MWAHA ONTHOKORORIWA 15
ETXIPO 30 Muluku Aka, Moopoli Aka, ni Tiithi Aka
‘Omwaattamela Muluku ti wooreera’ wa hiyo!
“Nto wa miyo, ti [wooreera] okhala vakhiviru va Muluku.” — NSAL. 73:28.
ELE NINKELA AHU OXUTTERA
Ninrowa woona moota woomwaattamela Muluku ni mareeliho nimphwanyaahu mwaha woopaka eyo.
1-2. (a) Weera nunnuwihere onthamwene ni mutthu mukina nintthuneya opaka eheeni? (b) Eheeni ninrowaahu othokorora mwa yoosoma ene yeela?
NYUWO mookhalano nthamwene a vanikuthani? Moota heeni nyuwo munnuwihenraanyu onthamwene owo? Apaale emaara mwaavirihaanyu etempu ni nthamwene anyu owo, nyuwo mwaasuwela maxupo awe, ni itthu simmusivela ni sihimmusivela. Nave nyuwo mohoonelela weera owo ookhalano mikhalelo sooreera seiyo muntthunaanyu otakiha. Nave munnamusivela vantxipale nthamwene anyu owo.
2 Okhalano onthamwene woolipa ni mutthu, ontthuneya etempu ni wiilipihera. Etthu emoharu enneereya ni onthamwene woolipa ni Yehova Muluku. Mwa yoosoma ene yeela, nnoorowa woona moota woomwaattamela Muluku ahu ni mareeliho nimphwanyaahu mwaha woopaka eyo. Woopatxerani, ninrowa woona mwaha wa heeni oraaya wooreera omwaattamela nthamwene ahu, Yehova.
3. Mwaha wa heeni nintthuneyaahu ophimelela mareeliho nimphwanyaahu vaavo nimmwaattamelaahu Yehova? Nvahe ntakihero.
3 Moohihovela, nyuwo munnaakhulela weera omwaattamela Yehova ti wooreera. Mene ophimelela moota veekhaikhai oraaya wooreera, onooneeriha ovirelela omwaattamela owo. (Nsal. 63:7-9 [63:6-8, Tradução do Novo Mundo]) Mwa ntakihero, noosuwela weera otxa yootxa yooreerela, opaka ixercício soolipiha erutthu, okona mookwanela ni owura maahi mantxipale ti wooreera wa hiyo. Nnaamweera oreene hiiho, atthu antxipale khempwatthela itthu iyo ni khenkosoopa ekumi aya. Menento vaavo nnuupuwelaahu moota itthu sooreera sinnikhaviheraaya, hiyo ninnavirelela opaka itthu iyo. Mwa mukhalelo mmoharu, pooti weeraka noosuwela weera omwaattamela Yehova ti wooreera wa hiyo, menento vaavo nnuupuwelelaahu mareeliho enkhumelela mwaha woopaka eyo, ennaneeriha ovirelela omwaattamela nthamwene ahu, Yehova. — Nsal. 119:27-30.
4. Ntoko ehimmwalaaya va Nsalmu 73:28, miyoonelo heeni nasalmu oonihenraawe?
4 Musome Nsalmu 73:28. Namalepa a Nsalmu 73 aari Mulevi aathanlinwe weera avareke ntoko mulipa oowiipa itxipo mutemplu mwa Yehova. Onooneya weera owo aahinvarela Yehova moororomeleya mwa iyaakha sintxipale. Menento nlelo annoona otthuneya waya wiisuupuxera mwaneene awe ni owuupuxera atthu akina weera “okhala vakhiviru va Muluku” waari wooreera wa yoowo ni wa awo. Mareeliho heeni enkhumelela mwaha woopaka eyo?
“OKHALA VAKHIVIRU VA MULUKU” ONNAPHWANYIHA OHAKALALA
5. (a) Mwaha wa heeni ovirelela omwaattamela Yehova onniphwanyihaaya ohakalala? (b) Moovarihana ni Miruku 2:6-16, nvahe matakihero a moota osuwela wa Yehova onrowaaya woophwanyihani mureerelo ni wookosoopani nyuwo.
5 Vaavo ninvirelelaahu omwaattamela Yehova, ninnakhala oohakalala. (Nsal. 65:5 [65:4, NM]) Eyo ekhaikhai mwa mathowa mantxipale. Nthowa noopatxera, ninnattottela mureerelo vaavo ninvarihelaahu muteko miruku sa mBiblyani. Miruku iyo sinnanikosoopa wa onthamwene woohireerela ni wa soottheka itokweene. (Musome Miruku 2:6-16.) Biblya onnahima moowiiwanyeya eeraka: “Òreriwa mutthu ophwannye miruku anyi, mutthu ole ohusenre iseru.” — Mir. 3:13.
6. Etthu heeni yaamweerinhe nasalmu oyeleela ohakalala wawe?
6 Ekhaikhai ti yooweera, mpaka asinthamwene a Yehova ikwaha ikina ennaxupeya. Namalepa a Nsalmu 73, aayeleela ohakalala wawe vaavo aaraaweno miyuupuwelo soohireerela. Owo annaxupeya ni aakhalano nrima mwaha wooweera mmuupuweloni mwawe, uupuwela weera atthu ale yaari oonanara murima ni yahampwattha Muluku vamoha ni malamulo awe, yannakhumela nnene. Owo annuupuwela moohireerela oonaka weera atthu ale oowali ni oowiisunnuwiha, yaakhalano muhakhu, yaari a ikuru, ni mpaka khiyaaviriha maxupo. (Nsal. 73:3-7, 12) Nasalmu ola aaxupeya, mpaka ekwaha emoha aahiikoha wakhala weera annapaka nnene wiilipihera onvarela Yehova. Mwaha wooxupeya wawe, owo aaheera: “Vano miyo ti vasiyonvene wi kisunke murim’aka wowisumaliha.” — Nsal. 73:13.
7. Emaara ninkhulumuwaahu, nintthuneya opaka eheeni? (Nwehe efootu ya .)
7 Nasalmu khaakhulenle weera oriipiwa wawe murima, omukhulumule. Owo aapakavo etthu. Owo “[aavolowa] Mpeweni mwa Muluku” mwemmo Yehova aatxentxalaawe muupuwelo awe. (Nsal. 73:17-19) Vaavo ninriipiwaahu murima, Yehova yoowo ori nthamwene ahu, onnasuwela eyo. Wakhala weera nnonvekela miruku ni waakhulela nikhavihero owo onnivahaawe moorweela mwa Biblya ni muloko, nnookhalano ikuru ninhaawelaahu weera niwere owina oriipiwa murima. Nnaamweera nxupeyaka, Yehova onoonimaaliha. — Nsal. 94:19.a
Mulevi olempe Nsalmu 73 eemenleene “mpeweni mwa Muluku” (Nwehe eparagrafu 7)
“OKHALA VAKHIVIRU VA MULUKU” ONNANIVAHA YOOLAKELA NI YOOWEHERERA
8. Mwa mikhalelo heeni mikina omwaattamela Yehova oraaya wooreera wa hiyo?
8 Omwaattamela Muluku ti wooreera wa hiyo mwa mikhalelo mikina miili sootepa otthuneya. Mukhalelo woopatxera, onnanivaha yoolakela yoohakalaliha mweekumini mwahu. Mukhalelo wa naaveeli, onnanivaha yooweherera yoolipa ya muhoolo. (Yer. 29:11) Nrowe nthokorore woohima sa mareeliho awo.
9. Moota heeni omwaattamela Yehova oneerihaaya ekumi ahu okhalano yoolakela?
9 Omwaattamela Yehova onneeriha ekumi ahu okhalano yoolakela. Atthu antxipale olelo yaawo ehinroromela weera Muluku ookhala, enuupuwela weera ekumi khiyaanoono yoolakela ni weera atthu enoorowa omala. Menento moorweela mwa yoosoma ahu ya Biblya, hiyo ninnaroromela weera Muluku “òkhala ni onnàlivela yale anamwàsa.” (Aheb. 11:6) Olelo hiyo ninnakhalano ekumi yoohakalaliha mwaha wooweera nimpaka ele nipakelinwaahu weera nipakeke, onvarela Tiithi ahu a wiirimu, Yehova. — Ola. 10:12, 13.
10. Nsalmu 37:29 onhima eheeni woohima sa itthu sa muhoolo atthu enanvarela Yehova enwehereraaya?
10 Wa atthu antxipale, yooweherera aya enkota ni ekumi yeela paahi, ntoko ovara muteko, waayara anamwane ni osuka musurukhu weera yiikhavihereke emaara yeeyo ehinrowaaya ovaraka muteko. Awo khesuwenle ele Muluku olaihenraawe woohima sa muhoolo. Moovirikana niiyo, arumeyi a Yehova ennamuroromela Yehova. (Nsal. 25:3-5; 1 Tim. 6:17) Ninnamuroromela Muluku yoowo nimmwaattamelaahu nave ninnaroromela ele onilaihenraawe woohima sa Muhoolo. Yooweherera ahu ya muhoolo, enhela mpuwa onvarela Yehova mahiku ootheene oparayiisu. — Musome Nsalmu 37:29.
11. Etthu heeni enkhumelela vaavo nimmwaattamelaahu Yehova ni owo oniisoonela hayi?
11 Omwaattamela Muluku ti wooreera wa hiyo mwa mikhalelo sintxipale. Mwa ntakihero, Yehova onnalaihera waalevelela anamattheka ettharunwe ni yaawo emmwaattamela. (Yes. 1:18) Yookhumelela aya ti yooweera, khaninkhalano yoowuupuxera ya murima yooxupeya mwaha wa soottheka nipankaahu khalayi. (Nsal. 32:1-5) Nave ninnakhalano eparakha yoomuhakalaliha Yehova. (Mir. 23:15) Moohihovela, nyuwo pooti wuupuwelela mareeliho makina enkhumelela mwaha wookhalano onthamwene woolipa ni Muluku. Vanonto, moota heeni nyuwo munrowaanyu ovirelela omwaattamela Muluku?
MOOTA WOOVIRELELA “OKHALA VAKHIVIRU VA MULUKU”
12. Etthu heeni nyuwo mpankaanyu weera mmwaattamele Muluku?
12 Wakhala weera nyuwo mukristu oopatisiwa, nyuwo moopaka itthu sintxipale weera mmwaattamele Yehova. Nyuwo mooxuttera ikhaikhai woohima sa Yehova Muluku ni Yesu Kristu, moottharuwa soottheka sanyu sa khalayi, mohinnuwihera nroromelo nanyu wa Muluku ni mohiilipihera opaka itthu moovarihana ni yootthuna awe. Weera nimwaattamele vantxipale Muluku, nintthuneya ovirelela opaka itthu iyo. — Akol. 2:6.
13. Itthu heeni tthaaru sinrowa onikhavihera ovirelela omwaattamela Yehova?
13 Etthu heeni enrowa onikhavihera ovirelela omwaattamela Yehova? (1) Nintthuneya ovirelela omusoma Biblya. Naapakaka eyo, yootthuna ahu ehikhaleke paahi oxuttera itthu vakhaaniini woohima sa Muluku. Opwaha mwa yeeyo, nintthuneya wiilipihera woonelela yootthuna ya Yehova wa hiyo ni nihooleliweke ni miruku sawe simphwanyeya mBiblyani. (Aef. 5:15-17) (2) Nintthuneya waatxeerera nroromelo nahu niphimelelaka itthu sintxipale sinoonihera moota owo onnisivelaawe. (3) Nintthuneya ovirelela osepa itthu seiyo simmunanara Yehova ni osepa okhala asinthamwene aatthu yaawo empaka itthu sene seiyo. — Nsal. 1:1; 101:3.
14. Moovarihana ni ele ehimmwale va 1 Akorinto 10:31, itthu heeni ikina nintthuneyaahu opaka nihiku ti nihiku weera nimuhakalalihe Yehova? (Nwehe efootu.)
14 Mmusome 1 Akorinto 10:31. Hiyo nipakeke itthu seiyo sinrowa omuhakalaliha Yehova. Ohiya paahi itthu nimpakaahu mmutekoni moolaleera naari mmithukumanoni, opaka itthu sinrowa omuhakalaliha Yehova, onhela mpuwa itthu nimpakaahu nihiku ti nihiku. Mwa ntakihero, vaavo ninroromeleyaahu mwa itthu sootheene ni vaavo ninkawanaahu ni atthu akina ele nraahuno, ninnamuhakalaliha Yehova. (2 Akor. 8:21; 9:7) Owo-tho ontthuna weera noonihereke weera ninnavaha mwiitti yoovaha ya ekumi. Hiyo ninnamwaattamela Yehova yoowo ovanhe ekumi, nipakaka itthu eriyari-neeriyari, ntoko otxa ni owura ni vaavo ninkosoopaahu ekumi ahu mwa mukhalelo wooreerela. Wiilipihera wootheene nimpakaahu weera nimuhakalalihe Yehova, nnaamweera itthu ikina sikhalaka ntoko ikhaanini, iyo sinnaneeriha okhala oosiveleya vamaithoni va Yehova. — Luka 16:10.
Weettiha moovareleleya, wiikosoopa asineene ahu nipakaka ixercício soolipiha erutthu, otxa yootxa yooreerela ni owaakhela aletto, iya mikhalelo soomuhakalaliha Yehova (Nwehe eparagrafu 14)
15. Yehova onweherera weera naakosoopeke hayi atthu akina?
15 Yehova onnaareerela murima anaxariya ni ale ehikhanle anaxariya. (Math. 5:45) Owo-tho onweherera weera hiyo naareereleke murima atthu ootheene. Mwa ntakihero, hiyo khontthuneya ‘onveeha mutthu [naari] onyakulihana, . . . [mene] naapixereke murima atthu ootheene.’ (Tito 3:2) Nuupuwelaka eyo, hiyo khontthuneya waaramusa atthu akina mwaha wooweera khenaakhulela soororomela sahu. (2 Tim. 2:23-25) Wakhala weera hiyo tooreera murima ni ninnaapwattha atthu akina, ninnavirelela omwaattamela Yehova.
HIYO POOTI OKHALA “VAKHIVIRU VA MULUKU” NNAAMWEERA NTTHEKAKA
16. Evirakaru etempu, namalepa a Nsalmu 73 iisoonela hayi?
16 Ankhanto wakhala weera noovira etempu nyuwo munnuupuwela weera khamumphwanela nsivelo na Yehova? Ntoko nthokoronraahu, yaaheereya etthu emoharu ni namalepa a Nsalmu 73. Owo aahiikhupanyera eeraka: “Vano wa miyo manani aka ahanle vakhani otherekuwa ni ehanle ethiru mavalo aka okwattuliwa.” (Nsal. 73:2) Owo aahaakhulela weera aari ‘oowaawa ntoko naanepa, ntoko enama’ ohoolo wa Yehova. (Nsal. 73:21, 22) Neereke owo uupuwela weera mwaha wa soottheka sawe Yehova khaamusivela ni khaarowa omulevelela?
17. (a) Nnaamweera aaxupeya, nasalmu aatthuneya opaka eheeni? (b) Etthu heeni ninxutteraahu ni yooweereya ela? (Nwehe efootu.)
17 Wakhala weera nasalmu uupuwela weera khaakhuleliwa ni Yehova, muupuwelo awe owo waari wa etempu ya vakhaani. Mwaha wooweera, onooneya weera, vaavo aaraawe ootepa oxupeya, owo aahoonelela otthuneya waya omwaattamela Muluku, ntoko enooniheraaya masu awe yaawo eneera: “Koma miyo kòkhala ni nyuwo [Yehova] vohihiyerereya: nyuwo mòkivarela ntata naka nolopwana. Nyuwo munnakèttiha ni miruku sanyu, vaholo vaya muni mukàkhele movuwani.” (Nsal. 73:23, 24) Hiyo-tho onnatthuneya onweha Yehova ntoko mwala ahu emaara yeeyo nniisoonaahu okhala ootteettheya ni ookhulumuwa. (Nsal. 73:26; 94:18) Naari noonaka weera inaani sahu sinnatherekuwa, onnatthuneya otthikela wa Yehova nroromelaka weera owo ‘ori oolikaneene weera anlevelele.’ (Nsal. 86:5) Otepaxa wene, vaavo nniisoonaahu okhala ootepa oxupeya, ninnatthuneya omwaattamela Muluku ahu. — Nsal. 103:13, 14.
Emaara ninkhulumuwaahu moomunepani, hiyo onnatthuneya omwaattamela Yehova nivarexexaka omukokhorela wahu owo (Nwehe eparagrafu 17)
“[MUKHALE] VAKHIVIRU VA MULUKU” MAHIKU OOTHEENE
18. Mwaha wa heeni sihikhanlaaya ilimite weera nimwaattamele Yehova?
18 Khekhanle elimite weera nimwaattamele Yehova ni omusuwela. Biblya onhima weera iphiro, osuwela ni miruku sa Yehova ti “sohitokoseya.” — Arom. 11:33.
19. Masu eri va Nsalmu, enanroromeliha eheeni?
19 Nsalmu 79:13 onhima ha: “Ni hiyo, muloko ni iputtiputthi sa sokukhula sanyu, nnothamaleni nyuwo vohihiyerereya; erukulu ni erukulu eri yothene.” Vaavo mummwaattamelaanyu Muluku muroromeleke weera munimwaakhela mareeliho oohimala ni wuuluma ni nroromelo mweeraka: “Mwala wa murim’aka ni eparakh’aka ti Muluku, wa ehuhu yothene.” — Nsal. 73:26.
ETXIPO 32 Rwaani wa Yehova!
a Atthu antxipale enwanano okhulumuwa naari oxupeya mwa etempu yintxipale, pooti ohaawela nikhavihero na meetiku. Weera mphwanye soohimmwa ikina, munwehe A Sentinela N.º 1 a 2023.