Ti wooreera wa hiyo okhala asinthamwene a asinna ni asirokora!

1-2. Etthu heeni eri yootthuneya wa Yehova ni owo ontthuna weera nipakeke eheeni?

MOOTA nnaathokororaahu atthu akina, ti wootepa otthuneya wa Yehova. Yesu oonixuttiha weera nintthuneya waasivelaka atthu akina ntoko nniisivelaahu asineene ahu. (Math. 22:37-39) Eyo enhela mpuwa waareerela murima mpaka atthu yaale ehinaakhulela soororomela sahu. Vaavo nnooniheraahu mukhalelo wa orera murima, ninnamutakiha Yehova Muluku. Owo “onnaariha nsuwa ahimuthanlaka aari weera mutthu ooreera murima naari oonanara murima, ni onnaarupihela epula anaxariya ni oohixariya.” — Math. 5:45.

² Nnaamweera Yehova aasivelaka atthu ootheene, owo onnaasivela otepaxa wene ale empaka itthu sooreera. (Yoh. 14:21) Owo ontthuna weera nimutakiheke. Owo onnanooperera okhalano ‘nsivelo ntokweene’ wa asinna ni asirokora ni owoonihera ‘nsivelo noohimala.’ (1 Ped. 4:8; Arom. 12:10) Nsivelo nno, nnoolikana ni nsivelo nenne nimmooniheraahu mmusi ahu naari nthamwene ahu nimmusivelaahu.

3. Etthu heeni nintthuneyaahu wuupuwelela woohima sa nsivelo?

³ Hiihaale ntoko nintthuneyaahu okosoopa mwiri ori vaate vahu weera wunnuwe, nintthuneya wiilipihera weera nunnuwihere nsivelo nahu wa atthu akina. Murummwa Paulo aahaavaha miruku makristu eeraka: “Osivelana wa onna okhale.” (Aheb. 13:1) Yehova ontthuna weera nivirelele wunnuwihera nsivelo nahu wa asinna. Mwa yoosoma ene yeela, nnoorowa woona mwaha wa heeni nintthuneyaahu waatxeerera okhala asinthamwene a asinna ni asirokora ni moota ninrowaahu ovirelela opaka eyo.

MWAHA WA HEENI NINTTHUNEYAAHU WAATXEERERA OKHALA ASINTHAMWENE A ASINNA

4. Ntoko ehimmwalaaya va Nsalmu 133:1, moota heeni ninrowaahu woonihera weera ninnavaha mwiitti emusi ahu yoowiiraana? (Nwehe efootu.)

⁴ Musome Nsalmu 133:1. Ninnaakhulela ele nasalmu olempaawe weera onthamwene ni ale emmusivela Yehova ti ‘wooreera’ ni ‘woosivela.’ Mene, ntoko hiihaale mutthu onttuwalaawe mikhalelo sooreera sa mwiri onoonaawe mahiku ootheene, hiyo pooti ottuwala oreera oneeraaya wiiraana wahu ni asinna. Hiyo ninnawoona asinna ni asirokora ikwaha sintxipale, pooti weeraka imaara sintxipale vasemanani. Moota heeni ninrowaahu ovirelela waasivela? Nsivelo nahu ni asinna ni asirokora nnimwaatxeerereya wakhala weera nnimwiihiyera etempu weera nuupuwelele moota heeni mutthu ori ootheene a hiyo oraawe ootthuneya mmulokoni ni wa hiyo.

5. Moota heeni atthu akina envoleeliwaaya ni wiiraana wa emusi ahu ya nsivelo?

⁵ Atthu akina enoonela mithukumano sahu ekwaha yoopatxera, ennatikiniheya vantxipale mwaha wa nsivelo nnooniheranaahu mukina ni mukhwaawe. Mwaha wa yeeyo, awo ennoonelela weera aaphwanya ekhaikhai. Yesu enre: “Moorweela mwa yeeyo, atthu ootheene enoosuwela weera mwa atthareli aka: wakhala weera munnasivelana mukina ni mukhwaawe.” (Yoh. 13:35) Moone yooweereya ya Chaithra yoowo aasomihiwa Biblya ni Anamoona a Yehova. Owo aahaakhulela nwopelo weera amoonele konkereesu. Oonelakaru mwaneene awe nihiku noopatxera, owo aamuleela ha ole aamusomiha Biblya: “Asitiithi aka khayintale okikhupaarela, menento okonkereesuni, nihiku nimoha paahi, kookhupaareliwa imaara 52! Kohoona nsivelo Yehova oraaweno ni miyo moorweela mwa emusi awe yoomunepani. Miyo kintthuna weerela eparte emusi ela.” Chaithra aavirelela orowa vahoolo ni opatisinwe eyaakha ya 2024. Aani, vaavo atthu enoonaaya mikhalelo sahu sooreera ohela mpuwa nsivelo nnooniheranaahu mukina ni mukhwaawe, ikwaha sintxipale awo ennakhalano ntthuno weera envareleke Yehova. — Math. 5:16.

6. Moota heeni ninkosoopeyaahu vaavo ninkhalaahu vamoha ni asinna ni asirokora?

⁶ Okhala vamoha ni asinna ni asirokora pooti onikosoopa. Paulo aahaaleela akristu eeraka: “Mulipihaneke mukina ni mukhw’awe nihiku ti nihiku . . . wera ahikhale mwa nyuwo mutthu òwuma murima niwoko nowotha wa yottheka.” (Aheb. 3:13) Wakhala weera nookhulumuwa mpaka manaani ahu empatxera otherekuwa wa ephiro ya exariya, Yehova pooti omweeriha munna naari murokora onivaha nikhavihero nenno ninhaawelaahu. (Nsal. 73:2, 17, 23) Nikhavihero nno noolipiha ti nooreera wa hiyo.

7. Ovarihana heeni okhanle eriyari ya nsivelo ni wiiraana? (Akolosi 3:13, 14)

⁷ Hiyo nneerela eparte ekhurupu eniilipihera vantxipale wooniherana nsivelo mukina ni mukhwaawe. Mwaha wa yeeyo, hiyo ninnaphwanya mareeliho mantxipale. (1 Yoh. 4:11) Mwa ntakihero, nsivelo ninnaneeriha “[ovirelela ovilelana] mukina ni mukhw’awe” ni eyo ennakumihera wiiraana variyari va asinna. (Mmusome Akolosi 3:13, 14; Aef. 4:2-6) Mwa yeeyo, mmithukumanoni mwahu, nipuro nooreera ekhurupu ekina ya mulaponi ehikhanlaayano.

MUTTITTIMIHANEKE MUKINA NI MUKHWAAWE

8. Moota heeni Yehova onnikhaviheraawe okhala oowiiraana?

⁸ Wiiraana wahu elapo yootheene, mwiiriira. Yehova toneeriha owereya eyo nnaamweera nreene atthu oohimalela. (1 Akor. 12:25) Biblya onhima weera “[ninnaxuttihiwa] ni Muluku osivelana mukina ni mukhw’awe.” (1 Ates. 4:9) Ni masu makina, moorweela mwa soolepa, Yehova onnanleela etthu nintthuneyaahu opaka weera nikhale vamoha ni asinna. Hiyo pooti ‘oxuttihiwa ni Muluku’ nsomaka moomaaleleya sooxuttiha sawe ni ovarihela muteko. (Aheb. 4:12; Yak. 1:25) Tiyeeyo Anamoona a Yehova eniilipiheraaya opaka.

9. Eheeni nxuttenraahu ni Aroma 12:9-13 woohima sa waattittimiha atthu akina?

⁹ Moota heeni masu a Muluku ennixuttihaaya weera nintthuneya okhalaka vakhiviru ni asinna? Moone ele Paulo ohimmaawe woohima sa mwaheene yoowo ntoko elempwalaaya va Aroma 12:9-13. (Mmusome.) Moone weera owo ohimme weera, “wa nttittimiho: muttittimihaneke mukina ni mukhw’awe.” Eyo entthuna ohima eheeni? Hiyo nintthuneya opatxeriha owoonihera ‘nsivelo noohimala’ atthu akina, naalevelelaka, nooniheraka owaakhela aletto, nikhalaka oovaha, ni itthu ikina. (Aef. 4:32) Hiyo khontthuneya onweherera munna naari murokora weera anivekele etthu. Hiyo onnatthuneya ‘opatxeriha’ opaka eyo. Wakhala weera nnoopaka eyo, nnimoona ele Yesu aahimmaawe eeraka: “Ovaha ti etthu yorera opwaha wakhela.” — Mit. 20:35.

10. Moota heeni ninrowaahu okhala ‘oovara muteko nttittimihanaka mukina ni mukhwaawe’? (Nwehe efootu.)

¹⁰ Etthu yootepa otthuneya ti yooweera, Paulo Ahimakaru weera nintthuneya opatxeriha waattittimiha atthu akina, owo oonooperera eeraka weera “wa muteko: [nihikhale] òresi.” Mutthu oowiilipihera, toovara muteko. Vaavo onvahiwaawe muteko, owo onnavara moowiilipihera. Eliivuru ya Miruku 3:27, 28 enhima ha: “Ohimwìmane sorera yole onòvekela, waweryá omwèrele.” Mwa yeeyo, vaavo nimmoonaahu mutthu ontthuna okhaviheriwa, nipakeke ele ninweraahu weera nimukhavihere. Hiyo khontthuneya ohima weera kinoomukhavihera emaara ekina naari ohima weera mutthu mukina onoomukhavihera. — 1 Yoh. 3:17, 18.

11. Etthu heeni enrowa onikhavihera okhala vamoha ni asinna ni asirokora?

¹¹ Mukhalelo mukina nnaattittimihaahu atthu akina, ori vaavo nnaalevelelaahu moowaakuveya yantthekela vale. Aefeso 4:26 oneera ha: “Khweli nsuwa nihinelele onyonyiwa wanyu.” Mwaha wa heeni? Eversu ya 27 ennahima yeeraka, “muhinvaherere Nanrima nipuro.” Moorweela mwa masu awe, Yehova onnanleela weera, nlevelelaneke mukina ni mukhwaawe. Akolosi 3:13 onnanooperera “[ovirelela] . . . [olevelelana] mukina ni mukhw’awe [moomalela].” Olevelela soottheka sa atthu akina, mukhalelo mmoha wootepa oreera onneeriha wiiraana ni asinna. Emaara nimpakaahu eyo, ninnakumihera “[wiiraana] omosaru wa munepa mwa nlutte na murettele.” (Aef. 4:3) Ni masu ookwasa, olevelela pooti okumihera wiiraana ni murettele.

12. Moota heeni Yehova onnikhaviheraawe olevelela?

¹² Ekhaikhai weera hiyo pooti woona okhala wooxupa waalevelela ale entthekenle. Mene hiyo pooti okhumela nnene nikhaviheriwaka ni munepa wootteela wa Muluku. Noopereriwakaru ‘wooniherana nsivelo noohimala mukina ni mukhwaawe’ ni okhala ‘oovara muteko,’ soolepa sinnaatxeerera seeraka: “Wa munepa: mukhale òweteteya.” Mutthu ‘oovara muteko, toowiilipihera vantxipale ni onnavara ni murima awe wootheene mwaha wa’ munepa wootteela. (Nwehe enoota ya yoosoma ya Tradução do Novo Mundo va Aroma 12:11.) Mwa yeeyo, munepa wootteela wa Muluku pooti onikhavihera woonihera nsivelo noohimala ni olevelelana mukina ni mukhwaawe moomalela. Mwa yeeyo, ninvekeleke Yehova ni murima ahu wootheene weera anikhavihere. — Luka 11:13.

“OHIKHALE VARIYARI VANYU OHÌWANANA”

13. Etthu heeni yaarowa okumihera ohiiwanana eriyari ahu?

¹³ Mmulokoni aakhalamo ‘atthu a mikhalelo sootheene’ ni a mahuweliwo oovirikana. (1 Tim. 2:3, 4) Wakhala weera khanniikosoopa, ovirikana nno pooti okumihera ohiiwanana mwa mikhalelo mutthu simmusivela ntoko moota woowara, moota woowiirehera, okosoopiwa ni mameetiku naari matthekulelo. (Arom. 14:4; 1 Akor. 1:10) Okhala weera Muluku onnanixuttiha osivelana mukina ni mukhwaawe, nintthuneya wiikosoopaka weera nihooneke soothanla sahu okhala sootepa otthuneya opwaha sa atthu akina. — Afil. 2:3.

14. Etthu heeni ikwaha sootheene nintthuneyaahu wiilipihera opaka ni mwaha wa heeni?

¹⁴ Nave-tho hiyo pooti osepa onyakulihana mmulokoni niilipiheraka waamaaliha ni waalipiha atthu akina emaara eri yootheene. (1 Ates. 5:11) Mahiku ala, atthu oovirikana yaahiñye onvarela Yehova ni yaakumihinwe mmulokoni, ennamutthikela Yehova ni hiyo ninnawaakhela atthu awo! (2 Akor. 2:8) Moone ele yeereñye ni murokora mmoha otthikenle Empa ya Omwene sivirakaru iyaakha 10 ahinvarelaka Yehova. Owo ohimme ha, “Kohaakheliwa moohakalala ni kookhupaareliwa.” (Mit. 3:19) Moota heeni mikhalelo iya sa nsivelo sinvolenlaaya murokora ola? Owo ohimme ha, “Kohoona weera ntata na Yehova nannakeettiha nikitthikiheraka ohakalala.” Vaavo nnaalipihaahu atthu akina, Yesu pooti onivarela muteko weera naamaaliheke ale eri “ookhulumuwa ni [elemelinwe].” — Math. 11:28, 29.

15. Mukhalelo heeni mukina wookumihera wiiraana? (Nwehe efootu.)

¹⁵ Mukhalelo mukina wookumihera wiiraana, ori moorweela mwa moota nnuulumaahu. Yobi 12:11 oneera: “Naru khannìwa apale masu ni mmwano khamunlawiha sosiva sothene?” Hiihaale ntoko mutthu onaapeya onlawihaawe ele onaapeyaawe weera oone yaareene nnene ahinaaye waavaha akina, ti wooreera wuupuwelela moomaaleleya ele ninkelaahu wuuluma, nihinaaye wuuluma. (Nsal. 141:3) Ikwaha sootheene, yootthuna ahu ekhaleke wuuluma masu oolipiha, oomaaliha ni ‘ooreerela wa ale enkela wiiwa.’ — Aef. 4:29.

16. Taani entthuneya wiilipihera weera evariheleke muteko masu aya mwa mukhalelo woolipiha?

¹⁶ Alopwana oothela ni asitiithi, onnatthuneya wiikosoopa weera yuulume mwa mukhalelo woolipiha. (Akol. 3:19, 21; Tito 2:4) Nave-tho asitokweene a mmulokoni ontthuneya okhala naapwiipwi a nimaaliho ntoko akukhuli enkukhula iputtiputthi sa Yehova. (Yes. 32:1, 2; Agal. 6:1) Miruku sikina sa mBiblyani, sineera: ‘Masu enuulummwa etempu yooreerela, tooreera!’ — Mir. 15:23.

NSIVELO “NI [MITEKO] NI EKHAIKHAI”

17. Moota heeni ninrowaahu ororomelaka weera nsivelo ninwooniheraahu asinna ni asirokora ti neekhaikhai?

¹⁷ Murummwa Yohani ohimme weera “nihimutthune mukhw’ihu ni eyanoru nari ni masuru, koma ni sopanka ni ekhaikhai.” (1 Yoh. 3:18) Ontthuneya weera nsivelo nahu wa asinna ni asirokora nikhumeke vamurimani. Moota heeni ninrowaahu opaka eyo? Vaavo ninvirihaahu etempu nikhalaka ni asinna ni asirokora, ninnavirelela okhala vakhiviru naawo ni nsivelo nahu ninnaatxeerereya. Mwa yeeyo, mwiihiyereke etempu weera mukhale ni asinna akina mmithukumanoni naari mmutekoni moolaleera. Mwiihiyereke etempu weera mwaaxekureke asinna. Vaavo nimpakaahu eyo, ninnoonihera weera “[ninxuttihiwa] ni Muluku osivelana mukina ni mukhw’awe.” (1 Ates. 4:9) Ni nnoovirelela woona ni maitho ahu “orera ni osivela enèraya asinna ekilanthene murima mmosá”! — Nsal. 133:1.