Eliivuru ya Yobi pooti wookhaviherani nyuwo vaavo munvahaanyu miruku

1-2. Maxupo heeni asinthamwene araru a Yobi ni Elihu yaavirinhaaya?

VAAVO Yobi aayelenlaawe mihakhu sawe sootheene, atthu antxipale a muttetthe awe yaahiiwa etthu yeereñye ni owo. Vaavo asinthamwene araru a Yobi, Elifazi, Bildadi, ni Zofari, yaasuwenlaaya ele yeereñye ni Yobi, awosa yaarowa elapo ya Uzi weera yammaalihe, yoonakaru etthu yeereñye ni Yobi awo yaatikhiniheya.

² Nkuupuwelani etthu ela. Itthu sootheene Yobi aaraweno aayeleela. Iputtiputthi sawe sintxipale, imombe, ikamelo ni apuuru awe aahaayeleela. Anamwane awe yaahikhwa ni anamuteko awe antxipale yaakhwa-tho. Ni empa anamwane a Yobi yaakhwenlaayamo yaamora. Ni khaiyene yeeyoru paahi yeereñye, Yobi aavoreiwa vantxipale. Erutthu awe yaasareya makhwatta oovoreya. Vaavo asinthamwene awe araru yaaphiñyaaya, Yobi eera akilantheene vattuurani ni axupeñyeene vantxipale. Moota heeni yiisoonenlaaya? Awosa yaakhala ni Yobi mahiku 7, mene mpuwa mwa etempu eyo, awo khayuulumme etthu, nnaamweera yoona weera owo annoona ovoreya. (Yobi 2:12, 13) Muhoolo mwaya, mmiravo mmoha iitthaniwa Elihu aaphiya ni aakilaathi vakhiviru vaya. Mene, Yobi aapatxera wuuluma. Owo aatthuna okhwa ni aanikhupanyera mwaha wooyariwa. (Yobi 3:1-3, 11) Mweekhaikhai, Yobi annahaawela nikhavihero! Etthu alopwana ale yuulummaaya ni moota yuulumaaya, waamurowa woonihera waari weera yaari asinthamwene eekhaikhai a Yobi ni waari weera yaanampwattha.

3. Etthu heeni ninrowaahu woona mwa yoosoma ene yeela?

³ Yehova aamuruma Mose olepa etthu asinthamwene araru a Yobi ni Elihu yaahimmaaya ni yaapankaaya. Ti wootthuneya osuwela weera itthu ikina Elifazi uulummaawe saakumiherinwe ni munepa woonanara. Moovirikana ni eyo, itthu Elihu uulummaawe suupuxerinwe ni Yehova. (Yobi 4:12-16; 33:24, 25) Khanintikhiniheya weera nnaamweera eliivuru ya Yobi ehimaka miruku sooreera, eyo-tho ennahima miruku soonanara. Nnoorowa woona moota eliivuru ya Yobi enrowaaya onikhavihera vaavo nintthuneyaahu ovaha miruku. Yoopatxera, nnoorowa woona matakihero oonanara aasinthamwene araru a Yobi. Moottharelana, nnoorowa woona ntakihero nooreera na Elihu. Mwa itthu siri poothe nnoorowa oxuttera moota aIsraeli yaarowaaya ottottela mureerelo eliivuru ya Yobi ni moota hiyo nintthuneyaahu ottottela mureerelo olelo-va.

MOOTA ASINTHAMWENE ARARU A YOBI YANVANHAAYA MIRUKU

4. Mwaha wa heeni asinthamwene araru a Yobi yahaawenraaya okwanihera yoolakela aya? (Nwehe-tho efootu.)

⁴ Biblya onhima weera asinthamwene araru a Yobi yaarowa “omukhaliha Yobi ni siso omuhakalaliha” vaavo yiiwalaaya woohima sa maxupo aavirihaawe. (Yobi 2:11) Menento, awo khiyaawenre okwanihera yoolakela aya. Mwaha wa heeni? Mwaha wa mathowa mararu. Yoopatxera, awo khiyaapatxenre omwiiwa Yobi ni wiiwexexa etthu yaamuxupa. Mwa ntakihero, awo yuupuwela weera Yehova ammuttaruxa Yobi mwaha wa soottheka sawe.a (Yobi 4:7; 11:14) Yanaaveeli, itthu sintxipale yaamulumenlaaya Yobi, nnaamweera saakhala ntoko sa miruku khisaamukhavihenre, saari soohireerela, ni soovoreya. (Yobi 13:12) Awo yaamuulumela itthu soohireerela Yobi, itthu seiyo saamweerinhe oxupeya. Mwa ntakihero, Bildade aahima ikwaha piili weera Yobi annuuluma vantxipale. (Yobi 8:2; 18:2) Ni ikwaha ikina alopwana ale yannakhala oowali. Mwa ntakihero, Zofari aamulikanxera Yobi ni mulopwana ‘nsikiini.’ (Yobi 11:12) Yanaararu, nnaamweera awo yahaamunyemela Yobi, itthu yuulummaaya ni moota yuulumaaya yaamweeriha owo wiivaha nthowa ni wiisoona ohisiveliwa. (Yobi 15:7-11) Alopwana ala yannavirelela weerera omoonihera Yobi weera aakhalano yoottheka ni khiyammaalinhe naari khiyaamulipinhe.

5. Etthu heeni yaakhumelenle ni miruku asinthamwene a Yobi yanvanhaaya?

⁵ Khanintikhiniheya, weera miruku sa asinthamwene a Yobi khasaamuhakalalinhe. Yobi anniisoona okhala ooxupeya mwaha wa masu aya. (Yobi 19:2) Vaavo awo yaamootheraaya opaka etthu yoonanara owo annoona weera annatthuneya wiisaakiha. Eyo yaamweeriha ohikhala nnene mmuupuweloni ni wuuluma moohireerela. (Yobi 6:3, 26) Itthu yuulummaaya asinthamwene a Yobi, khasaavarihana ni miyuupuwelo sa Yehova, naari khiyaamuthokoronre Yobi moomoriwa ikharari. Yookhumelela aya ti yooweera Satana aawera waavarihela muteko weera ehimulipihe Yobi. (Yobi 2:4, 6) Moota heeni yooweereya ela yaarowaaya waakhavihera atthu a khalayi, ni moota heeni enrowaaya onikhavihera olelo?

6. Etthu heeni asitokweene a wIsraeli yaatthuneyaaya oxuttera ni ntakihero noohireerela na asinthamwene a Yobi?

⁶ Moota aIsraeli yaarowaaya ottottela mureerelo. Opakiwakaru muloko wa aIsraeli, Yehova aahaathanla alopwana yaari asitokweene, weera ethoriheke muloko moovarihana ni malamulo awe axariya. (Ola. 1:15-18; 27:1) Alopwana ala yannatthuneya wiiwa moomaaleleya ehinaaye ovaha miruku naari othoriha. (2 Sow. 19:6) Awo-tho yannatthuneya opaka makoho, ohiya wuupuwela weera yaasuwela itthu sootheene. (Ola. 19:18) Alopwana ala yaavaha miruku wIsraeli yannatthuneya osepa wuuluma moohireerela wa ale yaasa nikhavihero. Mwaha wa heeni? Mwaha wooweera mutthu khaarowa okhala ootaphuwa ohima mweekhaikhai moota aisoonelaawe wakhala weera asitokweene yannuuluma moohireerela naari moohipixa murima. (Ott. 22:22-24) Asitokweene a wIsraeli yaathokoronre yooweereya ya Yobi yaaxuttera ni yooweereya awe.

7. Ohiya asitokweene a wIsraeli taani-tho yaatthuneya ovaha miruku, ni moota heeni awo yaarowaaya ottottela mureerelo yooweereya ya Yobi? (Miruku 27:9)

⁷ Ekhaikhai weera, asitokweene a wIsraeli khaiyene yaari meekhaaya yaatthuneya ovaha miruku. Mweekhaikhai, mwIsraeli ori poothe, mmiravo, oowuuluvala, mulopwana naari muthiyana amurowa onvahaka miruku nthamwene awe aarowa ohaawelaka nikhavihero weera areherere okokhorela wawe naari otxentxa muupuwelo awe. (Nsal. 141:5) Asinthamwene eekhaikhai ennakhala oolikaneene weera yaakhavihere akhwaaya mwa mukhalelo ene yoola. (Musome Miruku 27:9.) Ntakihero noonanara na asinthamwene araru a Yobi naahaaxuttiha aIsraeli etthu yaatthuneyaaya osepa wuuluma ni osepa opaka vaavo yaavahaya miruku.

8. Etthu heeni nintthuneyaahu osepa vaavo nnaavahaahu miruku atthu akina? (Nwehe-tho efootu.)

⁸ Moota ninttottelaahu mureerelo. Ntoko makristu, nintthuneya waakhavihera asinna ni asirokora vaavo envirihaaya maxupo. Menento, weera nipake eyo, nintthuneya osepa etthu asinthamwene araru a Yobi yaapankaaya. Yoopatxera, nintthuneya wiiwexexa itthu sootheene nihinaaye ovaha miruku ni ororomela weera ele ninhimaahu ennavarihana ni ekhaikhai. Yanaaveeli, miruku sahu sivarihaneke ni masu a Muluku ohiya ni muupuwelo ahu, ntoko Elifazi aapankaawe ikwaha sintxipale. (Yobi 4:8; 5:3, 27) Yanaararu nintthuneya osepaka wuuluma masu oohireerela, naari oowali. Muupuweleke weera Elifazi ni asinthamwene awe yaahuuluma itthu ikina saari seekhaikhai, muhoolo mwaya murummwa Paulo aalepa masu makina a Elifazi. (Mulikanxere ni Yobi 5:13 ni 1 Akorinto 3:19.) Menento, itthu sintxipale yuulummaaya yaamoothera Muluku ni sanvoreya Yobi, mwa yeeyo, Yehova aahima weera itthu yuulummaaya saari seethiru. (Yobi 42:7, 8) Vaavo nnaavahaahu miruku atthu akina nintthuneya ororomelaka weera etthu nnuulumaahu khemmweeriha Yehova okhala oohireerela naari khenweriha atthu wuupuwela weera Yehova khanaasivela arumeyi awe. Vano ninrowa woona etthu ninxutteraahu ni ntakihero na Elihu.

MOOTA ELIHU ANVANHAAWE MIRUKU YOBI

9. Muthalihe mwaha wa heeni Yobi aatthunaawe nikhavihero asinthamwene awe emaalakaru wuuluma ni moota heeni Yehova aamukhavihenrawe.

⁹ Yobi ni asinthamwene awe araru yaahuuluma mwa etempu yintxipale. Alopwana ale yaahuuluma masu enkwanela ikapiitulu 28 sa mBiblyani, ni itthu sintxipale yuulummaaya yuulumme enyoonyiheñyeene ni moohireerela. Hiyo ninnaiwexexa mwaha wa heeni Yobi aavirelenlaawe okhala ooxupeya! Owo nlelo annahaawela nimaaliho ni nttaruxo. Moota heeni Yehova aamukhavihenrawe Yobi? Owo anvarela muteko Elihu weera anvahe miruku. Mwaha wa heeni Elihu aahuulummaawe vahinaaye? Owo aahima, ‘Miyo ka mmiravo, nyuwo mohuuluvala. Tivawonto kaamanlaaka mwaha wa nttittimiho.’ (Yobi 32:6, 7) Mmiravo Elihu aasuwela etthu amiravo antxipale olelo esuwenlaaya: Atthu oowuuluvala ikwaha sintxipale ta miruku mwaha wooweera aakhala etempu yintxipale ni aakumanano itthu sintxipale sa mweekumini waapwaha amiravo. Mene aiwakaru moopixa murima masu a Yobi ni asinthamwene awe, Elihu khaavirelenle omaala. Owo aahimme ha: “Anamiruku kahiyene yale a iyakha sintxipale pahi nari asuweli èkhaikhai kahiyene yale òwuluvala pahi!” (Yobi 32:9) Moottharelana etthu heeni Elihu uulummaawe, ni moota heeni uulummaawe eyo?

10. Etthu heeni Elihu aapankaawe ahinaaye onvaha miruku Yobi? (Yobi 33:6, 7)

¹⁰ Ahinaaye opatxera onvaha miruku owo aatthuna weera Yobi, iisooneke okhala oomaaleleya ni akhale oolikaneene wiiwa ele aarowaawe wuuluma. Etthu heeni Elihu aapankaawe? Woopatxerani, owo aahikosoopa ni muupuwelo awe. Ninnasuwela eyo mwaha wooweera Biblya onhima weera woopatxerani Elihu aanyoonyiheya. (Yobi 32:2-5) Nnaamweera vareene hiiho, owo khaamunyemenle Yobi mwaha woonyoonyiheya. Opwaha mwa yeeyo, owo aahiiyeviha ni aahuuluma ni Yobi ntoko nthamwene eekhaikhai. Mwa ntakihero owo aamuleela Yobi eeraka: “Òná, oholo wa Muluku miyo wothe kinaphwanaphwana ni weyo.” (Mmusome Yobi 33:6, 7.) Mwa yeeyo, Elihu aahoonihera weera aamurowa omwiiwa moomaaleleya. Ahinaaye onvaha miruku Yobi, owo aahuuluma veeli itthu sootthuneya Yobi uulummaawe. (Yobi 32:11; 33:8-11) Owo aapaka etthu enlikana ni eyo imaara seiyo anvahaawe miruku Yobi. — Yobi 34:5, 6, 9; 35:1-4.

11. Moota heeni Elihu anvanhaawe miruku Yobi? (Yobi 33:1)

¹¹ Vaavo Elihu anvanhaawe miruku Yobi, khaamweerinhe owo wuupuwela weera khaavareleya muteko. Opwaha mwa yeeyo, owo aamoonihera nttittimiho mulopwana ole oororomeleya. Mwa ntakihero, Elihu aavarela muteko nsina na Yobi, nenno alopwana ale araru oweharu yahaavarenlaaya muteko. (Mmusome Yobi 33:1.) Apaale Elihu aanuupuwelela moota aaraaweno ntthuno noowuuluma vaavo Yobi ni asinthamwene awe yuulumaaya, menento Elihu anvaha Yobi eparakha yoowuuluma. (Yobi 32:4; 33:32) Elihu tho aamoonihera Yobi mwaha wa heeni itthu ikina owo uulummaawe ni aapankaawe saaraaya soohireerela ni mooreera murima owo aamuupuxera osuwela, owera, ni nsivelo noororomeleya na Yehova. (Yobi 36:18, 21-26; 37:23, 24) Miruku sooreera sa Elihu saamukhavihera Yobi wiireherera weera aiwe miruku sa Yehova. (Yobi 38:1-3) Moota heeni ntakihero na Elihu naakhavihenraaya atthu a khalayi ni moota heeni ninrowaaya onikhavihera olelo-va?

12. Moota heeni Yehova aavarihenlaawe maprofeta weera aakhavihere atthu awe, ni moota heeni aIsraeli awo yaakhavihereñyaaya ni ntakihero nooreera na Elihu?

¹² Moota aIsraeli yaarowaaya ottottela mureerelo. Yehova ikwaha sintxipale annaavarihela maprofeta weera aaxuttihe ni waatxaruxa aIsraeli. Mwa ntakihero, emaara ya aphuki, Yehova anvarihela Debora weera aavahe miruku atthu awe, Yehova tho anvarihela muteko Samuweli ovinyera areene mmiravo weera aaxuttihe aIsraeli. (Aph. 4:4-7; 5:7; 1 Sam. 3:19, 20) Emaara ya mamwene, Yehova aahaakumihera maprofeta mantxipale weera aalipihe atthu awe moomunepani ni waavaha miruku ale yaahiya okokhorela weekhaikhai. (2 Sam. 12:1-4; Mit. 3:24) Ntakihero na Elihu nlempwale mu liivuru ya Yobi naakhalano owera noowaakhavihera alopwana ni a athiyana oororomeleya wiiwexexa etthu yoowuuluma ni moota woowuuluma vaavo yaavahaaya miruku.

13. Moota heeni Akristu oolelo enrowaaya waalipiha asinna akina?

¹³ Moota ninttottelaahu mureerelo. Ntoko makristu, hiyo-tho ninnasuweliha yootthuna ya Muluku nlaleyaka masu awe enkhuma mBiblyani. Mukhalelo mukina woopaka eyo ori ovarihela masu ooreera ni enaalipiha asinna. (1 Akor. 14:3) Asitokweene ennatthuneya osuwela weera entthuneya “òrera murima” ni asinna ni asirokora, naari ereene ni ale enyoonyiheñye ni enuuluma “masu ànepa.” — 1 Ates. 5:14; Yobi 6:3.

14-15. Muthalihe moota mutokweene onrowaawe omutakiha Elihu vaavo onvahaawe miruku.

¹⁴ Nkuupuwelelani etthu ela. Mutokweene a mmulokoni onnoonelela weera murokora a muloko awe ooxupeya. Owo onnamukuxa munna mukina weera yamuxekure ni omulipiha. Mpuwa mwa oxekura, murokora onnahima weera, nnaamweera avirelelaka olaleera ni woonela mithukumano, owo khanhakalala. Etthu heeni mutokweene aarowaawe opaka?

¹⁵ Apaale owo onimweerera osuwela itthu heeni simmweeriha murokora owo oxupeya. Weera awere opaka eyo, owo ontthuneya omwiiwa moopixa murima. Neereke owo oniisoona weera khamphwanela nsivelo na Muluku? “Soovalaveliha sa mweekumini” sinnamukhulumula? (Luka 21:34) Etthu yanaaveeli, mutokweene onamwasaasera ewoora weera amuttottopele murokora. Owo onnoonela mithukumano ni onnarowa muteko woolaleera nnaamweera akhalaka ooxupeya. Ni yanaararu, mutokweene oniiwexexaawe nnene etthu emmuxupa murokora ole ni mwaha wa heeni owo oniisoonaawe hiiho, onoonvarela Biblya weera amukhavihere ororomela weera Yehova onnamusivela. — Agal. 2:20.

NVIRELELE OTTOTTELA MUREERELO ITTHU SOOTTHUNEYA

16. Moota heeni ninrowaahu ovirelela ottottela mureerelo eliivuru ya Yobi?

¹⁶ Mweekhaikhai sookhala itthu sintxipale ninxutteraahu ni eliivuru ela ya Yobi! Yoosoma evinre nohoona weera eliivuru ya Yobi yoonixuttiha mwaha wa heeni Muluku onaakhulelaawe ohaawa. Ni moota heeni ninrowaahu ovirelela okhala oororomeleya wa Yehova vaavo ninvirihaahu maxupo. Ni ntoko nonnaahu mwa yoosoma ela, nooxuttera moota woovaha miruku mooreerela nitakihaka ntakihero na Elihu ohiya na asinthamwene awe araru. Munoonela hayi otthikela osoma itthu muxuttenraanyu ni yooweereya ya Yobi muhinaaye waavaha miruku atthu akina muhoolo? Wakhala weera khamusomme eliivuru ela ya Yobi viinaano, mukhaleno yooluluwanya ya osoma eliivuru ela yooreera. Nyuwo munamoonelela weera ti yoovareleya muteko olelo ntoko emaara yaalempwaaya.