“Mwìweleleke nsu nàsuweli”

1. Moota heeni nneeraahu naakhelele ikano ni eheeni nintthuneyaahu opaka?

EMAARA ekina ootheene hiyo ninnatthuneya olakiwa. Pooti weera nyuwo muroovekela ikano iyo wa mutthu mummuttittimihaanyu naari tho mutthu mukina orooxupeya ni nyuwo oothanla woovahani ikano muhinaakuve ‘opaka etthu yoonanara.’ Naari muhinaakuve—opaka etthu mweeraanyu muttharuwe muhoolo. (Agal. 6:1) Ni emaara ekina tho nyuwo pooti waakhela ikano mutthunaka wookoleliwa mwa etthu yoonanara mpankaanyu. Mene ikano iyo pooti orweela mwa iphiro soohiyana-hiyana, mene yootthuneya ori waakhulela ikano iyo. Opaka eyo tiyooreera wa hiyo nave pooti ovuluxa ekumi ahu!—Mir. 6:23.

2. Moovarihana ni Miruku 12:15, mwaha wa heeni oraaya wooreera waakhulela ikano?

² Yoolepa ya mwaha ola onihima weera, “mwìweleleke nsu nàsuweli.” (Mir. 22:17) Khaavo ori oosuwela itthu sootheene, mweekhaikhai mpakana akhumelele mutthu ori oosuwela ni okhalanne sookumanano sintxipale onipwaha hiyo. (Mmusome Miruku 12:15 ni enoota.) Emaara nnaakhulelaahu ikano, nave hiyo nnoonihera weera toowiiyeviha. Nave ninnoonihera weera sookhala itthu ikina hiyo nihisuwenlaahu. Nintthuneyaahu okhaviheriwa weera niphwanye sootthuna sahu. Yehova aamuupuxera mwene oosuwela, Salomoni olepa ha: “Miteko sinnarera savariwakaru mowiwanana ni antxipale.”—Mir. 15:22.

3. Mwa mikhalelo heeni nneeraahu naakheleke ikano?

³ Ootheene hiyo mpakana waakhela ikano mooluluwanya naari moohiluluwanya. Entaphulela eheeni ekano yoovahiwa moohiluluwanya? Ekano yoohiluluwanya, entaphulela weera emaara ekina hiyo pooti omusoma Biblya, ebuukhu naari etthu ekina enkela oneeriha wuupuwelela otxentxa etthu mweekumini mwahu. (Aheb. 4:12) Eyo ekano yoohiluluwanya. Vano ekano yooluluwanya ti eheeni? Araaya munna mutokweene a mmulokoni naari munna oowunnuwela oomunepani onnuuluma nihiyo anleelaka etthu nintthuneyaahu otxentxa, nto eyo, ekano yooluluwanya. Mutthu aanisivelaka mpakana onivaha ikano sinrweela mBiblyani, etthu nintthuneyaahu opaka ori wiiwelela ikano iyo ni opaka ele ninweraahu weera nipake matxentxo mweekumini mwahu.

4. Moovarihana ni Koheleti 7:9, eheeni nihintthuneyaahu opaka naalakiwaka?

⁴ Ohima ekhaikhai, onnaxupa waakhulela ikano sooluluwanya. Naari hiyo naakhulelaka weera naatthu oohimalela, onnanixupa waakhulela ikano ninvahiwaahu ni mutthu mooluluwanya anleelaka etthu nimphwanelaahu otxentxa. (Mmusome Koheleti 7:9.) Hiyo ninneerera wiilevelela naari ninnanyoonyiwa ni mutthu onivanhe ikano nuupuwela weera owo onnanisontta ni khannsiveliwa ni hiyo. Hiyo tho pooti wuupuwela: ‘Ale taani weera ekilakeke moota ene yoola? Ale-tho toohimalela!’ Okhwipi waya ikano iyo saahikhala seiyo nintthunaahu mpaka hiyo okhootta ikano iyo ni orowa waasaasa ikano ni mutthu mukina seiyo hiyo nintthunaahu wiiwa.

5. Eheeni nneeraahu nixuttere mwa yoosomeene yeela?

⁵ Mpuwa mwa yoosoma ene yeela, ninkela oxuttera ni matakihero aatthu a mBiblyani yaakhontte olakiwa ni yaakhulenle. Ni ninkela woona etthu eneera enikhavihere waakhulela ikano ni moota nneeraahu nikhavihereye ni ikano iyo.

AWO KHIYAAKHULENLE IKANO

6. Ninxuttera eheeni ni mwene Robowamu ni ikano owo aakhenlaawe?

⁶ Ntakihero noopatxera naatthu yahaakhulenle ikano ti na Robowamu. Owo akhalakaru mwene a ana a Israeli, muloko wanvekela. Muloko owo waatthuna weera avukule muritti wa muteko aya. Woopatxerani Robowamu aapaka etthu yooreera vaavo aaronwaawe ovekela ikano wa alopwana oowuuluvala a ana Israeli weera asuwele etthu yoopaka. Alopwana ale oowuuluvala, yanvaha ikano weera aakhulele yoovekela ya muloko weera evirelele onvarela. (1 Mam. 12:3-7) Oweharu, Robowamu khaasiveliwe ni ikano aavahiwaawe. Mwaha wa yeeyo, owo aarowa ovekela ikano wa asinthamwenaawe unnunwaaweno vamoha. Oweharu alopwana yaakhalanne iyaakha miloko mixexe, [40] ni yaakhalano sookumanano sa mweekumini. (2 Sow. 12:13) Mene miruku yanvanhaaya Robowamu saari soonanara. Awo yaamuleela weera wannatthuneya waatxeera muritti wa muteko wa muloko ole. (1 Mam. 12:8-11) Aakhelakaru miruku iye soovirikana, Robowamu annatthuneya omukoha Yehova weera oone ikano heeni aakelaawe otthara. Nto ohiya opaka eyo, Robowamu aathanla ikano seiyo owo aatthunaawe wiiwa, saari ikano sa amiravo ale unnunwaaweno. Yookhumelela mwa yoothanla eyo, yaari ohaawa Robowamu ni muloko wootheene. Etthu ntoko eyo pooti onikhumelela naakhela vale miruku seiyo hiyo nihintthunaahu. Nnaamweera vareene hiiho, naakhela miruku sinkhuma mBiblyani, nintthuneya waakhulela.

7. Ntakihero na mwene Oziya, ninnixuttiha eheeni?

⁷ Mwene Oziya khaakhulenle ikano. Owo aavolowa nipuro na mpeweni yaakhuleliwaaya paahi ovolowa anamakeya weera emuhise rupani. Anamakeya yaahuuluma ni yoowo yeeraka: “Khohiyene muteko á wompahera Muluku rupani, mene wa anamakeya.” Oziya oonenle hayi masu awo? Owo aakuxera makaani mpakana ohikhuma mpewene emaara ene yeele. Owo aakhulenle ikano moowiyeviha akhumaka mpeweni, taani ansuwela weera Yehova ammulevelela? Mene khaapanke eyo. Oziya aanyoonyiwa ni khakhulenle ikano. Mwaha wa heeni? Oweharu owo oona weera owo ookhalano edireitu yoopaka ele mwaha wooweera owo aari mwene, mene Yehova khuupuwela hiiho. Mwaha wa etthu ele Oziya aapankaawe, owo yamphwanya maretta “mpaka nihiku na okhwa wawe.” (2 Sow. 26:16-21) Ntakihero na Oziya ninnixuttiha weera nihipwatthaka miritti hiyo nikhalannaahu, ootheene hiyo ninnatthuneya waakhulela ikano sinrweela mBiblyani weera naakhuleliwe ni Yehova.

AWO YAAHAAKHULELA IKANO

8. Yobi oonenle hayi emaara aakhenlaawe ikano?

⁸ Moohiyana ni matakihero nonnaahu mpaka va, Biblya ennuuluma sa atthu yaareelihewe mwaha woowiiwa ikano. Nwehe ntakihero na Yobi. Yobi annamusivela vantxipale Yehova ni aatthuna omuhakalaliha yoowo. Mene owo khaiyono aari oomalela. Emaara Yobi aavirihaawe maxupo, owo aahuuluma etthu ahuupuwenle. Mwaha wa yeeyo, owo aahaakhela ikano sooluluwanya moorweela mwa Elihu ni Yehova. Yobi oonenle hayi ikano iyo? Owo aahiiyeviha ni aahaakhulela ikano iyo. Yobi ohimme ha: “Khweli kohuluma sa itthu kihiniwakamo . . . Mwa yeyo, kinnalapa ni kinnattharuwa vantthupini ni vatturani.” Yehova aamureeliha Yobi mwaha woowiiyeviha wawe.—Yobi 42:3-6, 12-17.

9. Mose oonenle hayi aakhelakaru ikano ni mwaha wa heeni owo araawe ntakihero nooreera wa hiyo?

⁹ Mose ntakihero nooreera na mutthu aakhulenle wookoleliwa apakakaru etthu yoonanara. Ekwaha emoha aayeleela opixa murima ni aahiya onvaha ovuwa Yehova. Mwaha wa yeeyo, Yehova aamuleela Mose weera khaarowa ovolowa elapo yoohiyeriwa. (Nam. 20:1-13) Mose anvekelakaru Yehova weera atxentxe yoothanlaawe, Yehova aamweerela Mose: “Pahi ohipwaherere wuluma ni miyo sa etthu ela.” (Ola. 3:23-27) Naari vareene hiiho, Mose khaanyoonyinwe. Opwaha mwa yeeyo owo aahaakhulela yoothanla ya Yehova. Ni Yehova aavirelela onvarela muteko yoowo ahoolelaka muloko wa ana Israeli. (Ola. 4:1) Yobi ni Mose yaahaakhulela ikano ni awo matakihero ooreera nneereehu nitthareke. Voohima sa mwaha wa Yobi, owo aatxentxa muupuwelo awe aheereraka waasera mathowa. Ankha voohima sa Mose? Mose aavirelela okhala oororomeleya wa Yehova nnaamweera aayelenle eparakha yaamusivela vantxipale. Mose ohoonihera weera ahaakhulela ikano sa Yehova.

10. (a) Moovarihana ni Miruku 4:10-13, mwaha wa heeni oraaya wooreera waakhulela ikano? (b) Asinna akina yoonenle hayi vaavo yaakhenlaaya ikano?

¹⁰ Naattharaka matakihero aalpwana oororomeleya akhalayi, ntoko Yobi ni Mose hiyo ninnakhumela nnene. (Mmusome Miruku 4:10-13.) Asinna ni asirokora annatthara matakihero ala. Moone etthu ekhumelenle ni munna oneeriwa Emmanuel, yoowo onikhala oCongo. Owo ohimma ha: “Asinna oowunnuwela omunepani a muloko aka yoonakaru weera miyo kannamireya moomunepani, awo yaahoowa okikhavihera. Miyo kaatthara ikano saya ni kaasempa okumanano maxupo.”b Murokora mmoha pioneira onkhala oCanada oneeriwa Megan ohimme ha voohima sa waakhelela ikano: “Khoiyono weera emaara yootheene onnareera wiiwa ikano, mene etthu kintthunaaka wiiwa.” Ni munna mmoha onkhala oCroacia oneeriwa Marko ohimme ha: “Ehuhu ya muttuli miyo kooyeleela iparakha saka, vaavo kinuupuwelaaka ehuhu ele, miyo kinnoona weera ikano kaakhenlaaka sookikhavihera olipiha onthamwene aka ni Yehova.”

11. Munna Karl Klein aahimme eheeni voohima sa waakhulela ikano?

¹¹ Ntakihero nikina na mutthu aakhulenle ikano ni simukhavihera aari munna Karl Klein, yoowo aari mmoha a Mukuttula Woolamulela. Ahimaka soowereya sa mweekumini mwawe owo ohimme weera nihuku nimoha aahaakhela ikano sooluluwanya sa munna Joseph F. Rutherford, yoowo aari nthamwene awe. Munna Klein woopatxerani owo khasaamusivenle itthu iiwalaawe. Owo onihima ha: “Emaara ekina munna Rutherford aakoona ni aahima: ‘Ooyi munna Karl!’ Mene miyo ninlelo kireene oonyoonyiwa, kaahuuluma vathi-vathi, salaama. Owo aahuuluma-tho ‘Karl, murimá! Diabo ori ottuliwanyu munna!’ Kihimoonaka nnene munna ole, kaaheera: ‘Oyi, oyi munna Rutherford kheiyene etthu.’ Munna ole mwaha wooweera aasuwela woopiha waya etthu aakilenlaawe, owo aavirelela okeerela, ‘Nto murimá, mukhale musuwelaka weera Satana ori otthuli wanyu munna.’ Munna ole aahima ekhaikhai, nammira supi ni munna anivanhe ikano mooluluwanya ni okhalanne edireitu yoohima etthu eyo, . . .  hiyo pooti omorela mmuraakhoni mwa Diabo, Satana.”c (Aef. 4:25-27) Munna Klein aahaakhulela ikano sa munna Rutherford, ni yaavirelela okhala asinthamwene.

TI EHEENI ENEERA ENIKHAVIHERE WEERA NIWERE WAAKHULELA IKANO?

12. Eheeni enkela onikhavihera waakhulela ikano ni mwaha wa heeni? (Nsalmu 141:5)

¹² Eheeni enkela onikhavihera weera niwere waakhulela ikano? Ori okhala oowiiyeviha ni wuupuwelela weera hiyo naatthu oohimalela ni ikwaha sintxipale ninnapaka soottheka. Ntoko nonnaahu, Yobi aakhalano moonelo woohireerela mene owo aatxentxa muupuwelo awe ni Yehova aamureeliha. Mwaha wa heeni? Mwaha wooweera Yobi aari oowiiyeviha. Eyo yaahooneya emaara owo aakhulenlaawe ikano aavahiwaawe ni Elihu nnaamweera Elihu aakhanleene mmiravo ompwaha Yobi. (Yobi 32:6, 7) Wiiyeviha thooni, onoonikhavihera waakhulela ikano nnaamweera nihaakhulelaka vantxipale ni mutthu ole onnivaha ikano iyo araaya mwaha wooweera owo mmiravo. Munna mmoha mutokweene a mmulokoni oCanada ohimme ha: “Hiyo khaninwera woona itthu nimpakaahu ni mikhalelo sahu, mene atthu akina anniwera woona mikhalelo iyo, ninkela owera hayi opaka matxentxo navahiwa ikano?” Ekhaikhai weera ootheene hiyo ninnatthuna opaka matxentxo, nave ntoko makristu ninnatthuna wiilipihera weera nikhaleno yoowiima ya munepa wootteela ni opaka matxentxo ni muteko ahu woolaleera.—Mmusome Nsalmu 141:5.

13. Nooneleke hayi ikano ninvahiwaahu?

¹³ Mooneke ikano ntoko yoowoonihera ya nsivelo na Muluku. Yehova owo ontthuna itthu sooreera wa hiyo. (Mir. 4:20-22) Emaara owo onnivahaawe ikano moorweera mwa masu awe naari ibuukhu sinkhuma mBiblyani, naari tho mukristu oowunnuwa moomunepani nooneke ntoko nsivelo ninkhuma wa Yehova. Aheberi 12:9, 10, oneera ha: ‘Owo onnapaka eyo erelaka murerelo ahu.’

14. Emaara ninvahiwaahu ikano niwehexexeke eheeni?

¹⁴ Nwehexexeke itthu munxutteraanyu ni ikano nvahiwaanyu ohiya moota sivahiwaaya ikano iyo. Ikwaha sinntxipale, hiyo pooti woona weera ikano khasivahiwe mooreerela. Ekhaikhai weera mutthu onvaha ikano onnatthuneya ovaha ikano mooreerela.d (Agal. 6:1) Ankha wakhala weera ti hiyo ninkela waakhela ikano iyo? Aani onnatthuneya owehexexa etthu nneeraahu nxuttere ni ikano ninvahiwaahu ohiya moota ikano iyo sivahiwaaya. Khontthuneya wuupuwela ha: ‘Miyo khokisivenle moota sivahiwaaya ikano iya, neereke yookhala etthu kintthuneyaaka oxuttera ni ikano iye kivahiwaaka? Neereke miyo kinoowera ohiwehexexa ohimalela wa mutthu ole okivanhe ikano ni oxuttera etthu ni ikano okivanhaawe?’ Nakhala atthu a miruku nnoowera oxuttera etthu ni ikano hiyo ninvahiwaahu.—Mir. 15:31.

YOOKHAVIHERA ENKHUMELELA MWAHA WOOVEKELA IKANO

15. Mwaha wa heeni nintthuneyaahu weera nivekeke ikano?

¹⁵ Biblya onnanooperera weera nivekeke ikano. Miruku 13:10 oneera ha: “Miruku sinnaphwanyaneya variyari va atthu òleleya.” Aani, eversu ela enahima ekhaikai! Mwaha wooweera atthu anveka ikano annapaka soothanla sooreera nave annakhalano munnuwelo wooreera woomunepani waapwaha atthu ale ananweherera mutthu weera aavahe ikano. Tivaavonto ontthuneyaaya weera nyuwo mpatxeriheke oveka ikano.

16. Moota heeni hiyo nintthuneyaahu oveka ikano?

¹⁶ Moota heeni nneeraahu nivekeke ikano? Moone matakihero ala. (1) Murokora mmoha onnanvekela murokora mukina weera amuhoole aarowaka opakiha yoosomaawe avinyaka onnamukoha mikhalelo aatthuneyaawe oreherera weera akhale muhusiha ookhumelela nnene. (2) Murokora mmoha mwaamwali onnanvekela ikano murokora mukina oowunnuwela moomunepani sa moota woothanla ikuwo ontthunaawe othuma. (3) Munna athanleliwe opaka mwaha ekwahaawe yoopatxera onnanveka munna mmoha okhalanne sookumanano sintxipale weera owo awiriyane etthu owo areherenraawe avinyaka munna owo onnanvaha ikano moota wookhumela nnene. Naari asinna apatxenre khalai opaka nyaha, annatthuneya waakoha miruku asinna akina akhalanne sookumanano sintxipale, weera ekhumeleke nnene moota awo anxuttihaaya.

17. Eheeni nintthuneyaahu opaka naakhelaka ikano?

¹⁷ Vapiseru ootheene hiyo ninnaweherera waakhela ikano—sooluluwanya naari soohiluluwanya. Eyo yakhumelela, neerereke wuupuwelela ele nixuttenraahu yoosoma ene yeela. Mukhaleke oowiiyeviha. Nwehexexeke itthu munxutteraanyu ni ikano nvahinwaanyu, ohiya moota sivahiwaaya. Nto avinyaka mwaakhuleleke ikano. Khaavo ayariwe asuwelaka. Biblya onnalaihera weera: ‘mwiiwelela ikano ni waakhulela nttaruxo’ nnoorowa “okhala atthu òsuwela.”—Mir. 19:20.