MURU 1
Muluku taani?
1, 2. Makoho heeni ootthuneya atthu anipakaaya?
ANAMWANE ennikoha vantxipale. Mwa ntakihero, naaxuttihaka etthu awo annitthikela okoha veeli-veeli, ‘mwaha wa heeni?’. Nave emaara nnaakhula ahu makoho aya annitthikela okoha tho, ‘maxi moota heeni?’
2 Vano amiravo naari makholo, ootheene annipaka makoho weera esuwele etthu naari yiiwexexe etthu teetthu. Ikwaha sintxipale hiyo ninnakoha nihiku ti nihiku, weera nisuwele etthu ntoko ewoora naari ninnakohera etthu nintthunaahu othuma. Nto ikwaha sintxipale, ninnatthuna osuwela itthu sootthuneya ntoko, eheeni enrowa oneerela mohoolo. Apaale waakhuliwa wa makoho ahu, pooti okhumelela ohovela nnahiya opaka makoho.
3. Atthu akina anoonela hayi waasa waakhuliwa wa makoho aya mBiblyani?
3 Ninrowa ophwanya woowi wakhuliwa wa makoho ootepa otthuneya? Atthu akina anupuwela weera wakhuliwa wa makoho ori mBiblyani. Yaawo-yaawo anihima weera Biblya ovila omwiiwexexa. Koma anupuwela weera mapaadri, mapastore, manimadore ni axaalimu taniwera waakhula makoho a mBiblyani. Mene akina annoona wuuliha muru weera nkinsuwela wakhuliwa wa makoho awo. Ankha nyuwo? Munupuwela hiho?
4, 5. Nyuwo mookhalano nikoho? Mwaha wa heeni ontthuneyaaya wiilipihera opaka makoho?
4 Apaale nyuwo mootoko wuupuwelela makoho ntoko ala: Muluku aanipakela weera neereke oyariwa, wunnuwa ni okhwa? Vano alipa okhwa aakhala araayawo ni ekumi? Muluku ori moota heeni? Moohihovela mwannatthuna osuwela wakuliwa wa makoho ala. Mulopwana amiruku Yesu ahimme weera: “Àsani ni muni mphwanye” (Matheyo 7:7) Okhala nthiti ontaphulela ohikhulumuwa. Mene muhikhulumuwe wàsa wakhuliwa wa makoho anyu.
5 Nyuwo mwailipihera waasa, munoophwanya wakhuliwa waya makoho anyu. Wakhuliwa waya ori mBiblyani. (Miruku 2:1-5) Waakhula wa Biblya khonivila wiiwexexa. Mene wakhuliwa wa makoho anyu, onimookhaviherani okhala oohakalala vaanano, ni okhalano yooweherera yooreera ya muhoolo. Nrowe nipatxerihe nnikoho atthu antxipale anipakaaya!
NEEREKE MULUKU ONNAAPHWATTHA ATTHU?
6. Mwaha wa heeni atthu akina anuupuwelaaya weera Muluku khanniphwattha?
6 Atthu antxipale anuupuwela weera Muluku khanaaphwattha atthu. Enaweeriha wuupuwela hiiho tiheeni? Mwaha woowera itthu sinaakhumelela ti soowuumiha owanoni, ntoko ikhotto, wiittana, ni ohaawa wulaanne elapo yootheene ya vathi. Nave atthu annivoreiwa ni okhwa. Anuupuwela weera Muluku aaniphwattha, elapo khiyarowa okhala mootene yoola. Nave annikoha tho, ‘Muluku ohimmalihera heeni ohaawa?’
7. (a) Eheeni anamahoolela a ittiini anihimaaya sakhumelela itthu soonanara? (b) Eheeni atthu anuupuwelaaya weera Muluku toonanara murima?
7 Saakhumelelaka itthu soonanara mulaponi, mapaadri, mapastore ni anamaholela akina a ittiini anahima weera, “soothene onpaka Muluku.” Nto malove awo, ennaweriha atthu wuupuwela weera Muluku toonanara murima. Mwaha woowera anikhala ntoko anihima weera Muluku tonnihasula. Mene itthu soonanara khasinkhuma wa Muluku. Vano ninsuwela hayi weera khahiyono Muluku tonkumihera soonanara? Ebuukhu ya Yakobe 1:13 ennaiwanyeiha weera Muluku khanerera nroromelo nahu ni itthu soonanara. Eyo eneera: “Mutthu ori othene onèreriwa, ahihime wi: “kòhèreriwa ni Muluku,” hoye, niwoko Muluku khanèreriwa ni sonanara, nave tho khanamwèrera mutthu nari mmosaru.” Ekhaikhai weera Muluku onnona itthu soonanara sineereya mahikwaano. Mene khahiyono owo tonipaka itthu iyo soonanara. (Mmusome Yobi 34:10-12) Nrowe niwexexe nnene!
8, 9. Ntoko mwaha wa mmiravo akhumme vaate vasittithawe, heeni vahirerelaya omukhupanya Muluku ni maxupo aniphwanya?
8 Nkahaya nimupuwele mmiravo onikhala ni asitithawe nave emukhalelaka nthiti omuxuttiha opaka soothanla sooreera. Vano mmiravo ole unnuwakaru, aapatxera ohiwiiwelela asitithawe ni amwareya vaate vale, aneetta ikwaha sawe apakaka itthu soolavilavi. Muhoolo mwawe mapatxera okhalano maxupo. Wannikhalavo exariya ohima weera atithawe mmiravo ole tamukumihenre maxupo ale? Hooye! (Luka 15:11-13) Ntakihero na mmiravo ola, ekhumelenle hiiho ni atthu. Mene atthu tathanlale ohimwiiwelela Muluku, nave mwaha wa yeeyo, sinnakhumelela itthu soonanara. Mene khavanireerela omukhupanya Muluku ni itthu sineereya, mwaha woowera khahiyono tonkumihera itthu soonanara.
9 Nto Muluku ahimalihaka itthu iya soonanara? Yookhala etthu enamweeriha ohimaliha vaanano vaava. Ebuukhu ela, enimookhaviherani wiiwexexa ele Biblya onahimaawe wa mwahene yoowo. Mene muroromeleke weera Muluku onnanisivela ni owo khahiyono tonkumihera maxupo ahu. Yehova Muluku yoowo aneera amalihe itthu sootheene sinnixupa. — Yesaya 33:2.
10. Ninsuwela hayi weera Muluku onoomaliha ohaawa onniphwanya?
10 Muluku onoomaliha maxupo anniphwanya. Mwaha woowera Biblya onahima weera Muluku tootteela. (Yesaya 6:3) Nto entaphulela weera, sootheene owo opankaawe ti sowaara ni sooreera. Mene vannireerela omuroromela yoowo paahi, ohiya waaroromela atthu. Ikwaha sintxipale atthu annipaka itthu soonanara. Naari anamalamulela yaawo anihimmwa okhala axariya elapo yootheene ya vathi, khiyaanono owera woomaliha maxupo aneereya mahikwaano. Muluku paahi oneera awere. Owo onoomaliha sooxupa sootheene wa mahiku ootheene. — Mmusome Nsalmu 37:9-11.
NEEREKE MULUKU ONNIMUTTELA MURIMA ATTHU YAHAAWAKA?
11. Neereke Muluku onnimutteela murima awoonaka atthu ehaawaka?
11 Muluku khonimusivela woona itthu soonanara sineereya elapo ela ya vathi. Naari owoonani nyuwo muhaawaka. Mwaha woowera Biblya onnahima weera Muluku “onnatthuna exariya”. (Nsalmu 37:28) Eyo enoonihera weera Muluku khansiveliwa ni itthu soonanara, koma sinamusivela sooreera. Nave Biblya oneera khalayi Muluku wamuripa murima, vaavo elapo yasarenyaya opakiwa itthu soonanara. (Ephattuwelo 6:5, 6) Muluku khatxentxiye. (Malakhiya 3:6) Owo onniitta ohaawa wa atthu ootheene. — Mmusome 1 Pedru 5:7.
Biblya onahima weera Yehova tooreera murima mpattuxa a elapo yootheene
12, 13. (a) Mwaha wa heeni onnivoreyaya murima namoona mukhwihu ahaawaka? (b) Mwaha wa heeni ontthuneyaya ororomela weera Muluku onoomaliha ohaawa?
12 Biblya onnahima mathowa anneeriha ororomela weera Muluku khansiveliwa awoonaka atthu ehaawaka. (Ephattuwelo 1:26) Neereke nyuwo onnosivelani omoona mukhwiinyu ahaawaka? Ekhaikhai weera hooye! Nto ovoreya murima onoophwanyani mwamoonaka mutthu ahaawaka, Muluku tho onnatepa onvoreya murima. Mwaha wooweera owo onipanke ailikanyihaka mwaneene.
13 Nave Biblya onahima weera, “Muluku ti osivela.” (1 Yohani 4:8) Nave hiyo nookhalano mukhalelo mmoharu wa Muluku. Naakhalanne owera woomaliha maxupo enaaphwanya asinkhwihu, nammaliha. Mene nroromeleke weera Muluku onoomaliha ohaawa ni ohixariya wa elapo ela, mwaha wooweera owo onnaasivela atthu. Vannirerela waaroromela anatiri ootheene yaale niwonnahu nipatxeraka ebuukhu ela, mwaha wooweera enoomaliheriwa. Weera naaroromele anatiri ala, ontthuneya omusuwela toko Muluku.
MULUKU ONTTHUNA WEERA MMUSUWELE
Weera mpake onthamwene ni mutthu mukina, mumpatxera tinyuwo ohima nsina nanyu. Nave mBiblyani Muluku ohima nsina nawe
14. Muluku nsinanawe taani? Heeni ontthuneyaya weera nivareleke muteko?
14 Mwaatthunaka okhala nthamwene a mutthu muhimusuwela anyu, etthu heeni munipakaanyu? Moohihovela nyuwo munnahima nsina nanyu, nave munakoha nsina na nthamwenaanyu owo. Neereke Muluku ookhalano nsina? Nto ittiini sintxipale sinaxuttiha weera nsina nawe, Muluku ni Apwiya. Vano masu ala khahiyono masina a Muluku, onlikana ni weera “amwene” naari “presidente.” Mene masu awo anihima etthu mutthu onivaraawe. Nto Muluku ontthuna weera musuwele nsina nawe ni nvareleke muteko. Biblya onnithaliha nsina na Muluku, Nsalmu 83:19 [83:18 NM] Nnahima weera: “Ni esuwele wi nsina nanyu ti Yahvéh, [Yehova] nyuwo mekhinyu mwà Namusulù velaponi vothene.” Emaara aalemphwawe Biblya noovareliwa muteko nsina na Muluku ikwaha soophwaha 7 mil. Mene owo oothaliha nsina nawe ohoolo wanyu, mwaha wooweera ontthuna weera mukhale nthamwenaawe.
15. Nsina na Muluku nintaphulela eheeni?
15 Nsina na Muluku Yehova, nookhalano yootaphulela etokweene. Nsina nno nintaphulela weera owo onimweeriha okhala etthu ontthunawe, eyo tiyo, onimwaakwanihera anatiri ootheene aapankaawe. Nave okhalanne oweera woowitthaneliwa nsina nno, Yehova paahi. Mwaha wooweera khaavo oniwera omuhiiha etthu olakenlaawe.a
16, 17. Entaphulela eheeni Biblya amwitthanaka Muluku okhala, (a) “Òwerya sothesene”? (b) “Mwene a maloko”? (c) “Mpattuxa”?
16 Ntoko enihimaya yoolepa ya Nsalmu 83:19 nisommahu, yeeyo eneera: “Nyuwo mekhinyu mwà Namusulù velaponi vothene.” Ni Apokalise 15:3 Biblya onnamwitthana Muluku okhala nanwera sootheene: “Sitokotoko ni sotikiniha siri sopanka sá, Pwiya [Yehova] Muluku òwerya sothesene. Soloka ni sekhaikhai siri iphiro sá, mwene a maloko”. Entaphulela eheeni masu owi “Òwerya sothesene”? Masu awo antaphulela weera Yehova tokhalanne òwerya ohinipwahiwa wa atthu ootheene a mulaponi. Nankha “Mwene a maloko”? Eyo entaphulela weera Yehova ookhala okhuma khalai. Nave Nsalmu 90:2 nnahima weera, ovinya khalai nyuwo mwà Muluku mpaka ehuhu yothene!
17 Yookhala tho ekina, Yehova mpattuxa. Apokalise 4:11 onahima weera: “Weyo, Pwiya ni Muluku ahu, onaphwanela wakhela ovuwa ni nttittimiho ni owerya niwoko wòpattuxa sothesene ni nthowa na osivela wá sòkhala ni sòpattuxiwa.” Nkuupuwelani malaika, ittheneri, ihopa sa mpareya, miri, sootheene munoonaanyu mulaponi sipakiwe ni Yehova!
NEEREKE MUNOOWERA OKHALA NTHAMWEENE A YEHOVA?
18. Heeni atthu akina anuupuwelaya weera Muluku khanipakiwa onthamwene? Vano Biblya onahima eheeni?
18 Atthu akina annoova yaiwaka ethalihiwaka makhalelo otikiniha a Yehova. Mene atthu akina anahima weera Muluku khanipakiwa ontthamwene. Muluku nanwera sootheene ni totthuneya vantxipale. Atthu akina anuupuwela weera Muluku ori ottai ni hiyo. Neereke ekhaikhaiyo? Hooye, mwaha wooweera Yehova ontthuna weera hiyo nikhale nthamwene awe. Biblya onahima weera Muluku hakhanle “ottaiwene ni mutthu ti mutthu a hiyo.” (Miteko 17:27) Muluku ontthuna weera mmwattamele nave “yowo anawàttameleni nyuwo.” — Yakobe 4:8.
19. (a) Munrowa opaka eheeni weera mukhale nthamwene a Muluku? (b) Mikhalelo heeni sa Yehova sinoosivelani?
19 Ontthuneya opaka eheeni weera mukhale ntthamwene a Muluku? Weera mukhale ntthamwene a Muluku ontthuneya omusuwela Muluku ni Yesu. Nto Yesu mwaneene aahime weera: “Ela ti ekumi yohimala wi yale yòsuwenle weyo Muluku mmosá a ekhaikhai ni ole omurumma awe, Yesu Kristu.” (Yohani 17:3) Nto mwiilipihere oxuttera sa Muluku. Mwa ntakihero, nohoona weera “Muluku ti osivela.” (1 Yohani 4:16) Ettiitthu weera owo okhalano mikhalelo sootepa ovara murima. Biblya onahima weera Yehova “òpixa murima ni òsapwaneya, òtxerewa osarasareya, ni òsarya mahala ni ororomeleya”. (Ottimula 34:6) Nave Yehova toorera murima ni “òlevelela.” (Nsalmu 86:5) Nto Muluku onnaapixera murima atthu ootheene. (2 Pedru 3:9; Apokalise 15:4) Mwiilipiheraka omusoma Biblya, munoorowa oxuttera makhalelo makina a Yehova.
20-22. (a) Munaawere hayi omusuwela Muluku? (b) Eheeni muhinttuneyanyu wakhulela?
20 Munaawere hayi omwaattamela Muluku muhimoonaka? (Yohani 1:18; 4:24; 1 Timotheyo 1:17) Omusoma Biblya onimokhaviherani omusuwela nnene Yehova ni munrowa omoonaka okhala vakhiviru vanyu. (Nsalmu 27:4; Aroma 1:20) Mwamusuwela nnene sene Yehova, onimookhaviherani omwattamela ni omusivela.
Nsivelo okhalannaawe Tiithi a wirimu ninnapwaha nsivelo na tiithi ori nimwanawe
21 Nave munrowa osuwela weera Yehova Tiithi ahu. (Matheyo 6:9) Ohiya mwaha wooweera onivaha ekumi, mene mwaha wooweera owo ontthuna weera hiyo nihakalaleke. Tiyeyo tho tiithi vatthokoni ontthunawe wa anamwane awe. (Nsalmu 36:10 [36:9 NM]) Biblya onahima weera nyuwo munoowera okhala nthamwene a Yehova. (Yakobe 2:23) Nkupuwelani, Tiithi ni mpattuxa a elapo yootheene ontthuna weera mukhale nthamwene awe!
22 Aakhanleene mmusi anyu naari nthamwenaanyu onookhottiherani omusoma Biblya, naari onohiihani orowa omithukumanoni txonde muhakhulele opaka eyo. Mwaha wooweera nthamwene mukhanlanyu omuroromela Yehova.
23, 24. (a) Mwaha wa heeni ontthuneyaya opaka makoho? (b) Eheeni ninrowahu oxuttera muru onttharelana?
23 Emaara munimusoma anyu Biblya, pooti weera woopatxerani khamunrowa omwiiwexexa. Namwi vari hiiho, nyuwo muhuuleliweke muru okoha. Yesu ahimme weera niiyeviheke ntoko anamwane. (Matheyo 18:2-4) Yaamweerihe walikanxera anamwane, eri yooweera anamwane ennapaka makoho mantxipale. Nave nyuwo tho ontthuneya opaka makoho weera musuwele nnene ele munsomaanyu. Mene Muluku ontthuna weera mphwanye waakhuliwa wa makoho anyu. Mmwiiweleleke Biblya weera muroromeleke ele munixutteraanyu. — Mmusome Miteko 17:11.
24 Mukhalelo onnera wookhavihereni omusuwela Yehova, ori omusoma Biblya. Muru onttharelana, ninrowa osuwela mwaha wa heeni Biblya ovirikannaawe ni abuukhu akina.