova khaarowa waareeliha atthu yahaamwiiwelela. (2 Akor. 7:1) Evirakaru ehuhu, miloko sannamukokhorela Yehova ntoko owo ontthunaawe. Olelo va Otaiwan Yehova onnareelihawo ni aakhalawo anamalaleera 11.000.
Ovinyera eyaakha ya 1980, hiyo ninnoona ikelaka vahoolo miloko sa nuulumo na amis. Vano Harvey onnaviriha ehuhu yiintxipale akhaviheraka atthu yuuluma echines. Owo annahakalala mwaha woowaakhavihera asiyaya asirokora okhala Anamoona a Yehova. Miyo kinnuupuwelela moota owo ahakalanlawe amwiiwakaru ole amusomihawe apakaka nivekelo ekwaha yoopatxera. Ni kaakhalano eparakha yoovara oBetheli ya oTaiwan vamoha ni anamwane a mulipa kamusomihaaka khalayi.
YOOLUSA YOOKIVOREYA
Vano miyo kamuttiye. Sivinreene iyaakha 59 nthelannene, aiyaka kaasivelaka vantxipale yaahokhwa nihiku noopatxera na mweeri wa Janeiro eyaakha ya 2010 evoreiwaleene eretta ya câncer. Awo aavara muteko wa ehuhu yootheene mwa iyaakha 60. Miyo kohinkheliwa ni aiyaka, mene kannahakalala mwaha wa okhavihera ilapo piili. Naaxuttera olokolela—Harvey axuttera olepa—muulumo meeli ooxupa a wAsia.
Akhwaakaru Harvey, Mukuttula Woolamulela waalakela weera miyo kitthikele wAustralia. Etthu yoopatxera kuupuwenlaka waari: ‘okhootta, okhuma oTaiwan’! Mene miyo kaahupuwela ele Harvey akixuttinhawe, ya ohikhottela mareherero a Yehova. Miyo nkarowa opatxera okhoottela mareherero a Yehova mwaha wooweera owo ohookhwa. Avinyaka miyo kahoona weera iye saari miruku sooreera mwaha wooweera miyo kohuuluvala, ni kaahereke otthuna okhaviheriwa
OBetheli kookhalano eparakha yoowakhelela asinna ojapao ni oochina anweela oxekura
Olelo va, miyo kinvara muteko wAustralia, ni okwipi wa esemana kinnalaleera ni muloko kithanleliwaaka. OBetheli kookhalano eparakha yoowakhelela asinna ojapao ni oochina anweela oxekura. Kinnaweherera ovinyererihiwa wa atthu ale akhwiiye. Miyo kinnaroromela weera Yehova khanrowa omuttiwala Harvey yoowo ahamukhottela onvarela muteko.—Yohani 5:28, 29.
a Olelo va, nuulumo ninsuweliwa oTaiwan echines. Iyaakha sa muttuli nuulumo naasuweliwa oTaiwan yaari ejaponês, mwaha wa yeeyo mahimo mantxipale yuuluma ejaponês.