YOOSOMA 47
Nyuwo muhiireherera weera mBatiziwe?
Nyuwo mooxuttera itthu sintxipale sa mBiblyani moorweela mwa yoosomaanyu ya Biblya. Ekhaikhai weera nyuwo moopaka matxentxo mweekumini mwanyu weera nvarele muteko etthu muxuttenraanyu. Mene pooti weera yookhala etthu enwootxeelihani wiivaherera wa Yehova ni obatiziwa. Mwa yoosomeene yeela, nnoorowa woona itthu ikina seera iwootxeeliheni obatiziwa, ni moota muneeraanyu nwine itthu iyo.
1. Neereke nyuwo muntthuneya osuwela sootheene sa mBiblyani weera mbatiziwe?
Weera nyuwo mbatiziwe muntthuneya “osuwela ekhaikhai.” (1 Timotheyo 2:4) Eyo khentaphulela weera, weera nyuwo mbatiziwe muntthuneya osuwela waakhula makoho ootheene empakiwa voohima sa Biblya. Nnamweera atthu abatiziwe khalayi, annavirelela oxuttera voohima sa Yehova. (Akolosi 1:9, 10) Mene-tho nyuwo muntthuneya osuwela mathipelo a masu a Muluku. Asitokweene a mmulokoni animookhaviherani woonelela wakhala weera mooxuttera etthu weera mbatiziwe.
2. Itthu heeni ikina nyuwo muntthuneyaanyu opaka muhinaaye obatiziwa?
Muhinaaye obatiziwa, nyuwo muntthuneya ‘ottharuwa ni opaka yoothanla.’ (Musome Miteko 3:19.) Eyo entaphulela weera, nyuwo muntthuneya ottharuwa ni murima wootheene, mwa itthu sootheene mpankaanyu khalayi ni ovekela nlevelelo wa Yehova. Nave-tho, entaphulela weera muntthueneya okhalaka moovarihana ni yootthunaawe, ni ohipaka itthu sootheene Yehova onhimaawe weera ti soonanara. Etthu ekina muntthuneyaanyu opaka ori woonela mithukumano ni olaleya vamoha ni muloko.
3. Mwaha wa heeni nyuwo muhintthuneyaanyu woova obatiziwa?
Atthu akina annoova ohiwera okwanihera ele amulainheraaya Yehova. Ekhaikhai weera emaara ekina hiyo ninnattheka. Mwaha wooweera, mpaka alopwana ni athiyana ahimmwale mBiblyani yaattheka. Mene muupuwele weera Yehova khanweherera weera arumeyi awe ekhale oomalela. (Musome Nsalmu 103:13, 14.) Owo onimookhaviherani wakhala weera munoopaka ele munweraanyu! Ni owo onimoohakalalihani. Mweekhaikhai, Yehova onnalaihera weera khiyavo “enera enimwalanihe ni onitthunawawe.”—Mmusome Aroma 8:38, 39.
WEERA MUXUTTERE SINTXIPALE
Omusuwela nnene Yehova ni waakhulela nikhavihero nawe onimookhaviherani owina maxupo oowoova oBatiziwa.
4. Mmusuwele nnene Yehova
Mpaka vaavi muneeraanyu mmusuwele Yehova muhinaaye oBatiziwa? Nyuwo muntthuneya omusuwela mpaka omusivela ni otthuna omuhakalaliha. Moone EVIIDIYU weera moone eheeni anamasoma a Biblya a elapo yootheene apankaaya weera emusuwele nnene Yehova. Avinyaka mutthekule ni ipontu sinttharelana.
Nviidiyuni, eheeni yaakhavihenre atthu akina wiireherera weera ebatisiwe?
Mmusome Aroma 12:2. Avinyaka mutthekule ni ipontu sinttharelana:
Nyuwo munnahovela woohima sa ele Biblya onxuttihaawe? Nyuwo munnahovela weera Anamoona a Yehova anxuttiha ekhaikhai?
Wakhala weera nyuwo munniihovela, munaapake eheeni?
5. Nwine maxupo ootheene weera mBatiziwe
Ootheene hiyo ninnaviriha maxupo vaavo ninthanlaahu wiivaherera wa Yehova ni oBatiziwa. Weera moone ntakihero, moone EVIIDIYU. Avinyaka mutthekule ni ipontu sinttharelana.
Nviidiyuni maxupo heeni Narangerel aatthuneyaawe owina weera anvarele muteko Yehova?
Moota heeni nsivelo Narangerel aakhanlaaweno ni Yehova naamukhaviheraaya owina maxupo awe?
Musome Miruku 29:25 ni 2 Timotheyo 1:7. Avinyaka mutthekule ni epontu enttharelana:
Eheeni ennilipiha weera niwine maxupo?
6. Muroromeleke nikhavihero na Yehova
Yehova onimookhaviherani omusiveliha. Moone EVIIDIYU. Avinyaka mutthekule ni ipontu sinttharelana.
Nviidiyuni, eheeni yaamootxeeliha namasoma a Biblya oBatiziwa?
Eheeni elipinhe nroromelo nanyu wa Yehova?
Mmusome Yesaya 41:10, 13. Avinyaka mutthekule ni epontu enttharelana:
Nyuwo mwiivaherera wa Yehova, moota heeni muneeraanyu muroromeleke weera Yehova onowera okwanihera soolaihera opankaawe?
7. Maatxeerere omuxukurela wanyu Yehova mmusivelaka
Wuupuwela moota Yehova onoosivelaaweni, onimookhaviherani omuxukurela ni otthuna onvarela muteko mahuku ootheene. Musome Nsalmu 40:6 [40:5, Traduçao do Novo Mundo]. Avinyaka mutthekule ni ipontu sinttharelana:
Mareeliho heeni a Yehova eri oothanleya wa nyuwo?
Mprofeti Yeremiya annamusivela Yehova ni masu awe, owo annahela mwiitti eparakha yoonvarela muteko Yehova. Yeremiya enre: “masu á yàri ohakalala ni otthapa wa murim’aka, wona wi kinnatexa nsina ná, Yahvéh Muluku ànakhotto.” (Yeremiya 15:16) Mwaakhule makoho anttharelana:
Mwaha wa heeni okhala Namoona a Yehova eraaya eparakha yoothanleya?
Nyuwo muntthuna opatisiwa ni okhala Namoona a Yehova?
Yookhala etthu enookhoottiherani opaka eyo?
Moonelo anyu, eheeni muntthuneyaanyu opaka weera mBatiziwe?
ATTHU AKINA ANEERA: “Miyo kinnoova obatisiwa ni avinyaka opaka yoottheka.”
Neereke-tho nyuwo munoonela hiiho?
NYAHA SOOTTHUNEYA
Ni nikhavihero na Yehova, nyuwo munoowera owina maxupo ootheene weera mBatiziwe.
Wuuluula
Neereke nyuwo munnatthuneya osuwela sootheene weera mbatiziwe?
Matxentxo heeni nyuwo muntthuneyaanyu opaka muhinaaye obatiziwa?
Mwaha wa heeni nyuwo muhintthuneyaanyu ohiya woova owootxeelihakani obatiziwa?
WEERA MUSUWELE ITTHU SINTXIPALE
Moone etthu eneera eweriheni opaka yoothanla weera mbatiziwe.
“Niireke Muhiilokiherya Wira Mpatisiwe?” (A Sentinela, a Março a 2020)
Moone moota woowina maxupo yeera ewootxeeliheni obatiziwa.
“Exeeni Enkikhoottiherya OBatiziwa?” (A Sentinela, a Março a 2019)
Moone moota mulopwana mmoha aawinnaawe maxupo matokweene weera abatiziwe.
Woopatxerani mulopwana oneeriwa Ataa annahovela obatiziwa. Moone etthu yaamuttutthe murima weera apake yoothanla yootthuneya.