Yehova ontthuna weera atthu ootheene ettharuwe

1. Ottharuwa onhela mpuwa eheeni?

EMAARA nimpakaahu etthu yoonanara, hiyo onnatthuneya ottharuwa. Mbiblyani, mutthu onttharuwa onnatxentxa muupuwelo awe woohima sa etthu eyo owo opankaawe, onnahiya opaka itthu saamweerinhe opaka eyo nave onnathanla ohitthikela opaka yoottheka eyo. — Munwehe Glossário, “Arrependimento.”

2. Mwaha wa heeni ootheene hiyo nintthuneyaahu oxuttera woohima sa ottharuwa? (Nehemiya 8:9-11)

² Mutthu ori oothene onnatthuneya oxuttera woohima sa ottharuwa. Mwaha wa heeni? Mwaha wooweera ootheene hiyo nenne nri nihiku ninnattheka. Ntoko osuulu wa Adamu ni Heva, mutthu ori ootheene a hiyo oovala yoottheka ni okhwa. (Arom. 3:23; 5:12) Khaavo naari mutthu mmoha a hiyo ohitthenke. Mpaka alopwana yaarino nroromelo noolipa ntoko murummwa Paulo, yannawanano yoottheka. (Arom. 7:21-24) Neereke eyo entaphulela weera ikwaha sootheene nintthuneya oxupeya mwaha wa soottheka sahu? Hooye. Yehova toomoriwa ikharari ni ontthuna weera hiyo nihakalaleke. Moone yooweereya ya ayuda emaara ya Nehemiya. (Mmusome Nehemiya 8:9-11.) Yehova khaatthuna weera awo exupeyeke mwaha wa soottheka saya sa khalayi, mene owo aatthuna weera awo ehakalaleke vaavo yaamukokhorelaaya. Yehova oosuwela weera ottharuwa onnaphwanyiha ohakalala. Tivawonto owo onnixuttihaawe woohima sa ottharuwa. Wakhala weera hiyo nnoottharuwa soottheka sahu, nroromeleke weera Tiithi ahu a ikharari anonlevelela.

3. Eheeni ninrowaahu woona mwa yoosoma ene yeela?

³ Ninrowa oxuttera itthu sintxipale woohima sa ottharuwa. Mwa yoosoma ene yeela, nnoothokorora mikhalelo miraru. Woopatxerani, ninrowa woona etthu Yehova aaxuttinhaawe ana a Israeli woohima sa ottharuwa. Woottharelana, ninrowa woona moota Yehova aakhavihenraawe anamattheka ottharuwa. Ni okhwipi waya, ninrowa woona etthu heeni atthareli a Yesu yaaxuttenraaya woohima sa ottharuwa.

ETTHU YEHOVA AAXUTTINHAAWE ANA A ISRAELI WOOHIMA SA OTTHARUWA

4. Eheeni Yehova aaxuttinhaawe nloko na ana a Israeli woohima sa ottharuwa?

⁴ Emaara Yehova aareherenraawe ana a Israeli ntoko nloko, owo aapaka nivarihano naawo. Wakhala weera awo yaamukosoopa malamulo awe, owo aamwaakosoopa ni waareeliha. Woohima sa malamulo awo, aalenle ha: “Nlamulo nla kinòlamulaka, khannèmela ottai ni weyo nari khannòrakamela weyo.” (Ola. 30:11, 16) Mene wakhala weera awo yammurukunuwela, mwa ntakihero, yaakokhorelaka amuluku akina, owo khaarowa waareeliha, nave yanviriha maxupo. Menento nnaamweera oreene hiiho, awo nlelo yanwera otthikela waakhuleliwa ni Muluku. Awo yanwera ‘omutthikela Yehova Muluku aya ni wiiwelela nsu nawe.’ (Ola. 30:1-3, 17-20) Ni masu makina, awo yanwera ottharuwa. Wakhala weera yampaka eyo, Yehova aamurowa owaattamela nave aamurowa waareeliha veeli.

5. Moota heeni Yehova oonihenraawe weera khaanyanyanle atthu awe? (2 Mamwene 17:13, 14)

⁵ Atthu Yehova aathanliyaawe, yaahimurukunuwela ikwaha sintxipale. Ohiya paahi waakokhorela amuluku eethiru, awo yannapaka itthu ikina sootepa onanara. Yookhumelela aya, awo yaaviriha maxupo. Mene Yehova khaanyanyanle atthu awe ale yaamurukunuwela. Owo aahaarumiha maprofeta ikwaha sintxipale weera yaaleele atthu awe weera yaatthuneya ottharuwa ni otthikela wa yoowo. — Mmusome 2 Mamwene 17:13, 14.

6. Moota heeni Yehova aavarihenlaawe muteko maprofeta awe weera yaaxuttihe atthu awe otthuneya waya ottharuwa? (Nwehe efootu.)

⁶ Yehova ikwaha sintxipale aahaavarihela muteko maprofeta awe weera yaaleele ni waalaka atthu awe. Mwa ntakihero, Yehova moorweela mwa Yeremiya enre ha: “Ohokolowe weyo, Israeli . . . Nkinrowa wowehani ni ekhove yoximwene, hoye, niwoko miyo kà pixa murima . . . Nkinrowa onyonyiwa wa mahiku othene. Haya, wìlaphulele yotthek’á, niwoko khomwìwelenle Yahvéh, Muluku á.” (Yer. 3:12, 13) Moorweela mwa Yoweli Yehova aahimme ha: “Muhokolowele wa miyo ni murim’anyu wothene.” (Yow. 2:12, 13) Owo aamuruma Yesaya ohima ha: “Murapeke ni muthuweke, murakamelihe sopanka sanyu sonanara ottaiwene wa maitho aka, musempe emwanomwano.” (Yes. 1:16-19) Ni moorweela mwa Ezekiyeli Yehova ookoha eeraka: “Kapena miyo kinnatthapa nthowa na okhwa wa mulavilavi? . . . Apale onimòtxela ophwanya ekumi, arukunuxa murima ahiyaka iphiro sawe sonanara? Vetthwitthuni miyo nkinahakalala mokhwani mwa ole ontthuna okhwa, . . . mpittukuxe murima ni muni mukhale n’okumi.” (Ez. 18:23, 32) Yehova onnahakalala vaavo atthu enttharuwaaya, mwaha wooweera antthuna weera evirelele okhalano ekumi yoohimala! Mwa yeeyo, Yehova khaiyene onooweherera paahi moopixa murima weera anamattheka erukunuxe murima ahaakhaviheraka. Nrowe noone matakihero vakhaani woohima sa eyo.

7. Avarihelaka yooweereya ya profeta Hoseya ni amwaarawe, etthu heeni Yehova aaxuttinhaawe muloko awe?

⁷ Moone etthu Yehova aaxuttinhaawe atthu awe moorweela mwa ntakihero neekhaikhai na Gomeri mwaarawe profeta Hoseya. Amuraruwelakaru iyawe, owo aamuhiya Hoseya anakhala ni mulopwana mukina. Neereke mwaarawe owo khaarowa ophwanya nikhavihero? Yehova, yoowo onweha mirima, aamweerenle ha Hoseya: “Orowe tho ni omutthune muthiyana onamutthuna mulopwana mukina ni onèttela oraruwa, ntoko Yahvéh onàtthunaiye ana a Israeli, nari ala erukunuwelaka miluku sikina.” (Hos. 3:1; Mir. 16:2) Moone weera nlelo amwaarawe Hoseya yeera epakaka yoottheka etokweene. Menento Yehova aamuleela Hoseya weera awaakhelele veeli ni aalevelele nave atthikele okhala oowiiraana naawo.a Moolikana ni eyo, Yehova khaanyanyanle atthu awe yaawo yaamurukunuwela. Nnaamweera awo yaapaka soottheka itokweene, owo nlelo annaasivela ni annawaakhela ni waakhavihera weera ettharuwe ni otxentxa iphiro saya. Neereke ntakihero nna nintthuna ohima weera Yehova yoowo ‘onweha mirima’ onoorowa omukhavihera mutthu nlelo ompaka yoottheka etokweene ni omweeriha owo ottharuwa? (Mir. 17:3) Nrowe noone.

MOOTA YEHOVA ONWEERIHAAWE ANAMATTHEKA OTTHARUWA

8. Moota heeni Yehova aatthunaawe omukhavihera Kayini weera attharuwe? (Ephattuwelo 4:3-7) (Nwehe efootu.)

⁸ Kayini aari mwaana oopatxera a Adamu ni Heva. Owo aavala mikhalelo soottheka sa asitiithi awe. Opwaha mwa yeeyo, Biblya onhima weera owo: “Sopanka sawe sàri sonanara.” (1 Yoh. 3:12) Onooneya weera waari mwaha ene yoowo Yehova ‘ahampwantthaawe Kayini ni soovaha sawe’ vaavo anvahaawe mukuttho. Ohiya otxentxa iphiro sawe, ‘Kayini aanyoonyiwa vantxipale ni murima awe waamuriipa.’ Etthu heeni Yehova aapankaawe moottharelana? Owo aahuuluma ni Kayini. (Musome Ephattuwelo 4:3-7.) Moone weera Yehova aahuuluma mooreera murima ni Kayini ni aamuleela weera ammureeliha wakhala weera ampaka itthu sooreera. Nave-tho Yehova aamuleela Kayini weera onyoonyiwa wawe wammweeriha opaka etthu yoonanara. Mooriipiha murima Kayini khiiwelenle, owo khaamuhiñye Yehova omweeriha ottharuwa. Neereke Kayini ohiiwelela wawe woomweeriha Yehova ohiya wiilipihera waakhavihera anamattheka? Hooye.

9. Moota heeni Yehova aamweerinhaawe Davidi ottharuwa?

⁹ Yehova annamusivela vantxipale mwene Davidi. Mpaka aamwiitthana “mulopwana a vamurimani vaka.” (Mit. 13:22) Mene Davidi aapaka soottheka itokweene, seiyo saahela mpuwa oraruwa ni wiiva. Moovarihana ni nlamulo na Mose, Davidi annaphwanela okhwa. (Onam. 20:10; Nam. 35:31) Menento Yehova mwa ikharari annatthuna omukhavihera.b Owo aamurumiha profeta awe, Natani weera akumane ni mwene Davidi, nnaamweera owo ahoonihenre ottharuwa. Natani aavarihela ntakihero nimoha nooreera weera avare murima wa Davidi. Axupeñyeene vantxipale, Davidi aattharuwa. (2 Sam. 12:1-14) Owo oolepa nsalmu nnoonihera ottharuwa wawe wa etthu ele aapankaawe. (Nsal. 51, masu a vasulu) Nsalmu nna nohaakhavihera anamattheka antxipale ni nooweeriha ottharuwa. Ninnahakalala mwaha wa Yehova omweeriha murumeyi awe oosiveleya, Davidi ottharuwa.

10. Moota heeni nyuwo muniisoonelaanyu woohima sa Yehova waapixera wawe murima ni waalevelela atthu oottheka?

¹⁰ Yehova khonsiveliwa ni yoottheka, ni owo khanrowa ohiya evirelelaka. (Nsal. 5:5, 6 [5:4, 5, Tradução do Novo Mundo]) Nave-tho owo oosuwela weera ootheene hiyo anamattheka, mene mwaha wa onisivela wawe, owo onnanikhavihera owanano yoottheka. Owo ikwaha sootheene onneerera waakhavihera mpaka atthu ale entepa opaka soottheka ottharuwa ni otthikela wa yoowo. Ti woomaaliha osuwela eyo! Emaara nimphimelelaahu opixa murima ni nlevelelo na Yehova, hiyo ninnakhala oolikaneene ovirelela okhala oororomeleya wa yoowo ni waakuveya ottharuwa vaavo nimpakaahu yoottheka. Vano nrowe noone moota muloko wa ekristu oxuttihinwaaya vantxipale woohima sa ottharuwa.

ETTHU ATTHARELI A YESU EXUTTENRAAYA WOOHIMA SA OTTHARUWA

11-12. Etthu heeni Yesu aaxuttinhaawe atthu ale yaamwiiwelela woohima sa olevelela wa Tiithi awe? (Nwehe efootu ya .)

¹¹ Eseekulu yoopatxera, yaaphiya etempu aakhumelenlaawe Mesiya. Ntoko ehimmwalaaya mwa yoosoma evinre, Yehova aahinvarihela Yohani mpatisa ni Yesu Kristu weera yaaxuttihe atthu otthuneya waya ottharuwa. — Math. 3:1, 2; 4:17.

¹² Mpuwa mwa muteko awe woolaleera, Yesu aahaaxuttiha atthu yaamwiiwelela woohima sa mukhalelo wa nlevelelo wa Tiithi awe. Yesu aahiiwanyeiha nnene sene vaavo aavarihenlaawe ntakihero na mwaana aakhumme vaate va apapawe. Mwaana ole aathanla okhalano ekumi yoohireera. Menento owo “àttantta othoiwa” ni aatthikela owaani. Apapawe yoonenle hayi? Yesu ohimme weera mwaana ole “nlelo [areene] ottaiwene, atith’awe yàmòna ni yàmmorela ikharari. Ni [emuthikireraka, yaamukhupaarela ni yampexari].” Mwaana ole, aatthuna waavekela apapawe weera akhale kaporo vaate vaya, menento apapawe yaamwiitthana “mwan’aka ola” ni yaamutthikihera nipuro nawe na veemusini. Apapawe yenre: “Ola àriheya, vano òphwanyeya tho.” (Luka 15:11-32) Vaavo Yesu aaraawe wiirimu ahinaaye owa elapo ya vathi, moohihovela, owo annaaweha Atiithi awe yaapixeraka murima vantxipale anamattheka antxipale yaattharuwa. Yesu ohoonihera mukhalelo wooreera ni woomaaliha wa Tiithi ahu a ikharari, Yehova!

13-14. Etthu heeni murummwa Pedru axuttenraawe woohima sa ottharuwa ni aaxuttinhe eheeni atthu akina woohima sa mwaha owo? (Nwehe efootu.)

¹³ Murummwa Pedru ooxuttera vantxipale ni Yesu woohima sa ottharuwa ni nlevelelo. Ikwaha sintxipale Pedru wannatthuneya oleveleliwa ni Yesu annamulevelela. Mwa ntakihero, Pedru akhoottakaru ikwaha tthaaru weera aamusuwela Yesu, owo aaxupeya vantxipale mwaha wa etthu ele aapankaawe. (Math. 26:34, 35, 69-75) Mene Yesu avinyererihiwakaru, owo aamukhumelela Pedru, onooneya weera areene meekhaawe. (Luka 24:33, 34; 1 Akor. 15:3-5) Moohihovela, emaara eyo, Yesu mwa nsivelo aamulevelela ni ommaaliha mutthareli awe ole aattharunwe. — Munwehe Marko 16:7 ni enoota ya yoosoma “ni Pedru.”

¹⁴ Mwaha wa yookumanano awe, Pedru vano anwera waaxuttiha atthu akina woohima sa ottharuwa ni nlevelelo. Etempu vakhaani evirakaru efeesta ya Pentekoste, Pedru aapakela mwaha muloko mutokotoko wa ayuda oohiroromela, awiiwanyeihaka weera awo yaamwiiva Mesiya. Menento owo mwa nsivelo, aahaaleela eeraka: “Vanonto ttharuwani ni rukunuxani murima, wera sottheka sanyu sileveleliwe, wowi siso mahiku òmumula erwe wa ekhove ya Apwiya.” (Mit. 3:14, 15, 17, 19, 20a [3:14, 15, 17, 19, NM]) Mwa mukhalelo ene yoola, Pedru ohoonihera weera ottharuwa onnamweeriha mutthu otthenke otxentxa mukhalelo awe woonanara wa moota onuupuwelaawe ni ompakaaweno itthu, ni okhalano mukhalelo ommusiveliha Muluku. Nave-tho Pedru ohoonihera weera Yehova aamurowa otxipiha soottheka saya naari ohuupuwela-tho. Sivirakaru iyaakha sintxipale, Pedru aahaaroromeliha akristu weera: “[Yehova] . . . ari òpixa murima ni nyuwo, niwoko khanatthuna wi akina eriheye, mene othene erukunuxe murima.” (2 Ped. 3:9) Ela yooweherera yooreera wa akristu nnaamweera epakaka soottheka itokweene!

15-16. (a) Moota heeni murummwa Paulo oxuttenraawe woohima sa nlevelelo? (1 Timotheyo 1:12-15) (b) Eheeni ninrowaahu othokorora mwa yoosoma enttharelana?

¹⁵ Atthu vakhaani yannatthuneya ottharuwa vantxipale ni oleveleliwa ompwaha Saulo a oTarso. Moowuuma murima, owo aahaatthara-tthara atthareli oosiveleya a Kristu. Onooneya weera akristu antxipale yuupuwela weera owo ooriheya ni khaanoono yooweherera ya ottharuwa. Menento Yesu khaakhanleno muupuwelo owo woohireera wa atthu. Owo ni Tiithi awe yannoona mikhalelo sooreera sa Saulo. Yesu aahimme ha: “Ole ti ekahi kithanliyaka.” (Mit. 9:15) Yesu mpaka aavarihela muteko mwiiriira weera amweerihe Saulo ottharuwa. (Mit. 7:58–8:3; 9:1-9, 17-20) Saulo, yoowo muhoolo mwaya osuwelinwe ntoko murummwa Paulo, akhalakaru mukristu, imaara sintxipale ohoonihera oxukurela wawe mwaha wa oreereliwa murima ni omoreliwa ikharari. (Mmusome 1 Timotheyo 1:12-15.) Murummwa ola axukurelaka ohimme ha: “Muluku orera wawe murima onnawìtthanela orukunuxa murim’á.” — Arom. 2:4.

¹⁶ Emaara Paulo iiwalaawe woohima sa okonihana woohireerela muloko wa oKorinto, owo oonenle hayi? Owo aapaka etthu yeeyo ennixuttiha vantxipale woohima sa ottaruxa mwa nsivelo wa Yehova ni woohima sa otthuneya waya woonihera ikharari. Nnoorowa othokorora yooweereya eyo nnene sene mwa yoosoma enttharelana.