Moota womphwanya mutthu oophwanelela othelanano

1-2. (a) Itthu heeni mukristu oohithela naari oohitheliwa ontthuneyaawe owehexexa ohinaaye opatxera onamorari? (b) Eheeni entaphulelaaya masu ooweera “onamorari”? (Nwehe “Masu oowiiwanyeihiwa.”)

NEEREKE nyuwo munnatthuna othela naari ootheliwa? Nnaamweera othela ehikhanle etthu etokweene enkumihera ohakalala, akristu antxipale oohithela, amiravo ni oowunnuwela, ennatthuna vantxipale omphwanya mutthu weera ethelaneno. Ekhaikhai weera nyuwo muhaakunve opatxera onamorari, muntthuneya okhalano itthu sa weerutthuni, soomunepani ni sa mmuupuweloni weera mukhale oolikaneene weera muthele naari otheliwa.a (1 Akor. 7:36) Wakhala weera munoopaka eyo, nyuwo munookhalano ntheli noohakalaliha.

² Mene, khonkhala wookhweya omphwanya mutthu oophwanelela weera muthelaneno. (Mir. 31:10) Nave-tho nnaamweera mumphwannyeene mutthu muntthunaanyu omusuwela nnene, pooti ohikhala wookhweya opatxera onamorari.b Mwa yoosoma ene yeela, ninrowa woona etthu heeni enrowa waakhavihera akristu oohithela naari oohitheliwa omphwanya mutthu oophwanelela weera epatxere onamorari. Nave-tho nnoorowa oxuttera moota heeni atthu akina mmulokoni enrowaaya waakhavihera ale entthuna othela naari otheliwa.

MUMPHWANYE MUTTHU OOPHWANELELA

3. Itthu heeni mukristu oohithela naari oohitheliwa ontthuneyaawe owehexexa wa mutthu ontthunaawe othelanano?

³ Wakhala weera nyuwo muntthuna othela naari ootheliwa, waamukhala wooreera osuwela etthu munaasaanyu wa mutthu owo muhaakunve opatxera onamorari.c Wakhala weera khampanke etthu eyo, nyuwo pooti omukhootta mutthu ori oophwanelela wa nyuwo naari omwaakhulela mutthu ohikhanle oophwanelela wa nyuwo. Ekhaikhai ti yooweera, mutthu oophwanelela ontthuneya akhaleke mukristu oobatiziwa. (1 Akor. 7:39) Mene khaiyene mukristu ootheene obatizinwe onoorowa okhala oophwanelela weera muthelaneno. Nto waamureerela nyuwo wiipakela makoho ntoko ala: ‘Sooluluwanya heeni kiraakano mweekumini mwaka? Mikhalelo heeni kinoonaaka okhala sootepa otthuneya wa mutthu ole kintthunaaka othelanano? Mikhalelo saka tisooreerela?’

4. Atthu akina eheeni yaahenlaaya mpuwa emaara yaapakaaya mavekelo?

⁴ Moohihovela, moopaka nivekelo weera mumphwanye mutthu oophwanelela, wakhala weera eyo yootthuna anyu. (Afil. 4:6) Ekhaikhai weera Yehova khommuroromeliha mutthu weera anonvaha mutthu oothelanano. Mene owo onnapwatthela soohaawela sanyu ni miyuupuwelo sanyu, nave pooti wookhaviherani emaara yeeyo mummwaasaanyu mutthu oothelanano. Ti vawonto, nvireleleke omuleela Yehova soohaawela sanyu ni miyuupuwelo sanyu. (Nsal. 62:9 [62:8, Tradução do Novo Mundo]) Nvekeleke nvekaka olipa murima ni miruku. (Yak. 1:5) John,d Munna mmoha oohithela a wEstados Unidos onnahima etthu onhelaawe mpuwa aavekelaka: “Miyo kinnahima mikhalelo kintthunaaka wa mutthu kimmwaasaaka weera kithelaneno. Miyo kinnanvekela Yehova weera akivahe eparakha yomphwanya mutthu oophwanelela. Nave kinnanvekela Yehova weera akikhavihere wunnuwihera mikhalelo seiyo sinrowa okikhavihera okhala mulopwana oothela ooreerela.” Tanya, murokora mmoha a oSri Lanka, ohimme ha: “Vaavo kimmwaasaaka mutthu oophwanelela, miyo kinnanvekela Yehova weera akikhavihere ovirelela okhala mutthu oororomeleya, ni oohakalala.” Nnaamweera nyuwo muhimphwanyaka moowaakuveya mutthu oophwanelela, Yehova onnoororomelihani okosoopa soohaawela sanyu sa weerutthuni ni sa mmuupuweloni. — Nsal. 55:23 [55:22, NM]

5. Eparakha heeni akristu oohithela naari oohitheliwa eraayano weera emusuwele nnene sene mutthu ommusivela Yehova? (1 Akorinto 15:58) (Nwehe efootu.)

⁵ Biblya onnanlipiha eeraka ‘mwaatteliweke ni miteko sa Apwiya.’ (Mmusome 1 Akorinto 15:58.) Mwaavirelelaka waatteliwa ni miteko sa Yehova ni oviriha etempu mureene ni asinna ni asirokora, ohiya paahi munrowa ottottela mureerelo wiiraana iwo woolipiha, mene nyuwo munookhalano eparakha yoowaasuwela asinna ni asirokora akina oohithela naari oohitheliwa ntoko nyuwo, yaawo eniilipihera vantxipale onvarela Yehova. Vaavo nyuwo muniilipiheraanyu opaka ele munweraanyu weera mmusivelihe Yehova, nyuwo munoophwanya ohakalala weekhaikhai.

6. Emaara akristu oohithela naari oohitheliwa emmwaasaaya mutthu weera ethelaneno, ontthuneya wuupuwelela eheeni?

⁶ Masu ooreerela: Muhaakhulele weera omwaasa wanyu mutthu oophwanelela, ekhale etthu yootepa otthuneya mweekumini mwanyu. (Afil. 1:10) Ohakalala weekhaikhai khonweela mwaha wooweera moothela naari mootheliwa naari khamutenle naari khamuthelinwe, mene onweela ni onthamwene anyu ni Yehova. (Math. 5:3) Ni emaara yeeyo nyuwo muhithenlaanyu naari muhithelinwaanyu, nyuwo pooti okhalano eparakha yoowaatxeerera muteko anyu woolaleera. (1 Akor. 7:32, 33) Nvarele nnene etempu ene yeela. Jessica, murokora mmoha a wEstados Unidos yoowo athelinwe areeneno iyaakha 30 ohimme ha, “Miyo kannaatteliwa vantxipale ni muteko woolaleera ni eyo yannakikhavihera okhala oohakalala nnaamweera kaatthuna otheliwa.”

MWIIHIYEREKE ETEMPU WEERA NWEHEXEXE

7. Mwaha wa heeni oraaya wa miruku onwehexexa nnene sene mutthu oophwanelela mwa etempu yintxipale mutthu ohaakunve woonihera osiveliwa ni mutthu owo? (Miruku 13:16)

⁷ Nankha nyuwo mwamoona mutthu munoonaanyu weera toophwanelela othelanano? Neereke nyuwo onnatthuneya woonihera moowaakuveya mukhalelo woosiveliwa ni mutthu owo? Biblya onhima weera mutthu a miruku khampaka etthu ahuupuwenle. (Musome Miruku 13:16.) Mwa yeeyo, waamukhala wa miruku onwehexexa mutthu owo muhinaaye opatxera woonihera osiveliwa wanyu wa mutthu owo. Aschwin a wOlanda ohimme ha, “Miyuupuwelo soomutthuna mutthu sinninnuwa moowaakuveya mene-tho sinnamala moowaakuveya. Nto vaavo muniivahaanyu etempu weera munwehexexe mutthu owo, nyuwo khamunrowa opatxera onamorarino mwaha wootthimaka ephome.” Opwaha mwa yeeyo, nyuwo mwanwehexexa mutthu owo pooti wookhaviherani woonelela weera mutthu owo khaiyene toophwanelela wa nyuwo.

8. Moota heeni mutthu onrowaawe onweha mutthu oophwanelela? (Nwehe efootu.)

⁸ Moota heeni nyuwo munrowaanyu onwehexexa mutthu mukina moohisuwanyeya? Mmithukumanoni sa muloko naari emaara muntthekulaanyu, nyuwo pooti oweha itthu soomunepani, omutthu ni mikhalelo sa mutthu owo. Taani eri asinthamwene awe? Ni owo ommusivela wuuluma eheeni? (Luka 6:45) Sooluluwanya sa mutthu owo, neereke sinoolikana ni sooluluwanya saka? Nyuwo pooti wuuluma ni asitokweene a mmulokoni naari akristu akina oolipa moomunepani emusuwenle nnene sene mutthu owo. (Mir. 20:18) Nyuwo pooti okoha woohima sa mikhalelo sa mutthu owo. (Ru. 2:11) Emaara munanwehexexaanyu mutthu owo, musepeke omuhiya oohitaphuwa. Muttittimiheke miyuupuwelo sawe ni musepeke otthuna osuwela itthu sootheene woohima sa mutthu owo.

9. Muhaakunveene wuuluma ni mutthu munoonaanyu weera toophwanelela, eheeni muntthuneyaanyu ororomela?

⁹ Munrowa oviriha itempu ikavi muhinaaye omoonihera mutthu owo weera moosiveliwa? Wakhala weera mohaakuva wuuluma ni mutthu owo, pooti woonihera weera munnatthimaka ephome. (Mir. 29:20) Mene-tho wakhala weera munoopisa vantxipale, pooti woonihera weera khimwaano ntthuno, otepaxa wene wakhala weera mutthu mukina ohoonelela weera moosiveliwa. (Koh. 11:4) Muupuwele weera muhinaaye wuulumano mutthu owo, khontthuneya ororomela weera munoothelana ni mutthu owo. Mene nyuwo muntthuneya ororomela weera muri oolikaneene weera muthele naari mutheliwe ni weera mutthu mukina toophwanelela wa nyuwo.

10. Eheeni muntthuneyaanyu opaka moonelela weera mutthu mukina annoosivelani mene nyuwo khamummusivela?

¹⁰ Vanonto, nankha nyuwo moonelela weera mutthu mukina onnoosivelani? Wakhala weera nyuwo khamummusivela, moonihere eyo ni miteko sanyu. Khiwaarowa okhala wa xariya omweeriha mutthu mukina wuupuwela weera munnamutthuna, mene muhimutthunaka. — 1 Akor. 10:24; Aef. 4:25.

11. Ilapo ikina onamorari naari othelana onaasiwa ni atthu akina, vanonto, eheeni atthu awo entthuneyaaya wuupuwelela?

¹¹ Ilapo ikina, asitiithi naari atthu akina oowunnuwela, ennamwaasa mutthu weera athelane ni mmusi aya. Nave ilapo ikina, amusi naari asinthamwene, ennamwaasa mutthu oophwanelela weera athelane ni mutthu mukina, ni muhoolo mwaya, atthu awo ennaasa nihiku weera mulopwana ni muthiyana owo ekumanele yoone yaasivelanaka. Wakhala weera nyuwo munimweereliwa weera munamorariki naari muthele naari otheliwa, muupuwele itthu sintthuneya wa etthu eyo. Wakhala weera nyuwo munomphwanya mutthu weera muthelaneno, nwehexexe omutthu, mikhalelo ni opwaha mwa sootheene, itthu sa omunepani sa mutthu owo. Ntheli noomwaattamela Yehova, ti nootepa otthuneya opwaha musurukhu, osomaxa naari ovuwa wa mutthu. Muupuweleke weera, munna oohithela ni murokora oohitheliwa, ontthuneya opaka yoothanla etokweene woohima sa othelana. — Agal. 6:5.

MWAPATXERA ONAMORARI

12. Wakhala weera nyuwo muntthuna opatxera onamorari ni mutthu, moota heeni nyuwo munrowaanyu omoonihera mutthu owo?

¹² Wakhala weera nyuwo muntthuna opatxera onamorari ni mutthu, moota heeni munrowaanyu woonihera oosiveliwa wanyu?e Nyuwo pooti othanla moota wootthekula ni mutthu owo, pooti okhala nipuro noowaatta atthu naari munvarelaka muteko telefooni. Muulume muhikhuwaka etthu itthu muntthunaanyu. (1 Akor. 14:9) Waatthuneyaka vale, nyuwo pooti onvaha mutthu owo etempu weera uupuwelele ahinaaye waakhula. (Mir. 15:28) Wakhala weera mutthu owo khaakhulenle, muttittimihe moonelo awe.

13. Eheeni nyuwo munrowaanyu opaka wakhala weera mutthu ohoonihera weera oosiveliwa ni nyuwo? (Akolosi 4:6)

¹³ Nankha wakhala weera mutthu oosiveliwa ni nyuwo? Moohihovela, mutthu owo wannatthuneya olipa murima weera awaattameleni ni ooleeleni, nto mukhaleke ooreera murima ni oottittimiha. (Mmusome Akolosi 4:6.) Wakhala weera nyuwo munnatthuna etempu weera moone mwaawaakhulelaka onamorari, muhime. Nave waawereyaka, mmuleele mutthu owo moowaakuveya. (Mir. 13:12) Wakhala weera nyuwo khamunaakhulela, muhime eyo mooreerela ni moowiiwanyeya. Moone moota munna Hans a wAustralia, aamwaakhunlaawe murokora yoowo aamwaattamenle: “Miyo kaamuleela yoothanla aka mooreerela nave-tho moowiiwanyeya. Kaapaka eyo moowaakuveya mwaha wooweera nkaatthuna onvaha yooweherera yeethiru. Mwaha wa yeeyo, muhoolo mwaya miyo kanniikosoopa emaara kuulumaaka ni murokora ole.” Mwa mukhalelo mukina, wakhala weera nyuwo muntthuna opatxera onamorari ni mutthu, muhime muupuwelo anyu ni yootthuna anyu woohima sa onamorari. Sootthuna sanyu pooti ovirikana ni sootthuna sa mutthu mukina, moovarihana ni nipuro ahuuwalaawe naari itthu ikina.

MOOTA HEENI ATTHU AKINA ENROWAAYA WAAKHAVIHERA AKRISTU OOHITHELA?

14. Moota heeni ninrowaahu waakhavihera akristu oohithela naari oohitheliwa ni masu ahu?

¹⁴ Moota heeni ninrowaahu waakhavihera akristu entthuna othela? Moota mmoha woopaka eyo, ti moota nnuulumaahu. (Aef. 4:29) Hiyo pooti wiikoha: ‘Keereke miyo kinnatthekula ni mutthu ontthuna othela? Emaara kinanwehaaka munna oohithela ni murokora oohitheliwa evaanelaka, keereke kinnuupuwela weera awo ennasivelana mukina ni mukhwaawe?’ (1 Tim. 5:13) Opwaha mwa yeeyo, nihipakeke itthu sinrowa oweeriha akristu oohithela wuupuwela weera khenvareleya muteko mwaha wooweera khethenle naari khethelinwe. Hans nimuulummaahu, onnahima: “Asinna akina ennakoha, ‘Mwaha wa heeni muhinthelaanyu? Nyuwo vano khaiyene mwa mmiravo.’ Masu ntoko awo pooti oweeriha atthu oohithela wiisoona weera khiyaano mwiitti ni pooti oweeriha waakuveya othela.” Etthu yooreera, ori waasaasera eparakha weera naattottopele asinna awo oohithela! — 1 Ates. 5:11.

15. (a) Moovarihana ni miruku nimphwanyaahu va Aroma 15:2, eheeni nintthuneyaahu wuupuwelelaka nihaakunveene omukhavihera mutthu omphwanya mutthu oothelanano? (Nwehe efootu.) (b) Ipontu heeni sa eviidiyu sinvareleya muteko wa nyuwo?

¹⁵ Nankha wakhala weera nnuupuwela weera munna ni murokora yaamukhalano ntheli nooreera? Biblya onhima weera nttittimiheke miyuupuwelo sa atthu akina. (Mmusome Aroma 15:2.) Atthu antxipale ehithenle, khentthuna waaseriwa mutthu weera ethelaneno, nto onnatthuneya ottittimiha yoothanla aya eyo. (2 Ates. 3:11) Akina ennatthuna nikhavihero, mene hiyo khontthuneya opaka etthu ehinivekenleene.f (Mir. 3:27) Atthu akina ehithenle, ennatthuna ovahiwa miruku, mene khaiyene mooluluwanya. Lydia, murokora mmoha ahithelinwe a wAlemanha, ohimme ha: “Nyuwo pooti omuhela mpuwa munna ni murokora vamoha ni egrupu ekina. Nyuwo paahi ontthuneya waasaasera eparakha weera munna owo ni murokora ekumane, nto itthu ikina mwaahiyereke.”

16. Eheeni akristu oohithela naari oohitheliwa entthuneyaaya wuupuwelelaka?

¹⁶ Ootheene hiyo, nthenle naari nthelinwe, naari nihithenle naari nihithelinwe, pooti okhalano ekumi yoohakalaliha ni yoowaattano itthu sootepa oreera! (Nsal. 128:1) Nto wakhala weera nyuwo muntthuna othela naari otheliwa, ni nlelo khamumphwannye mutthu, nvireleleke owehexexa muteko munanvarelaanyu Yehova. Murokora mmoha a oMacau oneeriwa Sin Yi, ohimme ha: “Mulikanxeraka etempu mwaarowaanyu oviriha oparaisu ni ole muthelannaanyuno, etempu muraanyu oohitheliwa naari oohithela ti yooyeva, nto muttittimiheke etempu eyo ni nvariheleke nnene.” Vanonto, nankha nyuwo mwamphwannyeene mutthu oophwanelela ni mwaapatxenreene onamorari? Yoosoma enttharelana, nnimoona moota nyuwo munrowaanyu okhumela nnene vaavo munnamoraraanyu.