Mwaana Yehova aamulaihenraawe

Abrahamu ni Sara yaathelanne mwa iyaakha sintxipale. Awo yaahiya impa saya sooreera enarowa okhala mutentani. Mene Sara khaiikhupanyera, mwaha wooweera annamuroromela Yehova.

Sara annamuhaawela vantxipale mwaana, ni aamweerela Abrahamu: ‘Namuteko aka Hagari amuyara mwaninyu, owo anaakhale-tho mwanaka.’ Evirakaru etempu, Hagari aamuyarela mwaana Abrahamu. Yoowo iitthaniwa Ismayeli.

Sivinreene iyaakha sintxipale, Abrahamu areeneno iyaakha 99, ni Sara areeneno iyaakha 89, awo yaawaakhelela aletto, alopwana araru. Abrahamu aahaawopa weera ekilaathi vathi va mwiri ni etxe vakhaaniini. Moosuwela alopwana ale yaari taani? Awo yaari malaika! Mmoha a alopwana ale, aamweerela Abrahamu: ‘Yavira eyaakha emoha, weyo ni amwaaraa, munookhalano mwaana.’ Sara eera areene mutentani ni anniiwa eyo. Aapatxera otheya, ni aahuupuwela: ‘Miyo kohuuluvala, moota heeni kineeraaka kikhaleno mwaana?’

Mene evinreene eyaakha emoha, ntoko hiihaale nlaika na Yehova naahimmaaya, Sara aakhalano mwaana. Abrahamu anvaha nsina na Isakhi, nenno nintaphulela “Otheya.”

Emaara Isakhi aaraaweno iyaakha 5, Sara aamoona Ismayeli amuhasulaka. Okhala weera Sara aatthuna omukosoopa mwanawe, aarowa onvekela Abrahamu weera amoomole Hagari ni Ismayeli. Woopatxerani, Abrahamu khaatthuna opaka eyo. Mene Yehova aamweerela ha Abrahamu: ‘Opake etthu Sara onoovekelaawe. Miyo kinoorowa omukosoopa Ismayeli. Mene soolaihera miyo koopakenlaaka, sinoorowa okwanela ni Isakhi.’