Yoovekela yootepa oxupa

Ikwaha sootheene Abrahamu annamusivela Yehova ni annamuroromela owo, ni aamuxuttiha mwanawe Isakhi opaka etthu emoharu. Mene vaavo Isakhi aaraaweno iyaakha 25, Yehova anvekela Abrahamu weera apake etthu yootepa oxupa. Yaari eheeni?

Muluku aamweerela Abrahamu: ‘Txontte, orowe nipuro nniitthaniwa Moriya, ni weiwo wakivahe mukuttho. Ekwaha ela, nkintthuna mukuttho wa enama. Kintthuna weera okivahe Isakhi mwanaa mmoharu.’ Abrahamu khaasuwela mwaha wa heeni Yehova anvekelaawe eyo. Nnaamweera vareene hiiho, ntoko aapakaawe, owo aamwiiwelela Yehova.

Oxeexelo, Abrahamu aarowa ni Isakhi ni anamuteko eeli oMoriya. Yeettakaru ekwaha ya mahiku mararu, awo yaapatxera woona miyaako sa oMoriya. Nto Abrahamu, aahaleela anamuteko awe weera enweherereke vaavo owo ni Isakhi yaaronwaaya onvaha mukuttho Yehova. Abrahamu anvekela Isakhi weera ateexe ikhuuni ni aakuxa mwaalo. Isakhi aahaakoha apapawe: ‘Enama ene eri woowiini ninrowaahu onvaha Yehova?’ Abrahamu aamwaakhula: ‘Ohixupeye mwanaka, Yehova onooreherera eyo.’

Emaara yaaphiñyaaya omwaako iwe, awo yaareherera nipuro weera ehelevo ikhuuni. Avinyaka, Abrahamu aamutthuka mwanawe Isakhi matata ni metto ni aamwaatalela vasulu va ikhuni.

Moottharelana, Abrahamu aakuxa mwaalo mmatatani. Mwa etempu ene yeeyo, aahiiwa nlaika na Yehova neeraka: ‘Abrahamu! Ohimwiive mwanaa Isakhi! Vano miyo koosuwela weera onnamuroromela Muluku, weyo waari oolikana ene onvaha Muluku mwanaa mmoharu.’ Vano, Abrahamu aaweha enama yankiyeene vamwirini ni anvaha Yehova nipuro na Isakhi.

Ovinyera nihiku nne, Yehova aapatxera omwiitthana Abrahamu nthamwene awe. Moosuwela mwaha wa heeni? Mwaha wooweera Abrahamu annapaka itthu sootheene Yehova anvekelaawe, nnaamweera nuuwo ahaasuwela etthu Yehova aatthunaawe.

Avinyaka, Yehova aatthikela wuuluma yoolaihera ampakenlaawe Abrahamu: ‘Miyo kinimooreelihani nyuwo ni munookhalano emusi etokweene ni kinimwaaruhela itthu sooreera atthu ootheene mwaha wa emusi anyu.’