Nikula na Nowa

Noovira etempu, elapo yaasareya atthu oonanara murima. Mpaka malaika makina yaakhala oonanara murima. Awo yaakhuma wiirimu, ekhuruwelaka elapo ela ya vathi ni yaahiitatuxa okhala atthu. Moosuwela mwaha wa heeni awo yaapankaaya eyo? Mwaha wooweera awo yaatthuna waathela athiyana a elapo ela.

Malaika ale oonanara yaahaayara anamwane ni asithiyana. Anamwane aya yaahinnuwa ni yaari a ikuru vantxipale. Awo yannaamana ni yannaahasula atthu. Mene Yehova aatthuna omaliha eyo. Nto aalakela waanyanya atthu ale oonanara murima ni epula ya mirupi. Moosuwela epula ya mirupi ti heeni? Yaari epula yeeyo yoowaatta yaasarinhe maahi elapo yootheene.

Mene aakhala mulopwana mmoha yoowo aamusivela Yehova. Nsina nawe iitthaniwa Nowa. Nowa aathela ni aahaayara anamwane araru, yaawo yiitthaniwa, Semi, Khami, ni Yafeti. Mwaana ori poothe aakhalano amwaarawe. Yehova aatthuna onvuluxa Nowa ni emusi awe mwa epula ele ya mirupi. Mwa yeeyo, Yehova aamweerela Nowa weera apake nikula. Nikula nno naari ntokotoko naapakiwe ni ithaapwa nenno neetta vasulu va maahi. Yehova tho aamweerela weera aahelemo asinama antxipale mu nikula nne weera ehikhwe mwa epula ya mirupi.

Nowa ni emusi awe yaapatxera opaka nikula nne. Awosa yaahipaka nikula nne moota Yehova aalenlaawe. Nto saavira iyaakha 50 weera nikula nne nikhale noolikaneene. Emaara Nowa aapakaawe nikula, annaaleela tho atthu voohima sa epula ya mirupi. Mene khaavo aatthuna omwiiwa owo.

Nto, yaahiphiya ewoora yoovolowa munikulani. Nrowe noone etthu yeereñye moottharelana.