Nikhavihero wa athiyana enhasuliwa

Va jw.org. mwaha owo ompatxera ni mwaha oneera “Segurança da mulher — O ponto de vista da Bíblia,” woomaliherani wa mwaha ola yookhalawo elinkhi weera mbaxari PDF a mwaha owo. Nyuwo pooti wimprimiri ni opintta epaphelo eyo, mukhalihaka efolyetu ya ipaaxina 4. Murokora mmoha onitthaniwa Stacy a wEstados Unidos ohimme ha: “Miyo kohimprimiri ipaphelo ikina sa mwaha owo. Avinyaka miyo ni murokora mukina naakuxa ikoopiya iyo nnaroiha muttetthe yoowo muloko ahu onlaleeraaya.”

Muthiyana mmoha onvara muteko, aamukoha muroora wakhala weera anwera omuhiyera ikoopiya weera aakawele atthu akina a muttetthe owo. Yookhumelela aya, ikoopiya sookwanelaka 40 saakaiwa vamoha ni ikartawu 30 sa oxekura esaiti ya jw.org. Nihiku nikina, administrador a muttetthe ole aavekela weera yooniheriwe athiyana a muttetthe ole moota empakiwaaya yoosoma ya Biblya.

Stacy ni asirokora akina eeli yaakhalano yookhumelela yooreera muttetthe mukina. Iwo, awo yaahiya ikoopiya 5 sa ifolyetu, ni atthu yaavekela weera muhoolo mwaya yaakuxe ikina. Mmoha aathiyana awo onvara muteko, aahima eeraka: “Ifolyetu iya sinoorowa waakhavihera athiyana a muttetthe ola. Ti yeeyo hiyo naahaawelaahu.” Ekwaha ekina ya oxekura athiyana antxipale a muttetthe ole yaathukumana weera yoone moota empakiwaaya yoosoma ya Biblya, ni eeli a yaawo yaahima weera yaatthuna woonela muthukumano Empa ya Omwene okhwipi wa esamana yaattharelana.

Stacy ohimme ha: “Waari wootikiniha owoona atthu moota yaaraaya ohakala vaavo yaasomaaya mitthenka sa ekopiya ele. Yamprimiriwa ni opinttiwa efolyetu eyo, ti yoovara murima, ni owo mukhalelo mmoha wooreera woolaaleya mitthenka sa Omwene ni ekhurupu eyo yoothanleya ya athiyana. Waari woovara murima woona moota atthu yaakhenlaaya mitthenka sa ekoopiya eyo. Ni ninnaweherera woona moota Yehova onrowaawe oreeliha wiilipihera wahu weera nivirelele waakhavihera athiyana awo ni mitthenka sooreera.”