Nsina na Yehova — etthu nintaphulelaaya wa Yesu

1-2. (a) Etthu heeni Yesu aapankaawe ohiyu ahaakunveene okhwa? (b) Makoho heeni ninrowaahu waakhula mwa yoosoma ene yeela?

WAARI oxekuwa wa namaxexe, nihiku na 14 a Nisani eyaakha ya 33 Kristu awiiyeene. Yesu aahala vakhaani orukunuweliwa, othorihiwa, olamuliwa, ohasuliwa, ni wiiviwa. Owo ni arummwa awe oororomeleya yeera eriki omaliharu otxa yootxa ya Apwiya. Emalihakaru otxa yootxa ela yoothanleya, Yesu aahaavaha miruku soomalihera arummwa awe weera aakhavihere ni waalipiha awo. Ni awo ehinaaye opwaha, Yesu aaheemela vakhaani ni aapaka nivekelo noowiixera. Murummwa Yohani oolepa nivekelo nno, ni nivekelo nno nri va eliivuru ya Yohani ekapiitulu ya 17.

² Mwa yoosoma ela, ninrowa woona waakhuliwa wa makoho ala meeli: Etthu heeni yaamweerinhe Yesu opaka nivekelo nna? Ni moota heeni nivekelo nna ninrowaaya onikhavihera wiiwexexa etthu yaari yootepa otthuneya wa Yesu emaara aaraawe elapo ya vathi?

“MIYO KOHAASUWELIHA NSINA NANYU”

3. Itthu heeni Yesu aahimmaawe woohima sa nsina na Yehova, ni owo aatthuna ohima eheeni? (Yohani 17:6, 26)

³ Mwa nivekelo Yesu aapankaawe, owo enre: “Miyo kohaasuweliha nsina nanyu.” Veekhaikhai, eyo ennoonihera moota mwaha owo waaraaya wootepa otthuneya wa Yesu, mwaha wooweera owo aahuuluma eyo ikwaha piili. (Mmusome Yohani 17:6, 26.) Etthu heeni Yesu aatthunaawe ohima? Neereke owo aaxuttiha atthareli awe nsina na Muluku? Atthareli a Yesu yaari ayuda nto awo yaasuwela weera nsina na Muluku ti Yehova. Nsina nno ninnaphwanyeya mwa soolempwa sa eheeberi ikwaha 7.000, nto etthu Yesu aapakaawe khaiyene waari ohima weera Muluku nsina nawe ti Yehova. Mweekhaikhai, owo aaxuttiha etthu naataphulelaaya nsina nno. Yesu aahaaxuttiha atthareli awe omusuwela nnene sene Yehova, ohela mpuwa yootthuna awe wa elapo ya vathi ni atthu, itthu owo opankaawe ni onrowaawe opaka, ni mikhalelo sawe. Yesu paahi taarowa owera oxuttiha nnene sene woohima sa Yehova, mwaha wooweera owo oomusuwela nnene sene Yehova ompwaha mutthu ori poothe.

4-5. (a) Nvahe ntakihero na moota nsina na mutthu ninrowaaya okhala nootepa otthuneya wa hiyo. (b) Mwaha wa heeni nsina na Yehova naaraayano yootaphulela yootepa otthuneya wa atthareli a Yesu?

⁴ Nkuupuwelani weera ookhala mutokweene mmoha a mmulokoni mwanyu oniitthaniwa Davide ni owo-tho onnawera owooperari atthu, ni nyuwo moomusuwela mwa iyaakha sintxipale. Avinyaka nihiku tinno, ennoophwanyani eretta, ni munnatthimakela ospitaale weiwo onvaraawewo munna owo, ni munna owo onnavuluxa ekumi anyu. Vano nyuwo munnamusivela vantxipale munna owo ni vaavo muniiwaanyu nromoliwaka nsina nawe, nyuwo munnuupuwela etthu oopakenlaaweni. Davide khatxentxale nlelo mutokweene a mmulokoni yoowo mmusuwenlaanyu mwa iyaakha sintxipale menento vano owo meediku ovulunxe ekumi anyu.

⁵ Moolikana niiyo, atthareli a Yesu yaasuwela nsina na Yehova. Mene mwaha wa muteko woolaleera wa Yesu, nsina nno naakhalano yootaphulela yootepa otthuneya wa yaawo. Mwaha wa heeni? Mwaha wooweera Yesu annoonihera omutthu wa Atiithi awe mwa itthu sootheene uulumaawe ni aapakaawe. Nto emaara yeeyo atthareli awe yoonaaya moota Yesu aaxuttihaawe ni yoonaaya moota aakosoopaawe atthu, awo yannawera ‘omusuwela’ nnene sene Yehova. — Yoh. 14:9; 17:3.

“NSINA NANYU, NSINA MUKIVANHAANYU”

6. Etthu heeni Yesu aatthunaawe ohima vaavo aahimmaawe weera nsina na Yehova aavahiwa owo? (Yohani 17:11, 12)

⁶ Emaara aapakaawe nivekelo, Yesu aahaavekelela atthareli awe eeraka: “Mwaawehaweheke mwaha wa nsina nanyu, nsina mukivanhaanyu.” (Mmusome Yohani 17:11, 12.) Neereke entaphulela weera Yesu aarowa wiitthaniwaka Yehova? Hooye. Yesu aahima weera nsina na Yehova “nsina nanyu.” Mwa yeeyo, onooneya weera Yesu khaivanhe nsina na Yehova. Nto mwaha wa heeni Yesu aahimmaawe weera oovahiwa nsina na Muluku? Nthowa noopatxera, mwaha wooweera owo aari namathoonyera ni namitthenka a Yehova. Owo aawiiye mwa nsina na Atiithi awe ni aapaka miteko sootikiniha mwa nsina nno. (Yoh. 5:43; 10:25) Opwaha mwa yeeyo, nsina na Yesu nintaphulela “Yehova nvuluxa.” Nto, nsina na Yehova ninnavarihana ni nsina na Yesu.

7. Nvahe ntakihero nnoonihera mwaha wa heeni Yesu uulumaawe mwa nsina na Yehova.

⁷ Weera niiwexexe nnene, muupuwele ntakihero nna, namutthenka ti mutthu ommuthoonyera mutthu omurumme ni onuuluma mwa nsina na mutthu owo. Mwa yeeyo, masu namutthenka owo onuulumaawe ni moota onuulumaawe ti hiiho aarowaawe wuuluma mutthu ole omurumme. Moolikana ni eyo, Yesu aamuthoonyera Yehova ni uuluma mwa nsina na Yehova. — Math. 21:9; Luka 13:35.

8. Mwa mukhalelo heeni nsina na Yehova naaraaya “ni” Yesu aahaakunveene owa elapo ya vathi? (Ottimula 23:20, 21)

⁸ Biblya onnamwiitthana Yesu okhala Nsu, mwaha wooweera Yehova anvarihela muteko Yesu weera aaleele ni waavaha miruku malaika ni atthu. (Yoh. 1:1-3) Oweharu, Yesu aari nlaika nenne Yehova aaruminhaawe weera aakosoope aIsraeli vaavo yaaraaya weheweheweni. Vaavo Yehova aaleelaawe aIsraeli weera yannatthuneya wiiwelela nlaika nne, owo aahima mwaha wa heeni eeraka: “Wona wi nsina naka nri ni yowo.”a (Mmusome Ottimula 23:20, 21.) Yehova aahima weera nsina nawe “nri” ni Yesu mwaha wooweera Yesu annamuthoonyera ni ti mutthu yoowo onaakiha ni ontteliha nsina na Atiithi awe.

“TIITHI, NVUWIHE NSINA NANYU”

9. Mwaha wa heeni nsina na Yehova naaraaya nootepa otthuneya wa Yesu? Muthalihe.

⁹ Ntoko nonnaahu, nsina na Yehova naari etthu yootepa otthuneya wa Yesu ahaakunveene owa elapo ela ya vathi, ni emaara aaraawe elapo ela ya vathi, itthu sootheene Yesu aapakaawe sannoonihera moota nsina na Yehova naaraaya nootthuneya wa yoowo! Okhwipi wa muteko awe woolaleera, Yesu aanvekela Yehova eeraka: “Tiithi, nvuwihe nsina nanyu.” Emaara ene yeele, Atiithi awe yaahaakhula ni nsu ntokweene naakhala ntoko okukutteya, Yehova enre: “Miyo koovuwiha ni kinootthikela ovuwiha-tho.” — Yoh. 12:28.

10-11. (a) Moota heeni Yesu ovuwinhaawe nsina na Yehova? (Nwehe efootu.) (b) Mwaha wa heeni nsina na Yehova nintthuneyaaya otteelihiwa ni waakihiwa?

¹⁰ Yesu-tho aavuwiha nsina na Atiithi awe. Moota heeni? Mukhalelo mmoha aapankaawe eyo waari wuuluma woohima sa mikhalelo sootikiniha sa Tiithi awe ni itthu sootikiniha epankaaya. Mene eyo khiiyaaphiyera. Nsina na Yehova wannatthuneya otteelihiwa ni mukhalelo awe wannatthuya waakihiwa.b Yesu aahoonihera moota eyo yaaraaya yootthuneya vaavo aaxuttinhaawe atthareli awe moota woovekela. Yesu enre: “Tiithi muri wiirimu, nsina nanyu ntteelihiwe.” — Math. 6:9.

¹¹ Mene mwaha wa heeni nsina na Muluku nintthuneyaaya otteelihiwa ni waakihiwa? Mwaha wooweera oJardim wEdeni, Satana anveeha Yehova Muluku ni aahima itthu soowootha woohima sa owo. Satana aahima weera Yehova namootha ni aakhoottihera etthu yooreera Adamu ni Eva. (Eph. 3:1-5) Satana-tho aahima weera Yehova khampaka itthu mwa mukhalelo wooreera. Mwaha wa itthu Satana onthaawe atthu akina aakhalano moonelo woonanara woohima sa Yehova. Muhoolo mwaya, mahiku a Yobi, Satana aawoothera ale enanvarela Yehova weera ennapaka eyo mwaha wooweera yookhala etthu entthunaaya. Owo-tho aahima weera atthu khemmusivela ni khenrowa ovirelela onvarela Yehova wakhala weera enookumana ni maxupo. (Yobi 1:9-11; 2:4) Noovira etempu, waamurowa osuwanyeya taani ori namootha, aareene Yehova naari Satana.

“KOOVELEELA EKUMI AKA”

12. Etthu heeni Yesu aaraawe oolikaneene opaka mwaha wa nsivelo nawe ni nsina na Yehova?

¹² Mwaha wa nsivelo araaweno ni Yehova, Yesu oopaka itthu sootheene aaweraawe weera atteelihe ni aakihere nsina na Yehova. Owo aari oolikaneene okhwa weera oonihere weera nsinac na Yehova ti nootteela ni moota ompakaawe itthu ti wooreerela. Mwa yeeyo Yesu enre: “Kooveleela ekumi aka.” (Yoh. 10:17, 18) Atthu oopatxera eeli oomalela, Adamu ni Eva, aamurukunuwela Yehova emmutthara Satana. Moovirikana ni atthu awo, Yesu aari oolikaneene owa elapo ela ya vathi weera oonihere moota onaasivelaawe Atiithi awe. Owo oopaka eyo amwiiwelelaka moomalela Yehova mwa mikhalelo sootheene sa ekumi awe. (Aheb. 4:15; 5:7-10) Yesu aavirelela okhala oororomeleya ekumi awe yootheene, mpaka wiiviwa vamwirini wa nihaaxero. (Aheb. 12:2) Mwa mukhalelo ene yoola, owo ohoonihera nsivelo oraaweno ni Yehova ni nsina nawe.

13. Mwaha wa heeni Yesu aarawe ooreerela weera oonihere weera Satana namootha? (Nwehe efootu.)

¹³ Itthu sootheene Yesu opankaawe, ohoonihera nnene sene weera namootha Satana ohiya Yehova! (Yoh. 8:44) Yesu oomusuwela nnene sene Yehova waapwaha atthu ootheene. Nto, waakhanle weera itthu Satana omoothenraawe Yehova ti seekhaikhai, Yesu aamurowa osuwela woohima sa eyo. Mene khiyaavo etthu Yehova ootherinwaawe eri yeekhaikhai. Mwa yeeyo, Yesu aavirelela okhala oolipa aakihaka nsina na Yehova. Naari emaara yeeyo Yehova aakhalaawe ntoko oomuhiya, Yesu aari oolikaneene okhwa ohiya omurukunuwela Tiithi awe ansivelo. — Math. 27:46.d

“KOOMALIHA MUTEKO MWAAKIVANHAANYU”

14. Moota heeni Yehova omureelinhaawe Yesu mwaha wookhala oororomeleya?

¹⁴ Nivekelo Yesu aapankaawe ohiyu aahaakunveene wiiviwa, owo enre: “Koomaliha muteko mwaakivanhaanyu weera kivare.” Yesu annaroromela weera avirelela ororomeleya, Yehova aamurowa omureeliha, ni eyo yaari ekhaikhai. (Yoh. 17:4, 5) Yehova khaakhulenle weera Yesu avirelele okhala mmahiye. (Mit. 2:23, 24) Yehova onvinyereriha Yesu ni onvaha nipuro na vasuluxa wiirimu. (Afil. 2:8, 9) Noovira etempu, Yesu okhala Mwene a Omwene wa Muluku. Vanonto Omwene owo onrowa opaka eheeni? Yesu onnaakhula va eparte yanaaveeli ya nivekelo oxuttinhaawe vaavo oneeraawe: “Omwene anyu owe. Yeereye yootthuna anyu [yootthuna ya Yehova] elapo ela ya vathi, ntoko yeereñyaaya wiirimu.” — Math. 6:10.

15. Etthu heeni ekina Yesu onrowaawe opaka?

¹⁵ Moohipisa va, Yesu onoorowa owana ekhotto ni amwiittani a Muluku ni onoorowa waanyaaya atthu oonanara murima va ekhotto ya Harmagedoni. (Apok. 16:14, 16; 19:11-16) Muhoolo mwaya, Yesu onoorowa onvonyera Satana “mowixani,” weiwo Satana ohinrowaawe oweraka opaka etthu akhalaka ntoko orookhwa. (Apok. 20:1-3) Yesu onoorowa otthikihera murettele elapo ya vathi, ni onoorowa waakhavihera atthu okhala oomalela mpuwa mwa olamulela wawe wa iyaakha 1.000. Nave-tho owo onoorowa waavinyereriha atthu ookhwa ni onoorowa weeriha elapo yootheene ya vathi okhala eparaisu. Okhwipi waya yootthuna ya Yehova enookwanela! — Apok. 21:1-4.

16. Ekumi enrowa okhala hayi savira iyaakha 1.000 sa olamulela wa Yesu?

¹⁶ Ekumi enrowa okhala moota heeni savira iyaakha 1.000 sa olamulela wa Yesu? Yoottheka ni ohimalela khonrowa okhala. Atthu khenrowa otthuneyaka ovekela nlevelelo mwaha wa soottheka saya, awo-tho khenrowa ohaawelaka mukuttho weera waavuluxe, naari mphuki, naari anamakeya weera ekhale asinthamwene a Yehova. Okhwipi waya “[mwiitani] òmalihera onrowa [onyaanyiwa], ti okhwa” (yoowo okumiherinwe ni Adamu), atthu ookhwa anoovinyererihiwa. Ni mmahiyeni khenrowa okhalamo etthu. Atthu ootheene a elapo ya vathi anrowa okhala oomalela. — 1 Akor. 15:25, 26.

17-18. (a) Etthu heeni enrowa weereya okhwipi wa iyaakha 1.000 sa olamulela wa Yesu? (b) Etthu heeni Yesu onrowaawe opaka olamulelo awe waphiya okhwipi? (1 Akorinto 15:24, 28) (Nwehe efootu.)

¹⁷ Enimweereya etthu ekina yoothanleya woomaliherani wa olamulela wa iyaakha 1.000. Etthu heeni enrowa weereya? Khaavo onrowa ohovelaka weera Yehova, Muluku ootteela ni axariya. Moota heeni? Ojardim wEdeni, Satana aahima weera Yehova khanaalamulela atthu ni nsivelo ni weera namootha. Ovinyera etempu ele, nsina na Yehova ninnatteelihiwa ikwaha sintxipale ni ale emmwiiwelela ni emmuttittimiha, awo-tho ennamwaakiha. Nto, woomaliherani wa iyaakha 1.000 sa olamulela wa Yesu, mukhalelo wa Yehova onimwaakihiwa moomalela. Owo onoorowa woonihera nnenesene weera owo Tiithi a nsivelo a wiirimu.

¹⁸ Onoorowa wooneya weera itthu sootheene Satana omoothenraawe Yehova, khaiyene ti seekhaikhai. Etthu heeni Yesu onrowaawe opaka olamulelo awe waphiya okhwipi? Neereke owo onoorowa okhala ntoko Satana ni omurukunuwela Yehova? Hooye! (Mmusome 1 Akorinto 15:24, 28.) Yesu onoorowa waatthikihera Omwene Atiithi awe ni onoorowa owiiwelelaka awo. Moovirikana ni Satana, Yesu ori oolikaneene waatthikihera itthu sootheene Atiithi awe mwaha wooweera onnaasivela.

19. Nsina na Yehova nintaphulela eheeni wa Yesu?

¹⁹ Yehova ookhalano mathowa ooreera weera onvahe nsina nawe Yesu! Ni Yesu namathoonyera oomalela Atiithi awe. Vanonto, nsina na Yehova nintaphulela eheeni wa Yesu? Nintapulela itthu sootheene, ni nsina nno ti nootepa otthuneya wa yoowo opwaha itthu sootheene. Mpaka Yesu ooleva ekumi awe mwaha wa nsina nno, ni okhwipi wa olamulelo awe wa iyaakha 1.000 owo onoorowa waatthikihera Atiithi awe itthu sootheene. Moota heeni hiyo ninrowaahu omutakiha Yesu? Nikoho nna nnoorowa wiiwa waakhuliwa waya yoosoma enttharelana.