Moone masu ooweera “wòheliwa” va yoolepa ya olelo. Dicionário a Biblya onniiwanyeiha masu ala ntoko ‘murooro wa maahi owaaka wa hiyo.’ Ntakihero nna ninnoonihera moota Yehova onaasivelaawe asinna oothanliwa! Nave awo aasuwela weera eri “òsiveleyaxa mwa Muluku.” (Yuda 1) Murummwa Yohani oohima ele uupuwelaawe alepaka ha: “Ònani otthuna wulupale anivahiyaya Atithi, wera nìtthaniwe anamwane a Muluku!” (1 Yoh. 3:1) Neereke Yehova onaasivela paahi asinna oothanliwa? Hooye, Yehova ohoonihera weera onnansivela ootheene hiyo. Etthu heeni enoonihera weera Yehova onnansivela? Mukuttho etthu etokweene yoonihenre nsivelo na Yehova mwa elapo yootheene! — Yoh. 3:16; Arom. 5:8. w24.01 epaax. 28 eparag. 9-10

Eversu ya olelo ennoonihera etthu yaamukhavihenre Davidi emaara yeeyo oovaawe: Nnaamweera Davidi aari veerisani, owo annuupuwela etthu Yehova eeraawe ampakele owo. Moohihovela, Davidi annasuwela weera Yehova ammukhavihera etempu yoophwanelela. Nto Yehova aahihima weera Davidi aamurowa okhala mwene a wIsraeli. (1 Sam. 16:1, 13) Vamaithoni va Davidi, itthu sootheene Yehova aamuleihenraawe saakhala ntoko sookwanela. Etthu heeni Yehova olaihenraawe woopakelani nyuwo? Hiyo ninnaweherera weera Yehova onoorowa onikosoopa wa maxupo mootheene ninkumanaahuno. Mwaha wa yeeyo, nroromeleke weera maxupo mootheene ninkumanaahuno elapo ela, Yehova onoorowa omaliha elapo enyowani. (Yes. 25:7-9) Nave mpattuxa ahu ookhalano owera woowaavinyereriha alipa ookhwa, woomaliha iretta sinnikhumelela ni woowaamaliha amwiittani ahu. — 1 Yoh. 4:4. w24.01 epaax. 6 eparag. 12-13

Muupuweleleke wiivaherera ni opatisiwa wanyu. Nyuwo mwaapaka itthu piili iya mwaha wooweera mwaatthuna okhala vakhiviru ni Yehova. Nkuupuwelelani etthu yookhavihenreni waakhulela weera moophwanya ekhaikhai. Nyuwo mwaaxuttera ikhaikhai sa Yehova ni mwaapatxera omuttittimiha ni omusivela Tiithi anyu a wiirimu, opwaha mwa yeeyo nyuwo mwaahunnuwihera nroromelo nanyu nenno nookhavihenreni ottharuwa mwa itthu soonanara mwaapakaanyu khalayi. Murima anyu wooweerihani ohiya opaka itthu soonanara moowiiwanana ni mukhalelo wa Muluku, ni nyuwo mwaataphuwa moonelelakaru weera Muluku ohoolevelelani. (Nsal. 32:2) Nyuwo mwannoonela mithukumano ni mwaapatxera waaxuttiha atthu akina ele mwaaxuttenraanyu. Ntoko mukristu oowiivaherera ni oopatisiwa, nyuwo vano muneetta ephiro ya ekumi, ni moolakela ohihiya weettela ephiro ela. (Math. 7:13, 14) Nvireleleke okhala oolipa mwa omukokhorela wanyu Yehova ni ohittikinyeya mwa wiiwelela wanyu malamulo awe. w23.07 epaax. 17 eparag. 14; epaax. 19 eparag. 19