Neereke Anamoona a Yehova makristu eekhaikhai?

Hiyo Anamoona a Yehova, ninnaroromela weera namakristu eekhaikhai. Mwaha wa heeni? Mwa yoosomeene yeela, ninkela woona ele ninroromelaahu ninlipaahuno, ni mwaha wa heeni nneeriwaahu Anamoona a Yehova ni nnoonihera hayi weera ninnasivelana mukina ni mukhwaawe.

1. Anamoona a Yehova nroromelo naya ninlipa ni heeni?

Yesu enre: ‘Nsu ná Muluku ti nekhaikhai.’ (Yohani 17:17) Nimulikanxaka Yesu, soororomela sahu sinlipa ni masu a Muluku. Moone moota nimpakaahu eyo ipatxerakaru sooweereya sa vaanaano, otepaxa weene eseekulu 19. Eseekulu ele, egrupu emooha ya atthu, yaapatxera omusoma Biblya ni omwiiwexexa. Atthu awo yaatthuna osuwela eheeni owo aaxuttihaawe. Emaara yiiwexexaaya ele Biblya onxuttihaawe, yaari yeele yaaroromelaaya, naamwi yaavirikanne niiye igreja saaxuttihaaya. Muhoolo mwaya, awo yaapatxera waaxuttiha atthu akina ikhaikhai iyo.a

2. Mwaha wa heeni nneeriwaahu Anamoona a Yehova?

Yehova onnawiitthana ale anamukokhorela okhala Anamoona awe, mwaha wooweera awo annathaliha ikhaikhai voohima sa yoowo. (Aheberi 11:4–12:1) Mwa ntakihero, khalayi Muluku ahaaleela atthu awe: “Nyuwo mwà anamon’aka.” (Mmusome Yesaya 43:10.) Yesu onneeriwa ‘Namoona ororomeleya’. (Apokalise 1:5) Mwa yeeyo eyaakha ya 1931, naapatxenraahu weeriwa Anamoona a Yehova. Tiyeeyo nnihakalalaahu mwaha woovuwiha nsina nno.

3. Anamoona a Yehova antakiha moota heeni nsivelo Yesu aakhalannaawe?

Yesu annaasivela atthareli aawe yaawo yaari ntoko amusi awe. (Mmusome Marko 3:35.) Mwa yeeyo, Anamoona a Yehova araaya oowiiraana ntoko emusi ya elapo yootheene. Nto tiyeeyo awo aneeranaaya asinna ni asirokora. (Filemoni 1, 2) Hiyo ninniiwelela nlamulo nneera: ‘Mukhaleno nsivelo na onna wa elapo yothene’, naari neere ha, asinna ootheene. (1 Pedru 2:17) Anamoona a Yehova annipaka eyo. Awo annawoonihera nsivelo asinnaya a elapo yootheene. Otepaxa wene ehuhu ya maxupo, annakhaviheraana.

WEERA MUXUTTERE SINTXIPALE

4. Soororomela sahu sinlipa ni Biblya

Yehova aalaihera weera omwiwexexa wahu Biblya, waamunnuwa. Mmusome Daniyeli 12:4 ni enoota, avinyaka mutthekule ni epontu enttharelana:

• Vaavo atthu Muluku ammusomaaya Biblya nroromelo ‘naya ninnunnuwa.’

Moone moota egrupu emooha ya atthu, yaapatxera omusoma Biblya ni omwiiwexexa. Mwa yaawo aakhala mulopwana mmoha eeriwa Charles Russell yoowo aasoma masu a Muluku. Moone EVIIDIYU, ni avinyaka mutthekule ni ipontu sinttharelana.

EVIIDIYU: Ekhaikhai ya mBiblyani enniphwanyiwa wanaaveeli (7:45)

• Nviidiyuni, moota heeni Charles Russell ni atthu akina yaamusomaaya Biblya?

Nyuwo mwaasuwela?

Veeli-veeli, hiyo ninnatxentxa omwiiwexexa wahu Biblya. Naari, emaara ekina, hiyo ninnatxentxa omwiiwexexa wahu Biblya. Mwaha wa heeni? Mwaha wooweera Muluku onniiwexexiha vakhaani-vakhaani ele eri mBiblyani. Onlikana ntoko vaavo ompatxeraaya oxa vakhaani-vakhani ninnapatxera woona nsuwa. (Mmusome Miruku 4:18.) Ekhaikhai weera Biblya khatxentxeñye, nto vaavo hiyo nniwexexaahu ele onhimaawe, ninnakhalano soororomela inyowani.

5. Hiyo Anamoona a Yehova: ninkhala moovarihana ni nsina na Yehova

EVIIDIYU: Nsina nenno ninnisuwanyeiha (2:40)

• Mwaha heeni nsina na Anamoona a Yehova yaaraaya yoothanla yooreera?

Mwaha heeni Yehova aathanlalaawe atthu weera ekhale Anamoonaawe? Mwaha wooweera Anamoona a Yehova annavaanyiha atthu ale anoothera nsina nawe. Ninkela woona soowootha iyo piili.

Ittiini ikina sinxuttiha weera, onnitthuneya atthu ovarela muteko ilataratho emaara ammukokhorelaaya Muluku. Mene neereke eyo ekhaikhai? Mmusome Onamakeya 26:1, ni avinyaka mutthekule ni ipontu sinttharelana:

• Neereke weera Muluku ontthuna weera atthu evareleke muteko ilataratho emaara ammukokhorelaaya? Yehova onoonela hayi ilataratho?

Ittiini ikina sinxuttiha weera Yesu Muluku. Mene neereke eyo ekhaikhai? Mmusome Yohani 20:17, ni avinyaka mutthekule ni ipontu sinttharelana:

• Ekhaikhai weera Yesu Muluku? Neereke weera Yesu ni Muluku mutthu mmoharu?

• Muluku oothanla muloko weera waaleeleke atthu ekhaikhai voohima sa yoowo ni mwanawe. Nto nyuwo munoona hayi mwaha woosuwela eyo?

6. Hiyo ninnasivelana mukina ni mukhwaawe

Biblya onnaalikanxera makristu ni impari, soovirikana sa erutthu naari neere erutthu ya mutthu. Mmusome 1 Akorinto 12:25, 26, ni avinyaka mutthekule ni ipontu sinttharelana:

• Mukristu eekhaikhai anaapakeke eheeni aawoonaka makristu makina ehaawaka?

• Neereke nyuwo mohoonelela nsivelo Anamoona a Yehova anooniheranaaya?

Vaavo Anamoona a Yehova a elapo ekina anhaawelaaya nikhavihero, asinna a elapo yootheene annaakhavihera. Moone ntakihero nimoha, moone EVIIDIYU, ni avinyaka mutthekule ni ipontu sinttharelana

EVIIDIYU: Elapo ya Haiti yaaphwanyiwa ni furacão Matthew (5:29)

• Nohoona weera vaavo Anamoona a Yehova enaakhumelelaaya erisa, awo annaakhavihera ale aphwanyiwe erisa. Eyo enoonihera hayi nsivelo awo araayano?

NYAHA SOOTTHUNEYA

Anamoona a Yehova makristu eekhaikhai. Nri emusi emoha ya elapo yootheene nimmukokhorela Muluku, soororomela sahu sinkhuma mBiblyani nave ninnaaxuttiha atthu ikhaikhai voohima sa Yehova.

Wuuluula

• Mwaha wa heeni nithanliyaahu wiitthaneliwa nsina Nanamoona a Yehova?

• Hiyo nnooniherana moota heeni nsivelo mukina ni mukhwaawe?

• Nyuwo munoona weera Anamoona a Yehova makristu eekhaikhai?

WEERA MUSUWELE ITTHU SINTXIPALE

Weera muxuttere sintxipale ni soowereya sahu.

Anamoona a Yehova- nroromelo naya nivaraka muteko, empari 1: vapiphini eroka vowaara (1:00:53)

Nwehe ntakihero nimoha na moota Anamoona a Yehova yahonvaaya voohima sa soowixuttiha sowootha

Arumeyi a Muluku annavuwiha nsina nawe (7:08)

Nwehe makoho vakhaaniine ampakiwaxa voohiva sa Anamoona a Yehova.

“Makoho Animakela Okohiwa vohimya sa Anamoona a Yehova” (Mwaha va jw.org)

Stephen anneerela empari ikrime sa eraasa. Moone mwaha wa heeni aatxentxalaawe aasuwelakaru Anamoona a Yehova.

“Murima Aka Waamutepa Okhala Wootakhala” (A Sentinela, 1.º a Julho a 2015)