Nyuwo munoowera okwanihera sooluluwanya sanyu soomunepani

1. Maxupo heeni antxipale envirihaaya?

NYUWO mootoko okhalano yooluluwanya yoomunepani avinyaka munoona oxupa okwanihera?b Nto khamuhiyono meekhiinyu. Mwa ntakihero, Philip yoowo oonelenle weera aatthuna wiireherera weera apakeke mavekelo ankhuma vamurimani, ohimme weera wannamuxupa ophwanya etempu weera avekeleke. Erika aakhalano yooluluwanya yoopehera ophiya omuthukumanoni wookhuma muteko woolaleera, mene ikwaha sootheene owo aaphiya muthukumano omanleene. Tomáš mwa ikwaha sintxipale owo anneerera omusoma Biblya ootheene, menento owo onnaakhulela weera khawaamusivela omusoma Biblya. “Miyo kaaherera opaka eyo ikwaha tthaaru, menento ikwaha sootheene iyo miyo kaakota ebuukhu ya Onamakeya.”

2. Mwaha wa heeni nihintthuneyaahu okhala ooripiwa murima naahiwera okwanihera yooluluwanya?

² Wakhala weera nyuwo munniilipihera okwanihera yooluluwanya ni ninlelo khamuwenre okwanihera, nto muhuupuweleleke weera nyuwo khamunvareleya muteko. Okwanihera yooluluwanya nnaamweera ekhanleene yookhweeya ontthuneya okhalano etempu ni wiilipihera. Mwaha woowiilipihera nyuwo, munnoonihera weera munnavaha mwiitti onthamwene muraanyono ni Yehova ni munnapaka ele munweraanyu weera mmuhakalaliheke ni musuweleke weera Yehova onnavaha mwiitti wiilipihera wanyu. Opwaha mwa yeeyo, owo khonnivekela opaka etthu nihinweraahu. (Nsal. 103:14; Mik. 6:8) Nto vaavo munpakaanyu sooluluwanya mukhaleke eriyari-neeriyari weera nwere othanla sooluluwanya munkelaanyu owera okwanihera. Mwatanla vale yooluluwanya, etthu heeni enkela wookhaviherani okwanihera? Nnoorowa woona miruku sinrowa onikhavihera.

TIWOOTTHUNEYA OKHALANO NTTHUNO

3. Mwaha wa heeni ntthuno nraaya nootthuneya?

³ Weera niwere okwanihera yooluluwanya yoomunepani, hiyo nintthuneya okhalano ntthuno nookwanihera yooluluwanya eyo. Mwaha wooweera ntthuno mukhalelo onrowa onikhavihera wiilipihera okwanihera yooluluwanya ahu. Ni ntthuno pooti olikanxeriwa ni epheyo enkhavihera ebarku weetta. Ni wakhala weera epheyo ennavirelela woopa ebarku eyo pooti ophiya nipuro enkelaayawo, ni yoopakaxa vale epheyo ebarku pooti ophiya moowaakuveya nipuro nno. Emoha-moharu, nakhalano ntthuno noolipa onoonikhweela okwanihera sooluluwanya sahu. Munna mmoha oneeriwa David onkhala El Salvador ohimme ha: “Vaavo nyuwo munkhalanaanyu ntthuno nyuwo munniilipihera okwanihera sooluluwanya, nyuwo munniilipihera weera ehikhale etthu eneera ewootxeeliheni okwanihera sooluluwanya sanyu.” Etthu heeni nyuwo muntthuneyaanyu opaka weera mukhaleno ntthuno?

4. Vaavo nimpakaahu nivekelo etthu heeni nintthuneyaahu ovekela? (Afilipi 2:13) (Nwehe efootu.)

⁴ Nvekeleke weera mukhaleno ntthuno. Yehova pooti woovahani munepa wootteela weera mukhaleno ntthuno nookwanihera sooluluwanya sanyu. (Mmusome Afilipi 2:13.) Ikwaha ikina hiyo pooti okhalano yooluluwanya emoha mwaha wooweera noosuwela weera ti yeeyo nintthunaahu opaka, ni khohiyono woonanara opaka eyo. Mene hiyo pooti weera khanaanoono ntthuno nookwanihera yooluluwanya eyo. Tiyeeyo yeereñye ni Norina muroka mmoha a Uganda, owo aakhalano yooluluwanya yoopakiha soosoma sa Biblya, menento Norina khaakhanleno ntthuno noopaka eyo mwaha wooweera kiisoona opwanelela. Nto etthu heeni aapankaawe? Owo ohimme ha: “Miyo kaapatxera onvekela Yehova weera akikhavihere okhalano ntthuno noopakiha soosoma sa Biblya. Miyo kaapaka ele kaaweraaka weera kirehere mukhalelo aka wooxuttiha, ni sivinreene minyeeri vakhaaneene miyo kahoonelela weera yootthunaaka yaahantxeerereya ni eyaakha ene yeele miyo kaapatxera opakiha soosoma sa Biblya piili.”

5. Eheeni nintthuneyaahu opaka weera nantxeerere ntthuno nahu?

⁵ Mphimeleleke itthu Yehova oopakenlaaweni. (Nsal. 143:5) Murummwa Paulo annaphimelela moota Yehova aamurerenlaawe murima nto eyo yaamukhavihera owo wiilipihera onvarela Yehova. (1 Akor. 15:9, 10; 1 Tim. 1:12-14) Emoha-moharu, wakhala weera munnaphimelela itthu Yehova oopakenlaaweni nyuwo muneereke okhalano ntthuno nookwanihera sooluluwanya sanyu. (Nsal. 116:12) Moone etthu yaamukhavihenre murokora mmoha onkhala Honduras yoowo aakhalanne yooluluwanya yookhala piyoneira anthiti, owo ohimme ha: “Miyo kannamaala ni wuupuwelela moota Yehova onkisivelaawe. Ni moota okikhavihenraawe waaphwanya atthu awe. Opwaha mwa yeeyo, onnakikosoopa ni okikhavihera. Ophimelela itthu iya soohaantxeerera nsivelo naka wa Yehova ni ntthuno naka nonvarela owo.”

6. Etthu heeni ekina enrowa waantxeerera ntthuno nahu?

⁶ Muupuweleleke mareeliho ookwanihera yooluluwanya anyu. Muupuwelele etthu emukhavihenre Erika yoole ohimmwale woopatxerani okwanihera yooluluwanya awe yoopehera. Owo ohimme weera: “Miyo kaahoonelela weera vaavo kaapisaaka kannayelela itthu sintxipale. Vaavo kaapeheraaka mmuthukumanoni miyo kannawera owuulumiha asinna ni okhala vamoha naawo, opwaha mwa yeeyo, miyo kannattottela mureerelo miruku naavahiwaahu nihinaakuve okhuma muteko woolaleera.” Erika annawera owehexexa mareeliho aakhelaawe vaavo aapeheraawe ni eyo yaamukhavihera okwanihera yooluluwanya awe. Mootoko wuupuwelela mareeliho heeni munrowaanyu okhalano mwaakwanihera sooluluwanya sanyu? Mwa ntakihero, wakhala weera yooluluwanya anyu omusoma Biblya ni opaka mavekelo, muupuwelele moota eyo enkelaaya olipiha onthamwene anyu ni Yehova. (Nsal. 145:18, 19) Wakhala weera yooluluwanya anyu oreherera mukhalelo mmoha muupuwelele moota eyo enkelaaya oreherera onthamwene anyu ni atthu akina. (Akol. 3:14) Munoonela hayi opaka elista muhelaka itthu sootheene sooreera sinkela okhumelela mwakwanihera vale sooluluwanya sanyu? Veeli-veeli nweheke eliista eyo. Tomáš ole ohimmwale enre: “Vaavo miyo kinkhalanaaka mathowa ookwanihera yootthunaaka onookikweelaka okwanihera.”

7. Eheeni yaamukhavihenre Julio ni amwaariye okwanihera yooluluwanyaaya yoomunepani?

⁷ Nviriheke etempu ni atthu enwoopererani opaka itthu soomunepani. (Mir. 13:20) Moone etthu yaamukhavihenre Julio ni amwaariye okwanihera yooluluwanya aya yoomunepani. Owo ohimme ha: “Hiyo ninnawaasaasa asinthamwene nikhanlaahu ootthekulano woohima sa sooluluwanya sahu soomunepani ni ennikhavihera. Antxipale a yaawo yaakhalano sooluluwanya imoha-moharu, nave tho ennanivaha miruku soovareleya muteko nave ennaasaasa osuwela moota ineettaayano ipalanu sahu ni ennanilipiha waatthuneyaka vale.”

MWAAHIKHALENO NTTHUNO

8. Eheeni ekhanle yookhumelela wakhala weera nnimwiikhuraana niwehereraka ntthuno weera nikwanihere sooluluwanya sahu? (Nwehe efootu.)

⁸ Ohima ekhaikhai aakhala mahiku hiyo nihikhalanaahu ntthuno. Neereke eyo enoonootxeeliha okwanihera sooluluwanya sahu? Hooye, muupuwelele veeli nipwanapwaniho nne na ebarku. Epheyo ikuru simmukhavihera barku ophiya nipuro onkelaiyewo, menento ikuru sa epheyo pooti otxentxa mahiku makina, ni mahiku makina epheyo pooti ohoopa. Nto neereke eyo ennamootxeeliha barku weetta? Hooye, owo pooti ovirelela weetta. Mwa ntakihero, abarku akina aakhalano mutooro naari mithala (remos) sineettiheriwa barku mpaka ophiya nipuro onkelaiye. Ntthuno nahu ninkhala ntoko epheyo, mahiku makina ninnakhalano ntthuno nintxipale, mahiku makina ninnakhalano vakhaaneene mahiku mankina ohikhalaru mano. Wakhala weera nyuwo munimwiikhuraana nwehereraka okhalano ntthuno weera mukwanihere sooluluwanya sanyu, nyuwo pooti ohiwera okwanihera. Hiiho ntoko onwereyaaya barku ophiya nipuro onkelaiye pooti ehikhanle epheyo hiyo tho nnoowera okwanihera sooluluwanya sahu pooti nihikhanleno ntthuno. Ekhaikhai weera eyo, khenkhweya menento vannawereya. Nrowe noone nikoho atthu akina apaale ekhanlaaya oowiipakela, avinyaka nnimoona miruku mikina nintthuneyaahu ovarela muteko.

9. Neereke onnatthuneya wiilipihera okwanihera yooluluwanya yeeyo nihintthunaahu? Muthalihe.

⁹ Yehova ontthuna weera hiyo nipakeke itthu moohakalala ohiya moonyesereriwa. (Nsal. 100:2; 2 Akor. 9:7) Nankha wakhala weera nyuwo khamwaano ntthuno nookwanihera yooluluwanya anyu, neereke nyuwo munnatthuneya wiilipihera? Moone ntakihero na murummwa Paulo. Owo ohimme ha: “Mene kinattaruxa erutthu aka ni kinakhaliha okaporo aka.” (1 Akor. 9:25-27) Paulo anniinyesereriha opaka itthu sooreera nnaamweera waatthuneya wiilipihera. Vanonto Yehova oonela hayi itthu Paulo aapakaawe? Yehova annahakalala mwaha wa itthu Paulo aavaraawe nto mwaha wa yeeyo, Yehova annamureeliha.—2 Tim. 4:7, 8.

10. Mwaha wa heeni oraaya wootthuneya wiilipihera weera nikwanihere yooluluwanyaahu nnaamweera nihikhanleno ntthuno?

¹⁰ Vamoha-moharu, Yehova onnahakalala vaavo onnoonaawe niilipiheraka weera nikwanihere yooluluwanyaahu nnaamweera nihikhanleno ntthuno noopaka eyo. Yehova onnahakalala mwaha woosuwela weera ninniilipihera ohiya mwaha woonisivela itthu ninpakaahu menento mwaha woomusivela owo. Ni Yehova onooreeliha wiilipihera wahu ntoko hiihaale aamureelinhaawe murummwa Paulo. (Nsal. 126:5) Vaavo nnoonaahu weera Yehova onnanireeliha ninnakhalano ntthuno. Murokora mmoha oneeriwa Lucyna onkhala oPolônia ohimme: “Ikwaha ikina miyo nkinkhalano ntthuno noorowa olaleera otepaxawene kakhulumuwa vale, menento ohakalala kinpwanyaaka kaatthikelaka owaani yoovaha yootepa oreera ya Yehova.” Vinaano va, nrowe noone etthu nintthuneyaahu opaka nahikhaleno ntthuno.

11. Eheeni nintthuneyaahu opaka weera nantxeerere mukhalelo woowiihiiha?

¹¹ Muvekeleke weera mukhaleno wiihiiha. Wiihiiha mukhalelo woowehexexa miyupuwelo sahu ni soopaka sahu ni onhela mpuwa wiikosoopa weera nihipake itthu soonanara. Nave nintthuneya okhala owiihiiha weera nikhaleno ntthuno noopaka itthu sooreera otepaxewene sakhala itthu sooxupa nihintthunaahu opaka. Muupuwelele weera wiihiiha onneerela eparte yoowiima ya munepa, nto munvekeleke Yehova munepaawe wootteela weera munnuwihere mukhalelo ola wootepa otthuneya. (Luka 11:13; Agal. 5:22, 23) David oromolinwe woopatxerani, khohiyono weera ikwaha sootheene anwera opaka yoosomaawe ya omeekha, owo onnahima moota nivekelo nimukhavihenraaya. “Miyo kannanvekela Yehova ikwaha sootheene weera akikhavihere okhalano wiihiiha. Kikhaviheriwaka ni Yehova miyo kaawera ompaka programa oomusoma Biblya ni omutthara programa owo.”

12. Koheleti 11:4 onvarihana hayi ni sooluluwanya soomunepani?

¹² Muhiweherereke etempu okhala yoophwanelela. Elapo ela ninkhalaahu khontthuneya oweherera etempu okhala yoophwanelela, waakhala weera nnooweherera hiyo pooti ohiwera okwanihera sooluluwanya sahu. (Mmusome Koheleti 11:4.) Munna mmoha oneeriwa Daniel ohimme ha: “Khekhanle etempu yoopwanelela. Hiyo pooti okhaliha etempu yoopwanelela nipatxenreene opaka etthu.” Munna mmoha oneeriwa Paul onkhala wUganda onnahima mwaha wa heeni nihintthuneyaahu ohiyerera itthu. “Vaavo ninpatxeraahu opaka etthu nnaamweera nivirihaka maxupo hiyo ninnapaka etthu Yehova okhanlaawe ooreeliha.”—Mal. 3:10.

13. Mwaha wa heeni oraaya wooreera okwanihera yooluluwanya anyu vakhaani-vakhaani?

¹³ Mpatxereke vakhaani-vakhaani. Nyuwo pooti ohikhalano ntthuno muupuwelaka weera yooluluwanyaanyu ti yootepa oxupa weera mukwanihere. Nto munoonela hayi okwanihera yooluluwanya eyo vakhaani-vakhaani? Naari wakhala weera nyuwo muntthuna wunnuwihera mukhalelo mmoha munoonela hayi woonihera mukhalelo owo mwa itthu vakhaaneene nihiku ti nihiku? Naari wakhala weera yooluluwanya anyu ti yoomusoma Biblya, munoonela hayi opatxera omusomaka etempu vakhaaniini va nihikuni? Tomáš yoole oromolinwe woopatxerani wa yoosoma ela khaawera okwanihera yooluluwanyaawe yoomusoma Biblya ootheene mpuwa mwa eyaakha emoha. Owo ohimme ha: “Miyo kaahoonelela weera kanneerera osoma itthu sintxipale mwa ekwaha emoha paahi. Nto miyo kaathanla weerera waanaaveli, nto ekwaha ela kanpaka prograama, oosoma iparagrafu vakhaaniine va nihikuni ni ophimelela ele kaasomaaka. Nto miyo kaapatxera osiveliwa ni ele kaasomaaka mBiblyani. Nto mwaha wooxuttera osiveliwa omusoma Biblya.” Tomáš aapatxera oviriha etempu yintxipale amusomaka Biblya. Okwiipi waya, owo aawera ommaliha omusoma Biblya ootheene.c

MUHIKHULUMUWE EMAARA MUNVIRIHAANYU MAXUPO

14. Maxupo heeni nikhanlaahu ooviriha?

¹⁴ Pooti mukhalanneene ntthuno ni ikuru, mooripiha murima nyuwo pooti okhalano maxupo ookwanihera yooluluwanyaanyu. Mwa ntakihero,“erisa” pooti oniyeleeliha etempu weera nikwanihera yooluluwanyaahu. (Koh. 9:11) Maxupo pooti onikhulumula ni ohikhalano ikuru. (Mir. 24:10) Mwaha wookhala atthu ohimalela hiyo pooti opaka etthu yeeyo eneera enixupihe okwanihera yooluluwanyaahu. (Arom. 7:23) Naari okhulumuwa. (Math. 26:43) Eheeni enkela onikhavihera ovilela maxupo naari nihiku nooxupa?

15. Mwaha wa heeni muhintthuneyaanyu ohiya maxupo yookhulumulakani?(Nsalmu 145:14)

¹⁵ Muhihiye maxupo munkumanaanyuno ewootxeelihakani okwanihera yooluluwanyaanyu. Biblya onnoonihera weera nnaamweera nikumanakano maxupo ikwaha sintxipale hiyo nnoowera ovinya ni ovirelela orowa ohoolo, otepaxawene nikhaviheriwaka ni Yehova. (Musome Nsalmu 145:14.) Philip yoole oromolinwe woopatxerani ohimme ha: “Weera kisuwele weera kinnarowa nnene, miyo nkinwehexexa ikwaha ikavi kimonraaka, opwaha mwa yeeyo miyo kinwehexexa ikwaha ikavi kivinyaaka ni orowa ohoolo.” David ole oromolinwe woopatxerani enre: “Miyo kinneerera woona maxupo a vanihikuni ohiya ntoko maxupo menento ntoko eparakha yoomonihera Yehova moota kimmusivelaaka.” Vaavo ninkelaahu ohoolo nnaamweera nivirahaka maxupo ninnamoonihera Yehova weera nintthuna omusiveliha owo, Yehova onnahakalala vantxipale wooweehaani nyuwo mwiilipiheraka weera mukwanihere sooluluwanya sanyu.

16. Maxupo ennoonihera eheeni ikwaha ikina?

¹⁶ Muxuttereke ni maxupo. Eheeni etannyenre maxupo ala? Neereke yookhala etthu kintthuneyaaka opaka weera maxupo ala ehikhumelele tho? (Mir. 27:12) Ikwaha ikina maxupo pooti onoonihera weera yooluluwanya nipankaahu khaninwera okhanihera. Nto wakhala weera ti yeeyo eneereya niiyeenyu, muupuwelele nnene sene woohima sa sooluluwanya sanyu ni moone wakhala weera nyuwo munoowera okwanihera.d Wakhala weera nyuwo khamuwenre okwanihera yooluluwanyaanyu muhuupuweleke weera Yehova onwoonani nyuwo ntoko khamunvareleya muteko.—2 Akor. 8:12.

17. Heeni oraaya wooreera wuupuwelela sooluluwanya nweraanyu okwanihera khalayi?

¹⁷ Muupuweleke sooluluwanya muwenraanyu okwanihera. Biblya oneera: “Kweli Muluku kahi òhiloka mpaka ottuwala yopanka mwènranyu.” (Aheb. 6:10) Tthiri nto mpakeke etthu emoharu, muupuweleke itthu nyuwo nwenraanyu opaka. Mwa ntakihero, okhalano onthamwene ni Yehova, waaleela atthu akina woohima sa Yehova naari obatiziwa. Hiiho ntoko nwenraanyu okwanihera sooluluwanya iyo soomunepani khalayi, nyuwo munoowera okwanihera sooluluwanya muraanyuno viinaano.—Afil. 3:16.

18. Emaara nneereraahu okwanihera sooluluwanya sahu, etthu heeni yooreera nintthuneyaahu opaka? (Nwehe efootu.)

¹⁸ Mukhaviheriwaka ni Yehova nyuwo munoowera okwanihera sooluluwanya sanyu, hiihaale ntoko mutthu oneetta mukwaha ni barku onhakalala aphiya nipuro onkelaiye. Muhittiwaleke ottottela mureerelo mukwaha owo. Naari neere, vaavo nyuwo munvirelelaanyu wiilipihera weera mukwanihere sooluluwanya sanyu mpuhe ohakalala woowoona moota Yehova onreelihaawe wiilipihera wanyu. (2 Akor. 4:7) Mwaahikhulumuwero nyuwo munookela waakhela mareeliho mantxipale.—Agal. 6:9.