Yonathani aari nthamwene oolipa murima ni oororomeleya

Mwaana oopatxera a Sawuli, Yonathani, aari nakhotto oolipa murima vantxipale. Davidi mpaka aahima weera owo aari oowiisaakuviha ompwaha xaaka ni a ikuru sintxipale ompwaha kharamu. Nihiku nimoha, Yonathani ni namakhaviheraawe yaawoona Afilisti ereene va mwaako. Yonathani aamuleela namakhaviheraawe eeraka: ‘Afilisti yaniitthana weera niwele omwaako ni owana naawo, eyo enoonihera weera Yehova onoorowa onikhavihera waawina.’ Nto ti yeeyo yeereñye. Afilisti yaamwiitthana Yonathani ni namakhavihera awe weera ewele omwaako. Eeli ale yaawana ni yaawera owiiva Afilisti 20.

Okhala weera Yonathani aari mwaana oopatxera a Sawuli, owo aakhalano eparakha yookhala mwene. Menento owo aasuwela weera Yehova aamuthanla Davidi weera akhale mwene nipuro na Sawuli. Nnaamweera vareene hiiho, Yonathani khaamukhalela nrima Davidi. Opwaha mwa yeeyo, awosa yaari asinthamwene oororomeleya. Yonathani ni Davidi yaalaiherana weera yaamurowa okosoopana mukina ni mukhwaawe. Weera oonihere onthamwene awe, Yonathani aahinvaha Davidi ekasako awe, ekatana awe, muupa awe ni sintu awe.

Emaara Davidi aamutthawaawe Sawuli, Yonathani aahirowa okumana nuuwo ni aamweerela: ‘Davidi, okhale a ikuru ni oolipa murima! Yehova ohoothanla weyo weera okhale mwene. Apapaka aasuwela eyo.’ Onoorowa okhala wooreera okhalano nthamwene ntoko Yonathani, keera?

Yonathani aahileva ekumi awe ikwaha sintxipale weera amukhavihere nthamwene awe. Asuwelakaru weera Sawuli ontthuna omwiiva Davidi, Yonathani aapaka ele aaweraawe weera Sawuli atxentxe miruku. Menento Sawuli aanyoonyiwa vantxipale ni Yonathani.

Evinreene etempu vakhaani, Yonathani aahookhwa vamoha ni Sawuli. Nto, Davidi aamwaasa Mefiboxethi, mwanawe Yonathani ni aamweerela: ‘Apapaa yaari nthamwene aka. Mwaha wa yeeyo, miyo kinimookosoopa weyo ekumi aa yootheene. Weyo onrowa okhalaka owannyaka ni onoorowa otxaaka itthu sooreera.’ Davidi khintale omuttiwala nthamwene awe Yonathani.