Abrahamu ni Sara yaamwiiwelela Yehova

Waattamela oBabeli yaakhala esidade yiitthaniwa Uri, atthu a esidade ele khayamukokhorela Yehova. Yaakokhorela amuluku eethiru. Mene aakhala mulopwana mmoha oovirikana ni atthu a Uri. Owo iitthaniwa Abrahamu ni aamukokhorela Yehova paahi.

Yehova aahimweerela Abrahamu: ‘Mukhumewo owannyinyu mwaahiye amusi anyu ni murowe nipuro kineeraka koothonyihereni.’ Avinyaka, Muluku aamulaihera Abrahamu eeraka: ‘Emusi aa enoorowa wunnuwa ni anoorowa okhala atthu imilyau sintxipale. Miyo kinoorowa waapakela itthu sooreera atthu a elapo yootheene mwaha wa nyuwo ni amusi anyu.’

Abrahamu khaasuwela woowini Yehova aamurumawe orowawo. Nnaamweera vareene hiiho, owo aahimuroromela Yehova ni aahimwiiwelela. Mwa yeyo Abrahamu ni amwaarawe Sara, yaatthuka itthu saya ni yaapatxera weetta ekwaha. Apapawe ni sobrinyu awe yaahirowa naawosa. Apapawe yiitthaniwa Terahi ni sobrinyu awe iitthaniwa Lothi.

Emaara Abrahamu aaraweno iyaakha 75, owo ni emusi awe yaaphiya oKanani, nipuro nenno Yehova aatthunaawe weera erowewo. Iwe, Yehova ampakela yolaihera ekina Abrahamu: ‘Kinimoovaha elapo yootheene ela onoonaawe ni anamwane aa ni osulu aa.’ Abrahamu ni Sara yaahuuluvala nave-tho awo khayaakhanleno mwaana. Nto Yehova aarowa okwanihera moota heeni ele aalaihenraawe?