MWAHA ONTHOKORORIWA 30
ETXIPO 36 Nikhapeleleke Murima Ahu
Itthu sootthuneya ninxutteraahu ni mamwene a wIsraeli
“Vavale munimòna yovirikana naxariya ni mutakhali, yole onamurumela Muluku ni yole ohinamurumela.” — MAL. 3:18.
ELE NINKELA AHU OXUTTERA
Ninrowa woona moota Yehova aawoonelaawe mamwene a wIsraeli weera niiwexexe etthu owo ontthunaawe wa ale emmukokhorela olelo va.
1-2. Eheeni Biblya onhimaawe woohima sa mamwene a wIsraeli?
BIBLYA onnaahima alopwana 40 yaawo yaalamulela ntoko mamwene wIsraeli.a Soolepa iyo sinnahima mikhalelo sikina sa mamwene awo. Mwa ntakihero, mamwene makina ooreera yaapaka itthu ikina soonanara. Nrowe nthokorore voohima sa mwene Davidi. Yehova enre: “Murumeyi aka Davidi . . . akitthanre ni murima wothene, apankaka yeyo pahi eri yoloka vamaithoni vaka.” (1 Mam. 14:8) Menento mulopwana ola aapaka okonihana woohireerela ni muthiyana mmoha aathelinwe ni aaheeriha weera aiyawe yiiviwe okhottoni. — 2 Sam. 11:4, 14, 15.
2 Mwa mukhalelo mukina, mamwene makina oohiroromeleya yaapaka itthu ikina sooreera. Moone woohima sa Robowamu. Vamaithoni va Yehova, owo “àhèra sonanara.” (2 Sow. 12:14) Menento Robowamu aahiiwelela nlamulo na Muluku weera maloko 10 emwalanyihiwe mpuwa mwa omwene awe. Owo-tho aakhavihera muloko awe alipihaka icidade. — 1 Mam. 12:21-24; 2 Sow. 11:5-12.
3. Nikoho heeni nootepa otthuneya ninkhumelela, ni eheeni ninrowaahu woona mwa yoosoma ene yeela?
3 Ninnakhumelela nikoho nootepa otthuneya. Wakhala weera mamwene a wIsraeli yaapaka itthu sooreera ni soonanara, mwa mukhalelo heeni Yehova aawoonaawe okhala oororomeleya vamaithoni vawe? Waakhula wa nikoho nna, onoonikhavihera wiiwexexa etthu Yehova onaasaawe wa hiyo. Nnoorowa woona mikhalelo miraru apaale Yehova aavarenlaawe muteko weera asuwele mukhalelo wa mamwene a wIsraeli: murima aya, ottharuwa waya ni ovarexexa waya okokhorela weekhaikhai.
YAAMWAASA YEHOVA NI MURIMA AYA WOOTHEENE
4. Ovirikana heeni waakhanle voohima sa mamwene oororomeleya ni oohiroromeleya?
4 Mamwene yaamuhakalaliha Yehova, yannamukokhorela ni murimab aya wootheene. Mwene ooreera, Yosafati, ‘aamwaasa Yehova ni murima awe wootheene.’ (2 Sow. 22:9) Noolumaka woohima sa Yosiya, soolepa sinhima weera: “Khatonke okhala mwene aphwanaphwanne ni yowo, amurukunuxenle murima Yahvéh ni murim’awe wothene.” (2 Mam. 23:25) Nankha Salomoni yoowo mwa iyaakha sawe soomalihera aapanke itthu soonanara? “Murim’awe khawahakalanle”. (1 Mam. 11:4) Ni woohima sa Abiyami mwene mukina oohiroromeleya, soolepa sa mBiblyani sinhima weera: “Murim’awe khawahakalanle vomalela ni Yahvéh”. — 1 Mam. 15:3.
5. Muthalihe etthu entaphulelaaya omukokhorela Yehova ni murima wootheene.
5 Vanonto ontaphulela eheeni omukokhorela Yehova ni murima wootheene? Mutthu ommukokhorela Yehova ni murima wootheene, khampaka itthu paahi sinoonihera omukokhorela. Moovirikana ni eyo, owo onnamukokhorela Yehova mwaha wa nsivelo ni omoova, nave-tho owo onnalipiha nsivelo nno ni omoova ekumi awe yootheene.
6. Moota heeni ninrowaahu omukokhorelaka Yehova ni murima wootheene? (Miruku 4:23; Matheyo 5:29, 30)
6 Moota heeni ninrowaahu otthara matakihero a mamwene oororomeleya ni ovirelela okhalano murima woororomeleya? Nsepaka opaka itthu saakela oneeriha opaka itthu soonanara. Mwa ntakihero, matthekulelo oohireerela, pooti okawanya murima ahu. Ntoko onthamwene woohireerela ni miyuupuwelo sootthunaxa itthu sa weerutthuni. Wakhala weera nohoonelela weera yookhala etthu empatxera oriiriha onthamwene ahu ni Yehova, nipake ele ninweraahu weera nisepe etthu eyo. — Musome Miruku 4:23; Matheyo 5:29, 30.
7. Mwaha wa heeni oraaya wootthuneya osepa onthamwene woohireera?
7 Nihihiye murima ahu okawanyeyaka. Wakhala weera khanniikosoopa, hiyo pooti wiiwoka neeraka weera naatteliwa ni miteko sa omunepani, khanintthuneya osepa onthamwene woohireera. Weera nilikanxere, nkuupuwelani mureene vaate nihiku nooriira ni enviraaya epheyo. Mwaphiya owaani, munnaligari maakina oovihiha mpaani. Eheeni yaarowa okhumelela mwaahiwala mulako? Epheyo yooriira yaamurowa osareya mpaani mmo moowaakuveya. Ninxuttera eheeni? Nintthuneya opaka itthu ikina ohiya paahi otxa yootxa yoomunepani yeeyo envihiha onthamwene ahu ni Yehova. Nave-tho onnatthuneya owala mulako weera onthamwene woohireera yoowo ori ntoko ‘epheyo’ yooriira ya elapo ela naari mikhalelo soohireera, sihivolowe vamurimani vahu ni onikawanya. — Aef. 2:2.
AWO YAATTHARUWA SOOTTHEKA SAYA
8-9. Moota heeni mwene Davidi ni mwene Ezekiya yoonenlaaya nttaruxo? (Nwehe efootu .)
8 Ntoko nonnaahu muttuli, mwene Davidi aapaka yoottheka etokweene. Mene noomala mprofeti Natani omuleela yoottheka awe ele, Davidi moowiiyeviha, aattharuwa. (2 Sam. 12:13) Mwa masu awe yaawo elempwale va Nsalmu 51, hiyo ninnawera woona ottharuwa wawe ni murima wootheene. Davidi khaiyene aamweera wootherera ottharuwa iwe weera anwoke Natani ni weera ahittaruxiwe. — Nsal. 51:5, 6, 19 [51:3, 4, 17, NM] masu a vasulu.
9 Mwene Ezekiya aamutthekela-tho Yehova. Yooweereya ya mBiblyani enhima weera: “Murim’awe wàhìsunnuwiha. Mwa yeyo esara ya Muluku yàmmorela yowo, Yuda ni Yerusalemu.” (2 Sow. 32:25) Mwaha wa heeni Ezekiya aisunnuwinhaawe? Apaale owo anniisoona okhala a vasuluxa mwaha wa mihakhu aaraaweno, mwaha woowaawina Asiria naari olamihiwa mwa miiriira eretta aaraaweno. Pooti weeraka-tho wiisunnuwiha waamweeriha owoonihera aBabilonia mihakhu sawe. Mwaha woopaka eyo, aattaruxiwa ni mprofeti Yesaya. (2 Mam. 20:12-18) Mene ntoko mwene Davidi, moowiiyeviha Ezekiya aattharuwa. (2 Sow. 32:26) Okhwipi waya, Yehova annamoona ntoko mwene oororomeleya ‘aapaka yeeyo yaari yooreera.’ — 2 Mam. 18:3.
Mwene Davidi ni mwene Ezekiya moowiiyeviha yaattharuwa emaara yeeyo yaattaruxinwaaya mwaha wa soottheka saya (Nwehe eparagrafu 8-9)
10. Moota heeni mwene Amaziya oonenlaawe nttaruxo?
10 Moovirikana ni eyo, mwene Amaziya oYuda aapaka itthu sooreera “mene khahiyene ni murima womalela.” (2 Sow. 25:2) Etthu heeni yoonanara aapankaawe? Emaara Yehova aamukhavihenraawe waawina Adomi, Amaziya aakokhora ohoolo wa amuluku aya.c Nave emaara yeeyo aattaruxinwaawe ni mprofeti a Yehova, mwene Amaziya moowiisunnuwiha, aakhootta. — 2 Sow. 25:14-16.
11. Moovarihana ni 2 Akorinto 7:9, 11, eheeni nintthuneyaahu opaka weera nleveleliwe? (Nwehe efootu.)
11 Ninxuttera eheeni ni matakihero ala? Nintthuneya ottharuwa soottheka sahu ni opaka ele ninweraahu weera nihitthikele opaka veeli. Nankha naakhela miruku sa asitokweene a mmulokoni wa etthu enkhala ntoko ti yooyeva? Hiyo khontthuneya wuupuwelaka weera noonyanyaliwa ni Yehova naari ni asitokweene a mmulokoni. Mpaka mamwene ooreera a wIsraeli, khayaatthuneya okhootta miruku ni nttaruxo yaavahiwaaya. (Aheb. 12:6) Emaara ninttaruxiwaahu, nintthuneya (1) waakhulela moowiiyeviha, (2) opaka matxentxo ootthuneya ni (3) ovirelela onvarela Yehova ni murima wootheene. Wakhala weera nnoottharuwa soottheka sahu, Yehova onoonilevelela. — Mmusome 2 Akorinto 7:9, 11.
Emaara ninttaruxiwaahu, nintthuneya (1) waakhulela moowiiyeviha, (2) opaka matxentxo ootthuneya ni (3) ovirelela onvarela Yehova ni murima wootheene (Nwehe eparagrafu 11)f
AWO YAAVAREXEXA OKOKHORELA WEEKHAIKHAI
12. Eheeni yaawoonihera mamwene okhala oororomeleya?
12 Mamwene Yehova aawoonaawe okhala oororomeleya, yannavarexexa okokhorela weekhaikhai. Nave yannaakhavihera atthu opaka etthu emoha-moharu. Ekhaikhai weera awo yaakhalano mikhalelo soohimalela ntoko nonnaahu, mene awo yannamoova moomalela Yehova ni yaahiilipihera vantxipale omaliha okokhorela weethiru elapo aya.d
13. Mwaha wa heeni Yehova aamuttarunxaawe mwene Akhabi ntoko oohiroromeleya?
13 Nankha mamwene ale Yehova aattaruxaawe ntoko oohiroromeleya? Ekhaikhai weera khaiyene ikwaha sootheene awo yaapaka itthu soonanara. Mpaka mwene ootepa onanara, Akhabi, aahoonihera wiiyeviha ni ottharuwa mwaha woowiivoleihera wiiviwa wa Nabothi. (1 Mam. 21:27-29) Nave-tho owo aapaka icidade ni aahaakhavihera ana a Israeli owina mittetthe yaatuphelaaya. (1 Mam. 20:21, 29; 22:39) Mene Akhabi annakhavihera okokhorela weethiru mwaha wa amwaarawe. Mwaha wa yeeyo, owo khattharunwe. — 1 Mam. 21:25, 26.
14. (a) Mwaha wa heeni Yehova aamoonaawe mwene Robowamu okhala oohiroromeleya? (b) Eheeni yoonihera olamulelo wa mamwene oohiroromeleya?
14 Mmoone mwene mukina oohiroromeleya, Robowamu. Ntoko nonnaahu muttuli, owo aapaka itthu sintxipale sooreera mpuwa mwa olamulelo awe. Mene emaara omwene awe waalimpaaya, owo aahiya otthara miruku sa Yehova apakaka okokhorela weethiru. (2 Sow. 12:1) Muhoolo mwaya, owo aahiya okokhorela weekhaikhai ampatxera okokhorela weethiru. (1 Mam. 14:21-24) Khaiyene paahi aari Robowamu ni Akhabi yaahiñye okokhorela weekhaikhai. Ohima ekhaikhai, moovira etempu, mamwene mantxipale oohiroromeleya, yaakhalano mathowa mwaha wookhavihera okokhorela weethiru. Onooneya weera vamaithoni va Yehova, okokhorela weekhaikhai yaari etthu yootepa otthuneya weera emoonihere mwene aareene ooreera naari hooye.
15. Mwaha wa heeni ovarexexa okokhorela weekhaikhai oraaya wootthuneya wa Yehova?
15 Mwaha wa heeni okokhorela waaraaya wootepa otthuneya wa Yehova? Mwaha wooweera mamwene yaakhalano muritti woowaahoolela atthu a Muluku weera epakeke okokhorela weekhaikhai. Opwaha mwa yeeyo, okokhorela weethiru onnaweeriha atthu opaka yoottheka etokweene ni ohixariya. (Hos. 4:1, 2) Opwaha mwa yeeyo, mamwene ni atthu ale yaakhavihera, yanniivaherera wa Yehova. Nto Biblya onnalikanxera wiivoleihera waya okokhorela weethiru ni oraruwa. (Yer. 3:8, 9) Mutthu ommuraruwela mutthu othelannaaweno, khanoonihera ororomeleya wa mutthu owo. Moolikana ni eyo, murumeyi iivaherenre wa Yehova vaavo ompakaawe okokhorela weethiru, khanoonihera ororomeleya wa Yehova.e — Ola. 4:23, 24.
16. Vamaithoni va Yehova, eheeni emmoonihera mutthu okhala ooreera naari hooye?
16 Itthu heeni ninxutteraahu? Nintthuneya osepa okokhorela weethiru, menento nivarexexe okokhorela weekhaikhai ni ovirelela okhala mwemmo. Mprofeti Malakhiya ohiiwanyeiha nnene sene etthu emmweeriha mutthu okhala ooreera naari oonanara vamaithoni va Yehova. Owo olempe ha: “Vavale munimòna yovirikana naxariya ni mutakhali, yole onamurumela Muluku ni yole ohinamurumela.” (Mal. 3:18) Tivawonto, khanintthuneya ohiya etthu naari ohimalela wahu naari soottheka sahu sineerihaka ohiya onvarela Muluku. Ohiya onvarela Muluku, yoottheka etokweene.
17. Moota heeni omuthanla wahu mutthu oothelanano onrowaaya ovoleela omukokhorela wahu Yehova?
17 Wakhala weera nyuwo khamuthenle naari khamuthelinwe, nto munnuupuwela othela naari otheliwa, neereke nyuwo pooti woona moota masu a Malakhiya woohima sa omukokhorela Muluku, onvoleelaaya omuthanla wanyu mutthu oothelanano? Mutthu owo pooti okhalano mikhalelo sooreera, mene wakhala weera khananvarela Muluku eekhaikhai, neereke mutthu owo onnooniwa okhala axariya vamaithoni va Yehova? (2 Akor. 6:14) Ntoko mutthu oothelanano, neereke mutthu owo onoorowa wookhaviherani okhalano mikhalelo sooreera sa omunepani? Muupuwele ela: Asaarawe Salomoni pooti weeraka yaakhalano mikhalelo sooreera, mene awo khiyaamukokhorela Yehova, mwaha wa yeeyo, awo yaamweeriha Salomoni opatxera opaka okokhorela weethiru. — 1 Mam. 11:1, 4.
18. Eheeni asitiithi entthuneyaaya waaxuttihaka anamwane aya?
18 Asitiithi, nyuwo pooti ovarihela muteko sooweereya sa mBiblyani sa mamwene weera nwooperere anamwane anyu ororomeleya mpuwa mwa okokhorela wa Yehova. Mwaakhavihere wiiwexexa weera Yehova annamoona mwene okhala ooreera naari oonanara mwaha wa mukhalelo awe wa okumihera okokhorela weekhaikhai. Mwaaxuttihe anamwane anyu moorweela mwa masu ni matakihero a itthu soomunepani ntoko, omusoma Biblya, woonela mithukumano ni ovara muteko woolaleera, weera siri itthu sootthuneya opwaha itthu sootheene. (Math. 6:33) Opaka eyo enimwaakhavihera anamwane wunnuwihera onthamwene aya ni Yehova ehipwatthaka waari weera “asittithi aya ti Anamoona a Yehova.” Mwaahipaka eyo, awo pooti ohihela nipuro noopatxera mweekumini mwaya okokhorela weekhaikhai, naari awo pooti ohiya.
19. Yooweherera heeni ekhanle wa ole eemexenre onvarela Yehova? (Nwehe ekwaadru “Nyuwo pooti otthikela wa Yehova!”)
19 Mutthu eemexenre onvarela Yehova neereke khaanono yooweherera? Hooye, mwaha wooweera owo pooti ottharuwa ni otthikela okokhorela weekhaikhai. Weera apake eyo, owo ontthuneya ohiya wiisunnuwiha ni waakhulela nikhavihero na asitokweene a mmulokoni. (Yak. 5:14) Menento wiilipihera wawe wootheene khaiyene etthu nalikanxera ni otthikela wawe waakhuleliwa ni Yehova!
20. Wakhala weera nnimwaatakiha mamwene oororomeleya, Yehova onrowa onoonela hayi?
20 Itthu heeni ninxutteraahu ni mamwene a wIsraeli? Hiyo pooti okhala atthu oororomeleya wakhala weera nookhalano murima woowiivaherera wa Yehova. Onnatthuneya oxuttera ni soottheka sahu, ottharuwa ni opaka matxentxo ootthuneya. Nave onnatthuneya wuupuwelela otthuneya waya ovarexexa omukokhorela Muluku mmoha paahi a ekhaikhai. Wakhala weera nyuwo munoovirelela onvarexexa Yehova, owo oneereke owoonani nyuwo ntoko mutthu ompaka itthu sooreera vamaithoni vawe.
ETXIPO 45 Muupuwelo wa Murima Aka
a Mwa yoosoma ene yeela, masu ooweera “mamwene a wIsraeli” entthuna waahima mamwene ootheene yaalamulela atthu a Yehova, ohela mpuwa olamulelo wa mahimu meeli a oYuda, olamulelo wa mahimu 10 a wIsraeli naari mahimu 12 ootheene.
b MASU OOWIIWANYEIHIWA: Ikwaha sintxipale Biblya onnavarihela muteko masu ooweera “murima” weera ahime omutthu wa mpuwa, ohela mpuwa sootthuna, miyuupuwelo, soopaka, mikhalelo, osuwela wawe, itthu simmweeriha ni soolakela sawe.
c Oweharu, yaari yookhovelela wa mamwene oohiroromeleya waakokhorela amiluku yaakuxaaya wa miloko yaatuphelaaya.
d Mwene Asa aapaka soottheka itokweene. (2 Sow. 16:7, 10) Menento mwa ikharari owo onnahimmwa mBiblyani. Nnaamweera woopatxerani aakhoottiye ottaruxiwa, pooti weeraka muhoolo mwaya aattharuwa. Ohima mookwasa, soopaka sawe sooreera saahikhuneela soottheka sawe. Eyo entaphulela weera Asa aamukokhorela pahiru Yehova, ni annaasaasa omaliha okokhorela weethiru mpuwa mwa omwene awe. — 1 Mam. 15:11-13; 2 Sow. 14:2-5.
e Onooneya weera, malamulo meeli oopatxera mwa malamulo a Mose, yannakhoottiha omukokhorela mutthu naari etthu eri poothe ahikhanle Yehova. — Ott. 20:1-6.
f OTAPHULELA WA EFOOTU YA: Mmiravo mmoha yoowo ori mutokweene a mmulokoni, onnamuleela munna mmoha maxupo awe a ohapaliwa. Munna ole onnaakhulela moowiiyeviha miruku aavahinwaawe, ni onnapaka matxentxo ootthuneya, ni onnavirelela onvarela Yehova moororomeleya.