MWAHA ONTHOKORORIWA 34
ETXIPO 3 Yehova Onninivaha Ikuru, Nlipelelo, ni Nroromelo
Muroromeleke weera Yehova ohoolevelelani
“Mwàlevelela olemela wa sottheka saka.” — NSAL. 32:5.
ELE NINKELA AHU OXUTTERA
Ninrowa woona mwaha wa heeni nintthuneeyaahu waakhulela nlevelelo na Yehova, ni moota heeni Biblya onanroromelihaawe weera Yehova onnaalevelela atthu ettharunwe.
1-2. Etthu heeni Yehova ompakaawe wakhala weera noottharuwa soottheka sahu? (Nwehe-tho ya vakaapani.)
MWENE Davidi aasuwela moota mutthu oniisoneelaawe mwaha wa soottheka opankaawe khalayi. (Nsal. 40:13 [40:12, Tradução do Novo Mundo]; 51:5 [51:3, NM]) Owo aapaka soottheka itokweene mweekumini mwawe, menento owo aahoonihera ottharuwa weekhaikhai ni Yehova aamulevelela. (2 Sam. 12:13) Yookhumelelaaya, tiyooweera Davidi aataphuwa mwaha woosuwela weera Yehova aamulevelela. — Nsal. 32:1.
2 Ntoko Davidi, hiyo-tho pooti ohakalala vaavo ninsuwelaahu weera moomoriwa ikharari Yehova oolevelela soottheka sahu. Nkoonani moota oraaya wooreera osuwela weera Yehova ori oolikaneene olevelela soottheka sahu naari sireene itokweene, wakhala weera hiyo nnoottharuwa moomalela, onvekela Yehova weera anlevelele, wuuluma ni asitokweene weera enikhavihere, ni opaka ele ninweraahu weera nihitthikele opaka yoottheka eyo! (Mir. 28:13; Mit. 26:20; 1 Yoh. 1:9) Ni tiwoomaaliha osuwela weera Yehova onnalevelela soottheka moomalela onakhala ntoko khanintale opaka yoottheka eyo! — Ez. 33:16.
Mwene Davidi oolepa masalmu mantxipale enoonihera olevelela wa Yehova. (Nwehe eparagrafo ya 1-2)
3-4. Moota heeni murokora mmoha iisoonenlaawe apatisiwakaru? Ni ti heeni ninrowaahu woona mwa yoosoma ene yeela?
3 Menento ikwaha ikina atthu akina pooti woona okhala wooxupa waakhulela nlevelelo na Yehova. Moone yooweereya ya Jennifer, yoowo ohuuwale mweekhaikhaini. Mwa emiravo awe, owo aahiivoleihera mikhalelo soonanara ni annapaka moowiipithiheya weera asipapawe ehisuwele. Iyaakha soottharelana, owo aatthikela wa Yehova, ni aari oolikaneene weera apatisiwe. Owo ohimme ha: “Ekumi aka ya kalayi kaahiivoleihera ni okonihana moohirerela, kannawura vantxipale, kaari mutthu oowaakuva onyoonyiwa, ni waasa musurukhu yaari etthu yootepa otthuneya mweekumini mwaka. Miyo kaasuwela weera mwaha wa mukuttho wa Kristu Yehova pooti olevelela soottheka sahu, menento nkaawera ororomela weera Yehova ookilevelela.”
4 Ikwaha ikina neereke nyuwo munuupuwela weera Yehova oonyoonyiheya ni nyuwo mwaha wa soottheka mpankaanyu khalayi? Yehova ontthuna weera nroromeleke weera owo oonilevelela ntoko hiihaale Davidi aaroromelaawe. Mwa yoosoma ene yeela, nnoorowa woona, mwaha wa heeni nintthuneyaahu waakhulela nlevelelo na Yehova, ni etthu heeni enkela onikhavihera opaka eyo.
MWAHA WA HEENI NINTTHUNEYAAHU WAAKHULELA NLEVELELO NA YEHOVA?
5. Etthu heeni Satana ontthunaawe weera nroromeleke? Nvahe ntakihero.
5 Vaavo nnaakhulelaahu nlevelelo na Yehova, onookhalaka wookhweya wiikosoopa ni mirakho sa Satana. Muupuweleleke weera Satana aneereke opaka etthu eri poothe onweraawe weera anihiihe omukokorela Yehova. Satana pooti weerera oneeriha wuupuwelelaka weera soottheka sahu khasinleveleliwa. Muupuwelele yoowereya ya mulopwana mmoha ooKorito yoowo aakumihinwe mmulokoni mwaha wa okonihana woohireerela. (1 Akor. 5:1, 5, 13) Vaavo owo aattharunwaawe, Satana aatthuna weera asinna a mmulokoni ehimulevelele ni ehimwaakhulele otthikela mmulokoni. Mwa etempu emoharu, Satana aatthuna weera mulopwana ole aattharunwe, uupuweleke weera khaalevelelinwe ni “aripiwe murima vantxipale” mpaka ahiye omukokhorela Yehova. Satana khatxentxale yootthunaawe ni mirakho sawe, menento “nòsuwelaxa myupuwelo sawe.” — 2 Akor. 2:5-11.
6. Moota heeni ninrowaahu otaphuwa ni ohiya wiivaha nthowa?
6 Vaavo nnaakhulelaahu nlevelelo na Yehova, hiyo nnookhala ootaphuwa ni khaninrowa wiivahaka nthowa. Vaavo nintthekaahu ikwaha sintxipale hiyo ninnanyoonyiheya. (Nsal. 51:19 [51:17, NM]) Ni eyo etthu yooreera. yoowuupuxeraahu ya murima pooti oneeriha opaka matxentxo ni opaka etthu yoorera. (2 Akor. 7:10, 11) Menento, wakhala weera nnoovirelela wiivaha nthowa, hiyo nttharunweene eyo pooti oneeriha okhulumuwa ni ohiya onvarela Yehova. Vaavo nnaakhulelaahu nlevelelo na Yehova, hiyo ontthuneya ohiya wiivaha nthowa. Napaka eyo, hiyo nnoowera onvarela Yehova ntoko ontthunaawe, onvarela ni yoowuupuxera ya murima yoorera ni ohakalala. (Akol. 1:10, 11; 2 Tim. 1:3) Vanonto, moota heeni ninrowaahu ororomelaka nlevelelo na Muluku?
ETTHU HEENI ENROWA ONIKHAVIHERA WAAKHULELA NLEVELELO NA YEHOVA?
7-8. Yehova aamulenle Mose weera owo aarinono mikhalelo heeni, ni eyo enanroromeliha eheeni? (Ottimula 34:6, 7)
7 Muupuwele etthu Yehova ohimmawe woohima sa Yowo. Mwa ntakihero, muupuwele etthu Yehova amulenlaawe Mose omwaako Sinai.a (Mmusome Ottimula 34:6, 7.) Nnaamweera Yehova areeneno mikhalelo sintxipale sooreera, Owo aathanla omuleela mose weera Owo “Muluku òpixa murima ni òsapwaneya.” Neereke Muluku ntoko owo khaarowa omulevelela mutthu ottharunwe mweekhaikhai yoottheka awe? Hoye! Opaka eyo waarowa okhala wuuma murima ni ohimoriwa ikharari mikhalelo seiyo Yehova ohikhanlaaweno.
8 Wakhala weera Yehova onnahima weera toomoriwa ikharari, nroromeleke weera owo onhima ekhaikhai ni khanootha. (Nsal. 31:6 [31:5, NM]) Wakhala weera nyuwo munnoona okhala wooxupa ottiwala soottheka sanyu, mwiikoheke ha: ‘Wakhala weera miyo kinnaakhulela weera Yehova toomoriwa ikharari ni oopixa murima ni onnamulevelela mutthu ori poothe ottharunwe, neereke miyo nkintthuneya ororomela weera ookilevelela?’
9. Ontaphulela eheeni oleveleliwa soottheka sahu? (Nsalmu 32:5)
9 Muupuwele ele Yehova aalenlaawe anamalepa a Biblya, olepa woohima sa nlevelelo nawe. Muthokorore ntakihero na namalepa Davidi moota iiwanyeihalaawe woohima sa nlevelelo na Yehova. (Musome Nsalmu 32:5.) Davidi ohimme ha: “Nyuwo [moolevelela] olemela wa soottheka saka.” Masu a eheeberi a “nlevelelo” pooti otaphulela “okumiha,” naari “oteexa.” Nto vaavo Yehova aamulevelenlaawe Davidi, waakhala ntoko Davidi aarulinwe muritti woolemela aatenxaawe. Davidi annahakalala mwaha woosuwela weera Yehova oomulevelela moomalela. (Nsal. 32:2-4) Hiyo-tho pooti ohakalala ntoko Davidi. Vaavo ninttharuwaahu khanintthuneya oteexa muritti woolemela ni wiivaha nthowa. Mwaha wooweera Yehova ookumiha wa hiyo soottheka sahu.
10-11. Masu ooweera ‘ori oolikaneene olevelela,’ entaphulela eheeni woohima sa Yehova? (Nsalmu 86:5)
10 Musome Nsalmu 86:5. Davidi onnamuhima Yehova weera ‘ori oolikaneene olevelela.’ Yuulumaka masu ala ereferensiya emoha ya Biblya enhima weera Yehova: “[Owo] ‘toolevelela’ ni owo ‘mukhalelo awe.’” Mwaha wa heeni nlevelelo nraaya mukhalelo wa Yehova? Eparte enttharelana ya eversu ela enhima ha: “[Nyuwo] mwà òsareya ikharari wa yale enawìtthanani.” Mwa yoosoma evinre, nooxuttera weera Yehova oororomeliha owoonihera nsivelo noohimala wa ale emmusivela ni khanrowa waahiya. Mwaha wa nsivelo nawe noohimala, owo ‘onoolevelela moomalela’ soottheka sa anamattheka ootheene ettharunwe. (Yes. 55:7, enoota) Wakhala weera nyuwo onnooxupani waakhulela nlevelelo na Muluku mwiikoheke ha: ‘Miyo kinnaroromela weera Yehova toolevelela? Ni owo ori oolikaneene waalevelela moomalela atthu ootheene enttharuwa ni envekela oleveleliwa? Neereke-nto miyo nkintthuneya waakhulela weera owo ookilevelela vaavo kanvekenlaaka okimorela ikharari?’
11 Hiyo ninnaphwanya nimaaliho mwaha woosuwela weera Yehova oosuwela weera naatthu oohimalela. (Nsal. 139:1, 2) Ninnaphwanya eyo va nsalmu nikina na Davidi, nenno-tho ninnikhavihera waakhulela olevelela wa Yehova.
MUHITTIWALE WEERA YEHOVA ONNUPUWELA
12-13. Moovarihana ni Nsalmu 103:14, etthu heeni Yehova onuupuwelelaawe woohima sa hiyo, ni eyo emmweeriha opaka eheeni?
12 Musome Nsalmu 103:14. Davidi ohimme weera: “Onnaphimelela wi hiyo nri ntthupi.” Ni masu ala Davidi onniiwanyeiha itthu simmweeriha Yehova okhala oolikaneene waalevelela anamakokhorelaawe enttharuwa. Owo onnasuwela weera imaara sotesene hiyo naatthu oohimalela. Weera niiwexexe eyo nrowe noone masu a Davidi.
13 Davidi ohimme weera Yehova “onnasuwela ekhalelo ahu.” Owo ampaka Adamu “[avarihelaka muteko] ntthupi na etthaya,” ni owo oosuwela moota onipankaawe ni itthu ninhaawelaahu. Mwa ntakihero, hiyo ninnahaawela otxa, okona ni omumula. (Eph. 2:7) Menento vaavo Adamu ni Eva yaatthenkaaya, hiyo na ntthupi mwa mukhalelo mukina. Ntoko osuulu awe hiyo noovala yoottheka ni eyo ennaneeriha opaka itthu soonanara. Yehova ohiya paahi oroosuwela weera hiyo naatthu oottheka mene-tho ntoko Davidi ohimmaawe Owo “onnaphimelela” eyo. Masu a eheeberi evarihelinwe muteko va pooti otaphulelaka itthu sooreera. Ni masu vakhaaniini, hiyo pooti otaphulelaka masu a Davidi mwa mukhalelo ola, Yehova oosuwela weera ikwaha ikina ninnattheka, ni vaavo nimpakaahu soottheka ni nnattharuwa owo onnanimorela ikharari ni onlevelela. — Nsal. 78:38, 39.
14. (a) Etthu heeni ekina Davidi ohimmaawe woohima sa moota Yehova onnilevelelaawe? (Nsalmu 103:12) (b) Moota heeni ntakihero na Davidi nnooniheraaya weera Yehova onnanlevelela moomalela? (Nwehe-tho ekwaadru ““Moota Yehova onlevelelaawe ni onttiwalaawe.”)
14 Yehova onanlevelela moota heeni? (Musome Nsalmu 103:12.) Davidi ohimme weera vaavo Yehova onanlevelelaawe, Owo onnahela soottheka sahu “[hiihaale] ntoko ohittó onarakamelaya otá.” Mwa mukhalelo owo, nipuro ninkhumaayawo nsuwa tiwoorakamelana ni nipuro ninneelaayawo nsuwa ni mapuro ala meeli khenkumanela. Eyo entthuna onixuttiha eheeni woohima sa nlevelelo na Yehova? Ereferensiya emoha ehimme ha: “Vaavo yoottheka entxipihiwaaya, Yehova khanuupuwelela-tho eyo ni onnatxipiha moomalela.” Ni ikwaha ikina, winkhela wa yootxa naari etthu eri poothe, ennaneeriha wuupuwela etthu yaarivo khalayi. Menento vaavo Yehova onanlevelelaawe khanuupuwelela-tho yoottheka eyo ni khannittaruxa mwaha wa yoottheka eyo. — Ez. 18:21, 22; Mit 3:19.
15. Etthu heeni nintthuneyaahu opaka wakhala weera ninniivaha nthowa mwaha wa soottheka sahu sakhalayi?
15 Moota heeni masu a Davidi emphwanyeya va Nsalmu 103 enrowaaya onikhavihera waakhulela nlevelelo na Yehova? Wakhala weera ninniivaha mathowa mwaha wa soottheka sakhalayi hiyo niikoheke ha: ‘Keereke kiroottiwala weera Yehova onnupuwelela mukhalelo aka woottheka ni weera onnamulevelela namattheka ottharunwe ntoko miyo? Keereke kinuupuwelela-tho weera Yehova khanuupuwelela soottheka kipankaaka khalayi ni khanrowa okittaruxa mwaha wa soottheka iyo?’ Yehova khanuupuwela soottheka nipankaahu khalayi, hiyo-tho khontthuneya wuupuwelela. (Nsal. 130:3) Vaavo nnaakhulelaahu nlevelelo na Yehova, khaninrowa wiivahaka mathowa mwaha wa soottheka nipankaahu khalayi ni eyo enoonikhavihera omukokhorela Yehova moohakalala.
16. Nvahe ntakihero na moota oraaya woowoopiha ovirelela wiivaha nthowa mwaha wa soottheka sahu sakhalayi. (Nwehe-tho efootu.)
16 Nkuupuwelani ntakihero nna, vaavo mutthu oneettihaawe ekaaro owo onnaweha va espelyuni weera awereke woona etthu enwa ottuli wawe. Owo pooti opaka eyo waatthuneyaka vale, mene waamukhala woowoopiha wakhanle weera owo onnaweha va espelyuni emaara yootheene. Weera eettihe nnene ni moovareleleya, ontthuneya aweheke ohoolo onrowaawewo. Emoha-moharu, ikwaha ikina ti wooreera wuupuwelela soottheka nipankaahu khalayi, mwaha wooweera opaka eyo enoonikhavihera osepa opaka yoottheka emoha-moharu. Menento wakhala weera nnoovirelela wuupuwelela woohima sa yoottheka Yehova onlevelenlaawe, hiyo pooti oyeleela ohakalala wahu ni ohikhala oolikaneene onvarela Yehova mwa mukhalelo woorerela. Opwaha mwa yeeyo, nikhaleke oolikaneene onvarela muteko Yehova ni ovirelela wuupuwelela mareeliho Yehova olaihenraawe, vaavo miyuupuwelo soonanara ‘sihinrowaaya wuupuweleliwaka.’ — Yes. 65:17; Mir. 4:25.
Ntoko mutthu oneettiha ekaaro ontthuneyaawe owehexexa ohoolo ohiya oweha va espelyuni, hiyo-tho nintthuneya owehexexaka mareeliho ninkelaahu waakhela, ohiya owehexexa soottheka sahu sa khalayi (Nwehe eparagrafu 16)
NVIRELELE OROROMELIHA MURIMA ANYU
17. Mwaha wa heeni nintthuneyaahu ovirelelaka ororomelaka ni murima ahu wootheene nsivelo ni nlevelelo na Yehova?
17 Nintthuneya ovirelela waatxeerera nroromelo nahu wa nsivelo ni nlevelelo na Yehova. (1 Yoh. 3:19, enoota) Mwaha wa heeni? Mwaha wooweera Satana khanrowa ohiya wiilipihera weera aneerihe wuupuwela weera Yehova khansiveliwa ni hiyo ni khannilevelela. Mwa mukhalelo ori poothe, yoolakela awe eri emoha, oneeriha hiyo ohiya onvarela Yehova. Hiyo noosuwela weera Satana onoorowa waatxeerera wiilipihera wawe weera apake eyo. Mwaha wooweera oosuwela weera ohanleno etempu vakhaaneene. (Apok. 12:12) Nihimuhiye awinaka!
18. Etthu heeni nyuwo muntthuneyaanyu opaka weera muroromelihe murima anyu ni nsivelo ni nlevelelo na Yehova?
18 Weera naatxeerere nroromelo nahu ni nsivelo nahu wa Yehova, nintthuneya ovarihela muteko etthu niwenhaahu mwa yoosoma evinre. Weera muroromelihe murima anyu woohima sa nlevelelo na Yehova, muupuweleleke moota Yehova uulummaawe woohima sa mikhalelo sawe. Muupuweleleke woohima sa ele aalenlaawe anamalepa a Biblya woohima sa nlevelelo nawe. Muhittiwaleke weera owo onnuupuwela weera hiyo naatthu oottheka ni moomoriwa ikharari onoorowa onthokorora mwa ikharari iyo. Ni muupuweleke-tho weera Owo, vaavo onlevelelaawe onnapaka eyo moomalela. Nto, wakhala weera munoopaka eyo munookhalano nroromelo nimoharu nenno Davidi aaraaweno woohima sa omoriwa ikhararari wa Yehova. Ni nyuwo munoowera ohima ha: “Asantte Yehova mwaha woolevelela ‘olemela wa soottheka saka’!” — Nsal. 32:5.
ETXIPO 1 Mikhalelo sa Yehova
a Moone mwaha onthokororiwa “Mmwaattameleke Muluku— Moota Yehova uulummaawe woohima sa mikhalelo sawe” va Sentinela a 1 a Maio a 2009.