YOOSOMA 57
Ninkha mwapaka yoottheka etokotoko?
Nnamweera mmusivelaka ni mpakaka yootthuna ya Yehova, nyuwo pooti ottheka. Nankha wakhala weera yoottheka eyo etokotoko opwaha soottheka ikina. (1 Akorinto 6:9, 10) Nnaamwi mpankeene yoottheka etokweene, muupuweleke weera Yehova onnosivelani ni onntthuna woolevelelani ni wookhaviherani.
1. Nnaapake heeni weera Yehova anlevelele?
Atthu enamusivela Yehova ennaripiwa murima yoona vale weera aapaka yoottheka etokotoko. Yororomeliha ya Yehova ennaamaaliha atthu awe ni masu eneera: “soopahula sanyu sakhanle soxeera ntoko ekhama, kinotteliha ntoko makasa [etthapwe].” (Yesaya 1:18) Wakhala weera hiyo noottharuwa soottheka sahu ni murima wootheene Yehova onoonilevelela. Vano ninkela woonihera hayi weera hiyo noottharuwa sottheka sahu? Wakhala weera hiyo noottharuwa mweekhaikhai hiyo ninkela weemexera opaka soonanara ni onvekela nlevelelo Yehova. Voottharana ninkela opaka ele ninweraahu nihiyaka nyuupuwelo soonanara ni nihiyaka ele yaanitthekinhe. Opwaha mwa yeeyo, ninkela okhalaka moovarihana ni ele Yehova onnileelaawe weera nipakeke.—Mmusome Yesaya 55:6, 7.
2. Yehova onaavarihela hayi muteko asitokweene a mmulokoni wakhala weera noottheka?
Napaka yoottheka etokotoko Yehova onnilela weera ‘owitthane asitokweene a muloko.’ (Mmusome Yakobe 5:14, 15.) Asitokweene a mmulokoni ennamusivela Yehova ni iputtiputthi sawe. Awo ennavarihela muteko ele axuttenraaya mBiblyani weera enikhavihere ni otthikihera onthamwene ahu woolipa ni Yehova.—Agalata 6:1.
Asitokweene a mmulokoni ennikhavihera hayi wakhala weera noopaka yoottheka etokweene? Asitokweene eeli naari araru enkela onvarihela muteko Biblya weera enikhavihere woona weera nipankaahu etthu yoonanara. Enkela onivaha miruku naari nyoonelo seiyo sinkela onikhavihera weera nihitthikele veeli yoottheka eyo. Awo pooti woona weera hiyo khanimphwanela weerela empari muloko mwa ehuhu vakhaaniini, mpaka nitthikihere mukhalelo ahu woomunepani. Ninkha nto wakhala weera mutthu opanke yoottheka etokweene ohittharuwa? Wakhala hawo, asitokweene ennamukumiha mutthu owo mmulokoni weera ahaavalihe atthu akina.
WEERA MUXUTTERE SINTXIPALE
Moone moota Yehova oneeraawe onikhavihere napaka yoottheka etokweene.
3. Olapa soottheka sahu ononikhavihera
Emaara nintthekaahu ninnamuriipiha murima Yehova. Tiivawonto nintthuneyaahu olapa sottheka sahu. Musome Nsalmu 32:1-5. Avinyaka mutthekule ni epontu enttharelana:
Ohiya weerera wipithiha soottheka ninpakaahu, mwaha wa heeni oraaya woorera olapa soottheka sahu wa Yehova?
Ohiya paahi olapa sottheka sahu, nnimoona nnene tho wakhala weera nnovekela nikhavihero wa asitokweene a mmulokoni. Moone EVIIDIYU. Avinyaka mutthekule ni ipontu sinttharelana.
Nviidiyuni, asitokweene yapanke eheeni weera amukhavihere Canoni otthikela wa Yehova?
Nintthuneya okhala ororomeleya ni asitokweene, awo ekhalihiwe weera enikhavihereke. Mmusome Yakobe 5:16. Avinyaka mutthekule ni epontu enttharelana:
Mwaha wa heeni oraaya wookhweya asitokweene a mmulokoni onikhavihera naakhalaka oororomeleya naawo?
Mulape soottheka sanyu, mukhale oororomeleya ni asitokweene a mmulokoni ni mwaakhele nikhavihero na Yehova
4. Okumihiwa mmulokoni nikhavihero na Yehova
Wakhala weera mutthu opaka yoottheka etokotoko aakhottaka ohima ekhaikhai, mutthu owo pooti ohipakela empari muloko. Wakhala weera mutthu owo ookumihiwa mmulokoni hiyo khannuulumano naari vakhaaniini. Mmusome 1 Akorinto 5:6, 11 ni 2 Yohani 9-11. Avinyaka mutthekule ni epontu enttharelana:
Eferamenta ennunnuwiha epaawu. Moota heeni oothela ni mutthu ottheka ohittharunwe onkelaaya onanariha muloko?
Atthu antxipale yaakhumihinwe mmulokoni yaatthikelamo. Mwa yeeyo, mwaha wooweera olakiwa ovoreya, menento eyo, yaaweriha atthu ale omora. (Nsalmu 141:5) Moone EVIIDIYU. Avinyaka mutthekule ni ipontu sinttharelana.
EVIIDIYU: Mukhavihere moororomeleya othoriha wa Yehova (9:28)
Nviidiyuni, ookumihiwa mmulokoni wa Sonia wamukhavihenre hayi?
Okhumihiwa mmulokoni . . .
onttittimiha hayi nsina na Yehova?
onoonihera hayi weera Yehova ta axariya ni ansivelo?
5. Yehova onnanilevelela emaara ninttharuwaahu
Yesu aavarela muteko niphwanaphwaniho nenno ninnikhavihera wiiwexexa moota Yehova onoonelaawe vaavo mutthu onttharuwaawe. Mmusome Luka 15:1-7. Avinyaka mutthekule ni epontu enttharelana:
Yoolepa ela ennixuttiha eheeni woohima sa Yehova?
Mmusome Ezekiyeli 33:11. Avinyaka mutthekule ni epontu enttharelana:
Mwaha wa heeni oraaya wootthuneya opaka etthu eneera yoonihere weera noottharuwa?
Antoko hiihale mukukhuli onnaasaasa iputtiputthi sawe, Yehova tho onnawaasaasa atthu awe
ATTHU AKINA ANEERA: “Wakhala weera kinimwaalela asitokweene a mmulokoni etthu kipankaaka awo enkela okikhumiha mmulokoni.”
Eheeni nyuwo mwaakelaanyu omuleela wakhala weera mutthu onoonela hiiho?
NYAHA SOOTTHUNEYA
Wakhala weera noopaka yoottheka etokotoko, Yehova pooti onlevelela. Mwa yeeyo, ontthuneya ottharuwa ni murima wootheene ni okhala oolikaneene weera nihipake yoonanara.
Wuuluula
Mwaha wa heeni oraaya wootthuneya olapa soottheka sahu wa Yehova?
Nitthuneya opaka eheeni weera nleveleliwe soottheka sahu?
Wakhala weera noopaka yoottheka etokotoko, mwaha wa heeni ontthuneyaaya waasa nikhavihero wa asitokweene?
WEERA MUSUWELE ITTHU SINTXIPALE
Moone moota mulopwana mmoha oonalaawe ikharari sa Yehova seiyo silempwale va Yesaya 1:18.
Moota heeni okumihiwa mmulokoni mutthu otthenke oohittharuwa onaakhaviheraaya atthu ootheene?
“Mwaha wa heeni okumihiwa mmulokoni oraaya nsivelo na Yehova” (A Sentinela, 15 a Abril a 2015)
Moone moota munkelanyu wiwanyeiha okumihiwa mmulokoni wa mutthu ohikhanle Namoona a Yehova.
“Anamoona a Yehova anniikosoopa ni mutthu ohinerela eparte muloko?” (Mwaha va jw.org)
Weera moone mwaha wa heeni mulopwana mmoha akumihiwe mmulokoni oonalaawe weera Yehova aamwitthana, musome yooweereya eeneera “miyo kaannitthuna ohokoleela wa Yehova.”
“Biblya onnatxentxa ikumi sa atthu” (A Sentinela, 1.º a Abril a 2012)