Atthu 8 yaavolonwe elapo enyowani

Nowa, amusi awe ni asinama yaavolowa munikulani. Avinyaka Yehova aawala mulako ni yaapatxera orupa epula. Yaarupa epula yintxipale mpaka maahi osareya elapo yootheene, menento nikula naateexeya ni maahi. Atthu ootheene oonanara murima yahaavolonwe munikulani yaakhwa. Menento Nowa ni emusi awe yaari ookosoopeya munikulani. Munnawera wuupuwelela moota awo yiisoonenlaaya?

Yaarupa epula mahiku 40 othana ni ohiyu, avinyaka yaamaaxa. Vakhaani-vakhaani maahi yannavukuwa. Nave nikula naahemela vasulu va mwaako. Elapo yeera esareñyeene maahi. Mwa yeeyo, Nowa ni emusi awe khayaakhumme munikulani.

Vakhaani-vakhaani, maahi yaahuuma. Nowa ni emusi awe yeera ereene munikulani mwa iyaakha vakhaaniini. Mene Yehova aaweerela weera awo ekhume munikulani. Waakhala ntoko awo yaavolowa elapo enyowani! Itthu sootheene soonanara ni owali, saamala. Nowa ni emusi awe yaahakalala vantxipale mwaha woovuluxiwa ni Yehova. Mwa yeeyo, awo yanvaha mukuttho.

Yehova aahakalala vantxipale ni yoovaha eyo. Owo aalaihera-tho weera khaarowa ovarihela muteko epula ya mirupi weera atoloxe itthu sootheene sa mulaponi. Yehova aaheeriha okhumelela muura weera Nowa ni emusi awe ehittiwale yoolaihera ele. Nyuwo mootoko woona muura? Ikwaha sootheene munoonaanyu muura, muupuweleleke yoolaihera ya Yehova.

Noomala opaka yoolaihera ele, Yehova aamuleela Nowa ni emusi awe weera mukhalekeno anamwane ni musareye mulaponi mootheene.