Awo khiyaakokhorenle eneneero

Noovira etempu, mwene Nabukodonosori aapaka eneneero ya ewooru yootepa orakama. Avinyaka, owo aawiitthana atthu ootheene ootthuneyaxa oBabilonia weera yoone eneneero ele. Wa atthu ene yaala, aakhalavo Xadraki, Mexaki ni Abedinego. Mwene aalamula: ‘Mwiiwa etxipo erumaka, muurameke ni mukokhoreleke eneneero! Ole oneera ahikokhorele eneneero ela, anoovonyeriwa mmooroni.’ Vanonto, neereke awo yaamurowa okokhorela eneneero, naari yaamurowa ovirelela okhala oororomeleya wa Yehova?

Avinyaka, mwene aalamula weera siipiwe ikaruma sa etxipo. Emaara etxipo yaapatxenraaya oruma, atthu ootheene yaahuurama ni yaakokhorela eneneero. Menento Xadraki, Mexaki ni Abedinego, khiyaakokhorenle eneneero ele. Atthu akina yoonne ele, yaarowa omuleela mwene yeeraka: ‘Amiravo ale 3 Aheberi, enookhootta okokhorela eneneero mpankaanyu.’ Nto Nabukodonosori aalamula oroweliwa amiravo ale 3, ni aaweerela: ‘Kinimoovahani eparakha emoha paahi wa nyuwo weera mukokhorele eneneero. Mwaahikokhorelaru eneneero ela, miyo kinimoovonyerani mmooroni. Ni khaavo muluku ori poothe onrowa woovuluxani mmatatani mwaka.’ Awo yaamwaakhula: ‘Hiyo khanintthuna eparakha ekina. Muluku ahu onoorowa onivuluxa. Menento, pooti owo ahinivuluxaka, hiyo khaninrowa okokhorela eneneero ela.’

Nabukodonosori aanyoonyiwa vantxipale ni aaheera: ‘Mukukhele nikhuku na mooro ikwaha 7 opwaha ekhoveleleñyaaya!’ Avinyaka aahaaruma anakhotto awe eeraka: ‘Mwaatthuke amiravo ala, ni mwaavonyere munikhukuni mwa mooro!’ Anakhotto yaapaka eyo. Nto nikhuku na mooro naaviha vantxipale mpaka anakhotto ale yaapattinhe okhwa waattamelaru paahi. Menento amiravo ale 3 yaavonyeriwa munikhukuni mmwe mwa mooro. Emaara Nabukodonosori aawenhaawe munikhukuni, aawoona alopwana 4 yeettaka vamooroni mene ehisaaka. Nto owo aahoova vantxipale ni aahaakoha arumeyi awe: ‘Keera hiyo naavonyenre alopwana 3 vamooroni vale? Mene miyo kinwoona alopwana 4, ni mukina onlikana ni nlaika!’

Nabukodonosori aahaattamenla nikhuku nne na mooro, ni aaweerela amiravo ale 3: ‘Mukhumelesa vaate, nyuwo arumeyi a Muluku a wiirimu!’ Etthu yaatikhininhe atthu ootheene, mwaha wooweera khaavo mmoha a amiravo ale aasiiye naari vakhaani. Erutthu aya, maihi aya ni ikuwo saya, khiyaavo yaasiiye, naari khayinkha mwiixi.

Nabukodonosori aaheera: ‘Muluku a Xadraki, Mexaki ni Abedinego toowera waapwaha amuluku akina. owo ooruma nlaika weera naavuluxe. Khaavo muluku onlikana ni Muluku aya.’

Ninxuttera eheeni woohima sa Xadraki, Mexaki ni Abedinego? Nikhaleke oolikaneene ororomeleya wa Yehova nihipwatthaka etthu eri poothe enrowa weereya.