Nivirelele oxuttera ikhaikhai soopatxera sa mBiblyani

1. Moota heeni ikhaikhai soopatxera sa mBiblyani sitxentxalaaya ekumi anyu?

IKHAIKHAI soopatxera sa mBiblyani, sootxentxa ekumi ahu. Mwa ntakihero, emaara muxuttenraanyu weera nsina na Muluku ti Yehova, nyuwo moopatxera omwaattamela owo ni okhala nthamwene anyu. (Yes. 42:8) Muxutterakaru etthu eneereya mutthu akhwa vale, nyuwo moohiya wiikoha wakhala weera amusi anyu ekhwiiye ennahaawa. (Koh. 9:10) Ni vaavo muxuttenraanyu weera elapo ya vathi enookhala eparayiisu, nyuwo moohiya oxupeya ni itthu sa muhoolo. Nyuwo munnaroromela weera munookhala mukumi ohiya paahi etempu vakhaani, ntoko iyaakha 70 naari 80, mene mahiku ootheene. — Nsal. 37:29; 90:10.

2. Moota heeni 2 Pedru 1:12, 13 onooniheraawe weera akristu oolipa moomunepani pooti ottottela mureerelo ni ikhaikhai soopatxera sa mBiblyani?

² Hiyo khaninhiya ottottela mureerelo ikhaikhai soopatxera sa mBiblyani. Ekaarta awe yanaaveeli, murummwa Pedru aahaalepela akristu yaawo yaari “òlipene mwa ekhaikhai.” (Mmusome 2 Pedru 1:12, 13.) Emaara ene yeele, maprofeta oowootha ni atthu oonanara murima yanneerera waahapuxa akristu wa okokhorela weekhaikhai. (2 Ped. 2:1-3) Pedru aatthuna waakhavihera asinna ale weera ehihapuxiwe. Nto owo aawuupuxera itthu seiye yaaxuttenraaya. Ikhaikhai iyo saamurowa waakhavihera akristu ale okhala oororomeleya wa Yehova mpaka okhwipi.

3. Ntakihero heeni ninnikhavihera woona weera ikhaikhai soopatxera sa mBiblyani ti soovareleya muteko wa akristu oolipa moomunepani?

³ Nnaamweera ninvarenleene Yehova mwa iyaakha sintxipale, hiyo pooti oxuttera itthu inyowani ni ikhaikhai soopatxera sa mBiblyani. Muupuwele ntakihero nna: Mutthu oowaapeya nnene ni ole oneera oxuttera, pooti weera envarihela muteko itthu imoha-moharu soopatxera seiyo enhelaaya muyootxani. Mene, vaavo mutthu onvirihaawe etempu yintxipale avaraka muteko woowaapeya, owo onnawera ovarihela itthu iyo onhelaawe muyootxani mwa mikhalelo soovirikana ni onnattottela mureerelo. Moolikana niiyo, atthu epatxenre onvarela Yehova mwa iyaakha sintxipale naale eneera opatxera omusoma Biblya, aasuwela ikhaikhai imoharu soopatxera sa mBiblyani. Mene awo pooti oweha ikhaikhai iyo mwa mikhalelo soovirikana. Okhumela nipatisiwakaru pooti weera ekumi ahu ni iparakha sahu sonvarela Yehova sootxentxa. Mene ophimelela ikhaikhai nxuttenraahu khalayi, onnanikhavihera woonelela mikhalelo mikina soovarihela muteko viinaano. Nrowe noone ikhaikhai tthaaru soopatxera sa mBiblyani ni woona etthu akristu oolipa moomunepani enxutteraaya ni ikhaikhai iyo.

YEHOVA MPATTUXA

4. Osuwela weera Yehova Mpattuxa, onvoleela hayi ekumi anyu?

⁴ Hiyo noosuwela weera elapo ni itthu sootheene siri mwemmo, sipattuxinwe ni mutthu oosuwela ni oowera. Biblya oneera: “Onteka soothesene ti Muluku.” (Aheb. 3:4) Mene hiyo pooti oxuttera itthu sintxipale ni ekhaikhai ela yoopatxera. Mwaha wookhala Mpattuxaahu, Yehova oosuwela itthu sootheene woohima sa hiyo. Owo-tho onnanipwattha ni oosuwela etthu eri yooreera wa hiyo. Nto osuwela weera Yehova Mpattuxa, wootxentxa moomalela ekumi ahu nave nookhalano yooweherera yeekhaikhai.

5. Ekhaikhai heeni ya mBiblyani ennikhavihera okhala oowiiyeviha? (Yesaya 45:9-12)

⁵ Osuwela weera Yehova Mpattuxa, onnanikhavihera-tho okhala oowiiyeviha. Mwa ntakihero, yookhala etempu Yobi iiwehexexaawe meekhaawe paahi ni atthu akina. Weera amukhavihere, Yehova aamuupuxera Yobi weera owo aari Mpattuxa oowera sootheene. (Yobi 38:1-4) Mwaha wa Yehova omuupuxera eyo, Yobi aahoonelela weera itthu sootheene Yehova ompakaawe ti sooreera. Iiwanyeihaka weera atthu khontthuneya wiisoonaka okhala ootthuneyaxa ompwaha Muluku, profeta Yesaya olempe ha: “Apale oloko onnamwèrela mulipa a mwapu: Exeni onèrawe?” — Mmusome Yesaya 45:9-12.

6. Etempu heeni waarowaaya okhala wooreera ophimelela osuwela ni owera wa Mpattuxa ahu? (Nwehe-tho efootu.)

⁶ Vaavo mukristu onkhalaaweno sookumanano sintxipale mweekumini mwawe, owo pooti opatxera ororomelaxa miyoonelo sawe ohiya waasaasa miruku sa Yehova ni sa mBiblyani. (Yobi 37:23, 24) Wakhala weera eyo enimweereya, onookhala wooreera mukristu weemela ni wuupuwelela moota osuwela ni owera wa Mpattuxa oraaya wa vasuluxa. (Yes. 40:22; 55:8, 9) Mwapaka eyo, ekhaikhai ela yoopatxera, enoorowa wookhaviherani ovirelela okhala oowiiyeviha ni munimwiiwexexa weera etthu Yehova onuupuwelaawe ti yootepa otthuneya opwaha moonelo anyu.

7. Etthu heeni Raela aapankaawe weera aakhulele miruku minyowani?

⁷ Wuupuwelela weera Yehova Mpattuxa, woomukhavihera Raela onkhala wEslovenia waakhulela miruku minyowani sa mareherero a Yehova. Owo ohimme ha: “Ikwaha ikina onnakixupa waakhulela miruku sinvahiwa ni ale enhoolela mareherero. Mwa ntakihero, miyo kohoonela eviidiyu ya Soohima sa naathanu naararu sa Mukuttula Woolamulela sa 2023. Nnaamweera vareene hiiho, ekwaha yoopatxera kaamonnaaka munna ahunweene ipweto apakaka mwaha, kaaxupeya vantxipale. Nto kanvekela Yehova weera akikhavihere waakhulela matxentxo ale.” Raela ohiiwexexa weera, mwaha wa Yehova okhala Mpattuxa a erimu ni elapo ya vathi, owo ookhalano owera wooweettiha mareherero awe mwa mukhalelo wooreera. Neereke nyuwo-tho onnooxupani waakhulela matxentxo manyowani ni miruku minyowani? Nto etthu yooreera opaka, ori wiiyeviha ni wiihiyera etempu weera mphimelele osuwela ni owera wa Mpattuxa. — Arom. 11:33-36.

MULUKU KHANKUMIHERA OHAAWA

8. Mwaha wa heeni oraaya wooreera wa nyuwo oxuttera weera Muluku khaiyene tonkumihera ohaawa?

⁸ Mwaha wa heeni Muluku onaakhulelaawe ohaawa? Mwaha woohisuwela waakhula wa nikoho nna, atthu antxipale ennamunyoonyeriwa Muluku ni ennayeleela nroromelo naya weera owo ookhala! (Mir. 19:3) Moovirikana niiyo, nyuwo mooxuttera weera etthu enkumihera ohaawa, yoottheka nivanlaahu ni ohimalela wahu, ohiya Yehova. Nave-tho nyuwo mooxuttera weera opixa murima wa Yehova onnaweeriha atthu antxipale omusuwela ni woonelela weera owo onoorowa omaliha ohaawa wa mahiku ootheene. (2 Ped. 3:9, 15) Ikhaikhai iya sohoomaalihani ni soolipiha onthamwene anyu ni Yehova.

9. Mwa itthu heeni apaale waarowaaya okhala wooreera wuupuwelela mwaha wa heeni Yehova onaakhulelaawe ohaawa?

⁹ Noosuwela weera nintthuneya okhala oopixa murima vaavo nnanwehereraahu Yehova omaliha ohaawa. Mene vaavo hiyo naari mutthu nimmusivelaahu onvirihaawe maxupo, ohixariya naari vaavo oñyeleelaawe itthu sawe, hiyo pooti wuupuwelaka weera Yehova onnapisa omaliha maxupo. (Hab. 1:2, 3) Etempu ntoko eyo, onookhala wooreera wuupuwelela etthu emmweeriha Yehova waakhulela weera atthu ooreera murima eviriheke maxupo.a (Nsal. 34:20 [34:19, Tradução do Novo Mundo]) Nave-tho hiyo pooti ophimelela yootthuna ya Yehova yoomaliha maxupo wa mahiku ootheene.

10. Etthu heeni emmukhavihera Anne ovilela waayeleela wawe ameyawe?

¹⁰ Osuwela ekhaikhai woohima sa ohaawa, pooti onikhavihera ovilela. Anne yoowo onkhala oMayotte wOceano Índico, ohimme ha: “Mwa iyaakha sa muttuli, miyo kohaayeleela ameyaka, ni eyo ennakihiya ooxupeya. Mene miyo kinnuupuwelela weera Yehova khaiyene tonkumihera ohaawa. Moovirikana niiyo, Owo onnatthuna vantxipale omaliha itthu sootheene sinkumihera ohaawa ni waavinyereriha atthu ale naasivelaahu ekhwiiye. Ophimelela ikhaikhai iya onnakiphwanyiha murettele yoowo kihinweraaka ohima.”

11. Osuwela mathowa emmweeriha Yehova waakhulela ohaawa, onnikhavihera moota heeni?

¹¹ Osuwela mwaha wa heeni Muluku oraawe oopixa murima ni onaakhulelaawe ohaawa weereyaka, pooti onivaha ikuru weera nivirelele olaleera. Murummwa Pedru ohiiwanyeiha weera opixa murima wa Yehova onnaavaha eparakha atthu antxipale weera ettharuwe ni weera yavuluxiwe. Owo olempe ha: “[Muupuweleke omutthu heeni muntthuneyaanyu okhalano], entthuneya wi mwètteleke makhalelo òttela ni òmuttittimiha Muluku.” (2 Ped. 3:11) Mukhalelo mmoha ‘woomuttittimiha Muluku,’ ori olaleera. Hiihaale ntoko Tiithi ahu, hiyo ninnaasivela atthu. Ni nintthuna weera atthu awo ekhaleno ekumi yoohimala mu elapo enyowani. Yehova onnavirelela waavaha eparakha atthu a muttetthe anyu weera emukokhoreleke. Nto nyuwo mookhalano eparakha yoovara vamoha ni Muluku ni waakhavihera atthu antxipale wawereya vale weera emusuwele Yehova ehaakunveene omala elapo ela! — 1 Akor. 3:9.

NINKHALA “MAHIKU ÒMALIHERA”

12. Osuwela weera ninkhala “mahiku òmalihera” onanroromeliha eheeni?

¹² Biblya onnahima nnene sene moota atthu yaarowaaya okhala “mahiku òmalihera.” (2 Tim. 3:1-5) Vaavo nnoonaahu mikhalelo soonanara sa atthu, ninnoonelela weera eprofesiya ela ennakwanela. Wiiwexexa ekhaikhai ela onnaneeriha ororomela Masu a Muluku. — 2 Tim. 3:13-15.

13. Nuupuwelaka niphwanaphwaniho na Yesu nri va Luka 12:15-21, makoho heeni nintthuneyaahu wiipakela?

¹³ Osuwela weera ninkhala mahiku oomalihera, onnaneeriha opakaka itthu moowaakuveya. Va Luka 12:15-21. (Mmusome.) Yesu onnapaka niphwanaphwaniho nimoha nenno nnanxuttiha weera nintthuneya ohelaka itthu sootthuneya nipuro noopatxera. Mwaha wa heeni mulopwana ole namuhakhu iitthaninwaawe okhala “mulolo”? Khaiyene mwaha wooweera aarookhalano itthu sintxipale, mene mwaha wooweera aahela nipuro noopatxera itthu soonanara. Owo, “[aahiithukumanyera] mihakhu, mene vamaithoni va Muluku, owo khaiyono [aari] namuhakhu.” Mwaha wa heeni opaka eyo waaraaya woonanara? Muluku aamweerela ha mulopwana ole: “Ohiyu ene yoola munimookhwa.” Ninxuttera eheeni? Enhala etempu vakhaaniini weera elapo ela emale. Nto hiyo onnatthuneya wiikoha ha: ‘Keereke soolakela saka sinnoonihera weera kinkhala mahiku oomalihera? Sooluluwanya heeni kinrowaaka owooperera anamwane aka okhalano? Keereke kinvarihela etempu aka, ikuru saka ni itthu kiraakano weera kiithukumanyere mihakhu naari kiithukumanyere mihakhu wiirimu?’

14. Mwaha wa heeni oraaya wooreera ophimelela itthu sinoonihera weera ninkhala mahiku oomalihera, ni moota heeni yooweereya ya Miki enooniheraaya eyo?

¹⁴ Vaavo nimphimelelaahu itthu sinoonihera weera ninkhala mahiku oomalihera, eyo pooti otxentxa moomalela ekumi ahu. Tiyeeyo yeereñye ni murokora mmoha oneeriwa Miki. Owo ohimme ha: “Vaavo kaamalinhaaka osoma, kaatthuna okhala namathola-thola a ekumi ya inama ni opaka eyo okhala muteko aka. Nave-tho kaakhalano yooluluwanya yookhala pioneira anthiti ni okhavihera mapuro oothowa anamalaleera. Mene asinthamwene aka yaakivaha miruku weera koone wakhala weera kanwera ovara muteko owo kaatthunaaka ni emaara emoharu okwanihera sooluluwanya saka soomunepani. Awo-tho yaakuupuxera weera omala wa elapo ela ori vakhiviru. Ni weera mu elapo enyowani miyo kaaheereke owera waasoma asinama ootheene keeraaka kaatthuneke. Nto miyo kaalakela waapaka akuursu yeera ehikiiyereke etempu aka. Mwaha wa yeeyo, miyo koowera okhala pioneira anthiti ni muhoolo mwaya othaamela mapuro oothowa anamalaleera wEquador.” Olelo, Miki ni aiyawe envara esirkwiitu ya elapo ene yeeyo.

15. Moota heeni ntakihero na Yakobe nnooniheraaya weera hiyo khontthuneya waahiya atthu ale enkhala ntoko khentthuna wiiwa? Nvahe ntakihero. (Nwehe-tho efootu.)

¹⁵ Osuwela weera ninkhala mahiku oomalihera, onnanikhavihera wiilipihera ovara muteko woolaleera nnaamweera atthu akina woopatxerani ehitthunaka wiiwa mitthenka sooreera. Ekhaikhai ti yooweera, atthu pooti otxentxa. Moone ntakihero na Yakobe munnawe Yesu. Owo aamoona ni maitho awe Yesu unnuwaka, akhalaka Mesiya ni akhalaka muhusiha ahaalikana ni mutthu mukina. Nnaamweera vareene hiiho, Yakobe khaakhanle mutthareli a Yesu. Owo aakhanle mutthareli Yesu avinyererihiwakaru, ni aari mutthareli oowiilipihera!b (Yoh. 7:5; Agal. 2:9) Mwa yeeyo, muhaahiye amusi anyu naari atthu a muttetthe anyu yaawo nlelo ehinoonihera ntthuno wa mitthenka sa Omwene. Muhittiwale weera ninkhala mahiku oomalihera, ni weera muteko woolaleera ontthuneya ovariwa moowaakuveya. Pooti weera itthu munaaleelaanyu viinaano va, enoorowa wuupuwelela muhoolo, apaale epatxenreene maxupo matokweene.c

NVIRELELEKE OVAHA MWIITTI ITTHU YEHOVA ONNIVAHAAWE

16. Moota heeni itthu Yehova onnivahaawe sinnikhaviheraaya? (Nwehe-tho ekwaadru “Nvariheleke muteko ikhaikhai sa mBiblyani weera mwaakhavihere atthu akina.”)

¹⁶ Eparte yintxipale ya yootxa yoomunepani nnaakhelaahu, empakeliwa ale esuwenle itthu vakhaaniini woohima sa Biblya. Mwa ntakihero, mwaha wa vanlakani ompakiwa edomingu, irevista sinkaiwa, nyaha ikina ni iviidiyu sa esaite jw.org, empakeliwa otepaxa wene atthu ale ehikhanle Anamoona a Yehova. Mene nnaamweera vareene hiiho, itthu iyo pooti onikhavihera. Iyo sinnaatxeerera omusivela wahu Muluku, sinnalipiha nroromelo nahu wa Biblya nave sinnanikhavihera okhala atthu ooxuttiha nnene. — Nsal. 19:8 [19:7, NM].

17. Mwa itthu heeni waarowaaya okhala wooreera ophimelela ikhaikhai soopatxera sa mBiblyani?

¹⁷ Hiyo Anamoona a Yehova, ninnahakalala vaavo nniiwanyeihiwaahu ekhaikhai ya mBiblyani. Mene-tho ninnavaha mwiitti ikhaikhai soopatxera sa mBiblyani seiyo sineerinhe waakhulela ekhaikhai. Wakhala weera nookhalano mukhalelo wootthuna otthara moonelo ahu, ohiya otthara miruku sa mareherero a Yehova, nintthuneya okhalaka oowiiyeviha ni wuupuwela weera Mpattuxa ahu oosuwela ni oowera sootheene, toneettiha mareherero awe. Wakhala weera hiyo naari mutthu nimmusivelaahu onnaviriha maxupo, onookhala wooreera opixa murima ni wuupuwelela mwaha wa heeni Yehova onaakhulelaawe ohaawa. Ni emaara ninthanlaahu moota ninrowaahu ovarihelaka muteko itthu nraahuno ni etempu ahu, hiyo nintthuneya wuupuwelaka weera ninkhala mahiku oomalihera. Napaka eyo, itthu Yehova onnivahaawe, sinoorowa ovirelela onlipiha, onivaha ntthuno ni okhala atthu a miruku.