YOOSOMA 22
Moota heeni nyuwo muneeraanyu mwaala- leereke mitthenka sooreera atthu akina?
Mpaka va, nyuwo mooxuttera ikhaikhai sintxipale sa mBiblyani. Apaale nyuwo pooti wuupuwelaka ha: ‘Atthu ootheene waannatthuneya osuwela eyo!’ Ekhaikhai weera atthu ootheene wannatthuneya osuwela eyo! Nnaamweera vareene hiiho, nyuwo pooti woona wuuliha muru waaleela atthu akina itthu munxuttenraanyu. Mwa yoosomeene yeela, ninkela woona moota nyuwo munkelaanyu omaliha woova ni okhalano ohakalala mwaha woowaaleela atthu akina mitthenka siri mBiblyani.
1. Wa seiye munxutteraanyu, munaawere hayi wuuluma ni amusi anyu ni asinthamwene anyu?
Atthareli a Yesu yaahimme ha: “Khannawerya ohiya wuluma seiyo nònnahu ni nìwalahu.” (Mit. 4:20) Awo yannasiveliwa ni ekhaikhai ni yaatthuna waaleela atthu antxipale. Nyuwo tho munoonela hiiho? Mwaha wa yeeyo, mottottele murerelo eparakha ela weera muulume ni amusi anyu ni asinthamwene anyu iye munxutteraanyu. Muhittiwale opaka eyo nooreera murima.—Mmusome Akolosi 4:6.
Miruku mikina sineera
Vaavo nyuwo muntthekulaanyu ni amusi anyu, nyuwo pooti ohima masu ntoko ala: “Kooxuttera etthu yootepa otthuneya esemana ela.”
Mmoonihere soolepa sa mBiblyani nthamwene anyu yoowo onvoreiwa naari omuripale murima.
Wakhala weera makolekaanyu oomutekoni animokohani moota nvirihaanyu omala wa esemana, mwaleeleke ele muxuttenraanyu wa yoosomaanyu ya Biblya naari omithukumanoni.
Nwoonihere asinthamwene anyu esaite jw.org.
Munwope munna naari murokora weera ohooleni opakiha yoosomaanyu ya Biblya naari mmoonihere moota woovekela yoosoma ya Biblya va jw.org.
2. Mwaha wa heeni oraaya wootthuneya olaleera ni muloko?
Atthareli a Yesu yaapaka ele yaaweraaya weera yalaleere mitthenka sooreera atthu ootheene yaasuwelaaya. Awotho, yaalaleya moorehereya. Yesu aahaaruma atthareli awe olaleera “eli eli oholo waya, muttetthe ni nipuro nri nothene”. (Luka 10:1) Eyo yaahaavaha atthu eparakha yoowiiwa mitthenka sooreera sa Omwene. Nnaamweera vareene hiiho, atthareli a Yesu olaleera vamoha wannaaphwanyiha ohakalala. (Luka 10:17) Neereke nyuwo munoowera olaleera vamoha ni muloko?
WEERA MUXUTTERE SINTXIPALE
Moone moota munkelaanyu omaliha woova mwaalaleeraka ni okhalano ohakalala mweerelaka empari muteko ahu.
3. Yehova onookhala ni nyuwo
Atthu antthuna olaleera pooti okhala ooxupeya mwaha wa ele atthu akina eneeraaya yuupuwele naari yoonele.
Neereke nyuwo munnoova waaleela atthu akina ele munxutteraanyu? Mwaha wa heeni?
Moone EVIIDIYU, avinyaka mutthekule ni epontu enttharelana:
Moota heeni amiravo Anamoona a Yehova emmalihaaya woova?
Mmusome Yesaya 41:10, avinyaka mutthekule ni epontu enttharelana:
Wakhala weera nyuwo munnoova olaleera, ovekela onkela wookhavihereni hayi?
Nyuwo mwaasuwela?
Antxipale olelo eri Anamoona a Yehova, yuupuwela weera khiyaakela owera olaleera mitthenka sooreera. Moone ntakihero na munna oneeriwa Sergey, onkhala oRússia. Owo khaaroromela ni uupuwela weera ti wooxupa wuuluma ni atthu akina. Avinyaka owo aapatxera omusoma Biblya ni owo onnahima há: “Nnaamweera koova, kaapatxera wuuluma ni atthu akina iye kaaxutteraaka. Mootutuxereya, wuuluma ni atthu akina kaxutteraka mBiblyani, waahaatxeerera nroromelo naka. Nitho, nkaattiwala iye kaaroromelaka va murimani vaka.”
4. Muulume mooreera murima
Emaara munaaleelaanyu mitthenka sooreera atthu akina, muhupuweleke paahi etthu munkelaanyu wuuluma. Mene nto, moota muneeraanyu muulume. Mmusome 2 Timotheyo 2:24 ni 1 Pedru 3:15, avinyaka mutthekule ni ipontu sinttharelana:
Emaara munaaleelaanyu mitthenka sooreera atthu akina, neereke munnuupuwela moota munkelaanyu ovarela muteko iversu iya?
Pooti weera amusi anyu naari asinthamwene anyu, khankela owaakhulelani. Eheeni munkelaanyu opaka? Vano eheeni tho muneeraanyu muhipake?
Etthu heeni eri yootthuneya wuupuwela mwapaakaka makoho, oreerela murima naari waanyeserera atthu owaakhulelani? Mwaha wa heeni?
5. Waalaleera atthu akina mitthenka sooreera onnaphwanyiha ohakalala
Yehova anvaha Yesu muritti woolaleya mitthenka sooreera. Yesu oonela hayi muritti owo? Mmusome Yohani 4:34, ni avinyaka mutthekule ni ipontu sinttharelana:
Ohiya okhalano okumi, otxá onnaniphwanyiha ohakalala. Mwaha wa heeni Yesu aalikanxenraawe opaka yootthuna ya Muluku (mwa ntakihero olaleya mitthenka sooreera) ni yootxa?
Mwaha wa heeni munoonaanyu weera olaleya mitthenka sooreera onnaniphwanyiha ohakalala?
Miruku
Mithukumano sa eriyari ya esemana, mukosoope miruku sinvahiwa voohima sa moota woowaalaleera mitthenka sooreera atthu akina.
Muupuwele oveleela nsina nanyu, weera mweerele empari mithukumano sa eriyari ya esemana. Empari namasoma a Biblya onvahiwaawe pooti woovahani nroromelo noovirelela waaleela atthu akina ele munxutteraanyu.
Munvarele muteko equaaduru oneera: “Atthu akina aneera” naari “Wakhala weera mutthu ookoha” weera mmuxuttihe moota woowaakhula makoho makina ni etthu yoohima waakhala weera mutthu khanwaakhulelani.
WAKHALA WEERA MUTTHU OHOOKOHANI: “Hayi nyuwo inovidade heeni munkileelaanyu?
Mwaakela ottottela hayi mureerelo eparakha eyo weera mmuleele ele muxuttenraanyu mBiblyani?
NYAHA SOOTTHUNEYA
Waaleela atthu akina mitthenka sooreera onnaphwanyiha ohakalala, tiivookhweya opwaha ele munuupuwelaanyu.
Wuuluula
Mwaha wa heeni nintthuneyaahu waaleela mitthenka sooreera atthu akina?
Munkela opaka hayi eyo mooreerela murima?
Munkela omaliha hayi woova olaleera?
WEERA MUSUWELE ITTHU SINTXIPALE
Moone miruku mixexe sookhweya sa moota woolaleya mitthenka sooreera nvarelaka muteko ekartau yooxekura esaite jw.org.
Moonelele mikhalelo mixexe sinkela wookhaviherani nyuwo wuuluma mitthenka sooreera.
“Niireke Muhiilokiherya Wira Mukhale Mutothi Aatthu?” (Owehaweha, a Setembro a 2020)
Moone ntakihero nri mBiblyani moota nneeraaya nnikhavihere olipa murima olaleera nnaamweera nreene amiravo.
Muxuttere moota woowuuluma itthu sa mBiblyani ni amusi anyu ahimusuwenle Yehova.
“Enamuna Yoowiiriha Weemya Ekeekhai Amusi Ahikhanle Anamoona” (Owehaweha, 15 a Março a 2014)