Moota woowina mikhalelo soonanara

1. Etthu heeni atthu ootheene hiyo ninwanaahuno?

NEEREKE nyuwo mwaakhalano ntthuno na opaka etthu Yehova ohinaakhulelaawe? Wakhala weera munaakhula aani, muhuupuwele weera mukhalelo owo munviriha meekhiinyu waapwaha atthu akina. Biblya oneera: “Wereriwa ori wothene wophwannyeni, khopwahiye ikuru sa mutthu.” (1 Akor. 10:13)a Eyo enthaphulela weera mukhalelo ori poothe woonanara yoowo nyuwo munwanaanyuno, atthu akina-tho ennawanano mukhalelo ene yoowo. Nyuwo khamukhanle meekhiinyu, mene nnikhavihero na Yehova nyuwo pooti owera owina.

2. Sooweerera heeni akristu ni anamasoma akina a Biblya envirihaaya? (Nwehe-tho efootu.)

² Biblya ohimme ha: “Mutthu ti mutthu onnèreriwa ni minlelo sawe sonanara.” (Yak. 1:14) Etthu emmweerera mutthu pooti ovirikana ni ele emmweerera mutthu mukina. Mwa ntakihero, akristu akina ennawanano ni mukhalelo wootthuna okonihana ni mulopwana naari ni muthiyana, mene akina ennawanano ni mukhalelo wootthuna okonihana athiyanaru naari alopwanaru. Ale ehinye woonela epornografia pooti okhalano ntthuno na otthikela woonela epornografiya. Antxipale ehinye ovarihela mirette soohapala ni owura vantxipale ennawanano maxupo mamoha-moharu. Iya mikhalelo akristu akina ni anamasoma a Biblya enwanaayano. Imaara ikina ootheene ahu ninniisoona ntoko murummwa Paulo iisoonaawe, yoowo olempe ha: ‘Vaavo kintthuna aka opaka etthu yooreera, kinnakhalano ntthuno na opaka etthu yoonanara.’ — Arom. 7:21.

3. Etthu heeni mutthu aarowaawe opatxera wuupuwela wakhala weera ikwaha sintxipale onnawanano ni ntthuno noopaka etthu yoonanara?

³ Wakhala weera nyuwo munnavirelela owanano mukhalelo woonanara, nyuwo pooti wuupuwela weera khamunwera ni khamwaanono ikuru woopaka etthu yooreera. Nyuwo-tho pooti wuupuwela weera khamwaanono yooweherera, okhalaka ntoko Yehova khanwaakhulelani mwaha wa miyuupuwelo sanyu soonanara. Menento muroromeleke weera kheyaavo naari itthu sa seiyo siri seekhaikhai! Weera niiwanyeihe mwaha wa heeni, mwa yoosoma ela nnoorowa woona waakhuliwa wa makoho meeli: (1) Miyuupuwelo sooweera khamukhanleno ikuru soowera owina yoowerera ni khamukhanleno yooweherera sinkhuma woowi? (2) Moota heeni nyuwo munrowaanyu owanano mikhalelo soonanara?

ETTHU “MUTAKHALI” ONTTHUNAAWE WEERA NUUPUWELEKE

4. (a) Mwaha wa heeni Satana ontthunaawe weera nuupuweleke weera khaninrowa owera owina mikhalelo soonanara? (b) Mwaha wa heeni hiyo nintthuneyaahu ororomelaka weera nnoowera owina mikhalelo soonanara?

⁴ Satana ontthuna oneerihaka ororomela weera khaninwera owanano mikhalelo soonanara. Yesu aasuwela eyo vaavo aaxuttinhaawe atthareli awe ovekela eeraka: “Muhinihiye mooweereriwani, mene munivuluxe mmatatani mwa Mutakhali.” (Math. 6:13) Satana ohimme weera atthu khenwera omwiiwelela Yehova wakhala weera enookumanano ni yoowerera. (Yobi 2:4, 5) Mwaha wa heeni Satana onuupuwela awe hiiho? Satana mutthu oopatxera weereriwa ni sootthuna sawe soonanara, ni owo khaatthuna ovirelela okhala oororomeleya wa Yehova. Onooneya weera Owo onuupuwela weera hiyo nri ntoko owo, ni nnoomuhiya Yehova wakhala weera nnamweereriwa. Mpaka Satana uupuwela weera mpaka mwaana oomalela a Muluku anweriwa ni yooweerera! (Math. 4:8, 9) Muupuwele ela: Neereke hiyo mweekhaikhai khaninwera owanano mikhalelo soonanara? Moohihovela ninnawera! Hiyo ninnaakhulela ni masu a murummwa Paulo, olempaawe: “Kinnawera sothesene mwaha wa yoowo onakilipiha.” — Afil. 4:13.

5. Moota heeni ninsuwelaahu weera Yehova onnaroromela weera hiyo nnoowera owina mikhalelo soonanara?

⁵ Moovirikana ni Satana, Yehova onnaroromela weera hiyo nnoowera owanano sootthuna soonanara. Ninsuwela moota heeni eyo? Mwaha wooweera Yehova aahima vahinaaye weera muloko mutokotoko wa atthu oororomeleya onoovuluwa emaara ya maxupo matokweene. Muupuwele etthu entaphulelaaya eyo. Yehova khanootha, ohimme weera atthu antxipale ohiya atthu vakhaani enoovolowa mu elapo enyowani ni mukhalelo wooreera, ni “yàtxapa malaya aya ni yàtteliha mwa ephome ya Mwaputtiputthi.” (Apok. 7:9, 13, 14) Mweekhaikhai, Yehova khannoona ntoko atthu nihinwera owanano ni sootthuna soonanara.

6-7. Etthu heeni Satana ontthunaawe weera nroromeleke?

⁶ Satana ohiya paahi ontthuna weera hiyo niisooneke weera khaninwera owanano mikhalelo soonanara, mene-tho ontthuna weera hiyo nooneke ntoko khanikhanleno yooweherera, okhalaka ntoko Yehova khannaakhulela mwaha wa mikhalelo sahu soonanara. Muupuwele-tho ela: Mwaha wa heeni Satana ontthuna awe weera nuupuweleke wa mukhalelo ene yoola? Satana ti yoole ohinoono yooweherera othorihinwe ni Yehova ni ohiphwanenle okhalano ekumi yoohimala. (Eph. 3:15; Apok. 20:10) Moohihovela, Satana ontthuna weera nuupuweleke weera hiyo khanaanono yooweherera ntoko owo ohikhanlaaweno, otepaxa wene vaavo hiyo nraahuno eparakha yoowaakhela mareeliho owo ohikhanlaaweno. Mwa yeeyo, hiyo khanikhanle ntoko owo. Mweekhaikhai, Biblya onnanroromeliha weera Yehova ontthuna onikhavihera weera niwere okhalano ekumi yoohimala. Owo “khanatthuna wi akina eriheye, mene othene erukunuxe murima.” — 2 Ped. 3:9.

⁷ Mweekhaikhai, naaroromelaka weera khanaanono ikuru naari khaninwera owanano mikhalelo soonanara, ninnuupuwela moota Satana ontthunaawe weera nuupuweleke. Wiiwexexa eyo onoonikhavihera olipiha yoolakela ahu ya omukhootta Satana. — 1 Ped. 5:8, 9.

MOOTA NNIISOONA AHU MWAHA WA MUKHALELO AHU WOOTTHEKA

8. Ohiya paahi mikhalelo soonanara, yoottheka enhela mpuwa eheeni? (Nsalmu 51:5) (Nwehe-tho “Masu Oowiiwanyeihiwa.”)

⁸ Ohiya paahi Satana, yookhala etthu ekina ekhanle ooneeriha wuupuwelela weera khaninwera owanano mikhalelo soonananra ni weera khinaanono yooweherera. Etthu heeni? Mukhalelo ahu woottheka, yoowo nivanlaahu wa asitiithi ahu oopatxera.b — Yobi 14:4; musome Nsalmu 51:7 [51:5, NM].

9-10. (a) Moota heeni mukhalelo wa yoottheka waavolenlaaya Adamu ni Eva? (Nwehe-tho efootu.) (b) Moota heeni mukhalelo wa yoottheka onnivoleelaaya?

⁹ Muupuwelele moota mukhalelo woottheka wanvolenlaaya Adamu ni Eva. Vaavo yaamutthekenlaaya Yehova, awo yaahipitha ni yaahipithiha erutthu aya. Nuulumaka woohima sa mwaha owo, nwehe eliivuru Estudo Perspicaz das Escrituras, eneera: “Mwa yeeyo, yoottheka yaaweeriha wiivaha nthowa, oxupeya, ohivareleleya ni wuuliwa muru.” Waakhala ntoko Adamu ni Eva yaawalelinwe mpaani, empa yeeyo yaarinono ikwaartu ixexe. Adamu ni Eva yaaheereke okhuma okwaartu erowaka ekwaartu ekina. Menento awo khiyaarowa owera okhumela vaate. Awo khiyaawera otthawa mukhalelo aya woottheka.

¹⁰ Ekhaikhai weera khanikhanleno mukhalelo mmoharu wa Adamu ni Eva. Mwaha wooweera nlivo na Yesu khaninvareleya muteko wa yaawo. Mene nlivo na Yesu ninnanikhavihera oleveleliwa soottheka sahu ni okhalano yoowuupuxera ya murima yooreera. (1 Akor. 6:11) Nnaamweera vareene hiiho, noovala yoottheka ni ohimalela. Mwa yeeyo, hiyo khanintikiniheya vaavo nnivaha ahu nthowa, oxupeya ohivareleleya ni wuuliwa muru. Mweekhaikhai, Biblya onhima weera yoottheka ennaavoleela vantxipale atthu. Ni eyo ekhaikhai wa atthu ootheene naari “yale yahàtthenke sawasawa yottheka ele yohìwelela ènraiye Adamu.” (Arom. 5:14) Mene khanintthuneya wuupuwelelaka weera nnaamweera niyarinweene ni yoottheka, khaninrowa owera opaka etthu yooreera ni khanikhanleno yooweherera ya muhoolo. Nintthuneya okhoottaka miyuupuwelo iyo soonanara. Moota heeni?

11. Nooneleke hayi muupuwelo wooweera hiyo khaninwera owina mikhalelo soonanara, ni mwaha wa heeni? (Aroma 6:12)

¹¹ Vaavo nnuupuwela ahu weera khaninwera owanano ni sootthuna soonanara, hiyo pooti woona eyo ntoko mukhalelo ahu wa yoottheka ‘onuuluma’ ni nihiiweleleke. Mwaha wa heeni? Mwaha wooweera Biblya onnanxuttiha weera nihihiyeke yoottheka evirelelaka ‘onlamulela’ hiyo. (Mmusome Aroma 6:12.) Eyo entaphulela weera hiyo pooti othanla ohipaka itthu moovarihana ni sootthuna soonanara. (Agal. 5:16) Yehova onnaroromela weera hiyo nnoowera owina soowerera, ahanroromela kharowa onivekela opaka eyo. (Ola. 30:11-14; Arom. 6:6; 1 Ates. 4:3) Onnooneya weera hiyo nookhalano owera woowanano sootthuna soonanara.

12. Nooneleke hayi muupuwelo wooweera khinaanono yooweherera, ni mwaha wa heeni?

¹² Mwa mukhalelo mmoharu, vaavo nnoonaahu weera khananono yooweherera, okhalaka ntoko Yehova khannakhulela mwaha wa sootthuna sahu soonanara, hiyo pooti woona eyo ntoko mukhalelo ahu woottheka ‘wuulumaka’ ni hiyo nihiiweleleke. Mwaha wa heeni? Mwaha wooweera Biblya onnaxuttiha weera Yehova oosuwela mukhalelo ahu woottheka. (Nsal. 103:13, 14) Owo ‘oosuwela sootheene’ woohima sa hiyo, ohela mpuwa mukhalelo ahu woottheka yoowo nivanlaahu ni onneeriha opaka itthu soonanara mwa mikhalelo soovirikana. (1 Yoh. 3:19, 20) Wakhala weera hiyo nnoowanano ni mukhalelo wootthuna opaka etthu yoonanara avinyaka nihimpaka eyo, Yehova aneereke onoona okhala ootteela. Mwaha wa heeni nintthuneyaahu ororomelaka eyo?

13-14. Neereke mwaha wookhalano sootthuna soonanara, entaphulela weera khannakhuleliwa ni Yehova? Muthalihe.

¹³ Biblya onnanoonihera weera wookhala ovirikaana okhanle eriyari ya opaka etthu yoonanara (yeeyo ninweraahu owehexexa) ni okhalano ntthuno na opaka etthu yoonanara (nenno ninkhumelela meekhaya). Mwa ntakihero, akristu akina a oKorinto a eseekulu yoopatxera yannakonihana alopwanaru naari athiyanaru. Paulo olempe ha: “Khweeli akina mwa nyuwo mwàri siso.” Neereke eyo entaphulela weera awo ekhalakaru akristu khetonko okhalano ntthuno na okonihana woohireerela? Onooneya weera hooye. Mwaha wooweera awo yaakhovelela opaka itthu iyo. Mene akristu yaiweha-weha ni yaasepa opaka itthu moovarihana ni sootthuna saya yanaakhuleliwa ni Yehova. Owo aahiwoona okhala ‘oorapihiwa.’ (1 Akor. 6:9-11) Emoha-moharu pooti weereya ni nyuwo.

¹⁴ Muhipwatthaka mikhalelo heeni soonanara nyuwo munvirihaanyu, nyuwo pooti oowera owina. Nnaamweera muhimala-malihaka, nyuwo pooti wiiweha-weha ni osepa ‘minlelo soonanara sa erutthu anyu.’ (Aef. 2:3) Moota heeni nyuwo munrowaanyu opaka eyo ni owina mikhalelo soonanara?

MOOTA WOOWINA SOOWERERA

15. Wakhala weera nintthuna owina sootthuna soonanara, mwaha wa heeni nintthuneya ahu waakhulela itthu sinneerera?

¹⁵ Weera nwine sootthuna soonanara, nyuwo muntthuneya wiiyeviha ni waakhulela itthu sinweererani. Ni mwiikosoopeke weera muhiiwoke ni ‘myuupuwelo soonanara.’ (Yak. 1:22) Muhiyeviheke maxupo anyu. Mwa ntakihero, mutthu onwura pooti wuupuwelaka weera, ‘Akina ennawura vantxipale okipwaha miyo,’ naari mutthu onoonela epornografia, pooti wuupuwela ha: ‘Amwaaraka yaasiveliwa ni miyo nkaarowa woonelaka epornografia.’ Opaka eyo enoowerihani nyuwo oweriwa ni yooweerera. Mwa yeeyo, muhaaseke mathowa weera mpake etthu yoonanara, naari mmuupuweloni mwanyu. Mwaakhuleleke soopaka sanyu. — Agal. 6:7.

16. Moota heeni ninrowa ahu olipiha yoolakela ahu ya opaka etthu yooreera?

¹⁶ Ohiya waakhulela paahi itthu sinwererani, nyuwo-tho muntthuneya wiilipihera weera muheereriwe ni sooweerera iyo. (1 Akor. 9:26, 27; 1 Ates. 4:4; 1 Ped. 1:15, 16) Muupuweleleke etthu enooxupani owina ni emaara heeni enooxupayani eyo. Pooti weeraka ennooxupani owina yooweerera wakhala weera oxeexelo, othana naari ohiyu. Mwa ntakihero, neereke nyuwo onnooxupani owina yooweerera wakhala weera mookhulumuwa naari yoophwannyeni ohiyu eriyari? Mwiireherereke wa moota munrowaanyu waakhula ni etthu munrowaanyu opaka wakhala weera enookhumelela yooweerera eyo. Ti wootthuneya opaka eyo ehinaaye okhumelela yooweerera. — Mir. 22:3.

17. Etthu heeni ninxuttera ahu ni ntakihero na Yosefe? (Ephattuwelo 39:7-9) (Nwehe-tho efootu.)

¹⁷ Moone etthu Yosefe aapankaawe vaavo mwaara a Potifari erenraawe omuhapuxa. Moowaakuveya owo aakhoottha. (Musome Ephattuwelo 39:7-9.) Ninxuttera eheeni ni Yosefe? Yosefe aakhalano yoolakela ya opaka etthu yooreera ahinaaye weereriwa ni mwaara a Potifari. Vamoha-moharu, nyuwo pooti wunnuwihera mukhalelo woopaka ele eri yooreera ohinaaye ophiya weereriwa. Mwa yeeyo, vaavo muneereriwaanyu onookhala wookhweya wa nyuwo wuupuwelela yoolakela mpankaanyu khalayi.

‘NVIRELELEKE WIIWEHA-WEHA’

18. Moota heeni nyuwo munrowaayu owina mikhalelo soonanara? (2 Akorinto 13:5)

¹⁸ Weera nwere owina mikhalelo soonanara, nyuwo muntthuneya ‘ovirelela wiiweha-weha’ meekhiinyu, naari neere, ovirelela wuupuwelela moohihiyerera weera moone moota munkhumelaanyu nnene. (Mmusome 2 Akorinto 13:5.) Noovira etempu, nwehexexeke veeli-veeli miyuupuwelo sanyu ni soopaka sanyu ni mpakeke matxentxo waatthuneyaka vale. Mwa ntakihero, nnamweera nyuwo nweraka okhoottha sooweerera, pooti wiikoha ha: ‘Neereke yoovira etempu yintxipale weera kikhootte yooweerera ela?’ Wakhala weera nyuwo mohoonelela weera moopisa, muhikhulumuwe. Opwaha mwa yeeyo, mpakeke itthu sinrowa wookhaviherani wiikosoopa. Mwiipakelaka makoho ntoko ala: ‘Keereke kinnatthuneya ovukula etempu kinkuxaaka weera kisepe miyuupuwelo soonanara? Neereke itthu kinthanlaaka onnakhala wooxupa weera kiwine yooweerera? Neereke kinnasepa moowaakuveya oweha itthu sinhela mpuwa okonihana moohireerela? Neereke miyo kinnaiwexexa weera malamulo a Yehova ikwaha sootheene tooreera wa miyo, naari otthuneyaka wiilipihera vantxipale weera kitthare?’ — Nsal. 101:3.

19. Moota heeni soothanla sinkhala ntoko ikhaanini, mene sireene soonanara sinrowaaya weeriha okhala wooxupa owina mikhalelo soonanara?

¹⁹ Musepeke wiisaakiha ni yoolakela ya opaka etthu yoonanara. Biblya ohimme ha: “Murima wa mutthu ti wowotha opwaha sothene.” (Yer. 17:9) Yesu ohimme weera vamurimani sinnakhuma “miyuupuwelo soonanara.” (Math. 15:19) Mwa ntakihero, mutthu ohinye omoonela pornografia, noovira etempu pooti wuupuwelaka weera, “khaiyene ti woonanara” woona ifootu sa atthu ehiwanre nnene, naari owo pooti wuupuweha weera, ‘Khaiyene ti woonanara okhalano miyuupuwelo sinhela mpuwa okonihana mutthu waahipakakaru itthu iyo.’ Menento murima woowokeya wa mutthu owo ‘khoniikhapelela ni sa erutthu, waakhulelaka eninlelaaya.’ (Arom. 13:14) Moota heeni nyuwo munrowaanyu osepa opaka eyo? Musepeke opaka soothanla ikhaanini soonanara seiyo sinrowa oweerihani opaka soothanla itokweene soonanara ni muhoolo mwaya sinrowa oweerihani oweriwa ni sooweerera.c Musepeke-tho “miyuupuwelo soonanara” sootheene seiyo sinweerihani wiisaakiha weera mpake etthu yoonanara.

20. Yooweherera heeni nraahuno woohima sa muhoolo, ni nikhavihero heeni nraahuno viinaano?

²⁰ Ntoko nxuttenraahu, mwaha wa nikhavihero na Yehova nookhalano owera wookhoottha weereriwa. Opwaha mwa yeeyo, mwaha wa nlivo na Yesu Kristu nookhalano yooweherera ya ekumi yoohimala mu elapo enyowani. Nnookhala oohakalala vaavo ninrowaahu onvarelaka Yehova ni muupuwelo ni murima wooreera! Weera eyo yeereye, nroromeleke weera nookhalano owera woowina sooweerera ni nookhalano yooweherera. Ni mareeliho a Yehova woohima sa wiilipihera wahu, hiyo nnoowera owina!