MWAHA ONTHOKORORIWA 20
ETXIPO 67 “Mulaleye Masu a Muluku”
Muhiye nsivelo niweerihakani olaleera!
“Ni onaphwanela toko wi Evanjelyu elaleriweke miloko sothene.” — MAR. 13:10.
ELE NINKELA AHU OXUTTERA
Ninrowa woona moota nsivelo ninneerihaaya okhala anthiti ni ovara moororomeleya muteko woolaleera.
1. Eheeni nixuttenraahu ni muthukumano wa eyaakha ya 2023?
MUTHUKUMANO wa eyaakha ya 2023,a naahaakhela soowiiwanyeihiwa soohakalaliha woohima sa soororomela sahu nave-tho naahiiwa soohimmwa ikina soohakalaliha woohima sa muteko ahu woolaleera. Mwa ntakihero, nooxuttera weera, atthu akina pooti okhalano eparakha yookhala vamoha ni atthu a Yehova noomala Babilonia mutokweene onyaanyiwa. Nave noosuwela weera ovinyera mweeri wa Novembro a 2023, anamalaleera a Omwene khenrowa ovekeliwa erelatoriyu ya muteko aya woolaleera. Neereke matxentxo ala anneeriha muteko woolaleera okhala woohitthuneya, ni woohaakuveya? Waakhula ti wooweera hooye!
2. Mwaha wa heeni nihiku nri poothe ninvira muteko woolaleera ontthuneyaaya ovariwa moowaakuveya? (Marko 13:10)
2 Nihiku nri poothe ninvira, muteko ahu woolaleera onnatthuneya ovariwa moowaakuveya. Mwaha wa heeni? Mwaha wooweera etempu eneera emalaka. Moone ele Yesu aahimmaawe woohima sa muteko awe woolaleera mahiku oomalihera. (Mmusome Marko 13:10.) Moovarihana ni ele eliivuru ya Matheyo ehimmaaya, Yesu aahimme weera mitthenka sooreera saamurowa olaleeriwa elapo yootheene ehinaaye ophiya “emalihero.” (Math. 24:14) Masu ala entaphulela omala moomalela itthu sootheene soonanara sa elapo ela ya Satana. Yehova oothanla “nihiku ni ehuhu” wa itthu sootheene sinrowa weereya moohipisa va. (Math. 24:36; 25:13; Mit. 1:7) Nenne nri nihiku ninvira ninnanaattameliha etempu eyo. (Arom. 13:11) Niwehereraka eyo, ninnatthuneya ovirelela olaleera mpaka ophiya emalihero.
3. Eheeni enneeriha olaleera?
3 Nuupuwelaka woohima sa muteko ahu woolaleera, onookhala wooreera wiikoha ha: Mwaha wa heeni ninlaleyaahu mitthenka sooreera? Mwa masu vakhaani, ti nsivelo ninneeriha olaleera. Etthu nimpaka ahu mmutekoni moolaleera ennoonihera nsivelo nahu ni mitthenka sooreera, nsivelo nahu wa atthu ni opwaha sootheene, nsivelo nahu ni Yehova ni nsina nawe. Vano nrowe nthokorore ipontu iya.
NIINNALALEERA MWAHA WOOWEERA NINNASIVELA MITTHENKA SOOREERA
4. Nnoonela hayi vaavo nnaakhelaahu mitthenka sooreera?
4 Neereke nyuwo munnaweera wuupuwelela moota mwiisoonenlaanyu emaara mwaakhenlaanyu mitthenka sooreera, apaale oyariwa wa mwana veemusini vanyu naari emaara yeeyo mwaavahinwaanyu muteko yoowo mwaahaawelaanyu vantxipale? Moohihovela, nyuwo mwaahakalala vantxipale mpaka waaleela mitthenka iya sooreera amusi anyu naari asinthamwene anyu. Neereke etthu ntoko eyo yooheereya emaara yeeyo mwiiwalaanyu mitthenka sootepa oreera siri mitthenka sooreera sa Omwene wa Muluku?
5. Moota heeni nyuwo mwiisoonenlaanyu ekwaha yoopatxera mwaaxuttenraanyu ekhaikhai? (Nwehe efootu.)
5 Muupuwele moota nyuwo mwiisoonenlaanyu ekwaha yoopatxera mwaaxuttenraanyu ekhaikhai. Nyuwo mwaahoonelela weera Tiithi anyu a wiirimu onnoosivelani, ni owo ontthuna weera nyuwo mweereleke eparte emusi awe ya atthu emmukokhorela. Owo oolaihera omaliha ovoreya ni ohaawa, nyuwo pooti oweherera owoona veeli amusi anyu ale ekhwiiye evinyererihiwaka mwa elapo enyowani ni itthu ikina. (Mar. 10:29, 30; Yoh. 5:28, 29; Arom. 8:38, 39; Apok. 21:3, 4) Ikhaikhai iya saahakalaliha murima anyu. (Luka 24:32) Nyuwo mwannasiveliwa vantxipale ni ele mwaaxutteraanyu, ni khamwaatthuna ovitha ikhaikhai iya sootepa oreera vamurimani vanyu. — Munwehe-tho Yeremiya 20:9.
Emaara niiwalaahu mitthenka sooreera, khinaatthuna wiiyaathi vamurimani vahu ikhaikhai iya sootepa oreera! (Nwehe eparagrafu 5)
6. Eheeni nyuwo muxuttenraanyu ni yooweereya ya Ernest ni Rose?
6 Moone yooweereya ela. Munna mmoha oneeriwa Ernestb emaara aaraaweno iyaakha 10 apapa awe yaahikhwa. Ernest onnuupuwela: “Miyo kanniikoha: ‘Awo eronwe wiirimu naari aahiya okhala wa mahiku ootheene?’ Miyo kannaakhalela nrima anamwane akina yaarino asipapaya.” Ernest ikwaha sootheene annarowa omahiye, ni annakokhorela nihiye na apapa awe, ni annavekela eeraka: “Txontte Muluku, kintthuna osuwela apapaka eraayawo.” Sivinreene iyaakha 17 apapa awe ekhwiiyeene, Ernest aahaakhela yoosoma ya Biblya, yeeyo owo aakhulenlaawe. Owo aahakalala vantxipale vaavo aasuwenlaawe weera alipa ookhwa khensuwela etthu, hiihaale ntoko mutthu onkonaawe, nave weera Biblya oolaihera weera muhoolo onookhala ovinyerera wa alipa ookhwa. (Koh. 9:5, 10; Mit. 24:15) Vano, owo oophwanya waakhuliwa wa makoho yaawo yaamuxupa mwa etempu yintxipale! Ernest aahakalala vantxipale ni ikhaikhai seiyo aaxuttenraawe mBiblyani. Mwaarawe, Rose, aapatxera omusoma Biblya vamoha nuuwo ni yannalaleya mitthenka sa nsivelo sa Omwene. Eyaakha ya 1978 awosa yaabatiziwa. Awosa moohakalala yannaaleela soororomela saya amusi aya, asinthamwene aya, ni atthu ale yaatthuna wiiwa. Yookhumelelaaya ti yooweera, Ernest ni Rose yaahaakhavihera atthu oophiyeraka 70 obatiziwa.
7. Eheeni eneereya vaavo nsivelo ni ikhaikhai sa mBiblyani sininnuwaaya vamurimani? (Luka 6:45)
7 Moohihovela, vaavo ikhaikhai sa mBiblyani sinunnuwaaya vamurimani vahu, hiyo khaninwera omaala. (Mmusome Luka 6:45.) Ninniisoona ntoko atthareli a Yesu a eseekulu yoopatxera yaawo yenre: “Hiyo khannawerya ohiya wuluma seiyo nónnahu ni nìwalahu.” (Mit. 4:20) Hiyo ninnasiveliwa vantxipale ni ekhaikhai mpaka otthuna waaleela atthu antxipale.
NINNALALEERA MWAHA WOOWEERA NINNAASIVELA ATTHU
8. Eheeni enneeriha otthuna waalaleera atthu akina mitthenka sooreera? (Nwehe ekwaadru “Mwaasiveleke atthu — Mwaapakeke atthareli.”) (Nwehe efootu.)
8 Hiihaale ntoko Yehova ni Mwana awe, hiyo ninnaasivela atthu. (Mir. 8:31; Yoh. 3:16) Hiyo ninnaamorela ikharari atthu ale ‘ehimusuwenle Muluku’ nave-tho ‘ehikhanleno yooweherera.’ (Aef. 2:12) Awo ennaxupeya vantxipale ni maxupo a ekumi, mene hiyo nookhalano etthu yootepa oreera atthu awo enhaawelaaya yeeyo envuluxa ekumi, siri mitthenka sooreera sa Omwene wa Muluku. Nsivelo nahu ni waamorela wahu ikharari atthu awo onnaneeriha wiilipihera weera naaleele mitthenka sooreera. Mitthenka iya sooreera pooti waavaha yooweherera vamurimani vaya, waakhavihera okhalano ekumi yoohakalaliha viinaano va, nave waavaha yooweherera ya “ekumi yekhaikhai,” yeeyo eri ekumi yoohimala mu elapo enyowani ya Muluku. — 1 Tim. 6:19.
Nsivelo nahu ni waamorela wahu ikharari atthu onoorowa oneeriha wiilipihera weera naalaleere mitthenka sooreera (Nwehe eparagrafu 8)
9. Etthu heeni ninhimaahu woohima sa muhoolo ni mwaha wa heeni? (Ezekiyeli 33:7, 8)
9 Nave-tho nsivelo nahu ni atthu ninnaneeriha waaleela woohima sa emalihero enaattamela ya elapo ela yoonanara. (Mmusome Ezekiyeli 33:7, 8.) Hiyo ninnaamorela ikharari anamwaattamanani ahu nave amusi ahu ale ehikhanleno nroromelo, antxipale entthara mikhalelo sa ekumi ehisuwelaka etthu enrowa owa weiwo “onokhale ohawa otokotoko, wowisiso ohitonke okhumelela, opatxera elapo mpaka ehuhu ya nanano, nari mano khorwa okhala.” (Math. 24:21) Nintthuna weera atthu awo esuwele ele enrowa weereya mpuwa mwa othoriha iwo weera ettiini yoowootha enoorowa onyaanyiwa. Ni onyaanyiwa wa itthu iyo soonanara onoorowa okumihera ekhotto ya Harmagedoni. (Apok. 16:14, 16; 17:16, 17; 19:11, 19, 20) Ninnavekela weera nummero nintxipale na atthu ala apaale naakhulele mitthenka iya ni epwexeererane ni hiyo mwa okokhorela weekhaikhai viinaano va. Vanonto ankha atthu ale ehintthuna wiiwa mitthenka iyo viinaano va waahela mpuwa amusi ahu oosiveleya?
10. Mwaha wa heeni nintthuneyaahu waaleela atthu moowaakuveya?
10 Ntoko yiiwanyeihinwaaya mwa yoosoma evinre, pooti weeraka Yehova onoorowa waavuluxa atthu ale enrowa opaka matxentxo ni murima aya wootheene vaavo enrowaaya omoona Babilonia mutokweene anyaanyiwaka. Wakhala weera eyo enimweereya, nto onnooneya weera onnatthuneya opaka moowaakuveya muteko ola woolaleera. Muupuwele etthu ela: Etthu hiyo nnaaleelaahu atthu awo viinaano va, pooti wuupuwela muhoolo. (Munwehe-tho Ezekiyeli 33:33.) Apaale awo enoorowa wuupuwela etthu naalenlaahu ni yiiwalaaya ni opwexeererana ni hiyo mwa okokhorela weekhaikhai moohipisa. Hiihaale ntoko kwaarta ole aaweherera mapresu aatxentxalaawe miyuupuwelo sawe vaavo ‘yeereñyaaya etetere etokweene,’ apaale atthu akina ehinaakhulela mitthenka viinaano va enoorowa otxentxa mirima saya vaavo Babilonia mutokweene yowo onnanariha elapo onrowaawe onyaanyiwa. — Mit. 16:25-34.
NINNALALEERA MWAHA WOOWEERA NINNAMUSIVELA YEHOVA NI NSINA NAWE
11. Moota heeni nnanvahaahu Yehova ovuwa, nttittimiho ni owera? (Apokalise 4:11) (Nwehe efootu.)
11 Etthu etokweene enneeriha olaleya mitthenka sooreera, mwaha wooweera ninnamusivela Yehova Muluku ni nsina nawe nootteela. Muteko woolaleera onnanivaha eparakha yonvuwiha Muluku yoowo nimmusivelaahu. (Mmusome Apokalise 4:11.) Hiyo ninnaakhulela ni murima ahu wootheene weera Yehova Muluku onnaphwanela waakhela ovuwa, nttittimiho, ni owera wa arumeyi awe oororomeleya. Hiyo ninnanvaha Yehova ovuwa ni nttittimiho vaavo nnaaleelaahu atthu akina weera Yehova ‘oopattuxa soothesene’ ni weera hiyo nookhala mwaha wooweera owo oonipattuxa. Hiyo ninnanvaha owera, aani owera wahu vaavo ninvarihelaahu muteko etempu ahu, ikuru sahu, ni itthu nraahuno weera naaleele atthu akina mitthenka sooreera wakhala weera makhalelo ahu ennaneemerera. (Math. 6:33; Luka 13:24; Akol. 3:23) Mwa masu vakhaani, hiyo onnanisivela wuuluma woohima sa Muluku yoowo nimmusivela ahu. Nave hiyo ninnatthuna vantxipale waaleela atthu akina woohima sa nsina na Muluku ni ele nintaphulelaaya nsina nno. Mwaha wa heeni?
Ninnanvaha Yehova owera vaavo ninvarihelaahu muteko etempu ahu, ikuru sahu ni itthu nraahuno weera nilaleye mitthenka sooreera moomalela wakhala weera mikhalelo sahu sinnaneemerera (Nwehe eparagrafu 11)
12. Moota heeni nintteelihaahu nsina na Yehova mmutekoni moolaleera?
12 Nsivelo nahu ni Yehova ninnaneeriha otteeliha nsina nawe. (Math. 6:9) Hiyo nookhalano muritti wootteeliha nsina na Yehova mwa soowootha sootheene Satana oothenraawe nsina nno. (Eph. 3:1-5; Yobi 2:4; Yoh. 8:44) Mmutekoni moolaleera, hiyo ninnamwaakiha Muluku ahu, vaavo nnaaleelaahu ekhaikhai woohima sa yoowo atthu ale antthuna wiiwa. Hiyo nintthuna weera atthu ootheene esuwele weera mukhalelo wootepa otthuneya wa Yehova, ti nsivelo, ni weera olamulela wawe ti wa exariya, nave Omwene awe moohipisa va onoorowa omaliha maxupo ootheene ni onoorowa owiiha murettele ni ohakalala wa atthu ootheene. (Nsal. 37:10, 11, 29; 1 Yoh. 4:8) Vaavo nnaakiheraahu olamulela wa Yehova mmutekoni moolaleera, ninnatteeliha nsina nawe nave ninnahakalala mwaha woosuwela weera ninnatteeliha-tho nsina nahu. Moota heeni?
13. Mwaha wa heeni nniiteexaahu mwaha wookhala Anamoona a Yehova? (Yesaya 43:10-12)
13 Yehova ooniitthana hiyo weera nikhale ‘anamoona awe.’ (Mmusome Yesaya 43:10-12.) Iyaakha vakhaani sa muttuli, ekaarta ya Mukuttula Woolamulela yaahimme ha: “Nttittimiho ntokweene mutthu ori poothe onrowaawe okhalano ni ohakalala ori wiitthaniwa Namoona a Yehova.”c Mwaha wa heeni? Moone ntakihero nna. Waakhanle weera nyuwo mwammuhaawela mutthu weera akhale namoona anyu wa etthu enrowa wuulummwa otribunale, nyuwo mwaamurowa omuthanla mutthu mmusuwenlaanyu nnene sene ni mummuroromelaanyu, mutthu yoowo mikhalelo sawe seera soonihere onamoona woororomeleya. Emaara yeeyo Yehova aanithanlaawe weera nikhale Anamoona awe, owo ohoonihera weera oonisuwela nnene ni onnanroromela weera noonihere weera owo Muluku mmoha paahi eekhaikhai. Hiyo ninniisoona okhala atthu oottittimiheya mwaha wookhala Anamoona awe. Nto onnatthuneya ottottela mureerelo iparakha sootheene weera naasuwelihe atthu nsina nno, nave nivaanyihe soowootha sootheene woohima sa Yehova. Emaara nimpakaahu eyo, hiyo-tho ninnatteeliha nsina nraahuno nenno ninneeriha wiiteexa mwaha wookhala Anamoona a Yehova! — Nsal. 83:19 [83:18, Tradução do Novo Mundo]; Arom. 10:13-15.
NIVIRELELE OLALEERA MPAKA OKHWIPI
14. Itthu heeni sooreera ninwehereraahu muhoolo?
14 Tthiri nookhalano itthu soohakalaliha ninwehereraahu muhoolo. Ni mareeliho a Yehova, ninnaweherera owoona atthu antxipale yaakhulelaka ekhaikhai ehinaaye opatxera maxupo matokweene. Opwaha mwa yeeyo, ninnahakalala vantxipale mwaha woosuwela weera nnaamweera mpuwa mwa maxupo ala, enrowa waakhumelela atthu ootheene, eri maxupo matokweene, nnoowera owoona atthu antxipale ehiyaka elapo ela ya Satana ni epwexeereranaka vamoha ni hiyo weera envuwihe Yehova! — Mit. 13:48.
15-16. Eheeni nintthuneyaahu ovirelela opaka, ni ninrowa opaka mpaka liini?
15 Niwehereraka eyo, nookhalano muteko woovara. Nookhalano eparakha yooweerela eparte olaleya mitthenka sooreera sa Omwene wa Muluku elapo yootheene. Emaara emoharu, onnatthuneya ovirelela waaleela atthu. Mwaha wooweera awo entthuneya osuwela weera emalihero ya elapo ela yoonanara, ennaattamela vantxipale. Nto vaavo etempu eyo ya othoriha enrowaaya ophiya, awo enoorowa osuwela weera mitthenka naalaleyaahu saakhuma wa Yehova Muluku. — Ez. 38:23.
16 Vanonto, eheeni nlakenlaahu opaka? Mwaha wa nsivelo, aani nsivelo nahu ni mitthenka sooreera, ni atthu opwaha mwa sootheene, nsivelo nahu ni Yehova Muluku ni nsina nawe, nivirelele olaleya mitthenka sooreera moowaakuveya ni moohihiyerereya mpaka Yehova ohima weera, “Paahi!”
ETXIPO 54 “Ephiro” Yookumi
a Muthukumano wa eyaakha opakinwe nihiku na 7 a Outubro a 2023, Empa ya assembleya ya Anamoona a Yehova, oNewburgh oNova York, wEstados Unidos. Eprograma yootheene yohooniheriwa va JW Broadcasting, eparte yoopatxera mweeri wa Novembro a 2023 ni eparte yanaaveeli mweeri wa Janeiro a 2024.
b Nwehe mwaha oneera “A Bíblia muda vidas — Fiquei impressionado com as respostas da Bíblia,” va A Sentinela a 1 a Fevereiro a 2015.