Oviriha maxupo oowiikhoveleliha muloko munyowani

Nicolas ni Céline aaviriha maxupo oovirikana. Awo yaahaakhulela yoothanleliwa ya okhuma oFrança weera erowe muloko munyowani. Awosa ehimme ha: “Etempu ele naathammaahu, woopatxerani waari wooxupa mwaha wooweera nanninkheliwa ni asinthamwene ahu. Nlelo neera nihaakunveene okhalano onthamwene woolipa ni asinna a muloko ole munyowani.”a Muupuwelelaka maxupo, moota heeni nyuwo munrowaanyu okhumela nnene emaara mumpakaanyu matxentxo murowaka muloko munyowani? Eheeni atthu akina enrowaaya opaka weera yookhavihereni? Nave mareeliho heeni munrowaanyu ophwanya mwavirelela okhala muloko munyowani?

MIRUKU 4 SINROWA WOOKHAVIHERANI OVIRIHA MAXUPO

1. Mmuroromele Yehova. (Nsal. 37:5) Kazumi, yoowo onkhala oJapão, aahiya muloko awe yoowo aakhalaawe mwa iyaakha 20, mwaha wooweera aiyawe yaathaamihiwa omutekoni. Moota heeni owo ‘anvaherenraawe Yehova iphiro sawe’? Owo onnahima: “Miyo kaamuhulela Yehova murima aka kimuleelaka Yehova maxupo aka ootheene, ntoko omeekha, ni sookhulumula saka. Vaavo kaapakaaka eyo, Yehova annakivaha ikuru seiyo kaahaawelaaka.”

Moota heeni nyuwo munkelaanyu wunnuwihera nroromelo nanyu wa Yehova? Ntoko mwiri ontthuneyaaya maahi ni etxaatxira weera winnuwe, nroromelo nahu-tho ontthuneya otxihiwa weera ninnuwe. Nicolas, ohimmwale woopatxerani, aahoonelela weera ophimelela matakihero a Abrahamu, a Yesu, a Paulo ni alopwana yaalenve itthu sintxipale weera epake yootthuna ya Muluku, waalipiha nroromelo nawe nnikhavihero na Yehova. Okhalano eprograma ya omusoma Biblya ya omeekha, ohiya paahi onkela wookhaviherani ni matxentxo a mweekumini, mene-tho, onimookhaviherani okhalano itthu soomunepani seiyo munkelaanyu waaleela atthu akina muloko anyu munyowani.

2. Musepeke olikanxera. (Koh. 7:10) Jules aaphwanya ovirikana wa makhalelo emaara aakhummawe oBenin athaamelaka wEstados Unidos. Owo ohimme ha, “Miyo kaatthuneya omuleela mutthu ori poothe kaamusuwelaaka sooweereya saka sa mweekumini.” Okhala weera etthu ele khaakhovelenle, owo aapatxera orakamelana ni muloko. Emaara aasuwenlaawe nnene sene asinna, owo aatxentxa moonelo awe. Owo ohimme ha: “Kinnaakhulela weera nipuro nri poothe nintthunaahu okhala elapo ela ya vathi, atthu enoolikana. Mene awo evirikanne mikhalelo saya paahi. Owoonaka asinna moota eraaya, etthu yootthuneya.” Menento musepeke olikanxera ni muloko anyu wakhalayi. Murokora mmoha pioneira, Anne-Lise ohimme ha, “Nkipanke matxentxo weera kiphwanye itthu kihiñyaaka muttuli, kipanke matxentxo weera koonelele itthu inyowani.”

Nave-tho asitokweene a mmulokoni, entthuneya esepaka olikanxera muloko aya munyowani ni wa khalayi. Itthu soovirikana khaiyene itthu soonanara. Ninnoopereriwa osuwela mikhalelo sa nipuro nraahu nihaakunveene ovaha miruku. (Koh. 3:1, 7b) Etthu yooreera ovaha ntakihero nooreera ohiya waasa ovaha miruku sahu mmulokoni. — 2 Akor. 1:24.

3. Mwiivoleihere. (Afil. 1:27) Weetta ontthuneya etempu ni ikuru, mene ti wootthuneya woonela mithukumano waawereyaka vale okhuma woopatxerani. Mwaha wooweera, wakhala weera asinna a muloko anyu munyowani khenoowonani naari ennavira etempu yintxipale ehoowonneni, moota heeni enkelaaya wookhaviherani? Lucinda aathamme vamoha ni anamwane awe eeli asithiyana, athaamelaka ecidade etokweene ya wAfrica do Sul, onnuupuwela: “Kaavahiwa miruku weera kiivoleihereke mmulokoni, ovara vamoha ni asinna emaara yoolaleera, ni woonela mithukumano. Nave-tho naahaakhulela weera owaani nikhale nipuro na muthukumano wa muteko woolaleera.”

‘Wiilipihera ovara vamoha’ miteko sooteka ni asinna ni asirokora muloko anyu munyowani, mukhalelo wootepa oreera weera mukhavihere ‘wiiwelela wa evanjelyu.’ Anne-Lise, ohimmwale woopatxerani, aahoopereriwa ni asitokweene a mmulokoni, weera alaleereke ni asinna ootheene a mmulokoni. Eheeni yaakhumelenle? Owo ohimme ha, “Moowaakuveya miyo kaahoonelela weera ele yaari etthu yaarowa okikhavihera.” Opwaha mwa yeeyo, wiivaherera ovara miteko ntoko olimpari naari oreherera Empa ya Omwene, onimoonihera weera vano nyuwo munnoonihera muloko owo okhala wawinyu. Wakhala weera nyuwo munimwiivoleihera, moowaakuveya nyuwo munimwaakhuleliwa ni munoorowa wiisoonaka weerela eparte emusi eyo enyowani yoomunepani.

4. Mwaapakeke asinthamwene anyowani. (2 Akor. 6:11-13) Woonihera waapwattha atthu mukhalelo onrowa wookhaviherani waapaka asinthamwene, nto mwiihiyereke etempu sihaakunveene naari simanleene mithukumano weera mwaasuwele atthu akina. Mwiilipihereke weera musuwele masina aya. Wuupuwelela masina a atthu awo, ni okhala a nsivelo ni oowiisaakuviha, onoorowa oweeriha atthu awo osiveliwa ni nyuwo ni moohihovela munoorowa okhalano asinthamwene ooreera.

Ohiya oxupeya ni waakhuleliwa, mweemerere weera asinna ni asirokora yoosuweleni ntoko muraanyu. Mpake etthu Lucinda ohimmaawe, “Vano nookhalano asinthamwene a vamurimani, mwaha wa opatxeriha wahu waawopa owaani.”

“MWÀKHELANEKE MUKINA NI MUKHW’AWE”

Atthu akina onnaaxupa ovolowa Empa ya Omwene yeeyo eraayamo atthu antxipale ehaasuwenlaaya. Vanonto moota heeni munrowaanyu waakhavihera ale eneera ophiyaru? Murummwa Paulo, onnanooperera eeraka, “mwàkhelaneke mukina ni mukw’awe, ntoko Kristu tho owàkhenlaiyeni”. (Arom. 15:7) Emutakihaka Yesu, asitokweene a mmulokoni pooti waakhavihera ale eneera ophiyaru wiisoona okhala oowaakheliwa. (Nwehe ekwaadru eneera, “Etthu enrowa okhavihera vaavo munthaamaanyu.”) Menento, atthu ootheene a mmulokoni, waahela mpuwa anamwane, aakhalano muritti woowaapaka asinthamwene anyowani.

Owaakhela atthu akina, onhela mpuwa woonihera owaakhela aletto, mene-tho eyo pooti ohela mpuwa waavaha nikhavihero. Mwa ntakihero, murokora mmoha, aamukuxa murokora eera ophiyaru weera amusuwelihe ecidade ni omuleela moota womphwanya transporte mapuro oowaattiwa. Etthu ele murokora aapankaawe yaamukhavihera murokora mukina wiikhoveleliha.

EPARAKHA YOOWUNNUWA MOOMUNEPANI

Emaara musoope oninnuwaaya, owo onnuuhuuwa imaara sintxipale ohaakunveene mapururu aya okhomaala weera opatxere ovava. Moolikana ni eyo, emaara munthaamelaanyu muloko munyowani, nyuwo ontthuneya ohiya etthu eri poothe enrowa owootxeelihani okhalano mapururu mmutekoni mwa Yehova. Nicolas ni Céline, ennahima yeeraka “Othaama onnaxuttiha itthu sintxipale, wiikhoveleliha atthu anyowani. Mikhalelo soovirikana soonikhavihera wunnuwihera mikhalelo sinyowani.” Jeans-Charles, ohimmwale woopatxerani, onnahima moota emusi aya yaaphwannyaaya mareeliho: “Othaama wahu wooweeriha anamwane ahu wunnuwa moomunepani. Sivirakaru miyeeri vakhaani, mwanihu mwaamuthiyana aahaakhulela yoothanleliwaawe mithukumano sa eriyari ya esemana, nave mwanihu mukina aahaakhulela okhala namalaleera oohibatiziwa.”

Ankha wakhala weera makhalelo anyu khenwaakhulelani othaama, mwa ntakihero, okela mapuro oothowa anamalaleera? Vanonto munoonela hayi opatxera ovarela muteko miruku niwenhaahu? Vaavo mummuroromelaanyu Yehova, mwiivoleihere moomalela ni miteko sa mmulokoni, mukhumaka ni asinna weera mwapake muteko woolaleera mwaapakaka asinthamwene anyowani naari mulipihaka onthamwene anyu ni asinna akina. Nyuwo pooti opatxeriha waakhavihera anyowani naari ale enhaawela nikhavihero. Mwaha wooweera nsivelo nnaasuwanyeiha akristu eekhaikhai, woonihera onookhavihera mukhalelo anyu woowunnuwa moomunepani. (Yoh. 13:35) Nyuwo pooti ororomela weera “amakeya si yala annamusivela Muluku.” — Aheb. 13:16.

Nnaamweera ekhumelelaka maxupo, asinna antxipale aattottela mureerelo mwaha woothaama ekelaka muloko munyowani, ni nyuwo-tho pooti ottottela murerelo! Anne-Lise ohimme ha “Othaamela muloko munyowani, wookikhavihera orowa vahoolo.” Ni Kazumi onnaakhulela eeraka “vaavo munthaamaanyu, nyuwo munnawera woona nikhavihero na Yehova mwa mukhalelo yoowo mwahantalaanyu woona.” Ankha Jules? Ohimme ha: “Asinthamwene yaawo kaapankaaka aakikhavihera ohiisoona okhala meekhaaka. Vano kinniisoona opakela eparte muloko aka munyowani yoowo onrowa okixupa ohiya.”