Ninkela owina hayi oriipiwa murima

ORIIPIWA murima ori ntoko oteexa muritti wootepa olemela wamurimani vahu. (Mir. 12:25) Neereke mwanninte oriipiwa murima woovirelela mweekumini mwanyu? Nyuwo mwanninte oriipiwa murima mpaka sinoomalelani miruku? Waari weera ti hiiho, muroromeleke weera khamukhanle meekhiinyu. Antxipale a hiyo nanninte okhala yaale yaathokorora amusi, yaale olelo va ekhwiiye. Akina a hiyo nohinta ophwanyiwa irisa sa ephattuwelo ni itthu ikina sooriipiha murima seiyo sinaamalihe ikuru ni miruku. Vano, ti eheeni eneera enikhavihere owina naariipiwaka murima?a

Hiyo onoowereya oxutta moota woovilela naariipiwaka murima nithokororaka ntakihero na mwene Davidi. Owo aaviriha maxupo oovalaveliha mweekumini mwawe, mpaka emaara ekina ohalela vakhaani okhwa. (1 Sam. 17:34, 35; 18:10, 11) Vano Davidi aavilenle hayi oriipiwa wawe murima? Ninkela otthara hayi ntakihero nawe?

DAVIDI AAWENRE HAYI ORIRIHA ORIIPIWA WAWE MURIMA

Davidi aaviriha sooweerera sintxipale emaara emoharu. Moone mwa ntakihero, etthu yaakhumelenle emaara aamutthawa-tthawaawe mwene Sawuli. Vaavo Davidi ni anakhotto awe yaatthinkaaya okhottoni, yaariipiwa murima vaavo yaasuwenlaya weera itthu saya saahiiyiwa ni amwiittana aya, ehisa tho impa saya ni yaakuxa asaaraya wamoha ni anamwane aya ntoko ipottha. Vano Davidi oonenle hayi? “Vavale Davidi vamosa ni muloko wa atthu wari ni yowo, yàweliha nsu naya yìnlaka mpaka olaliha mimilo saya.” Etthu yaatempe tho omuriipiha murima yaari yooweera anakhotto awe oororomeleya “yànnatthuna onvonya maluku.” (1 Sam. 30:1-6) Emaara emoharu, Davidi annaviriha itthu tthaaru soovalaveliha: amusi awe yaari weerisani, khaasuwela waari weera anakhotto awe yanwera omwiipithiha ni mwene Sawuli yoowo amutthara-ttharaka weera amwiive. Ninnuupuwela itthu Davidi uupuwelaawe!

Eheeni nto Davidi aapankaawe woottharelana? Moowaakuveya owo anvekela “Yahvéh Muluku awe wera anvuluxe.” Davidi aawenre hayi opaka eyo? Etthu Davidi uupuwelaawe waari onvekela Yehova weera amukhavihere uupuwelaka moota owo aamukhavihenraawe ehuhu ya khalayi. (1 Sam. 17:37; Nsal. 18:2, 6) Davidi aahoona weera waari wootthuneya ovekela miruku wa Yehova, mwa yeeyo, aamukoha Yehova etthu yoopaka. Aakhelakaru miru sa Yehova, Davidi aatthara miriku iyo moowaakuveya. Yookhumelela aya yaari yooweera, owo wamoha ni anakhotto awe yaareelihiwa ni Yehova mpaka waaphwanya atthu yaakuxinwe wamoha ni itthu saakuxinwe. (1 Sam. 30:7-9, 18, 19) Nohoona itthu tthaaru Davidi aapankaawe? Owo aavekela nikhavihero wa Yehova, aahuupuwela moota aamukhavihenraawe muttuli ni aapaka moovarihana ni miruku aakhenlaawe wa Yehova. Ninkelanto omutakiha hayi Davidi? Nrowe noone moota miraru.

MMUTAKIHEKE DAVIDI MWARIIPIWA MURIMA

1. Ovekela. Vaavo onniphwanyaaya oriipawa murima, onnitthuneya onvekela Yehova weera anikhavihere ni onivaha miruku. Hiyo onnitthuneya opaka nivekelo weera murima ahu okhurunuwe nihulaka tho murimaahu wa yoowo. Kapena pooti opaka nivekelo nampuwa-mpuwa, wakhala weera eyo ennavarihana ni ehuhu nikhanlaahu. Vaavo nniilipiheraahu waasa nikhavihero wa Yehova, ninnatakiha nroromelo na Davidi: “Yahvéh, miyo kinnotthunani nyuwo, ikuru saka. Yahvéh, mwalaka, ekanko aka ni Nvulux’aka.” (Nsal. 18:2) Neereke mweekhakhai nivekelo ninnakhavihera? Murokora mmoha pioneira oneeriwa Kahlia ohimme ha: “Emaara kimmalihaaka nivekelo kinnoona murima khuwaa. Nivekelo ninneereranyiha muupuwelo aka ni wa Yehova ni omuroromela waka onnaatxeerereya.” Moohihovela, nivekelo yoovaha etokweene Yehova onivanhaawe enanikhavihera ovilela naariipiwaka murima.

2. Muupuwele. Muupuwelelaka okumi anyu, munnawera wuupuwelela sooweerera seiyo nvirinhaanyu nave nwenre paahi mwaha wookhaviheriwa ni Yehova? Emaara hiyo nnuupuwelelaahu moota Yehova onikhavihenraawe ni moota aakhavihenraawe atthareli awe, ninnaphwanya ikuru ni omuroromela Yehova. (Nsal. 18:18-20 [18:17-19 Tradução do Novo Mundo]) “Kookhalano elista ya mavekelo yaawo yaakhuliwe,” masu ala ti a mutokweene mmoha a mmulokoni oneeriwa Josué. “Opaka ela yookikhavihera wuupuwelela ikwaha ikavi kinvekenlaaka Yehova mooluluwanya ni moota owo akivanhaawe moowiiwana ni ele kanvekenlaaka.” Aani, vaavo hiyo nnuupuwelelaahu itthu Yehova onnipakelaawe, ninnaphwanya ikuru weera niwine oriipiwa murima.

3. Opaka. Nihinaayeene othanla yoopaka yaniphwanya etthu yooniriipiha murima, onnitthuneya waasa mBiblyani, masu a Muluku weera niphwanye miruku soororomeleya. (Nsal. 19:8, 12 [19:7, 11 Tradução do Novo Mundo]) Antxipale ahoonelela weera, vaavo enthola-tholaaya yoolepa emoha mBiblyani, ennawera wiiwexexa nnene eversu envarihana ni ekumi aya. Munna mmoha mutokweene a mmulokoni oneeriwa Jarrod ohimme ha: “Othola-thola nyaha sinnakikhavihera woona etthu enhimaaya eversu ni osuwela etthu Yehova ontthunaawe okileela. Eyo ennakikhavihera moota kineeraaka kipake yoothanla moovarihana ni miruku kisommaaka.” Vaavo hiyo nnaasaahu miruku sa Yehova mBiblyani ni nnapaka moowiiwanana ni miruku iyo, ninniiwariha ikuru weera niwere ovilela itthu sinniiniha murima.

YEHOVA ONNITTHUNA ONIKHAVIHERA NAARIIPIWAKA MURIMA

Davidi aahoona weera, weera awere ovilela itthu saamuriipiha murima, annitthuneya weera akhaviheriwe ni Yehova. Mene nto owo aatthapela vantxipale moota aakhaviherinwaawe ni Yehova, ti yeeyo yaamweerinhe ohima ha: “Vamosá ni Muluku aka kinnatuphela ekanko aka. Muluku t’onkiwariha ni ikuru.” (Nsal. 18:30, 33 [18:29,32 Tradução do Novo Mundo]) Pooti woonaka weera maxupo ahu ankhala ntoko exiri nihinweraaru otupha. Mene nikhaviheriwaka ni Yehova, nnoowera otupha. Emoha-moharu, naari sinikhumelelaka itthu sooniriipiha murima ntoko exiri yoorakamela musulu, nnoowera otupa! Aani, vaavo nnanvekelaahu Yehova nikhavihero, nuupuwelaka moota anikhavihenraawe muttuli ni nnapaka moovarihana ni miruku sawe, owo onoonivaha ikuru ni miruku seiyo ninhaawelaahu weera niwine waniphwanya oriipiwa murima!