Yesu onnanvinyereriha Lazaro

Yesu aakhalano asinthamwene awe araru yaakhala oBetania. Aari Lazaro ni asirokorawe eeli, Maria ni Marta. Nihiku nimoha, Yesu aari esidade yoorakamelana ni oBetania. Avinyaka owo aahaakhela mitthenka soowaakuveya wa Maria ni Marta: ‘Lazaro onoovoreiwa vantxipale. Txontte, nwe moowaakuveya!’ Menento Yesu aapisa orowa. Evinreene mahiku meeli, owo aaweerela atthareli awe: ‘Nrowe oBetania. Lazaro onookona, ni miyo kinrowa onvinxa.’ Atthareli awe yaaheera: ‘Okhala weera owo onookona, anookhala nnene.’ Oonelelakaru weera atthareli awe khayiiwexenxe, Yesu aaweerela: ‘Lazaro ohookhwa.’

Emaara Yesu aaphiñyaawe oBetania, yeera evinreene mahiku maxexe Lazaro akhwiiyeene. Atthu antxipale yeera ereene iwo emmaalihaka Marta ni Maria. Marta asuwelakaru weera Yesu aaphiya, owo aamutthimakela ni aamweerela: “Apwiya, mwaari vaava, murokoraka khaakela okhwa.” Yesu aamweerela: ‘Murokorinyu onoorowa okhala mukumi veeli. Munnaroromela eyo Marta?’ Marta aahaakhula: ‘Aani, miyo kinnaroromela weera owo anoovinyererihiwa muhoolo.’ Yesu aamweerela: “Miyo kiri evinyerero ni ekumi.”

Avinyaka, Marta aarowa omuleela Maria eeraka: ‘Yesu ohoowa.’ Maria aatthimakela aaraawewo Yesu, ni atthu yannamutthara owo. Inlaka vantxipale, Maria aakokhora ohoolo wa Yesu ni aamweerela: ‘Pwiya, waakhanle weera mwaari vaava, murokoraka khaarowa okhwa!’ Amoonakaru Maria inlaka mwaha wooriipiwa murima, Yesu-tho aapatxera winla. Atthu yaamonne Yesu inlaka, yaaheera: ‘Nkoonani moota Yesu aamusivelaawe Lazaro.’ Mene atthu akina yannakohana yeeraka: ‘Mwaha wa heeni ola ahipankaawevo etthu weera nthamwene awe ahikhwe?’ Vanonto, etthu heeni Yesu aarowaawe opaka?

Yesu aarowa mpaka nihiye na Lazaro, nto naakhala nluku ntokweene naahiiwale vamulako. Owo aaheera: ‘Nvinxe nluku.’ Marta aaheera: ‘Aavira mahiku maxexe akhwiiyeene! Ni erutthu awe enninkha.’ Nnaamweera vareene hiiho, naavinxiwa nluku nne, ni Yesu aavekela eeraka: ‘Tiithi, asantte vantxipale mwaha wooweera munnakiiwa. Miyo koosuwela weera munnakiiwa ikwaha sootheene, mene miyo kinuuluma eyo weera atthu ala esuwele weera nyuwo mukirumme owa elapo ela ya vathi.’ Nto, Yesu aakhuwela moowiiwanyeya: “Lazaro, mukhumele vaate!” Avinyaka, yaaheereya etthu yootikhiniha: Lazaro aakhuma mmahiye avitikelelinweene ni ikuwo. Ni Yesu aaheera: “Mmutaphule ni mmuhiye arooke.”

Atthu antxipale yonne mwiiriira ole, yaapatxera omuroromela Yesu. Mene atthu akina yaarowa waaleela etthu ele afarisi. Afarisi yaanyoonyiwa vantxipale ni yannatthuna omwiiva Lazaro ni Yesu. Yuda Iskarioti mmoha a atthareli 12, moowiipithiheya, aarowa wa afarisi ni aahaakoha: ‘Munrowa okiliva kavi weera kooleeleni Yesu araawewo?’ Awo yaahaakhula weera yaamurowa omuliva musurukhu 30 wa iparatha. Nto Yuda annuupuwelela moota eeraawe amwinnyerere Yesu wa afarisi.