Yesu onnamuthanla Saulo

Saulo aayarinwe esidade ya oTarso. Owo aari nfarisi ni annasuwela nnene sene malamulo aayuda. Mene owo khaasiveliwa ni makristu. Owo annaakuxa akristu asilopwana ni asithiyana mmawannyaya ni annaawalela mukateya. Emaara atthu oonanara murima yaamwiivalaaya mutthareli Stefano ni maluku, Saulo aarimweemela paahi eeraka woona.

Saulo annaatthara-tthara akristu ni anvekela-tho namakeya mutokweene weera arowe oDamasko weera aawalele akristu yaakhala weiwo. Saulo aphiyakaru waattamela oDamasko, waara waatutha waamurukurera ni owo aamorela vathi. Saulo aahiiwa nsu neeraka: ‘Saulo, mwaha wa heeni onkitthara-ttharaawe?’ Saulo aakoha: ‘Pwiya weyo taani?’ Aahaakhuliwa: ‘Miyo ka Yesu. Miyo kintthuna weera weyo orowe oDamasko. Iwo weyo onoosuwela etthu ontthuneyaawe opaka.’ Mwa emaara ene yeele Saulo khaawera woona, ni asilopwana yaari nuuwo yanvarela moono awe ni yaamuroiha oDamasko.

ODamasko, aakhalawo mukristu mmoha itthaniwa Ananiya. Yesu aamukhumelela owo moolohani ni aamweerela: ‘Orowe mpaka owannyawe Yuda, ephiro eniitthaniwa yoowookowa, ni omwaase mulopwana oniitthaniwa Saulo.’ Ananiya aaheera: ‘Pwiya, miyo kohiiwa woohima sa Saulo. Owo ontthuna waawalela atthareli anyu ootheene mukateya!’ Yesu aaheera: ‘Orowe wa yoowo. Miyo koomuthanla Saulo weera alaleye mitthenka sooreera mapuro mantxipale.’

Ananiya aarowa ni amphwanya Saulo ni aamweerela: ‘Yesu ookiruma weera kilamihe ohoona waa.’ Nto, Saulo aatthikela woona. Owo aaxuttera woohima sa Yesu ni aakhala mutthareli. Apatisiwakaru, Saulo aapatxera olaleya musinakooka ni akristu akina. Ayuda yaatikhiniheya omoona Saulo uulumaka woohima sa Yesu!

Saulo aakhala iyaakha 3 alaleeraka oDamasko. Ayuda yaanyoonyiwa vantxipale nuuwo ni yampaka palano weera emwiive. Emaara asinnawe yaamwiiwalaaya palano owo oohireerela, yaamukhavihera Saulo otthawa weera ahiiviwe. Awo yaamuhela musestuni etokotoko, yaakuruxela esestu eyo vanikhukuni vaxirini ya esidade.

Aphiyakaru oYerusalemu aakhala ni akristu akina, mene akristu ale yannamoova owo. Nto, mutthareli iitthaniwa Barnaba aamureerela murima Saulo. Moottharelana, Saulo aapatxera olaleya mittenka sooreera vamoha ni muloko wa oYerusalemu. Avinyaka, owo aapatxera wiitthaneliwa nsina na Paulo.