Nyuwo Mwaasuwela?
Itijolu saaphwanyinwe oBabilania akhalayi ni moota saapakiwaaya, sinoonihera moota heeni weera Biblya ta ekhaikhai?
ALIPA ootholathola oBabilonia yaahoonelela itijolu sintxipale seiyo saavarelinwe muteko weera etekiwe ecidade ele. Moovarihana ni namatholathola Robert Koldewey, itijolu iye saapakiwa ni wooxiwa “ohitto wa ecidade,” weiwo oloko waaraya wooreera ni saakhalawo miri sintxipala weera sivareliwe muteko owo.
Anamatholathola yaahoonelela weera anamalamulela oBabilonia, yannavarihela iwuufuni iye weera yaahise atthu. Namasoma mmoha a sooweereya ni anuulumo na khalayi na wAsiria, eeriwa Paul-Alain Beaulieu aasomiha Universidade ya oToronto, ohimme weera soolepa ikina sa maBabilonia, soohoonihera weera alipa yaahiiwelela ni oohittittimiha itthu soonamunepani, annavonyeriwa owuufuni weera akhwe. Yoolepa emoha ya mahiku a mwene Nabukhodonosori ehimme ha: “Mwaanyaanye, . . . mwaahise, muhooxesa, . . . mwaavonyere owuufuni, . . . wooneye mwiixi aya, mwaavonyere mmooroni ni weera ehiseye.”
Masu ala ennawuupuxera anamasoma a Biblya ele elempwale va Daniel ekapiitulu 3. Mwene Nabukhodonosori aalamula opakiwa enenero ya etxikukhu vamusatalani oDura, yaakhala woorokamela ecidade ya oBabilonia. Vaavo aheberi ala araru Xadraki, Mexaki ni Abedinego yaakhootta okokhorela enenero ya etxikukhu. Nabukhodonosori aanyoonyiwa vantxipale ni woottharelanani, owo aalamula weera mooro opattihiwe muttukutthani imaara “ithanu opwaha yakhovelelaya” ni ooraaru, ‘yaavonyeriwa muttukutthani mwa mooro’. Mene awosa yaavuluwa mwaha wooweera nlaika na Yehova naahaakhavihera.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Etijolu emoha emphwanyeya nsina na Nabukhodonosori
Itijolu iye siphwanyinwe oBabilonia sinnoonihera tho weera Biblya ta ekhaikhai. Mwaha wooweera itijolu iye saalempwa masu yanvuwiha mwene, ni etijolu emoha elempwale ha: “Nabukhodonosori ti mwene oBabilonia . . . Empa mwene opankaawe . . . asusulaawe eneelamulele mwa mahiku otheene” masu ala ennalikana ni masu emphwanyeya va Daniyeli 4:27 [4:30, NM]. Vaavo Nabukhodonosori aahimaawe iisunnuwihaka: “Kahiyene ola Babilonia ole mutokwene kitenkaka ni ikuru sa owerya waka wera okhale ohano aka wa ovuwa waka?”