Moota heeni muneeranyu mukhale nthamwene a Muluku?

1. Nereeke Muluku onniiwa mavekelo ootheene?

Eri yooreera vantxipale wuuluma ni Muluku. Owo onatthuna weera, atthu ootheene epakeke mavekelo ni ekhale ntthamwene a yoowo. (Nsalmu 65:2) Mene eyo khentaphulela weera mavekelo ootheene ennakhuleliwa ni Muluku. Mwa ntakihero, wa atthu ale empaka itthu soonanara naari enaahasula asaaraya, mavekelo aya khempwatthiwa ni Muluku. (1 Pedru 3:7) Nankha voohima wa atthu empaka itthu soonanara ehinatxentxa muupuwelelo aya? Naari vakhanini mano, Muluku khaniiwa mavekelo atthu ene yaawo. Tiiyeeyo yeereya naatthu a Muluku akhalayi, ana a Israeli. Ankha napittukuxa murima nnahiya opaka itthu soonanara? Muluku anootteliwa murima ni aneereke wiiwa mavekelo ahu. — Mmusome Yesaya 1:15; 55:7.

2. Wookhala moota woovekela?

Khaavo mutthu mukina ompwanela onvekela, ahikhanle mpattuxa ahu Yehova. Eyo enoonihera weera ninnaroromela weera Muluku ti yoowo paahi. (Matheyo 4:10; 6:9) Ninvekeleke Muluku mwa nsina na Yesu, mwaha wooweera ti yoowo akhwiiye wa soottheka sahu. (Yohani 14:6) Yehova khantthuna weera mavekelo ahu, ekhaleke ooheliwa mmuru naari oosommwa mbuukhuni. Tivaavo ompwanelaaya okhala mavekelo enkhuma vamurimani. — Mmusome Matheyo 6:7; Afilipi 4:6, 7.

Yehova onniiwa mavekelo oohihimeriwa mmuupuweloni. (1 Samuweli 1:12, 13) Yehova khanivanhe ehuhu yoovekela, koma owo oonivaha ehuhu eri poothe weera ninvekeleke marigana maxupo ahu, waari weera oxexelo, ehuhu yookona , naari ehuhu yootxa. — Mmusome Nsalmu 55:22; Matheyo 15:36.

3. Onnatthuneya othukumana naatthu enamukokhorela Muluku?

Onnaxupa wa yaale eri nthamwene a Muluku, okhala vamoha naatthu ehinaroromela soolaihera sa Muluku ni tho weera owo ookhala. (2 Timotheyo 3:1, 4; 2 Pedru 3:3, 13) Vano ootheene ale enamusivela Muluku, onnaarerela othukumana vamoha naakina tho enanvarela yoowo. — Mmusome Aheberi 10:24, 25.

Tiivoorerela okhala vamoha naatthu emmusivela Muluku. Neera hiiho, onthamweene ahu ni Yehova onoolipa. Mmithukumanoni mwa Anamoona a Yehova ninnaapwanya atthu eneera enikhavihere olipiha nroromelo nahu. — Mmusome Aroma 1:11, 12.

4. Munakhale hayi nthamwene a Muluku?

Wuupuwelela ele Biblya onaxuttihaawe, onoonikhavihera opaka onthamwene ni Yehova. Mene entthuneya ehuhu, weera nwehexexe ni wuupuwelela itthu apattunxaawe, miruku ni soolaihera sawe. Nave wuupuwelela soopattuxiwa ni ovekela, onnanikhavihera oweha moota Yehova oraawe ansivelo ni a miruku. — Mmusome Yehoxuwa 1:8; Nsalmu 1:1-3.

Ontthuneya okhalano nroromelo ni Muluku. Nroromelo onkhala ntoko mwiri. Mwiri waahiheleliwaka onimuuma, tiivavonto ontthuneyaaya ohelela. Emohamoharu ni hiiyo, nroromelo nahu nnoolipa niilipiherakaru oxuttera sa Muluku. — Mmusome Matheyo 4:4; Aheberi 11:1, 6.

5. Heeni oraaya wootthuneya okhala nthamwene a Muluku?

Antoko mutthu onamwaakiheraawe muukwaawe ni itthu seera simoopopiheke mweekumini mwaawe, hiiho tho sinnereya ni hiyo nikhaviheriwaka ni Yehova Muluku. Owo onnaakihera nroromelo nahu ni yooweherera ya muhoolo yookhalano ekumi yoohimala. (Nsalmu 91:1, 2, 7-10) Nave, onnanoniheera itthu nneerahu nipakeke weera nikhaleno ekumi yoohixupa ni yoohakalaliha. Nave-tho, onnanixuttiha makhalelo ookhala. — Mmusome Nsalmu 73:27, 28; Yakobe 4:4, 8.