Biblya onxuttiha eheeni uulumaka sa obatizo?

1. Nikoho eheeni atthu akina asomme ebuukhu ela anipakaaya?

NYUWO mooxuttera ikhaikhai sa mBiblyani nivarelaka muteko ebuukhu ela. Mwa ntakihero, nyuwo mooxuttera weera Muluku olaihera weera onotatuxa elapo ela okhala eparadiso. Nave moosuwela ekhaikhai voohima sa alipa ookhwa ni yooweherera ya ovinyererihiwa wa alipa ookhwa. (Koheleti 9:5; Luka 23:43; Yohani 5:28, 29; Apokalise 21:3, 4) Apaale mootoko woonela mithukumano sahu, ni moohona weera Anamoona a Yehova tanipaka itthu sinamusivela Muluku. (Yohani 13:35) Wakhala weera munniwera omukhuveela Yehova, ni moothanla onvarela muteko, nyuwo pooti wiikoha: Yookhala etthu ekina yoopaka weera kinvareleke muteko Muluku?

2. Mwaha wa heeni mulopwana ole ahalaka omukoha Filipe wawereyaka obatiziwa?

² Ookhala mulopwana mmoha oniromoliwa mBiblyani yoowo aakonhe weera, kipakeke eheeni weera kinvareleke muteko Muluku? Eyo yakhumelenle Yesu avinyerenreene. Emaara oohusera mmoha a Yesu oneeriwa Filipe, uulummaawe weera Yesu ari Mesia, okhala mulopwana yaamusivela vantxipale masu Filipe alokolonlaawe, ni aamukoha wakhala weera annaphwanela obatiziwa. — Miteko 8:26-36

3. (a) Yesu aalenle eheeni oohuserawe? (b) OBatizo wa makristau okhaleke ntoko tuuvi?

³ Biblya onnahima nneene weera naatthunaka okhala murumeyi awe Yehova ontthuneya obatiziwa. Yesu ahalela ooxutterawe weera: “mwàkhalihe amalapo othene òhuser’aka, mwàbatizaka yawo.” (Matheyo 28:19) Yesu aahonihera moota woopaka eyo, mwaha wooweera owo nave aabatiziwa. OBatizo wa makristau eekhaikhai ontthuneya weera okhaleke ntoko wa Yesu. Owo khabatizinwe ni mahi vakhaaneene ooweera oheleliwa mmuru. Mene owo aahineela mmahini anaana erutthu yootheene. — Matheyo 3:16

4. Mwaarowaka oBatiziwa, munrowa woonihera eheeni?

⁴ Mwaarowaka oBatiziwa, musuwele weera muntthuna owoonihera atthu akina weera muntthuna okhala nthamwene a Muluku. Nave muntthuna opaka yootthuna awe ekumaanyu yoottheene. (Nsalmu 40:8, 9 [40:7, 8 NM]) Nyuwo pooti wiikoha: ‘Kintthuneya opaka eheeni weera kibatiziwe?’ Nto moone itthu 6 sootthuneya weera mphwanelele oBatiziwa.

MMUSOMEKE BIBLYA NI MUKHALEKE OWIIWELELA

5. (a) Etthu heeni yoopatxera muntthunaanyu osuwela muhinaaye obatiziwa? (b) Mwaha wa heeni ohintthuneyaaya otxompa omithukumanoni?

⁵ Etthu yoopatxera, ontthuneya weera mmusuwele Yehova ni Yesu, muhinakuve obatiziwa. Nave nyuwo moopatxera opaka eyo mmusomaka Biblya. (Mmusome Yohani 17:3.) Nto osomaru khomphiyera etthu, mwaha wooweera Biblya onahima weera otthuneya ‘osuwela eekhaikhai’ ya Yehova. (Akolosi 1:9) Mithukumano sa Anamoona a Yehova sinimookhaviherani waatxerera osuwela iwo ni otepa omwattamela Muluku. Tiyeyo mithukumano iyo siraaya sootepa otthuneya, ni ohinreerelaaya otxompela. — Aheberi 10:24, 25.

6. Ti heeni entthuneya osuwela muhinaakuve oBatiziwa?

⁶ Ekhaikhai weera Yehova khanrowa woowehererani osuwela itthu sootheene weera mBatiziwe. Ntoko mulopwana alaleeriwe ni Filipe, owo khaaweherenre osuwela itthu sootheene weera aBatiziwe. (Miteko 8:30, 31) Ekhaikhai ti yoowera nnorowa ovirelela oxuttera ikhaikhai sa Muluku wa mahiku ootheene. (Koheleti 3:11) Mene weera mphwanelele oBatiziwa, ontthuneya weera musuwele malamulo matokweene a mBiblyani, ni mukhaleke moovarihana ni malamulo awo. — Aheberi 5:12.

7. Etthu heeni yanaaveeli muntthuneyaanyu okhalano muhinakuve oBatiziwa?

⁷ Biblya onahima weera “ohikhanle wiwelela, konawereya omusiveliha Muluku”. (Aheberi 11:6) Etthu yanaaveli entthuneya muhinakuve oBatiziwa tiila, ontthuneya okhalano wiiwelela. Ehuhu ya arummwa, oohusera a Yesu yaarowa ocidade ya oKorinto weera yaxuttihe. Neereke mukwahaya waaharerela? Aani, mwaha wooweera “Akorinto antxipale yìwalaya nsu, yàhìwelela, enabatiziwa”. (Miteko 18:8) Nave tho nyuwo, munoolikana naawo. Mwaha wooweera mmusomakaru Biblya, munnaroromela masu a Muluku ni anatiri awe, vamoha ni mukuttho wa Yesu yowo onrowa onoopola wa yoottheka ni okhwa. — Yehoxuwa 23:14; Miteko 4:12; 2 Timotheyo 3:16, 17.

MWAALELEKE ATTHU AKINA ELE MUXUTTENRAANYU MBIBLYANI

8. Ti heeni enrowa wokhaviherani waalaleera akina itthu muxuttenraanyu?

⁸ Nyuwo mwaamusomaka Biblya, munnoona moota onookhaviheraweni mookumini mwanyu, wiiwelela wanyu onoolipa. Wiiwelela wanyu onimokhaviherani ophwanya etthu yanararu ori waalaleera atthu akina itthu munxutteraanyu. (Yeremiya 20:9; 2 Akorinto 4:13) Vano taani munrowaanyu waalaleera?

9, 10. (a) Taani muneeraanyu mwaapatxerihe waalalera sa mBiblyani? (b) Eheeni muneeranyu mpake muhinaaye olaleera ni Muloko?

⁹ Nyuwo pooti opatxera waalaleera itthu sa mBiblyani amusi anyu, asinthamwene anyu naari atthu munvaranyuno muteko. Eyo ti yootepa oreera, maxi muhittiwale waalaleera moopixa murima ni nsivelo. Moona weera mookwanela olaleera ni muloko, mmukoheke ole onooxuttihani Biblya wawereyaka olaleera. Ni owo oona weera munowera, nyuwo munoovanela ni asitokweene eeli a muloko anyu. Weera nyuwo mulaleyeke ni muloko, khontthuneya opaka itthu Biblya onhimaawe weera ti soonanara.

¹⁰ Etthu heeni asitokweene anrowaaya ovaanela ni nyuwo? Awo animookohani wakhala weera nyuwo munnaiweexexa itthu vakhaani sa mBiblyani ni mwaaroromelaka seiyo. Animokohani tho, mwaattharihaka mahiku ootheene ele Biblya onaxuttihaawe, ni mwaatthunaka okhala Namoona a Yehova. Maxi nyuwo hontthuneya owoova asitokweene. Awo annaakhavihera ootheene ammulokoni ni nsivelo. (Miteko 20:28; 1 Pedru 5:2, 3) Mwavanelaru ni asitokweene awo, animoolelani weera mpatxereke olaleera ni muloko.

11 Heeni oraya wootthuneya otxentxa makhalelo ahu nihinaaye olaleera ni Muloko?

¹¹ Asitokweene pooti wooleelani weera muntthuneya otxetxa makhalelo a okumi anyu, muhinaye olaleera ni muloko. Heeni oraaya wootthuneya otxentxa makhalelo a okumi anyu? Mwaha weera, naalaleeraka ninnoonihera weera na Anamoona a Yehova. Nto makhalelo a okumi ahu animoonihera weera ninnamuttittimiha Yehova. — 1 Akorinto 6:9, 10; Agalata 5:19-21.

MUTXENTXEKE MAKHALELO A EKUMI ANYU WAATTHUNEYAKA

12. Mwaha wa heeni atthu ootheene antthuneyaaya ottharuwa soottheka?

¹² Etthu yanaxexe muneeranyu mpake muhinaaye obatiziwa, ori ottharuwa soottheka sanyu. Murummwa pedru eenre: “Vanonto ttharuwani ni rukunuxani murima, wera sottheka sanyu sileveleliwe”. (Miteko 3:19) Ottharuwa soottheka ontaphulelani heeni? Ontaphulela ohiya opaka itthu soonanara. Mwa ntakihero, wakhala weera mutthu aapaka itthu soohirera, ontthuneya ottharuwa. Ankha wakhala weera mwanniilipihera opaka sooreera? Naamwi vareene hiiho ontthuneya otthaaruwa soottheka sanyu. Mwaha wooweera atthu ootheene ninnattheka, nave ontthuneya oleveleliwa ni Yehova. — Aroma 3:23; 5:12.

13. Entaphulela eheeni orukunuxa murima?

¹³ Neereke onnatthuneya opaka etthu ekina ohiya paahiru ottharuwa soottheka? Aani, ontthuneya opaka etthu yanaathanu. Murummwa Pedru enre, rukunuxani murima. Eyo entaphulela ohiya opaka itthu soonanara, munapatxera opaka itthu sooreera. Weera niiwexexe nnene, nkupuwelani waakhanle weera muneetta mutuphini moona weera moothweelela, khamwaatthikela ottuli weera mwaphwanye mphiro? Vamoharu, eneereya ni hiyo, emaara nimmusomaahu Biblya, pooti woonelela weera onnatthuneya otxentxa itthu mweekumini mwahu. Ontthuneya wiilipihera orukunuxa murima, eyo tiiyo otxentxa makhalelo ahu weera nipatxereke weettela itthu sooreera.

NVAHERERE EKUMI ANYU WA YEHOVA

14. Mutthu oniivaherera hayi wa Yehova?

¹⁴ Etthu ya nathanu namoha muntthunaanyu opaka muhinakuve oBatiziwa, ori ovaherera okumi anyu wa Yehova. Nto munaapake hayi? Nyuwo muntthuneya onvekela Yehova, nave omulaihera weera munaamukokhoreleke yooworu pahi. Munivekeloni mwanyu, nyuwo munomulela Yehova weera opaka yootthunaawe, enrowa okhala etthu yoopatxera mweekumini mwanyu. — Olaleya 6:15.

15, 16. Eheeni enrowa owerihani wivaherera wa Yehova?

¹⁵ Omulaiheera onvareela muteko Yehova ori ntoko olaiheera okhala ni mutthu oosivenleni okumi anyu wootthene. Nwuupuweele atthu eeli ettomeranne. Noovira ehuhu mmiravo onnamusivela vantxipale mwali yoole omuttomenraawe nave annatthuna omuthela. Nto eyo yoothanla etokotoko namwi vareene hiiho, oothanla okhalano muritti, mwaha wooweera oosiveliwa ni mwali owo omuttomenraawe.

¹⁶ Vamoharu numala omusuwela Yehova, nyuwo pooti opatxera omusivela ni onvarela muteko. Mwaha wa nsivelo nno, nnoowerihani ovaherera ekumi anyu wa yoowo. Weera mutthu anvareleke muteko Yehova ntoko Yesu, ontthuneya opaka yeele Biblya onahimaawe eeraka ‘wìkhotte . . . ni okitthareke’. (Marko 8:34) Masu awo antaphulela eheeni? Eyo entaphulela weera opaka yootthuna ya Yehova ekhaleke etthu yootepa otthuneya opwaha sowinlela sanyu. Etthu yoopatxera mwekumini mwanyu, okhaleke omwiiwelela Yehova. — Mmusome 1 Pedru 4:2.

KHONTTHUNEYA WOOVA

17. Ti heeni enaweeriha atthu ohiivaherera wa Yehova?

¹⁷ Atthu akina khaniivaheerera wa Yehova mwaha wooweera anoova ohikwanihera onvarela muteko Yehova. Awo khantthuna omunyonyiha Yehova, naari anoona weera Yehova khanrowa waakoha mwaha woohiivaherera.

18. Ti heeni enrowa wookhaviherani ohoova omunyonyiha Yehova?

¹⁸ Omusivela wanyu Yehova, onimokhaviherani ohoova omunyonyiha. Nyuwo munimwiilipihera opaka etthu mmulaihenraanyu mwaha wooweera nyuwo munnamusivela. (Koheleti 5:4; Akolosi 1:10) Opaka yootthuna ya Muluku khenrowa wooxupani. Murummwa Yohani olempe weera: “Khweli osivela wa Muluku ti wù: wera nikhapelale malamulo awe, ni malamulo awe khanalemela.” — 1 Yohani 5:3.

19. Mwaha wa heeni ohintthuneyaaya woova wiivaherera wa Yehova?

¹⁹ Weera nveleele okumaanyu wa Yehova, nyuwo khontthuneya oweherera okhala oomalela. Mwaha wooweera Yehova khannivekela etthu nihinweraahu opaka. (Nsalmu 103:14) Yehova onimookhaviherani weera mpakeke itthu soomusivela, eyo tiiyo sooreera. (Yesaya 41:10) Etthu yootthuneya ori omuroromela Yehova, owo onimookhaviherani opaka soothanla sooreera. — Miruku 3:5, 6

MUNOONIHERE HAYI WIIVELEELA WANYU WA YEHOVA?

20. Etthu heeni entthuneya opaka mutthu aveleela ekumi awe wa Yehova?

²⁰ Neereke nyuwo moolikana weera nveleele ekumi anyu wa Yehova? Mutthu aveleela ekumi awe wa Yehova, onnatthuneya opaka etthu. Etthu heeni? Onnatthuneya weera mutthu aBatiziwe.

21, 22. Moota heeni muneeranyu moonihere nroromelo nanyu ohoolo waatthu?

²¹ Mwaivelenleene wa Yehova munatthuna oBatiziwa, muulume ni muhooleli asitokweene a muloko anyu, owo onimwaaleela asitokweene akina amuloko anyu weera ewupuxereni sooxuttiha vakhani sa mBiblyani. Awosa yoona weera mookwanela oBatiziwa, nto munobatiziwa kongresu, eyo tiiyo muthukumano mutokweene onaattamela naari muthukumano wa Assembleiya wa Anamoona a Yehova. Nihiku muneeraanyu mBatiziwe, munna mmooha onoopaka mwaha onahima etthu entaphulelaya oBatizo. Mmwahani mmo, owo onimwaakoha makoho meeli ale anrowa oBatiziwa. Ale anrowa oBatiziwa emaara anrowaaya waakhula makoho awo, anrowa opakaka ele Biblya onahimaawe weera ‘woonihera nroromelo ohoolo wa atthu’. — Aroma 10:10.

²² Wamala mwaha owo munrowa oBatiziwa. Ontthuneya oneelihiwa erutthu anyu yootheene mmaahini. OBatizo onrowa owooniheera atthu ootheene weera mohivelela wa Yehova, ni okhuma emaara eyo mwa Namoona a Yehova.

ETTHU OBATIZO ONTAPHULELAAYA

23. Entaphulela eheeni oBatiziwa “mwa nsina na Atithi, na Mwana, ni na Munepa wottela”?

²³ Yesu aahimme weera oohuseraawe yaarowa oBatiziwaka mwa “nsina na Atithi ni na Mwana ni na Munepa Wottela”. (Mmusome Matheyo 28:19.) Eyo entaphulela eheeni? Masu oweera mwa nsina na Atiithi entaphulela ororomela weera Yehova Muluku oowera sootheene. Mwa nsina na Mwana entaphulela wiiweexexa otthuneya wawe Yesu ohoolo wa Muluku. Ni mwa nsina na Munepa wootteela entaphulela wiwexexa weera Yehova onvarela muteko munepa awe wootteela weera opake yootthunaawe. — Nsalmu 83:19 [83:18 NM]; Matheyo 28:18; Agalata 5:22, 23; 2 Pedru 1:21.

24, 25. (a) OBatizo ontaphulela eheeni? (b) Eheeni ninrowaahu woona muru woomalihera wa ebuukhu ene yeela?

²⁴ Etthu ontaphulelaaya oBatizo ti yootthuneya. Erutthu anyu yanelihiwa mmaahini, onlikana ni ohiya omutthu wa khalai. Mwaakhumaka mmahini, onlikana ni opatxera omutthu onyowani, oolikaneene weera mpakeke yootthuna ya Muluku. OBatizo, onnawoonihera atthu akina weera muntthuna onvarelaka muteko Yehova okhuma emaara ele mbatiziwaanyu mpaka muhoolo. Onnareera wuupuwela weera, emaara mumbatiziwaanyu, munveleela ekumi anyu wa Yehova, ohiya wa mutthu naari wa mareherero a mulaponi.

²⁵ Wiiveleela wanyu ni oBatiziwa, onimookhaviherani olipiha onthamwene anyu ni Yehova. (Nsalmu 25:14) OBatiziwa khaiyono toovuluwa wene. Murummwa Paulo aathaliha weera, makristau antthuneya wiilipihera omusiveliha Muluku weera ephwanye ovuluxiwa. (Afilipi 2:12) Vano nyuwo ontthuneya olipiha onthamwene anyu ni Yehova, mwaha wooweera oBatiziwa opatxera wa itthu. Moota heeni? Nnoorowa woona muru woomalihera wa ebuukhu ene yeela.