Mutakihe wiilipihera wa Yesu mmutekoni moolaleera

1. Mwa mukhalelo heeni atthu a Yehova evirikannaaya ni ale eniihima okhala akristu?

ETTHU emoha enweeriha arumeyi a Yehova ovirikana ni ale eniihima okhala makristu, mwaha wa wiilipihera waya mmutekoni moolaleera. (Tito 2:14) Imaara ikina, nyuwo pooti wooxupani okhala ni ntthuno noovara muteko woolaleera. Apaale nyuwo pooti okhalano moonelo mmoharu wa mutokweene mmoha a mmulokoni yoowo ohimme ha, “Imaara ikina, nkinkhalano ntthuno noovara muteko woolaleera.”

2. Emaara ekina etthu heeni ekhanle yoonixupa ni wiilipihera wahu mmutekoni moolaleera?

² Pooti weeraka hiyo onnansivela ovara miteko mikina sa mareherero a Yehova ohiya muteko woolaleera. Mwaha wa heeni? Mwaha wooweera vaavo nintekaahu ipreediyu sa mareherero a Yehova naari Impa sa Omwene, ninnaakhavihera asinna yaawo enviriha irisa sa iphattu, naari imaara ikina ninnaalipiha, nto moohipisa hiyo ninnoona sookhumelela sooreera ni eyo ennanihakalaliha. Mwa mukhalelo mukina, pooti weeraka hiyo nooviriha iyaakha sintxipale nivaraka muteko woolaleera muttetthe mmoha yoowo atthu vakhaaniini paahi enooniheraaya ntthuno. Naari apaale pooti weeraka hiyo ninnaaphwanya atthu yaawo enkhootta mitthenka sooreera. Nave-tho hiyo noosuwela weera, vaavo nnaattamelaahu omala wa elapo ela, mitthenka sooreera ninlaleyaahu sineereke okhoottiwa. (Math. 10:22) Etthu heeni enrowa onikhavihera ovirelela naari waatxeerera wiilipihera wahu ni muteko woolaleera?

3. Etthu heeni ninxutteraahu woohima sa wiililipihera wa Yesu ni ntakihero nri va Luka 13:6-9?

³ Hiyo pooti oxuttera etthu woohima sa wiilipihera mmutekoni moolaleera nithokororaka ntakihero na Yesu. Emaara aavaraawe muteko woolaleera, owo khaahiñye wiilipihera. Mweekhaikhai, noovira etempu, owo aahaatxeerera muteko awe. (Mmusome Luka 13:6-9.) Hiihaale ntoko mulopwana aaphatteñye mwiri wa ifiiku aavirinhaawe iyaakha tthaaru eereraka okosoopa mwiri yoowo wahaakumiha soowiima, Yesu aaviriha iyaakha tthaaru aalaleeraka ayuda, ni antxipale a yaawo khiyaamwaakhulenle. Menento, hiihaale ntoko mulopwana ole ahaahiñyaawe oweherera mwiri wa efiiku, Yesu khaahiñye waalaleera atthu naari khaavukunle wiilipihera wawe mmutekoni moolaleera. Moovirikana niiyo, owo aahaatxeerera wiilipihera wawe weera avare mirima saya.

4. Itthu heeni ixexe sa ntakihero na Yesu ninrowaahu othokorora?

⁴ Mwa yoosoma ene yeela, nnoorowa woona moota Yesu oonihenraawe wiilipihera, otepaxa wene mpuwa mwa mweeri 6 soomalihera sa muteko awe woolaleera. (Nwehe enoota ya yoosoma “Avinyaka” va Luka 10:1.) Oxuttera ni itthu owo oxuttinhaawe ni otakiha ele aapakaawe, onoorowa onikhavihera ovirelela wiilipihera olelo va. Nnoorowa woona ntakihero na Yesu mwa mikhalelo mixexe: (1) Owo annawehexexa yootthuna ya Yehova, (2) annawehexexa iprofesiya sa mBiblyani, (3) owo annaroromela nikhavihero na Yehova, ni (4) owo annaroromela weera atthu akina yaamurowa omwiiwelela.

OWO ANNAWEHEXEXA YOOTTHUNA YA YEHOVA

5. Moota heeni Yesu oonihenraawe weera aawehexexa opaka yootthuna ya Muluku?

⁵ Yesu annalaleera mwa nthiti “mitthenka sa Omwene” mwaha wooweera aasuwela weera owo waari muteko yoowo Muluku aatthunaawe weera avareke. (Luka 4:43) Yesu aapaka muteko ola woolaleera okhala etthu yootthuneya mweekumini mwawe. Mpaka okhwipi wa muteko awe, owo anneetteetta “esidade ni esidade, muttetthe ni muttetthe” aaxuttihaka atthu. (Luka 13:22) Owo-tho aahaatxentxeriha atthareli akina weera evareke vamoha ni owo ntoko anamalaleera. — Luka 10:1.

6. Moota heeni muteko woolaleera onvarihanaaya ni miteko mikina? (Nwehe efootu.)

⁶ Olelo-tho, olaleya mitthenka sooreera, muteko wootepa otthuneya Yehova ni Yesu entthunaaya weera nivareke. (Math. 24:14; 28:19, 20) Wookhala ovarihana eriyari ya muteko woolaleera ni miteko mikina sa mmarehereroni mwa Yehova. Mwa ntakihero, ninnateka Impa sa Omwene naari ninnakhavihera oBetheli ni yoolakela yoowaakhavihera asinna envara muteko woolaleera. Vaavo enkhumelelaaya erisa ya ephattu, ninniilipihera weera asinna ni asirokora ekhaleno itthu enhaawelaaya seiyo sinrowa waakhavihera otthikela woonela mithukumano ni ovara muteko woolaleera. Vaavo nnoonelelaahu otthuneya waya ovara muteko woolaleera ni nnuupuwelelaahu weera etthu yootepa otthuneya Yehova ontthunaawe weera nipakeke, ninnakhalano ntthuno noovara muteko woolaleera moohihiyerereya. János, mutokweene mmoha a mmulokoni a oHungria, ohimme ha, “Kinnuupuwela weera mwa miteko soothesene sa mareherero a Yehova, muteko wootepa otthuneya muteko woolaleera, owo muteko woopatxera nthanlelinwaahu.”

7. Mwaha wa heeni Yehova ontthunaawe weera nivireleleke ovara muteko woolaleera? (1 Timotheyo 2:3, 4)

⁷ Hiyo pooti waatxeerera wiilipihera wahu mmutekoni moolaleera, niwoonaka atthu ntoko Yehova onwonelaawe. Owo ontthuna weera atthu antxipale yiiwe mitthenka sooreera ni yaakhulele. (Mmusome 1 Timotheyo 2:3, 4.) Weera eyo yeereye, owo onnantxentxeriha weera nikhale oolikaneene olaleera mitthenka sooreera sinvuluxa ikumi. Mwa ntakihero, ebroxuura Mwaasiveleke atthu — Mwaapakeke atthareli yookhalano miruku soovareleya muteko sinrowa onikhavihera opatxeriha otthekula ni yoolakela yoowaapaka atthareli. Nnaamweera viinaano va atthu ehooniheraka ntthuno, pooti weeraka enookhalano eparakha yoopaka eyo mpuwa mwa maxupo matokweene. Etthu nnaaleelaahu viinaano va, pooti weeraka enrowa okhala yeeyo enrowa oweeriha waakhulela muhoolo. Mene weera eyo yeereye, hiyo nintthuneya ovirelela olaleera.

OWO ANNAWEHEXEXA IPROFESIYA SA MBIBLYANI

8. Moota heeni osuwela iprofesiya sa mBiblyani waavolenlaaya moota Yesu aavarelaawe muteko etempu awe?

⁸ Yesu aahiiwexexa moota iprofesiya sikina sa mBiblya seeraaya sikwanele. Owo aasuwela weera aarowa ovara muteko awe woolaleera mpuwa mwa iyakha tthaaru ni emeya. (Dan. 9:26, 27) Owo-tho aasuwela weera yaaprofetisariwa woohima sa woowi ni moota owo aakelaawe okhwa. (Luka 18:31-34) Itthu Yesu aasuwenlaawe saavoleela moota owo aavarelaawe muteko etempu awe. Yookhumelela aya ti yooweera, owo aahilaleera mwa nthiti weera amalihe muteko aavahinwaawe weera avare.

9. Mwaha wa heeni iprofesiya sa mBiblyani sinneerihaaya olaleera moowiilipihera?

⁹ Wiiwexexa wahu iprofesiya sa mBiblyani onnaneeriha olaleera moowiilipihera. Noosuwela weera etempu ehanle weera makhalelo a elapo ela emale, ehanle vakhaani. Noosuwela weera sooweereya sa viinaano ni mikhalelo sa atthu, sinoonihera ele Biblya onhimaawe woohima sa mahiku oomalihera. Ninnoonelela-tho moota ohiiwanana wa epotencia ya elapo yootheene Anglo-Americana ni Rússia vamoha ni ale emmukhavihera enkwaniheraaya eprofesiya woohima sa mwene a elapo yoohitto ni mwene a elapo yoota “mahiku òmalihera.” (Dan. 11:40) Ninniiwexexa-tho weera epotencia ya elapo yootheene Anglo-Americana enthoonyera meetto sa eneneero enhimwa va Daniyeli 2:43-45. Ninnaroromela weera ntoko eprofesiya enhimaaya, Omwene wa Muluku moowaakuveya onoonyaanya ikuverno sa atthu. Iprofesiya sootheene iya sinnoonihera weera ninkhala mahiku oomalihera ni weera nintthuneya olaleera moowaakuveya.

10. Mwa mikhalelo heeni mikina iprofesiya sa mBiblyani sinneerihaaya olaleera moowiilipihera?

¹⁰ Nave-tho iprofesiya sa mBiblyani sinnanivaha mitthenka seiyo hiyo nintthunaahu waaleela atthu akina. Carrie, murokora mmoha onvara oRepública Dominicana, ohimme ha: “Iprofesiya woohima sa itthu sooreera Yehova olaihenraawe muhoolo, sinnakeeriha miyo waaleela atthu akina ekhaikhai.” Owo onnaatxeerera eeraka: “Emaara kinoonaaka itthu atthu envirihaaya olelo, kinnoonelela weera awo ennatthuneya-tho wiiwa woohima sa itthu sooreera Yehova olaihenraawe.” Iprofesiya sa mBiblyani sinnaneeriha ohikhulumuwa mwaha wooweera noosuwela weera Yehova tonhoolela muteko ola woolaleera. Leila, yoowo onkhala oHungria, ohimme ha: “Yesaya 11:6-9 onnakeeriha waalaleera mitthenka sooreera atthu ale enkhala ntoko khenrowa waakhulela. Miyo koosuwela weera mutthu ori poothe onoorowa opaka matxentxo akhaviheriwaka ni Yehova.” Ni Christopher, munna mmoha oZâmbia, ohimme ha: “Ntoko Marko 13:10 onhimaawe, mitthenka sooreera sinnalaleeriwa elapo yootheene, ni miyo kinnahakalala okhavihera okwanela wa eprofesiya ela.” Eprofesiya heeni ya mBiblyani enweerihani nyuwo ovirelela olaleera?

OWO ANNAROROMELA NIKHAVIHERO NA YEHOVA

11. Mwaha wa heeni Yesu aatthuneyaawe omuroromela Yehova weera avirelele olaleera moowiilipihera? (Luka 12:49, 53)

¹¹ Yesu annaroromela nikhavihero na Yehova weera avirelele olaleera mwa nthiti. Nnaamweera owo aari ooreera murima, owo aasuwela weera mitthenka sooreera saamukumihera ohiwanana ni osonttiwa otokotoko. (Mmusome Luka 12:49, 53.) Yookhumelelaaya, muteko wa Yesu waaweeriha ahooleli a ittiini ikwaha sintxipale otthuna omwiiva Yesu. (Yoh. 8:59; 10:31, 39) Mene Yesu aavirelela olaleera mwaha wooweera asuwela weera Yehova aari ni owo. Owo ohimme ha: “Nkikhanle meekhaaka, Atiithi ekirumme ari ni miyo. . . . Ale ekirumme khekihiñye; eri ni miyo, mwaha wooweera ikwaha sootheene kinnapaka ele enaasivela.” — Yoh. 8:16, 29.

12. Moota heeni Yesu aatxentxerinhaawe atthareli awe weera evirelele olaleera nnaamweera yaatthara-tthariwa?

¹² Yesu aahaaleela atthareli awe weera yaatthuneya ororomelaka nikhavihero na Yehova. Ni aahaaroromeliha imaara sintxipale weera Yehova aamwaakhavihera ohela mpuwa yaatthara-tthariwaka. (Math. 10:18-20; Luka 12:11, 12) Menento aawooperera weera ekhaleke oowiikosoopa. (Math. 10:16; Luka 10:3) Owo aahaaleela-tho weera khaayaatthuneya waakhanyerera atthu yaale yahaatthuna wiiwa mitthenka sooreera. (Luka 10:10, 11) Ni aahaaleela weera etthaweke wakhala weera yaamutthara-tthariwa. (Math. 10:23) Nnaamweera Yesu aari oowiilipihera ni aamuroromela Yehova, owo anniikosoopa mwa soowoopiha. — Yoh. 11:53, 54.

13. Mwaha wa heeni nyuwo muntthuneyaanyu ororomelaka weera Yehova onoorowa wookhaviherani?

¹³ Hiyo ninnahaawela nikhavihero na Yehova weera nivirelele olaleera moowiilipihera emaara nintthara-tthariwaahu. (Apok. 12:17) Mwaha wa heeni nyuwo muntthuneyaanyu ororomelaka weera Yehova onoorowa wookhaviherani? Muupuwele nivekelo na Yesu nlempwale va Yohani ekapiitulu 17. Yesu aahinvekela Yehova weera aawehexexeke arummwa awe, ni Yehova aahaakhula nivekelo nno. Eliivuru ya Miteko ennahima moota Yehova aakhavihenraawe arummwa olaleera mwa nthiti nnaamweera yaatthara-tthariwa. Nivekelo Yesu aapankaawe, aahinvekela-tho Yehova weera aakosoopeke ale yaakela woonihera nroromelo wa mitthenka seiyo arummwa yaarowaaya olaleyaka, eyo enoohelani mpuwa nyuwo. Yehova khohiñye waakhula nivekelo na Yesu, owo onoorowa wookhaviherani hiihaale ntoko aakhavihenraawe arummwa. — Yoh. 17:11, 15, 20.

14. Ninsuwela moota heeni weera nnoorowa okhala oolikaneene ovirelela olaleera moowiilipihera? (Nwehe efootu.)

¹⁴ Nnaamweera okhalaka wooxupa olaleera mwa nthiti mitthenka sooreera mahiku ala oomalihera, ninnaakhela nikhavihero nootheene hiyo ninhaawelaahu. (Luka 21:12-15) Hiihaale ntoko Yesu ni atthareli awe, hiyo ninnaahiya atthu othanla wakhala weera enimwiiwa naari hooye, ni ninnasepa onyakulihana. Naari elapo yeeyo muteko ahu onkhoottihiwaaya, asinnihu ennavirelela olaleera mitthenka sooreera mwaha wooweera ennamuroromela Yehova ohiya ikuru saya. Hiihaale ntoko Yehova aavanhaawe ikuru arummwa awe a eseekulu yoopatxera, olelo-tho onnanivaha ikuru weera “olaleya okwaniheriwe” etthu yeeyo emmuhakalaliha. (2 Tim. 4:17) Nyuwo pooti ororomela weera, mwamuroromela Yehova munoovirelela olaleera mwa nthiti.

OWO AAVIRELELA OKHALANO MOONELO WOOREERELA

15. Etthu heeni enoonihera weera Yesu aakhalano moonelo wooreerela woohima sa muteko woolaleera?

¹⁵ Yesu aavirelela okhalano moonelo wooreerela woohima sa muteko awe woolaleera, eyo yaamukhavihera ovirelela wiilipihera mmutekoni mwawe. Mwa ntakihero, okhwipi wa eyaakha 30 Kristu awiiyeene, Yesu aahoona weera atthu antxipale yaari oolikaneene waakhulela muteko awe woolaleera, ni aahaalikanxera ni ematta eri yoolikaneene weera ehemphwe. (Yoh. 4:35) Evinreene eyaakha emoha, owo aahaaleela atthareli awe eeraka: “Soohepha siri sintxipale.” (Math. 9:37, 38) Ni muhoolo mwaya, owo aattittimihera veeli eeraka: “Soohepha sohaatta . . . Tivawonto, munvekele Mwaneene ematta weera aaruuhe anamuteko akina.” (Luka 10:2) Yesu annaroromela weera yaamurowa okhala atthu yaarowa waakhulela mitthenka sooreera, ni emaara atthu yaapakaaya eyo, owo annahakalala. — Luka 10:21.

16. Moota heeni maphwanaphwaniho a Yesu enooniheraaya moonelo wooreerela woohima sa muteko woolaleera? (Luka 13:18-21) (Nwehe efootu.)

¹⁶ Yesu aahaaxuttiha atthareli awe okhalano moonelo wooreerela woohima sa mitthenka yaalaleeraaya, yeeyo yaarowa waakhavihera olaleera moowiilipihera. Mwa ntakihero, moone maphwanaphwaniho meeli. (Mmusome Luka 13:18-21.) Yesu aavarihela muteko niphwanaphwaniho na enuku ya emostarta weera axuttihe weera mitthenka sa Omwene saarowa omwara-mwareya mwa mukhalelo wootikhiniha. Ni niphwanaphwaniho nikina owo aalikanxera mitthenka sa Omwene ni efaramenta, mwaha wooweera mitthenka sooreera sa Omwene saarowa olaleeriwa mapuro mantxipale a mulaponi ni iyo sanweeriha atthu opaka matxentxo, nnaamweera matxentxo awo yahaarowa wooneleliwa moowaakuveya ni atthu akina. Mwa yeeyo, Yesu aahaakhavihera atthareli awe woona weera yaamukhumela nnene ni mitthenka yaalaleeraaya.

17. Mathowa heeni nraahuno enneeriha ovirelela okhalano moonelo wooreerela woohima sa muteko woolaleera?

¹⁷ Hiyo ninnavirelela olaleera moowiilipihera vaavo nnoonaahu etthu eneereya elapo yootheene. Yeele eri eyaakha, imiliyawu sintxipale sa atthu enoonihera ntthuno ennoonela Muthukumano wa wuupuwelela okhwa wa Yesu nave ennamusoma Biblya ni hiyo. Atthu antxipale ennapatisiwa nave ennavara muteko woolaleera vamoha ni hiyo. Hiyo khansuwenle atthu akavi ehanle weera yaakhulele muteko ahu woolaleera, mene ninnasuwela weera Yehova oneera othukumanyaka muloko mutokotoko wa atthu, yoowo onrowa ovuluwa mpuwa mwa maxupo matokweene yaawo enaattamela. (Apok. 7:9, 14) Yehova tori mwaneene a muteko woolaleera ni owo onnaroromela weera atthu antxipale enoorowa waakhulela mitthenka sooreera, mwa yeeyo hiyo onnatthuneya ovirelela olaleera.

18. Nintthuna weera atthu akina yooneke eheeni wa hiyo?

¹⁸ Ovinyera khalayi atthareli a Yesu ennasuweliwa mwaha wa nthiti naya mmutekoni moolaleera. Vaavo atthu yoonaaya wiilipihera wa arummwa, ‘yaasuwela weera yaaheetta ni Yesu.’ (Mit. 4:13) Hiyo-tho, nintthuna olaleya mitthenka sooreera moolipa murima ni moohakalala. Ni pooti weeraka atthu enimoonelela weera nintthara ntakihero na Yesu.