Mwene oopatxera a wIsraeli

Yehova aahaathanla aphuki weera yaakosoopeke ana a Israeli. Mene, okhala weera maloko ootheene yaakhalano mwene aya, ana a Israeli yaatthuna tho okhalano mwene. Awo yaarowa onvekela eyo Samuweli. Mene Samuweli aahoona okhala etthu yoohireerela ni anvekela Yehova. Yehova aamweerela owo: ‘Samuweli, nthowa naya khaiyene nri ni weyo, mene nri ni miyo. Waaleele awo weera anookhalano mwene, mene awo enoorowa ohaawa mmatatani mwawe.’ Nto Samuweli aahaaleela atthu ale. Nnaamweera vareene hiiho, awo yaahakhula: ‘Hiyo khansuwenle yeeyo. Etthu nintthunaahu paahi okhalano mwene!’

Yehova aamuleela Samuweli weera mulopwana iitthaniwa Sawuli aarowa okhala mwene. Nihiku nimoha, Sawuli aahirowa omoona Samuweli oRama. Nto, weera amoonihere Sawuli weera aathanliwa okhala mwene ana a Israeli, Samuweli aamuttikitthela makhura vamuru vawe.

Avinyaka, Samuweli aawiitthana atthu ootheene weera awoonihere mwene munyowani a wIsraeli. Mene khaavo aawera omphwanya Sawuli. Moosuwela mwaha wa heeni? Mwaha wooweera owo anniisipithiha. Avinyaka yaamwaasa vantxipale ni yamphwanya Sawuli, owo aari oorakama waapwaha atthu ootheene ni aari ootepa oreera. Nto, Samuweli aamukuxera variyari va atthu Sawuli ni aaheera: ‘Mmooneke! Ola mwene Yehova oothanlenlaaweni nyuwo.’ Atthu yaakhuwela ehakalanleene vantxipale emaara yonnaaya weera yaakhalano mwene.

Woopatxerani, Sawuli annamwiiwelela Yehova ni annapaka etthu Samuweli aamurumaawe. Menento noovira etempu owo aahiya omwiiwelela Yehova. Ekwaha emoha, Sawuli aatthuna onvaha mukuttho Yehova. Mene owo khaatthuneya opaka eyo, menento eera apakeke eyo aari Samuweli. Samuweli aamweerela Sawuli weera anweherereke owo ophiya. Mene Sawuli khaanweherenre ni aapka itthu sootheene meekhaawe. Mwaha wa yeeyo, Samuweli aamunyemela Sawuli: ‘Weyo khawaatthuneya ohimwiiwelela Yehova! Anyemeliwakaru neereke Sawuli annamwiiwelela Yehova? Hooye.

Muhoolo mwaya, Sawuli aarowa owana ni atthu yiitthaniwa Amaleki, ni Yehova aamuleela weera khawaatthuneya waamorela ikharari atthu awo. Mene Sawuli ammorela ikharari mwene a wAmaleki, yoowo iitthaniwa Agagi. Yehova amweerela Samuweli: ‘Sawuli khantthuna osuwela sa miyo naari okiiwelela.’ Samuweli aariipiwa murima vantxipale mwaha wa etthu eyo, ni aarowa wuuluma ni Sawuli. Owo enre weera, okhala weera Sawuli khaaiwelela, Yehova aamurowa omuhela mwene mukina vanipuroni vawe. Emaara Samuweli aarukununwaawe weera aroweke, Sawuli aavara ikuwo sa Samuweli ni aapera vakhani ekuwo awe. Samuweli aamweerela: ‘Yehova-tho onoorowa owaakha omwene aa wa ana a Israeli.’ Nto taani aarowa okhala mwene munyowani a wIsraeli? Yehova aamurowa omuthanla mutthu eera amusiveleke ni omwiiwelela yoowo.