YOOSOMA 26

Mwaha wa heeni nintepaahu ohaawa?

Itthu Simpirimiriwe

Yaakhumelelaka maxupo, atthu akina annikoha: “Mwaha wa heeni sinkhumelelaaya itthu iya?” Mene nto, tivoohakalaliha osuwela weera Biblya onnaakhula nikoho nna!

1. Itthu soonanara sipatxenre hayi valaponi?

Satana Diabo, aamurukunuwela Yehova. Owo aatthuna olamulela. Mwa yeeyo, aawoototha Adamu ni Heva, weera emurukunuwele Muluku. Satana aapanke moota heeni eyo? Owo aamoototha Heva. (Eph 3:1-5) Owo aatthuna weera Heva uupuweleke weera, Yehova ammukhoottihera itthu sooreera. Nitho Satana ahiiwanyeiha weera, atthu yaamuhakalala ehimwiiwelelaka Muluku. Avinyakaru vaavo Satana aahima yoowootha yoopatxera. Owo amweerela Heva weera khaakela okhwa. Tiyeeyo Biblya ommwihimaawe Satana okhala “namootha ni tiithi oowootha”.—Yohani 8:44.

2. Adamu ni Heva yaathanlale opaka eheeni?

Yehova aahaapakela itthu sooreera Adamu ni Heva. Owo aahaleela weera etxeeke soowiima sa miri sootheene sa mmattani. Mene, aakhoottihenre otxa soowiima sa mwiri mmoha paahi. (Ephattuwelo 2:15-17) Awo naamwi yaakhoottiheriwe, yaathanla otxa soowiima sa mwiri ole. ‘Heva arukula yoowima ya mwiri ole ni ahotxa’. Mootharelana mwaya, anvaha Adamu ni aahootxa. (Ephattuwelo 3:6) Ooweeli aya yaahiya omwiiwelela Muluku. Adamu ni Heva yaari atthu oohikhalano yoottheka. Mwa yeeyo, khawaari wooxupa omwiiwelela Muluku. Mene awo yaathanla ohimwiiwelela Yehova. Ethanlakaru opaka eyo, yaattheka ni yaakhotta olamuleliwa ni Muluku. Yoothanla ela, yaahaakumihera oohaawa.—Ephatuwelo 3:16-19.

3. Yoothanla ya Adamu ni Heva evolenle hayi ekumi ahu?

Adamu ni Heva etthekakaru, yaahiya okhala oomalela ni mwa yeeyo, yaahavaliha yoottheka eyo anamwanaaya ootheene. Biblya athalihaka sa Adamu oneera: “Vanonto, ntoko mwaha wa mutthu mmosaru yottheka evolonwaya mwelaponi mumu ni nwaha wa yottheka okwa tho, siso okhwa tho wòhàphiyera atthu othene, wona wi othene aya àttheka.”—Aroma 5:12.

Mwaha wa yoottheka, ninnahaawa mmikhaleloni moohiya-hiyana. Emaara ekina ninnahaawa mwaha wa soothanla nimpakaahu, naari mwaha wa nipuro ni ehuhu nraahu.—Mmusome Koheleti 9:11.

WEERA MUXUTTERE SINTXIPALE

Moone mwaha wa heeni Muluku ohikhalannaawe nthowa, mwaha wa maxupo ni oohaawa otawanle olelo va. Moone-tho, moota owo onoonelaawe aanoonaka hiyo nihaawaka.

4. Mathowa anneeriha ohaawa

Atthu antxipale anuupuwela weera Muluku tanlamulela elapo. Neereke etthu eyo ekhaikhai? Moone EVIIDIYU.

EVIIDIYU: Taani anlamulela elapo ya vathi? (1:24)

Mmusome Yakobe 1:13 ni 1 Yohani 5:19. Avinyaka mutthekule ni epontu enttharelana:

Neereke Muluku ookhalano nthowa, mwaha wa maxupo anniphwanyiha ohaawa?

5. Moone itthu sinkhumelela mwaha wa olamulelo wa Satana

Moone EVIIDIYU.

EVIIDIYU: Mwaha wa heeni ohaawa otawanlaaya?—Empari (3:07)

Musome Ephattuwelo 3:1-6. Avinyaka mutthekule ni ipontu sinttharelana:

Satana ahimme yoowootha heeni?—Moone iversu 4 ni 5.
Moota heeni Satana aiwanyeihaawe weera Yehova aamwaakhoottihera itthu sooreera atthu?
Moovarihana ni ele aahimmaawe Satana, neereke atthu yaamuhakalala ehilamuleliwaka ni Muluku?

Mmusome Koheleti 8:9. Avinyaka mutthekule ni epontu enttharelana:

Noohiiwa weera khahiyono Yehova onlamulela elapo. Vanonto ti eheeni enkhumelela mulaponi?

Otakanseriwa wa ilataratho: Ilataratho sooniheraka elapo yooreera ovinyera opattuxiwa wa itthu mpaka mparadiso muhoolo. A. Eparadiso valaponi ni nipuro nooreera. B. Moovira mwa iseekulu anamalamulela esarihaka mulaponi ittiini soowootha ohiiwanana, ikhootto ni oonanara wa elapo. Anamalamulela akina a mulaponi: A Wiixipto, oChina, oGrécia, oRoma, wAlemanha, oGrã-Bretanha ni wEstados Unidos. C. Atthu ekhalaka mparadiso valaponi muhoolo.

Adamu ni Heva yaari oomalela ni yaakhala mparadiso. Awosa yaahiya omwiiwelela Yehova enamwiiwelela Satana
Epakakaru yoottheka eyo, elapo yoosareya, soottheka ohaawa ni okhwa
Yehova onoomaliha soottheka, ohaawa ni okhwa. Atthu anootthikela okhala oomalela ni okhala mparadiso

6. Yehova onnanvoreya murima aanoonaka nihaawaka

Neereke Yehova onnanvoreya murima aanoonaka nihaawaka? Nrowe noone ele mwene Davidi ni murummwa Pedru alempaaya. Musome Nsalmu 31:7 ni 1 Pedru 5:7. Avinyaka mutthekule ni epontu enttharelana:

Soolepa iya sinnoonihera weera Yehova onnoona ohaawa wahu ni ontthuna onikhavihera. Nyuwo munoona hayi mwaha woosuwela eyo?

7. Muluku onkela omaliha ohaawa wootheene

Mmusome Yesaya 65:17 ni Apokalise 21:3, 4. Avinyaka mutthekule ni epontu enttharelana:

Heeni oraaya woorera osuwela weera Yehova onoomaliha itthu sootheene sinnixupa olelo va?

Nyuwo mwaasuwela?

Emaara Satana aathalinhaawe yoowootha yoopatxera, owo aananariha nsina na Yehova. Owo aapaka eyo, ahimaka weera Yehova khaiyono namalamulela a xariya ni a nsivelo. Moohipisa, Yehova onookela omaliha ohaawa wootheene. Eyo yeereya vale, onookela woonihera weera namalamulela oophwanelela. Otteeliha nsina na Yehova mwa soowootheriwa sootheene, eyo etthu yootthuneya valaponi.—Matheyo 6:9, 10.

ATTHU AKINA ANEERA: “Naahaawaka Muluku tonneerera.”