Maphapo meeli oovirikana

Emaara Isakhi aaraaweno iyaakha 40, aamusuwela Rebeka ni aathelana ni yoowo. Nto owo aannamusivela vantxipale. Evinreene etempu, Rebeka aarupala maphapo.

Oopatxera oyariwa iitthaniwa Esawu, anaaveeli iitthaniwa Yakobe. Esawu annaviriha etempu yintxipale areene mutuphini ni wannamusivela vantxipale oxaya. Mene Yakobe aathanla okhavihera owannyawe.

Esawu aari mwaana oopatxera. Mwaha wa yeeyo, aakhalano eparakha yoowaakhela soohiyeriwa ovirikana ni Yakobe. Moosuwela yoohiyeriwa ti heeni? Itthu sootheene tiithi onaahiyeraawe anamwane aakhwaaka. Ntoko imatta naari musurukhu. Va emusi ya Isakhi, soolaihera Yehova ampakenlaawe Abrahamu sanneerela-tho eparte yoohiyeriwa. Esawu khoona okhala sootthuneya soolaiheriwa iye, mene Yakobe, annoona okhala sootepa otthuneya!

Nihiku nimoha, Esawu aarowa oxaya nave aatthikela owaani akhulumunweene vantxipale. Nto, aahoona winkhela yootxa aapeñyaawe Yakobe. Nave-tho aamweerela: ‘Miyo koovoliwa etala! Okivahe yootxa vakhaaniini waapeñyaawe.’ Yakobe aaheera: ‘Aani Esawu. Mene wakilaiheraru weera onookihiyera yoolaiheriwaa.’ Esawu aaheera: Yakobe, miyo nkintthuna osuwela sa yoohiyeriwa. Ohalekeno sootheene, miyo kintthuna otxa paahi.’ Neereke saari miruku sooreera Esawu opaka eyo? Hooye, khaiyene saari miruku sooreera. Esawu aatxentxa etthu yootepa otthuneya ni yootxa.

Emaara Isakhi uuluvanlaawe, owo aahoona weera yaari etempu yoomureeliha mwanawe oopatxera. Mwaha wooweera Yakobe aathuma etokweene, Rebeka aamukhavihera waakhela mareeliho awo. Emaara Esawu aasuwenlaawe eyo, aanyoonyiwa vantxipale mpaka otthuna omwiiva Yakobe. Isakhi ni Rebeka yaatthuna omukosoopa Yakobe. Mwaha wa yeeyo, yaamweerela otthawela wa tiiyu awe Labano, murokorawe Rebeka, mpaka Esawu omuriire murima. Yakobe aahiiwelela miruku sa asitithawe. Nave aarowa okhala ni atatawe Labano.