YOOSOMA 8
Mwaha wa heeni Muluku onahiyaawe ohaawa otepaka?
1. Ohaawa opatxenre moota heeni?
Onnooneya vanlakani weera, olamulelo wa atthu khonwera omaliha maxupo
Voopatxerani Satana aari oohittheka, navetho aasuwela weera Muluku taapwanenle okokhoreliwa. Naamwi vareene hiiho aapatxera wuupuwelela, kikokhoreliweke miyo. Mene mwaha wowupuwelela eyo amoototha Heva. Tivaavonto Biblya onahimaawe eraaka Satana nanrima owo “Khakhanle mwa ekhaikhai.” (Yohani 8:44) Mooripiha murima, Heva yaamwaakhulela Satana ni yamurera ettuli Muluku ni Adamu tho yaahera emoharu. Eheeni yaakhumelenle? Ohaawa ni okhwa waavolowa mulaponi. — Mmusome Ephattuwelo 3:1-6, 19.
Satana opittukuwela olamulela wa Muluku. Hiiho tho, antthuna weera akina epakeke emohamoharu. Aani, ninnasuwela ela mwaha wowoototha Heva. Mahiku ala nraahu atthu antxipale khentthuna olamuleliwa ni Muluku. Mwaayeeyo ennamwakhulela Satana. Tivaavo Satana oraawe “namalamulela a elapo.” — Mmusome Yohani 14:30; 1 Yohani 5:19.
2. Neereke Muluku tantannya itthu sineereya elapo ya vathi?
Hooye. Yehova aapaka itthu soothene antoko atthunaawe eyo tiyo, itthu sooreera. Atthu ni malaika yaanwera omwiiwelela Muluku. (Olaleya 32:4, 5) Muluku oonivaha othanla wootaphuwa, waari weera nintthuna opaka etthu yooreera naari yoonanara. Vano naatthunaka omusiveliha Muluku, nnopaka ele enamusivela yoowo. — Mmusome Yakobe 1:13-15; 1 Yohani 5:3.
3. Mwaha wa heeni Muluku ahimmalihaawe ohaawa?
Atthu oottiya maaru ennatthariha makhalelo a Satana. Mene enuupuwela weera khontthuneya omwiiwelela Muluku weera ekhaleke nnene. Naamwi vareene hiiho, Muluku onnaapixera murima aavahaka ehuhu weera yoonelele meekhaayaru. (Koheleti 7:29; 8:9) Soovira iyaakha sintxipale atthu elamulelanaka yaaworu. Mene khaavo mwene naari elapo niwalaahu weeriwaka somala iretta, ikhotto, onamakakattha, naari opakelana itthu soonanara. — Mmusome Yeremiya 10:23; Aroma 9:17.
Mene olamulelo wa Muluku woovirikana ni olamulelo waatthu, mwaha woowera onnaakosoopa atthu. (Yesaya 48:17, 18) Okaphila nooweha omwene wa Muluku onoomaliha olamulela waatthu. Nto ole onaakhulela olamuleliwa ni Muluku anaahiyeriwe elapo ya vathi weera ahakalaleke ni opuha. — Yesaya 11:9. — Mmusome Daniyeli 2:44.
4. Vano va nisuwenlahu, nnapakeke heeni?
Nithanleke waari weera nintthuna olamuleliwa ni Muluku naari ni Satana. Mene mweettelo ahu onimonihera waari weera hiyo nintthuna olamuleliwa ni Muluku naari ni Satana. Waawereya naamuthanla omusiveliha Muluku mwaha wooweera Satana aahimaka weera nyuwo khamunwera onvarela Muluku niinsivelo. Woothaiwo, hiyo nnowera onvaanyiha Satana. — Mmusome Yobi 1:8-12; Miruku 27:11.
5. Nnoonihere hayi weera niinnatthuna olamuleliwa ni Muluku?
Makhalelo ni soothanla sahu sinimoonihera waakanle weera inri empari ya Muluku
Vaavo nnamusomahu Biblya, nimmonihera weera hiyo ninnatthuna olamuleliwa ni Muluku. Nave-tho, ninnonihera weera ninnatthuna opaka yootthuna we. (Yohani 4:23) Ntoko Yesu ahiitakanseraawe ni itthu sa ipolitika, hiyo tho khannitakansera naari khaninrowa okhottoni. Vaavo nneera hiiho nnimoonihera weera nri empari ya Muleuku. — Mmusome Yohani 17:14.
Satana onnapaka ele onweraawe weera atthu yooneke itthu soonanara okhala ntoko soohitthekeya. Vano vaavo nnemexeraahu opaka itthu soonanara, amusi ni asinthamwenaahu enimoona onanara ni onikhulumula. (1 Pedru 4:3, 4) Vano neereke nniwiiwelela itthu atthu enntthunaaya naari ele Muluku onntthunaawe? Satana aahiimaka weera, atthu yaampaka yootthuna ya Muluku wakhala weera voohakweela. Mene niiwelelaka malamulo, nimmonihera weera Satana namootha. — Mmusome 1 Akorinto 6:9, 10; 15:33.
Ohaawa onoomala. Mwaha waaheni nnerahu hiiho? Mwaha woowera Muluku onnaasivela atthu, nave ale enamuroromela ni omwiiwelela yoowo, enookhala mweelaponi mpaka khalayi. — Mmusome Yohani 3:16.