Yakobe ni Esawu yaahiiwanana

Yakobe aarowa nipuro nenno niitthaniwa Harani. Mpuwa mwa ekwaha ele, Yehova aamulaihera Yakobe weera ammukosoopa, ntoko hiihaale aamukosompaawe Abrahamu ni Isakhi. Ni tiyeeyo yeereñye. OHarani, Yakobe aahithela, ni aahaayara anamwane antxipale ni aakhalano muhakhu muntxipale.

Evinreene etempu yintxipale, Yehova aamweerela Yakobe: ‘Otthikele elapo ya asipapaa.’ Menento, Yakobe ni emusi awe yaapatxera weetta ekwaha etthikelaka owannyaya. Avinyaka, Yakobe aasuwela weera Esawu aamurowa okumana nuuwo, ni annaaruuha alopwana 400. Yakobe aannamoova Esawu omweeriha etthu yoonanara owo naari emusi awe. Nto Yakobe aavekela: ‘Txontte Yehova, mukivuluxe wa munnaka weera ahikiive.’ Nihiku naattharelana, Yakobe aamuruuhela Esawu iputtiputthi sintxipale, ipuri, imompe, ikamelu ni ikavalu ntoko soovaha.

Ohiyu ene yoole, Yakobe areene meekhaawe, aahoona nlaika nimoha! Awosa yaapatxera owana. Ooweeli aya yaawana ohiyu wootheene, ni Yakobe aavulala, nnaamweera vareene hiiho owo khaahiyerenre. Nto Yakobe aatthuna weera nlaika nne nimureelihe nihimaka weera Yehova khaarowa ohiya etthu yoonanara emukhumelelaka owo. Nlaika naamweerela: ‘Okihiye kipwaheke.’ Yakobe aahakhula: ‘Hooye, mwakireeliharu paahi.’

Okhwipi waya, nlaika nne naamureeliha Yakobe. Nto, owo aakhalano nroromelo weera khawaatthuneya omoova Esawu.

Nihiku nne oxeexelo Yakobe anweha Esawu ottayi areene ni alopwana 400 ewaaka. Yakobe aarowa okumana ni Esawu, ni amwaattamelakaru owo, aakokhora ikwaha 7. Esawu aamutthimakela Yakobe ni yaakhupaarelana. Ooweeli aya yaapatxera wiinla vantxipale ni yaahiiwanana. Yehova aahakalala vantxipale mwaha wowoona moota Yakobe iiwanannaawe ni munnawe, keera?

Avinyaka, Esawu aatthikela owannyawe ni Yakobe aavirelela weetta ekwaha arowaka elapo ya asipapawe. Yakobe aahayara anamwane 12. Awo yiitthaniwa, Rubeni, Simiyoni, Levi, Yuda, Dani, Naftali, Gadi, Aseri, Isakari, Zabuloni, Yosefe ni Beniyamini. Mmoha a anamwane awo Yehova anvarihela muteko weera avuluxe emusi eyo yoothanleya. Mwaana heeni yoowo? Moota heeni owo aapankaawe eyo? Nrowe noone.