Davidi ni Sawuli

Davidi amwiivakaro Goliyathi, aahikhala mutokweene aanakhotto a Sawuli. Owo aawina ikhotto sintxipale ni aahivuwa. Asithiyana yanniipa yeeraka Davidi aawina ikhotto sintxipale ompwaha Sawuli, eyo yaamweeriha Sawuli okhala a nrima ni owo aalakela omwiiva Davidi. Nihiku nimoha, Davidi amwiipelaka tthakare Sawuli, nto Sawuli aahikuxa nivaka ni anvonyera Davidi. Mene owo aahiwera osempa.

Avinyaka, Sawuli aaheerera omwiiva Davidi ikwaha sintxipale. Mwaha wa yeeyo, owo aahuupuwelela othawela onikareni. Sawuli aahaathukumanya anakhotto 3.000 weera yamwaase Davidi. Sawuli aavolowa munikhukuni iipinthaawemo Davidi ni alopwana awe. Alopwana ale yaamweerela Davidi: ‘Ela eparakha yoomwiiva mwene Sawuli!’

Davidi aaheetta moowiita mpaka ophiya aaraawevo Sawuli ni athikila epetaasu emoha ya ikuwo sawe. Ni Sawuli khaasuwenle, nto Davidi khiisoonne nnene mwaha woopaka eyo. Mene iwo waari ohoonihera nttittimiho wa mwene Yehova aamuthanliyaawe. Menento Davidi, khaahiñye asilopwana awe omwiiva Sawuli. Sawuli akhumakaru munikhukuni, Davidi aamuleela owo: ‘Miyo kaakhala ni eparakha yoowiivani nyuwo, menento miyo nkipanke eyo.’

Neereke etthu eyo yaamweeriha Sawuli ohiya otthuna omwiiva Davidi? Hooye. Sawuli aavirelela omutthara-tthara weera amwiive Davidi. Ohiyu omoha, Davidi ni musulu awe Abixayi yaavolowa moowiita mmukotthani mwa Sawuli. Mpaka Abneri, yoowo aamukosoopa mwene aamukona. Oonakaru eyo, Abixayi aatthuna omwiiva Sawuli. Menento Davidi aamweerela: ‘Abixayi omuhiye. Yehova onoosuwela etthu yompakela Sawuli. Nrowe paahi nikuxe nivaka nawe ni ekarafa awe ya maahi nikhumekewo nno.’ Davidi ni Abixayi yaakhumawo omukotthani iwe ni yaahiwela mwaako waattamenle iwe.

Davidi aakhuwela areene osulu wa mwaako ole: ‘Abneri, mwaha wa heeni ohimukosompaawe mwene? Hiyo nookuxa nivaka ni ekarafa awe ya maahi ni weyo khononne.’ Sawuli aahiiwa nsu na Davidi ni aaheera: ‘Weyo waamukiiva, mene khokiivale. Mweekhaikhai, weyo onkela okhala mwene a wIsraeli.’ Avinyaka, Sawuli aatthikela owannyawe. Neereke amusi oottheene a Sawuli khiyaamusivela Davidi? Nrowe noone.