Mmukhavihere Yesu muhooleli ahu

1. Tiivi eri yootthuna ya Yehova mahukwaano?

YOOTTHUNA ya Muluku tiyoowera mitthenka sootheene silaleiwe elapo yootheene. (Mar. 13:10; 1 Tim. 2:3, 4) Ola muteko wa Yehova, mwaha wookhala wootthuneyaxa, owo oomuthanla Yesu Kristu weera alamuleleke. Mwaha woolamuleliwa ni Yesu, nroromeleke weera muteko onimweetta ntoko Yehova ontthunaawe mpaka elapo ehinaaye ophiya weemaliheroni.—Math. 24:14.

2. Eheeni ninkelaahu oxuttera yoosoma ene yeela?

² Yoosoma ela, nnimoona moota Yesu onanvarelaawe “kaporo oororomeleya ni amiruku” weera aavahe yootxa yoomunepani arumeyi awe nave moota onaakhaviheraawe oreherera ekampaanya yootthuneya, olaleya mitthenka sa Omwene. (Math. 24:45) Nave-tho, nnimoona moota nneeraahu nimukhavihereke Yesu ni “kaporo oororomeleya ni amiruku.”

YESU ANEERA AHOOLELAKA MUTEKO WOOLALEERA

3. Owera heeni Yesu ovahinwaawe?

³ Moota heeni nikhalanlaahu oororomela weera Yesu onnahoolele muteko woolaleera? Ahinaakuveeni otthikela wiirimu, Yesu ahaakhumelela oohuseraawe omwaako wa oGalileya. Owo aaweerela: “Owerya wothene kòvahiwa wirimu ni elapo ya vathi.” Ni moone ele aahimmaawe woottharelana: “Vanonto rowani, mwàkhalihe amalapo othene òhuser’aka.” (Math. 28:18, 19) Owera Yesu ovahinwaawe onhela mpuwa ohoolela muteko woolaleera.

4. Moota heeni ninkalaahu ororomela weera Yesu ari ahoolelaka muteko woolaleera?

⁴ Yesu oororomeliha weera, muteko woowaapaka oohusera, wampakiwa “maloko othene.” Opwaha mwa yeeyo, owo aahaaroromeliha weera ankhala ni yaawo mpaka “emalihero ya olumwenku.” (Math. 28:20) Masu a Yesu, enroromeliha weera, owo aahala ohoolela muteko woolaleera mpaka mahuku ala.

5. Moota heeni nirowaahu opakela eparte yookwanihera ya eprofesia ya Nsalmu 110:3?

⁵ Yesu aahikhala ni nroromelo weera mahuku oomalihera yaahala okhala anamalaleera ookwaneleene weera evare muteko woolaleera. Eyo yaahimmwa khalairu weera: “Muloko anyu ti wa nthiti nihiku na ekhotto anyu.” (Nsal. 110:3) Yesu aasuwela weera eprofesiya ela yaamukwanela. Waari weera nyuwo munnalaleya, mummukhavihera Yesu ni kaporo oororomeleya ni amiruku. Nave-tho, mumpakela eparte yookwanihera iprofesiya. Nnaamweera vareene hiiho, nroromeleke weera muteko ola wookhala ni maxupo aya.

6. Maxupo heeni ninkumanaahuno olelo?

⁶ Maxupo nraahuno ori ottharatthariwa ni anamavaanyiha, anamahooleela a ettiini ni epoliitika, yaawo emmwaramwara soowootha woohima sa muteko ahu woolaleera. Eyo pooti oweeriha anamwaattamanaahu, amusi ahu, atthu oowaasuwela oneeriha ohiya olaleera ni ohiya onvarela muteko Yehova. Ilapo ikina amwiittani ahu ennaahooxa ni yaatthukelaka mukadeya asinnihu ni asirokorihu mene-nto hiyo khanintikhina ni eyo. Yesu aheera: “Nyuwo muni musondiwe ni amalapo othene nthowa wa nsinanaka.” (Math. 24:9) Mweekhaikhai itthu sootheene sinoonihera weera hiyo nohaakhuleliwa ni Yehova. (Math. 5:11, 12) Diabo ari eriyari ya ottharatthara iwo. Mene eriyari ya Yesu owo khaiyono etthu. Nihooleliwaka ni ni Yesu, mitthenka iya sooreera sinahala olaleiwa elapo yootheene! Nrowe noone etthu enneeriha ororomela eyo.

7. Mathowa heeni aniroromeliha weera Apokalise 14:6, 7, onnakwaniheriwa?

⁷ Mene waalaleera atthu a elapo yootheene pooti okhalano maxupo. Yesu enre weera mitthenka sooreera saamulaleiwa elapo yootheene nnaamweera nivirihaka maxupo. (Mmusome Apokalise 14:6, 7.) Eyo enaakwaniheriwa hayi? Muteko Ola woolaleera onnavariwa elapo yootheene ni mayuulumelo mantxipale. Mwa ntakihero, musaittini mwahu, atthu a elapo yootheene pooti osoma iliivuru sahu mwa iyuulumelo soopwaha 1000! Ni ekaruma etokotoko yoowaaxuttihera atthu Biblya eri eliivuru, Mukhaleno ekumi yoohimala! yeeyo etaphuleliwe muulumo oopwaha 700! Ohiya eyo, yootxa yoomunepani yoorehereriwa moorweela mwa iviidiyu wa atthu ale ehiniiwa ni va ebraili wa atthu ehinoona. “Atthu a maloko othene,” eenavahiwa “eyano yottela,” yoowo ari Biblya. (Zak. 8:23; Sof. 3:9) Hiyo nookhalano eparakha yoowoona iprofesiya iyo saakwaniheriwaka ni sootheene iyo sinnapakiwa sihooleliwaka ni Yesu Kristu.

8. Eheeni enkhumelela ni muteko ahu woolaleera?

⁸ Olelo atthu oopwaha 8.000.000 a ilapo soopwaha 240 enneerela eparte mareherero a Yehova ni vayaakhani atthu antxipale ennabatiziwa! Numero khanitempe okhala etthu yootthuneya, mene etthu yootthuneya siri “mikhalelo minyowani” iye oohusera enkhalaayano. (Akol. 3:8-10) Wa masu makina, awo aakhalano mikhalelo soomunepani. Awo aahiya mikhalelo ntoko, othanyana, okhala oowali ni mikhalelo mikina. Eprofesiya ya Yesaya 2:4 ennaakhwaniheriwa, ‘atthu a Yehova khenhusera ekhotto.’ Niilipiheraka okhalano mikhalelo minyowani atthu oneereke waasivela ovolowa mmarehereroni mwa Yehova. Neera haawo, ninnoonihera weera ninnamutthara muhoolelaahu ari Yesu Kristu. (Yoh. 13:35; 1 Ped. 2:12) Sootheene iyo khasinwereya mahala. Yesu onnanivaha nikhavihero nootheene nintthunaahu.

YESU OOMUTHANLA KAPORO AWE

9. Moovarihana ni Matheyo 24:45-47, eheeni Yesu aahimmaawe yaakela okhumelela mmahuku oomalihera?

⁹ Mmusome Matheyo 24:45-47. Yesu aahimme weera mahuku oomalihera aakela omuthanla “kaporo oororomeleya ni amiruku” weera yaavahe yootxa yoomunepani atthu a Muluku. Mene nto yaari yooweherera weera kaporo owo anvara muteko mwintxipale mahuku ahu ala ni tiyeeyo eneereya. Mwene ahu Yesu onaavarela asinna oothanliwa weera yaavahe yootxa yoomunepani “ehuhu yoopwanelela” atthu a Muluku ni ale antthuna oxuttera ekhaikhai. Asinna ala khenuupuwela weera nroromelo nahu ninlipa ni yaawo. (2 Akor. 1:24) Opwaha mwa yeeyo, asinna ala aasuwela weera Yesu ti “mwene ni namahoolela” a atthu a Muluku.—Yes. 55:4.

10. Moovarihana ni efootu, eliivuru heeni yookhavihenreni weera muxuttere ekhaikhai?

¹⁰ Okhuma eyaakha ya 1919, kaporo oororomeleya ni amiruku onnakumihera iliivuru sintxipale weera aakhavihere ale entthuna oxuttera ekhaikhai ni waavaha eyootxa yoomunepani atthu a Muluku. Eyaakha ya 1921, aakumiheriwa liivuru, A Harpa de Deus, aakhavihenre atthu antxipale oxuttera ekhaikhai ya mBiblyani. Moovira etempu iliivuru ikina saapakiwa. Eliivuru heeni yookhavihenreni omusivela Yehova ni omusuwela? Neereke yaari eliivuru “Seja Deus Verdadeiro,” naari eliivuru, A Verdade que Conduz à Vida Eterna, hooye-hooye, Poderá Viver Para Sempre no Paraíso na Terra, Conhecimento Que Conduz à Vida Eterna, Kapena tho iliivuru: O Que a Bíblia Realmente Ensina? Biblya onxuttiha eheeni? kapena pooti okhala eliivuru ela ya vaanaano, Mukhaleno Ekumi Yoohimala! Eliivuru sootheene iya soonikhavihera weera naaxuttihe atthu ekhaikhai nave nnaamweera iliivuru iya sivirikanneene, sohaakhavihera atthu.

11. Mwaha wa heeni oraaya wootthuneya weera ootheene hiyo naakhele eyootxa ya omunepani?

¹¹ Khaiyono paahi ale exuttenre ekhaikhai vaanaano tentthuna yootxa yoomunepani. Ootheene hiyo ninnatthuna. Murummwa Paulo olempe ha: ‘Vano yotxa yolipa ti ya alipa ookhomaala.’ Ni owo ohimme weera navarihela muteko ele ninxutteraahu mBiblyani enoonikhavihera “othanla yorera ni yonanara.” (Aheb. 5:14) Opaka yootthuna ya Yehova kheiyono etthu yookhweya, mwaha wooweera atthu a mahuku ahu ala aakhalano mikhalelo soonanara. Nnaamweera vareene hiiho Yehova onnanithokorora ni onnanivaha yootxa ya omunepani weera nikhaleno nroromelo noolipa. Owo onaavarela asinna a Mukuttula Woolamulela weera ekumihereke ni ekaweke yootxa eyo yoomunepani.

12. Ntharaka ntakihero na Yesu nnoonela hayi nsina na Muluku?

¹² Hiyo nintthara ntakihero na Yesu ni ninnavaha nttittimiho nsina na Yehova. (Yoh. 17:6, 26) Mwa ntakihero, eyaakha ya 1931, naakuxa nsina nooweera Anamoona a Yehova ninnapaka eyo mwaha wooweera nintthuna wiithaneliwa nsina na Yehova nave ninnanvaha ovuwa. (Yes. 43:10-12) Ovinyara mweeri wa Outubro wa eyaakha ele nsina na Yehova ninarwa vakaapani wa irevista. Opwaha mwa yeeyo ittini ikina sinnavinxa nsina na Yehova mBiblyani mwaya. Nave Tradução do Novo Mundo onnatthikihera nsina na Yehova mmapuroni naaraayamo woopatxerani.

YESU ONNAREHERERA ATTARELI AWE

13. Etthu heeni enoororomelihani nyuwo weera Yesu onnanvarela “kaporo oororomelaya ni a miruku?” (Yohani 6:68)

¹³ Yesu onnanvarihela “kaporo oororomeleya ni a miruku” weera apake mareherero yaawo envireleliha okokhorela weekhaikhai. Munoonela hayi opakela eparte mareherero awo? Kapena nyuwo munuupuwela masu a Pedru aneera: “Pwiya, weyo wokhalano masu a ekumi yohimala.” (Yoh. 6:68) Yesu onnavarela muteko mareherero weera anivahe yootxa ya omunepani ni muteko woolaleera. Opwaha mwa yeeyo, owo onnanikhavihera owara “omutthu wananano” ni omuhakalaliha Yehova. Neereke nyuwo munuupuwela waari weera khamwaapakela eparte mareherero a Yehova?—Aef. 4:24.

14. Miruku nnaakhelaahu mmpuwa mwa eretta ela ya COVID-19 (coronaviru) sinnikosoopa hayi?

¹⁴ Yesu onnanivaha miruku sooreera mwa etempu yooreera eyo yoohoonihereya mpuwa mwa eretta ela ya COVID-19 (coronaviru), emaara yeeyo atthu a mulaponi yaaxeeraaya maitho ehisuwelaka etthu yoopaka, Yesu moorweela mwa mareherero awe aanivaha miruku soowiiwanyeya, sa owara máscara mapuro oowaattiwa ni ohaattamelana ni atthu akina. Asitokweene ammulokoni yaavahiwa miruku weera yaalikareleke anamalaleera weera esuwele itthu anhaawelaaya sa weerutthuni ni somunepani. (Yes. 32:1, 2) Opwaha mwa yeeyo, ninnaakhela miruku ni nimaaliho moorweela mwa soohima sa Mukutthula woolamulela.

15. (a) Miruku heeni naakhenlaahu mpuwa mwa eretta ela woohima sa mithukumano ni muteko woolaleera? (b) Yehova onreeliha hayi wiilipihera wahu iwo?

¹⁵ Mpuwa mwa eretta ela hiyo noohaakhela miruku sooluluwanya sa moota nneerahu nivireleleke woonela mithukumano ni ovara muteko woolaleera. Moowaakuveya naahaakhela miruku sa woonela mithukumano sahu sa assembleya ni kongresu moorweela nviidiyu conferência. Nave-tho hiyo ninnavirelela olaleera moorweela mwa ikarta ni telefoni. Nave Yehova onnareeliha wiilipihera wahu. Ifiliyaale ikina sinnahima waatxeerereya wa anamalaleera mmuttettheni mwaya nave-tho atthu antxipale annahima soowereya sooreera mpuwa mwa eretta ela ya coronaviru.—Munwehe quaadru “Yehova onnareeliha muteko woolaleera.”

16. Hiyo nintthuneya weera nroromeleke eheeni?

¹⁶ Atthu akina pooti wuupuwela weera mareherero a Yehova annoova vantxipale mpuwa mwa eretta ela ya coronaviru mene miruku awo anvahaaya ti sooreera. (Math. 11:19) Hiyo nuupuwelelaka vale moota Yesu onaahoolelaawe atthu awe mwa nsivelo, hiyo ninnaroromela weera nihixikhaka etthu eneera ekhumelele muhoolo Yesu ni Yehova enrowa okhala ni hiyo.—Mmusome Aheberi 13:5, 6.

17. Nyuwo monoolela hayi okhalano muhooleli ntoko Yesu Kristu?

¹⁷ Hiyo ninnahakalala okhalano muhooleli ahu Yesu, hiyo nneerela eparte mareherero yaawo ahinkhalelaniwa ntthalu mwaha wa eraça ni nuulumo. Hiyo ninnatxihiwa nnene moomunepani ni ninnaxuttihiwa weera nivareke nnene muteko woolaleera. Mutthu ti mutthu ahiyo oneera axutteraka okhalano omutthu wanaanano. Nitho ninnaxuttihiwa osivelana mukina ni mukwaawe, aani, itthu sootheene iya, sinnaneeriha wiiteexa mwaha wookhalano Yesu ntoko muhooleli ahu.