Nvireleleke okhala oohakalala vaavo munuuluvalaanyu

1-2. Yehova onwoonela hayi arumeyi awe oowuuluvala? (Nsalmu 92:12-14; Nwehe-tho vakaapani.)

ATTHU a elapo yootheene ennakhalano miyoonelo soovirikana vaavo enuuluvalaaya. Mwa ntakihero: Neereke nyuwo munnuupuwela vaavo moonelenlaanyu niihi nanyu noopatxera nootteela? Pooti weeraka nyuwo mwaakhala ni ntthuno noophela nihinaaye wooniwa ni mutthu mukina. Menento, nyuwo mwaahonelela weera opaka eyo khiyaarowa okhoottihera okhumelela maihi makina ootteela. Ntakihero nna ninnoonihera moota onkhalaaya wooxupa wa atthu antxipale vaavo enuupuwelelaaya wuuluvala.

² Menento, Tiithi ahu a wiirimu ookhalano moonelo woovirikana woohima sa arumeyi awe oowuuluvala. (Mir. 16:31) Wa Yehova awo ari ntoko miri sinkumihera soowiima sintxipale. (Musome Nsalmu 92:13-15 [92:12-14, NM]) Mwaha wa heeni ntakihero nna nraaya nooreera? Ikwaha sintxipale, miri soowinnuwa siri ni ifuloori soowinkhela ti seiye sivirinhe iyaakha sintxipale. Mwiri mmoha wootikiniha oniitthaniwa cerejeira japonesa. Miri mikina sa cerejeira sootepa ooreera sookhalano iyaakha soopwahaka 1000. Ntoko hiihaale miri iyo, asinna oororomeleya oowuuluvala tootepa oreera otepaxa wene vamaithoni va Muluku. Yehova onnoona etthu ekina ohiya paahi maihi aya ootteela. Owo onnavaha mwiitti mikhalelo sooreera sa asinna awo, ntoko ovilela ni ororomeleya waya. Opwaha mwa yeeyo, Yehova onnuupuwelela iyaakha sintxipale asinna awo evirinhaaya envarelaka moororomeleya.

3. Nvahe ntakihero na moota Yehova aavarihenlaawe muteko atthu oowuuluvala weera akwanihere yootthuna awe.

³ Wuuluvala khommweeriha mutthu ohikhalano mwiitti vamaithoni va Yehova.a Mweekhaikhai, Yehova onnaavarihela muteko atthu oohimalela weera akwanihere yoolakela awe. Mwa ntakihero, Sara aarino iyaakha 90 vaavo Yehova aamulenlaawe weera aarowa okhala maaye a nloko ntokotoko ni nenno naarowa omukumihera Mesiya. (Eph. 17:15-19) Nave-tho Mose aari oowuuluvala vaavo Yehova aamuthanliyaawe weera aakuxe aIsraeli aakumihaka wExipitu. (Ott. 7:6, 7) Ni murummwa Yohani aakhalano iyaakha soowinnuwela vaavo Yehova aamupuxenraawe olepa iliivuru 5 sa mBiblyani.

4. Moovarihana ni Miruku 15:15, etthu heeni enrowa waakhavihera asinna oowuuluvala oviriha maxupo aya? (Nwehe-tho efootu.)

⁴ Wuuluvala onnakumihera maxupo mantxipale. Murokora mmoha ohuuluma masu ootheiha, enre ha: “Wuuluvala khaiyene ti wa atthu oohilipa.” Mene ohakalalab pooti waakhavihera atthu oowuuluvala oviriha maxupo aya. (Musome Miruku 15:15.) Mwa yoosoma ene yeela, nnoorowa woona itthu heeni asinna oowuuluvala entthuneyaaya opaka weera evireleleke ohakalala. Nave-tho nnoorowa woona etthu asinna a mmulokoni entthuneyaaya oopaka weera yaakhavihere. Mene woopatxerani, ninrowa woona mwaha wa heeni oraaya wooxupa ovirelelela ohakalala vaavo nnuuluvalaahu.

MWAHA WA HEENI ORAAYA WOOXUPA OVIRELELA OHAKALALA VAAVO NNUULUVALAAHU

5. Etthu heeni enweeriha atthu akina oowuuluvala okhulumuwa?

⁵ Itthu heeni ikina sikhanle oowookhulumulani? Apaale nyuwo munnaxupeya mwaha wooweera khamunwera opaka ele mwaaweraanyu opaka khalayi. Nave-tho pooti weeraka nyuwo munnankheliwa ni etempu yeeyo mwaaraanyu mmiravo ni mwaaraanyuno ekumi yooreera. (Koh. 7:10) Mwa ntakihero, murokora mmoha oniitthaniwa Ruby ohimme ha: “Miyo kinnoona ovoreya mweerutthuni mwaka ni nkinwera wiisookola ntoko khalayi. Owara ikuwo onkhala wooxupa wa miyo. Naari ovinya weera kitxentxe ipeyuuka onkhala wooxupa. Matata aka ennakirikira ni miyo nkinwera ovarela muteko ikatha saka nnene sene, mwa yeeyo naari opaka itthu sookhweya onkhala wooxupa wa miyo.” Harold, yoowo aavara oBeteeli, ohimme ha: “Ikwaha ikina miyo kinnaxupeya mwaha wooweera nkinwera onvonya boola. Atthu yannakeerela ha: ‘Munvahe boola Harold mwaha wooweera owo khammukusa.’ Mene vano miyo nkaarowa onvonya nnakhala vakhaani.”

6. (a) Mathowa heeni makina ekhanle ooweeriha ale oowuuluvala okhulumuwa? (b) Etthu heeni ekhanle ooweeriha ale oowuuluvala othanla wakhala weera anoorowa othanla weetthiha ekaaro naari hooye? (Nwehe va nwehereri ene yoola muru oneera “Neereke kinnatthuneya ohiya weettiha ekaaro?”)

⁶ Apaale nyuwo pooti okhulumuwa mwaha wooweera khamunwera opaka itthu mwaaweraanyu, otepaxa wene wakhala weera nyuwo mummuhaawela mutthu aneera ookosoopekeni naari wakhala weera muntthuneya okala ni mmoha a anamwane anyu. Naari nyuwo pooti oxupeya mwaha wooweera nyuwo khamunoona nnene naari ekumi anyu khekhanle nnene ni nyuwo khamunwera weettiha ekaaro meekhiinyu. Itthu iya mweekhaikhai pooti ovoleela ohakalala wanyu! Menento, muupuweleleke weera etthu enneeriha okhala ootthuneya wa Yehova ni wa atthu akina khaiyene owera nraahuno woowiikosoopa, okhala meekhiihu naari owera weettiha ekaaro. Ni nroromeleke weera Yehova oosuwela miyuupuwelo sahu etthu Owo onpwatthaawe murima ahu woosareya nsivelo omuxukurela wahu ni waaxukurela wahu asinna. — 1 Sam. 16:7.

7. Etthu heeni enrowa waakhavihera atthu ale enoova ohikhala mpaka etempu elapo ela enrowaaya omala?

⁷ Apaale nyuwo pooti woova muupuwelaka weera khamunrowa okhala mpaka etempu elapo ela enrowa omala. Wakhala weera eyo ennooriipihani murima, ti heeni enrowa wookhaviherani? Muupuweleleke weera Yehova onnaweherera moopixa murima omaliha elapo ela yoonanara. (Yes. 30:18) Mene opixa murima wa Yehova wookhalano yoolakela, weera atthu antxipale ekhaleno etempu ni eparakha yoomusuwela ni onvarela Owo. (2 Ped. 3:9) Mwa yeeyo, vaavo nyuwo munkhulumuwaanyu, mweerereke wuupuwelela atthu akavi enrowa ovuluxiwa mwaha wa opixa murima wa Yehova. Pooti weeraka akina a yaawo amusi anyu.

8. Moota heeni maxupo enaavoleelaaya ale yuuluvanle?

⁸ Nihipwatthaka waari weera na amiravo naari na atthu oowuuluvala, vaavo ninvoreiwaahu naari nnoonaahu ovoreya ti wookhweya opaka naari wuuluma etthu ni muhoolo mwaya nnattharuwa. (Koh. 7:7; Yak. 3:2) Mwa ntakihero, vaavo murumeyi oororomeleya Yobi aavirihaawe maxupo, aahuuluma ‘masu aahuupuwenle nnene.’ (Yobi 6:1-3) Opwaha mwa yeeyo, maxupo a ekumi pooti omweeriha mutthu oowuuluvala opaka naari wuuluma itthu seiyo ahaarowaawe opaka naari wuuluma. Mene nnaamweera nreene oowuuluvala naari nivoreiwaka khiwaarowa okhala wooreera okhala oowali naari oweherera weera imaara sootheene atthu enipakeleke itthu sooreera. Ni wakhala weera nohoonelela weera khanoonihenre nsivelo ni mutthu, nintthuneya ovekela nlevelelo. — Math. 5:23, 24.

ETTHU MUNTTHUNEYAANYU OPAKA WEERA NVIRELELE OHAKALALA

9. Mwaha wa heeni nyuwo muntthuneyaanyu waakhulela nikhavihero na atthu akina? (Nwehe-tho efootu.)

⁹ Mwaakhuleleke nikhavihero na atthu akina. (Agal. 6:2) Woopatxerani eyo pooti okhala yooxupa. Murokora mmoha oniitthaniwa Gretl ohimme ha: “Ikwaha ikina miyo kinnoona okhala wooxupa waakhulela nikhavihero mwaha wooweera miyo nkintthuna waavaha muteko atthu. Yaavira etempu weera miyo kiwere otxentxa muupuwelo aka ni okhala oowiiyeviha weera kaakhulele weera kinnahaawela nikhavihero.” Vaavo nyuwo munaakhulelaanyu nikhavihero na atthu akina, nyuwo munneeriha weera awo yooneke ohakalala onkhumelela mwaha woovaha. (Mit. 20:35) Ni nyuwo monoohakalala mwaha woowoona nsivelo ni okosoopiwa ni atthu akina.

10. Mwaha wa heeni nyuwo muhintthuneyaanyu ottiwala woonihera oxukurela? (Nwehe-tho efootu.)

¹⁰ Moonihere oxukurela. (Akol. 3:15; 1 Ates. 5:18) Vaavo atthu akina empakaaya itthu sooreera wa hiyo, hiyo ninnaxukurela, mene hiyo pooti ottiwala opaka eyo. Mene vaavo ninhakalalaahu nneera asantte, asinthamwene ahu ennoona weera ninnavaha mwiitti ele ennipakelaaya. Leah, yoowo onaakosoopa atthu oowuluvala oBeteeli, ohimme ha: “Murokora mmoha ori nno onnakilepela ikaarta akixukurelaka. Ekhaikhai weera ikaarta iyo ikhaanini, mene ti sooreera sinnakisivela ikaarta iyo, mwaha wooweera kinnahakalala osuwela weera owo onnavaha mwiitti ele kinampakelaaka.”

11. Moota heeni nyuwo munrowaanyu waakhavihera atthu akina? (Nwehe-tho efootu.)

¹¹ Mwiilipihereke waakhavihera atthu akina. Wakhala weera nyuwo munnavarihela muteko etempu anyu ni ikuru sanyu weera mwaakhavihere atthu akina, nyuwo khamunrowa ovirihaka etempu yintxipale muupuwelelaka maxupo anyu. Masu a wAfrica envariheliwa muteko vantxipale ennaalikanxera atthu oowuuluvala ni ebiblioteka yoosareya iliivuru, erino nyaha sootthuneya sa miruku. Nto, okhala weera nyuwo mwa “ebiblioteka ekumi,” mpatxeriheke waaleela amiravo itthu musuwenlaayu ni sooweereya sanyu. Mwaapakeleke makoho ni nwiiweke etthu awo enhimaaya. Nwoonihere mwaha wa heeni opaka yootthuna ya Yehova onwihaaya ohakalala ni oraaya wooreera wa hiyo. Moohihovela nyuwo munoorowa ohakalala vaavo munrowaanyu waamaalihaka ni waalipiha asinthamwene anyu amiravo. — Nsal. 71:18.

12. Moovarihana ni Yesaya 46:4, etthu heeni Yehova onlaiheraawe wa ale yuuluvanle? (Nwehe-tho efootu.)

¹² Munvekeleke Yehova nvekaka ikuru. Apaale nyuwo pooti oxupeya mwa, mukhalelo wa weerutthuni naari wa mmuupuweleloni, mene Yehova “khakhulumunwe nari khanakhulumuwa.” (Yes. 40:28) Moota heeni Yehova onvarihelaawe ikuru sawe soohimala? Mukhalelo mmoha ori waalipiha asinna oowuuluvala yaawo eri oororomeleya. (Yes. 40:29-31) Mweekhaikhai Owo onnalaihera wookhaviherani nyuwo. (Mmusome Yesaya 46:4.) Ni Yehova ikwaha sootheene onnakwanihera soolaihera sawe. (Yeh. 23:14; Yes. 55:10, 11) Vaavo nyuwo munvekelaanyu ni munoona nsivelo ni nikhavihero na Yehova, nyuwo munoohakalalaka vantxipale.

13. Moovarihana ni 2 Akorinto 4:16-18, etthu heeni nintthuneyaahu wuupuwelelaka? (Nwehe-tho efootu.)

¹³ Muupuweleke weera wuuluvala onahaala omala. Vaavo nnuupuwelaahu weera maxupo ta etempu vakhaaniini, onnakhala wookheya ovilela. Biblya onnaroromeliha weera muhoolo atthu khenrowa wuuluvalaka ni ovoreiwa. (Yobi 33:25; Yes. 33:24) Mwa yeeyo, nyuwo pooti ohakalala musuwelaka weera muhoolo munookhalano ekumi yooreera, yoolipa ni yootepa oreera, yeeyo muhitonko anyu okhalano. (Mmusome 2 Akorinto 4:16-18.) Mene etthu heeni atthu akina enrowaya opaka weera ekhavihere?

ETTHU ATTHU AKINA ENTTHUNEYAAYA OPAKA WEERA YOOKHAVIHERENI

14. Mwaha wa heeni oraaya wootthuneya waalikarela ni waaxekura asinna oowuuluvala?

¹⁴ Mukhaleno yookhovelela ya waalikarela ni waaxekura asinna oowuuluvala. (Aheb. 13:16) Atthu antxipale oowuuluvala anniisoona okhala meekhaaya. Munna mmoha oniitthaniwa Camil, yoowo ohinwera okhuma vaate wawe ohimme ha: “Miyo kinkhala mpaani oxeexelo, othana ni ohiyu. Nto miyo kinnaxupeya vantxipale. Ikwaha ikina kinniisoona ntoko kharamu owalelinwe. Eyo ennakeeriha okhala oonyoonyiheya.” Vaavo nnaaxekuraahu asinna oowuuluvala ninnoonihera weera awo tootthuneya wa hiyo ni ninnaasivela. Neereke nyuwo mootoko wuupuwela omulikarela munna oowuuluvala a muloko anyu naari omuxekura, mene muhipaka eyo? Mwaha woowaatteliwa vantxipale eyo pooti weereya. Vanonto, moota heeni ninrowaahu ‘othanla itthu soophwanelela’ seiyo sinhela mpuwa waaxekura asinna oowuuluvala? (Afil. 1:10) Etthu ekhanle ookhavihera ori olepa masina a asinna oowuuluvala a muloko anyu ni othanla nihiku munrowaanyu waalepela mensagem naari waaxekura. Ohiya weera: ‘Nihiku nikina kinoorowa waaxekura,’ muthanleke nihiku munrowaanyu waaxekura.

15. Itthu heeni atthu oowuuluvala ni amiravo entthuneyaaya opakaka vamoha?

¹⁵ Amiravo akina khenoona etthu yoowuuluma naari yoopaka ni ale yuuluvanle. Mene muhixupeye vantxipale ni eyo. Nyuwo mukhale paahi nthamwene ooreera wa yaawo. (Mir. 17:17) Mweerere otthekula ni asinna oowuuluvala sihinaaye naari samala vale mithukumano. Apaale nyuwo pooti waakoha yoolepa heeni ya mBiblyani enaasivela vantxipale naari waavekela weera yooleeleni yoowereya aya yootheiha emaara yeeyo yaaraaya anamwane. Nyuwo-tho pooti waawopa weera yoonele ni nyuwo eprokraama ya JW Broadcasting^®. Opwaha mwa yeeyo, nyuwo pooti wiivaherera weera mwaakhavihere ni itthu awo ehinweraaya opaka meekhaaya. Mwa ntakihero, neereke awo ennahaawela nikhavihero weera emwaatualisari telefooni aya naari obaxari ipublikasau sa yoosoma? Murokora mmoha oniitthaniwa Carol ohimme ha: “Mwaawope asinna oowuuluvala weera mpake itthu sinoosivelani naawo. Miyo koosuwela weera kohuuluvala mene nlelo kinnatthuna ottottela mureerelo ekumi. Miyo onnakisivela opaka soothuma, otxa nipuro nikina ni orowa oweha soopattuxiwa.” Ni murokora mmoha oniitthaniwa Maira ohimme ha: “Miyo kookhalano nthamwene aka a iyaakha 90. Hiyo nookhalano iyaakha soovirikana sinkwanela 57. Mene ikwaha sintxipale miyo nkinuupuwelela eyo, mwaha wooweera ninnatheya vamoha ni woonela iviidiyu vamoha. Ni vaavo ninkhalahuno maxupo ninnakhaviherana mukina ni mukhwaawe.”

16. Mwaha wa heeni oraaya wooreera waahoola atthu oowuuluvala ospitaale?

¹⁶ Mwaahooleke atthu oowuuluvala ospitaale. Ohiya paahi waateexa mukaaroni, nyuwo pooti okhala naawo weera moone moota enrowaaya okosoopiwaka ni mameediku. (Yes. 1:17) Nyuwo-tho pooti wiivaherera weera mulepe etthu meediku onrowaawe ohima. Murokora mmoha oowuuluvala oniitthaniwa Ruthi ohimme ha: “Ikwaha sintxipale vaavo kinrowaaka ospitaale meekhaaka mameediku khenkisoopa nnene. Awo ennahima masu ntoko: ‘Maxupo anyu ta mmuupuweleloni, eyo etthu ya mmurini mwanyu.’ Mene wakhala weera koomukuxa mutthu weera arowe ni miyo kinnakosoopiwa nnene. Kinnaaxukurela asinna mwaha wa etempu eniihiyeraaya weera erowe ospitaale.”

17. Mwa mukhalelo heeni nyuwo munrowaanyu ovara muteko woolaleera ni asinna oowuuluvala?

¹⁷ Nvareke vamoha muteko woolaleera ni asinna oowuuluvala. Asinna akina owuuluvala pooti weeraka khenwera olaleera empa ni empa. Nkuupuwelani wakhala weera ti yeeyo eneereya ni murokora mmoha a muloko anyu. Neereke nyuwo mwanwera onwopa weera mwalaleere vamoha ni ekarinya? Nyuwo pooti okuxa ekatera weera owo akilaathi. Mukhalelo mukina woopaka ori onwopa munna oowuuluvala weera akhale ni nyuwo vaavo munrowaanyu opakihaka yoosoma ya Biblya, ni pooti opaka eyo owannyawe. Opwaha mwa yeeyo, asitokweene pooti othanla opaka muthukumano wa munna oowuuluvala weera okhale wookheya wa owo orowela muteko woolaleera. Vaavo nniilipiheraahu waattittimiha asinna oowuuluvala, Yehova onnahakalala vantxipale. — Mir. 3:27; Arom. 12:10.

18. Etthu heeni ninrowaahu woona mwa yoosoma enttharelana?

¹⁸ Yoosoma ela yoonuupuxera weera Yehova onnaasivela asinna oowuuluvala ni onnaavaha mwiitti. Ni ootheene hiyo a mmulokoni ninniisoona hiiho! Ekumi yoowuuluvala khaiyene ti yookhweya, mene ni nikhavihero na Yehova hiyo pooti ovirelela okhala oohakalala. (Nsal. 37:25) Ti wooreera osuwela weera mahiku ooreera khekhanle ottuli mene eri muhoolo! Mene asinna ni asirokora ennaviriha maxupo oovirikana: awo ennamukosoopa mmusi aya oowuuluvala naari nthamwene aya onvoreiwa. Etthu heeni awo entthuneyaaya opaka weera evirelele ohakalala? Ti yeeyo ninrowaahu woona mwa yoosoma enttharelana.