Moota woovaha miruku

1. Taani ophwanenle ovaha miruku? Muthalihe.

MUNOONELA hayi ovaha miruku? Akina onnaakhweela ovaha miruku, akina onnaxupa ovaha miruku, ni awo kheniisoona okhala oovareleleya ovaha miruku. Mwa mikhalelo sootheene, ootheene hiyo nookhalano muritti woovaha miruku etempu yooreerela. Mwaha wa heeni? Mwaha wooweera Yesu ohimme weera atthareli eekhaikhai yaarowa osuweliwa mwaha wa nsivelo enooniheranaaya mukina ni mukhwaawe. (Yoh. 13:35) Ni mukhalelo mmoha woowoonihera nsivelo nahu, ori waavaha miruku asinna ni asirokora waatthuneyaka vale. Masu a Muluku ehimme weera ‘onthamwene wooreera’ pooti okhumelela mwaha wa ‘miruku seekhaikhai.’ — Mir. 27:9.

2. Etthu heeni asitokweene a mmulokoni entthuneyaaya okhala oolikaneene opaka, ni mwaha wa heeni? (Nwehe-tho ekwaadru “Muhooleli a muthukumano wa eriyari ya esemana.”)

² Asitokweene a mmulokoni entthuneya ovahaka miruku mwa mukhalelo wooreerela. Yehova anvarihelaka muteko Yesu, ohaavaha murutti alopwana ala weera ehooleleke muloko. (1 Ped. 5:2, 3) Moota mmoha woopaka eyo, ori ovaha miruku sinkhuma mBiblyani vaavo empakaaya nyaha saya mmulokoni. Awo-tho entthuneya onnvahaka miruku kata mutthu, waahela mpuwa ale ekumihinwe mmulokoni. Moota heeni asitokweene a mmulokoni ni ootheene hiyo ninrowaahu ovaha miruku sooreera?

3. (a) Moota heeni ninrowaahu oxuttera ovaha miruku sooreera? (Yesaya 9:5 [9:6, NM]; nwehe-tho ekwaadru “Mmutakiheke Yesu mwaavahaka miruku.”) (b) Etthu heeni ninrowaahu woona mwa yoosoma ene yeela?

³ Hiyo pooti oxuttera vantxipale woohima sa ovaha miruku sooreera, nsomaka matakihero aatthu a mBiblyani, otepaxa wene na Yesu. Nsina nimoha ovahinwaawe ti nooweera owo “Namuku òsuwanyeyaxa.” (Mmusome Yesaya 9:5 [9:6, Tradução do Novo Mundo]) Mwa yoosoma ene yeela, nnoorowa woona etthu nintthuneyaahu opaka vaavo ninvekeliwaahu miruku, ni etthu nintthuneyaahu opaka wakhala weera ninrowa ovaha miruku nihivekelinwe. Nnoothokorora-tho otthuneya waya ovaha miruku emaara yooreerela ni mwa mukhalelo wooreera.

VAAVO NINVEKELIWAAHU MIRUKU

4-5. Vaavo mutthu onnivekelaawe miruku, nikoho heeni nintthuneyaahu wiipakelaka toko? Nvahe ntakihero.

⁴ Vaavo mutthu onnivekelaawe miruku, etthu heeni yoopatxera nintthuneyaahu opaka? Hiyo pooti okhalano ntthuno noowaakuva omukhavihera mutthu owo. Mene nintthuneya opatxera wiikoha ha, ‘Keereke miyo ka mutthu oophwanelela ovaha miruku woohima sa mwaha ene yoola?’ Ikwaha ikina, mukhalelo woomukhavihera mutthu, ori ohinvaha miruku, mene omuleela mutthu ophwanenle onvaha miruku woohima sa mwaha owo.

⁵ Nkuupuwelani ntakihero nna. Muupuwele weera nthamwene anyu onnavoreiwa vantxipale. Owo onnooleelani weera oothola-thola woohima sa okosoopiwa omphwanelela wa yoowo ni onnoovekelani weera mmuleele moonelo anyu woohima sa okosoopiwa omphwanelela. Pooti weeraka nyuwo mookhalano moonelo woohima sa mwaha owo, menento nyuwo khaiyene meetiku nave khamunsuwela ovara muteko owo. Mwa yeeyo, mukhalelo wooreera woomukhavihera nthamwene anyu, ori omukhavihera omphwanya mutthu onrowa owera omukhavihera.

6. Mwaha wa heeni nintthuneyaahu oweherera nihaakunveene ovaha miruku?

⁶ Nnaamweera noonaka weera nri oolikaneene ovaha miruku, hiyo pooti oweherera vakhaaniini nihaakunveene omwaakhula mutthu onivekenle miruku. Mwaha wa heeni? Miruku 15:28 oneera weera “namiruku onnatthokelela, ahinaye wakhula.” Nankha noona weera noosuwela waakhula? Nnaamweera vareene hiiho, hiyo pooti oweherera vakhaaniini weera nthola-thole, nipake nivekelo, ni ophimelela. Napaka eyo, hiyo pooti ororomelaka weera waakhula wahu onoorowa ovarihana ni moonelo wa Yehova woohima sa mwaha owo. Moone ntakihero na profeta Natani.

7. Etthu heeni nyuwo muxuttenraanyu ni ntakihero na profeta Natani?

⁷ Uulumaka ni profeta Natani, mwene David aahima weera aatthuna ompakela etemplu Yehova. Natani anvaha miruku moowaakuveya weera apake. Mene Natani wannatthuneya wiihiyera etempu weera amukohe Yehova. Mwaha wa heeni? Mwaha wooweera Yehova khaatthuna weera Davidi apake etemplu. (1 Sow. 17:1-4) Ntoko yooweereya ela enooniheraaya, vaavo ninvekeliwaahu ovaha miruku nintthuneya okhala asuweli, “[nipisaka] wuluma.” — Yak. 1:19.

8. Nthowa heeni nikina nintthuneyaahu wiikosoopa vaavo ninvahaahu miruku?

⁸ Moone nthowa nikina nintthuneyaahu wiikosoopa, vaavo nnanvahaahu miruku mutthu mukina: Wakhala weera nnonvaha mutthu mukina miruku soohireerela, hiyo pooti okhalano mathowa mwaha wa etthu yoonanara enrowa omukhumelela. Mwa yeeyo, nookhalano mathowa ooreera enneeriha wuupuwelela moomaaleleya nihaakunveene ovaha miruku.

OVAHA MIRUKU NIHIVEKELINWEENE

9. Asitokweene a mmulokoni, entthuneya ororomelaka eheeni ehaakunveene ovaha miruku? (Agalata 6:1)

⁹ Ikwaha ikina, asitokweene a mmulokoni onnatthuneya onvaha miruku munna naari murokora opanke ‘etthu yoonanara.’ (Mmusome Agalata 6:1.) Enoota ya yoosoma woohima sa eversu ela, enhima weera mutthu owo “onnapaka etthu yoonanara nnaamweera nlelo ahaakunveene opaka yoottheka etokweene.” Yoolakela ya asitokweene a mmulokoni, ori omukhavihera mutthu ovirelela weetta ephiro emphwanyiha ekumi yoohimala. (Yak. 5:19, 20) Menento weera miruku saya sikhale sooreera, awo entthuneya toko owehexexa wakhala weera mutthu owo mweekhaikhai oopaka etthu yoonanara. Yehova onnaakhulela weera ootheene hiyo nipakeke soothanla moovarihana ni yoowuupuxeraahu ya murima. (Arom. 14:1-4) Nankha wakhala weera munna oopaka etthu yoonanara ni asitokweene a mmulokoni enlakela opatxera onvaha miruku?

10-12. Emaara envahaaya miruku ehivekelinweene, asitokweene a mmulokoni entthuneya opaka eheeni? Nvahe ntakihero. (Nwehe-tho efootu.)

¹⁰ Khaiyene ti wookhweya asitokweene a mmulokoni onvaha miruku mutthu ohaavekenle. Mwa mukhalelo heeni? Murummwa Paulo oohima weera mutthu pooti ohisuwela weera oopaka etthu yoonanara. Mwa yeeyo, asitokweene ammulokoni ehaakunveene onvaha miruku mutthu, sookhala itthu entthuneyaaya opaka weera emukhavihere mutthu owo wiiwa miruku.

¹¹ Ovaha miruku mutthu ohivekelinweene, onoolikana ni waala mmiso etthaya yoolipa. Alipa oolima ehaakunveene opatxera waala mmiso, awo ennareherera toko etthaya. Eyo enneeriha weera etthaya eyo ekhale yoolikaneene weera yaaliwe. Apaka eyo, owo onnaala mmiso, avinyaka onnahelela mmiso owo weera akhavihere wunnuwa. Moolikana niiyo, mutokweene a mmulokoni ahaakunveene ovaha miruku, sookhala itthu ikina ontthuneyaawe opaka weera amweerihe munna owo otthuna wiiwa miruku. Mwa ntakihero, owo pooti oweherera etempu yooreerela ni omuleela munna owo weera onnampwattha, ni weera yookhala etthu ontthunaawe wuuluma. Wakhala weera munna onvaha miruku oosuweliwa okhala ansivelo ni ooreera murima, onoorowa okhala wookhweya atthu waakhulela miruku onaavahaawe.

¹² Vaavo entthekulaaya, mutokweene a mmulokoni pooti omukhweihera munna owo asuwelaka weera ootheene hiyo ninnapaka soottheka, ni ikwaha ikina ninnahaawela nikhavihero. (Arom. 3:23) Moomaaleleya ni mwa nttittimiho, mutokweene a mmulokoni onnamoonihera avarelaka muteko soolepa moota munna owo opankaawe etthu yoonanara. Vaavo munna owo onoonelelaawe weera oopaka etthu yoonanara, mutokweene a mmulokoni “onnaala mmiso” amuleelaka mookhweya etthu munna owo ontthuneyaawe opaka weera areherere etthu opankaawe. Okhwipi waya, mutokweene a mmulokoni “onnahelela” mmiso amuttottopelaka munna owo ni avekelaka vamoha nuuwo. — Yak. 5:15.

13. Moota heeni asitokweene a mmulokoni enrowaaya ororomelaka weera mutthu enanvahaaya miruku onnaiwexexa?

¹³ Ikwaha ikina, etthu mutthu onvaha miruku onhimaawe ni etthu mutthu onvahiwa miruku oniiwaawe, sinkhala itthu piili soovirikana. Weera esepe okhumelela eyo, asitokweene a mmulokoni ontthuneya opaka eheeni? Mwa mukhalelo wooreerela, asitokweene a mmulokoni pooti opaka makoho weera yoone wakhala weera munna owo ohiiwexexa miruku ovahinwaawe ni oosuwela moota woovarihela muteko. (Koh. 12:11) Waakhula wa munna owo onoorowa waakhavihera asitokweene a mmulokoni woonelela wakhala weera munna owo ohiiwexexa miruku ovahinwaawe.

OVAHA MIRUKU ETEMPU YOOREERELA NI MWA MUKHALELO WOOREERELA

14. Neereke hiyo onnatthuneya ovaha miruku nnyoonyinweene? Muthalihe.

¹⁴ Ootheene hiyo naatthu oohimalela, mwaha wa yeeyo, ikwaha ikina hiyo pooti opaka naari wuuluma itthu sinrowa waanyoonyiha atthu akina. (Akol. 3:13) Masu a Muluku ennahima weera ikwaha ikina hiyo pooti onyoonyihana mukina ni mukwaawe. (Aef. 4:26) Mene hiyo khontthuneya okhalano mukhalelo wootthuna ovaha miruku nnyoonyinweene. Mwaha wa heeni? Mwaha wooweera “onyonyiwa wa mutthu khonèra yeyo eri yexariya vamaithoni va Muluku.” (Yak. 1:20) Wakhala weera nnoovaha miruku nnyoonyinweene, pooti weeraka nnoorowa otepiha maxupo. Mene eyo khentaphulela weera nihimuleeleke mutthu onnyoonyinhe miyuupuwelo sahu ni moota nniisoonelaahu. Menento nnoorowa wuuluma mwa mukhalelo wooreerela wakhala weera nnooweherera toko okhala oomaaleleya. Hiyo pooti oxuttera ni ntakihero na Eliu yoowo anvanhe miruku sooreera Yobi.

15. Etthu heeni ninxutteraahu ni ntakihero na Eliu? (Nwehe-tho efootu.)

¹⁵ Yaavira mahiku Eliu amwiiwaka Yobi iisaakihaka wa itthu asinthamwene awe oowootha yeerera ommaaliha yaamuulumelaaya. Eliu annammorela ikharari Yobi. Mene aanyoonyiwa mwaha wooweera Yobi aamuhiya Yehova okhwipi aniiwehexexa paahi mwaneenaawe. Nnaamweera vareene hiiho, Eliu aaweherera etempu yooreerela ni muhoolo mwaya aahuuluma mwa mukhalelo wooreerela ni mwa nttittimiho vaavo anvahaawe miruku Yobi. (Yobi 32:2; 33:1-7) Ntakihero na Eliu ninnanxuttiha ekhaikhai yootepa otthuneya: Miruku sooreera sinvahiwa etempu yooreerela, mwa mukhalelo wooreerela, mwa nttittimiho ni mwa nsivelo. — Koh. 3:1, 7.

NVIRELELE OVAHA NI WAAKHULELA MIRUKU

16. Etthu heeni nyuwo munxutteraanyu ni Nsalmu 32:8?

¹⁶ Yoolepa ya mwaha ola, enhima weera ‘Yehova onnaniwehexexa weera anivahe miruku.’ (Musome Nsalmu 32:8.) Eyo entthuna ohima weera Yehova onnavirelela onikhavihera. Owo ohiya paahi onnivaha miruku mene-tho onnanikhavihera ovarihela muteko. Nno ntakihero nooreera wa hiyo! Vaavo ninkhalaahuno eparakha yoowaavaha miruku atthu akina, nintthuneya omutakihaka Yehova naapwatthaka atthu awo ni waakhavihera okhumela nnene.

17. Vaavo asitokweene a mmulokoni envahaaya miruku moovarihana ni Biblya, awo enkhala ntoko eheeni? Muthalihe. (Yesaya 32:1, 2)

¹⁷ Viinaano va opwaha khalayi, hiyo ninnatthuneya ovaha ni waakhela miruku sooreera. (2 Tim. 3:1) Asitokweene a mmulokoni envaha miruku sooreera moovarihana ni Biblyia, eri ntoko “muroro wa mahi munikareni.” (Mmusome Yesaya 32:1, 2.) Hiyo ninnaaxukurela asinthamwene ehinoovelela onivaha miruku ninhaawelaahu. Masu aya eri ntoko “[ewooru] mutheloni mwa epratha.” (Mir. 25:11) Ootheene hiyo nivirelele wunnuwihera osuwela ninhaawelaahu weera nivaheke ni waakhela miruku sooreera.