Kooxuttera itthu sintxipale ni kaakhalano itthu sootikiniha sooreera kinvarelaka Yehova

Asipapaka yaathaama wEstônia enkela wAlemanha, mpuwa mwa ekhotto ya naaveli ya elapo yootheene. Nto miyo kiyarinwe wAlemanha, kiyariwakaru awo yaathaamela oCanadá nnakela okhala waattamela Ottawa, oCanadá. Hiyo naakhala mmukulani mwa alakhu va nipuroni vapintarinwe ni ekoore yootteela. Hiyo naari oohaawe mene etthu yahaanithowa yaari mootxe. Nannatxa awo wehixelo wootheene naatxaahu yootxa yooxeexelo.

Nihiku nimoha, Anamoona a Yehova yaahaasomela amma yoolepa ya Apokalise 21:3, 4, yoolepa ela yaahaavara murima amma mpaka awo opatxera winla. Eso ya ekhaikhai yaahaaliwa mmurimani mwa asipakaka ni awosa yaahunnuwa moomunepani moowaakuveya mpaka obatiziwa.

Asipapaka khayuuluma nnene englês, nnaamweera vareene hiiho, awo khayaakuxera matheela ekhaikhai. Isaabadu sintxipele apapaka yannakikuxa miyo ni murokoraka nnarowa ovara muteko woolaleera nnaamweera awo yaavara muteko ohiyu wootheene efaabrica ya metalúrgica oSudbury, Ontário. Ni isemana sootheene vemosini vahu nannamusoma Nwehereri. Miyo kixuttenre omusivela Yehova moorweela mwa ameyaka ni apapaka. Tivanto eyaakha ya 1956, kireeneno iyaakha 10 kaahiivaherera wa Yehova. Omusivela waya asipapaka Yehova waakeerinhe miyo ovirelela onvarela muteko owo.

Kimalihakaru osoma kaapatxera ovara itthu ikina. Miyo kuupuwela weera khakhala vale piyoneiru nkaarowa owera wiiyaathi musurukhu weera okwanele okwanihera yootthunaaka yooweetta ekwaha kikelaka elapo ekina kinwenleene aviyawu. Miyo kaapatxera ovara muteko oradiyuni kimukumiheraka programa a itxipo. Miyo wannakisivela vantxipale muteko ole. Mene waatthuneya weera kivareke ohiyu, nto mwaha wa yeeyo kaapatxera oyeleela mithukumano ikwaha sintxipale, ni kaapatxera otthekula ni asinthamwene yahanvarela muteko Yehova. Nto yoowuupuxeraaka ya murima yootxentxerihiwa ni Biblya yaakikhavihera opaka matxentxo.

Miyo kaathaamela Oshawa ecidade yeeyo enkhala Ontário. Kireene weiwe kaamusuwela Ray Norman, murokorawe Lesli ni mapiyoneiru makina. Awo yannakikosoopa nnene. Woona moota awo yaaraaya oohakalala waakeeriha miyo wuupuwelela etthu kaakelaaka opakela ekumi aka. Awo yaakooperera okhala piyoneiru. Ni kaapaka eyo mweeri wa Setembro a eyaakha ya 1966. Miyo kaari oohakalala kittottelaka mureerelo ekumi aka. Mene miyo nkuupuwela matxentxo makavi yeera ekeerele mweekumini mwaka.

YEHOVA OOWOPANI WEERA MWAVARE ETTHU MWAAKHULELE

Kiriki osoma miyo kaaprieenxeri epetisau yoovara muteko oBetheli ya oCanadá. Muhoolo mwaya kikhalakaru piyoneru kaawompwa weera kavareke oBetheli iyaakha 4. Mene miyo kaasiveliwa vantxipale ni Lesli ni kannoova weera kaakhulela nwopelo ole kammuyeleela murokora ole ni nkaarowa oweeraka wuulumano. Kipakakaru mavekelo mantxiple miyo kaalakela waakhulela nwopelo ole. Ni murima oriki okivoreya vantxipele kaaheera: muhale nnene Lesli.

Kiphiyakaru oBetheli kaavara muteko wootxapa ikuwo, muhoolo mwaya kaavara muteko wesekretário. Etempu ene yeele Lesli aakhala piyoneira oothanleya ni aathanleliwa ovara oGatineau, oQuebec. Ikwaha sintxipale miyo kannuupuwela etthu heeni aavaraawe Lesli ni wakhala weera yoothanla kaapankaaka yaari yooreera. Mene kaatikhiniheya vantxipale, murokoriye Lesli, Ray aawompwa ovara oBetheli ni naakona ekwaartu emoha. Nto mwaha wa yeeyo, miyo kaatthikela wuuluma ni Lesli. Hiyo naathelanne nihuku nenno yoothanleliwaaka ya oBetheli yaamalaaya nihiku na 27 a Fevereiro a 1971.

Nthelanakaru miyo ni Lesli naathanleliwa ovara muloko wa nuulumo na efrances oQuebec. Sivirakaru minyeeri vakhaaneene miyo kaatikhiniheya vaavo kaawompwalaaka ovara muteko wa mutokweene a esirkiitu ni iyaakha 28 paahi. Miyo kiisoona okhala mviravoxa ni nkakhanleno sookumanano sintxipale sa mweekumini. Mene masu a Yeremiya 1:7, 8 yaakilipiha vantxipale. Mene Lesli aamweera acidente ni ekaaro ni owo aakhalano maxupo ohimphwanya ikhove, nto mwaha wa yeeyo, noona weera khanaawera ovara muteko wa mutokweene a esirkwiitu. Nnaamweera vareene hiiho, Lesli aahimme ha: “Waari weera Yehova ooniwopa, mwaha wa heeni hiyo nihineereraahu ovara muteko owo?” Hiyo naahaakhulela yoothanleliwa ele ni naamphwanya ohakalala mpuwa wa muteko iyaakha 17.

Muteko wa mutokweene a esirkwiitu ti woowaatteliwa vantxipale nto mwaha wa yeeyo, nkaakhalano etempu yintxipale weera khikhale vamoha ni mwaaraka. Miyo kaaxuttera etthu. Nihiku tino waari segunda feira weixelo, mulako ahu waamaniwa kirookaru onweha mutthu aamana mulako, nkanphwannye mutthu, kaaphwannye paahi ecestu yaarimo yootxa, etowaliya ni ekarafa emoha ya eviinyu, koopho ni ekaarta yahalempwale nsina yeeyo yaahima ha: “Mwaakuxe amwaarinyu weera mwatthekuleno.” Naari nihiku nooreera ni nsuwa nannoopa. Nto miyo kaamuleela Lesli weera nkaakela oweera orowa otthekula nuuwo mwaha wooweera kaakhalano nyaha kaatthuneyaaka oreherera. Lesli aakiiwexexa mene waamuriipa murima. Kipatxerakaru oreherera nyaha saka iye, yoowuupuxeraaka ya murima yaapatxera okilemela. Miyo kaahuupuwelela yoolepa ya Aefeso 5:25, 28, waakhala ntoko Yehova aakuupuxenre soolepa iye weera koone weera kannatthuneya waakosoopa amwaaraka. Kivekelakaru, miyo kaaweerela amwaaraka: “Nrowe” awo yaahakalala vantxipale. Hiyo naaheettiha ekaaro mpaka nipuro nooreera nenno waattamela mmoolokoni, naahaatala etowaliya ele vathi ni nne naari nihiku nootepaxa oreera naavirinhaahu vamoha. Nikhumakaru iwe miyo kaakhalano etempu ya oreherera nyaha saka.

Soothanleliwa sahu sootheene sa muteko ahu wa mutokweene a esirkwiitu saari sooreera ni soohakalaliha. Nanneetta elapo yootheene ya oColúmbia Britânica mpaka oTerra Nova. Ewoora ene yeele yootthunaaka ya enamwane yannakwanela, aani, yootthuna yooweetteetta ni osuwela mapuro makina. Miyo kahuupuwela opriyeenxeri epetisau ya Escola ya oGileade, mene miyo nkaarino yootthuna ya okhala missiyonaariyu elapo ekina. Wa miyo muteko we missiyonaariyu yaaphwanela atthu oothanleya, miyo kuupuwela weera nkakhanle oophwanelela weera kikhale missiyonaariyu. Opwaha mwa yeeyo, miyo kannoova othanleliwa elapo ya wAfrica elapo yeeyo yaawaniwa ekhotto naari saariwowo iretta. Miyo kannahakalala kireene oCanadá.

NWOPELO NAHAWEHERERAAHU WOOROWA WESTÔNIA NI ILAPO SOOWAATTAMELA EPHAREYA BÁLTICO

Eyaakha ya 1992, Anamoona a Yehova yaatthikela ovara muteko ilapo seiye seerela eparte União Soviética. Avinyaka vaavo asinna yaanikoha waari weera hiyo nannatthuna othaamela wEstônia weera navare muteko we missiyonaariyu. Nwopelo ole waaniphwanye mootutuxera ni hiyo naavekela woohima sa mwaha owo. Nave tho naahuupuwela ekwaha ya naaveli ha: ‘Wari weera Yehova ooniwopa, mwaha wa heeni hiyo nihineereraahu opaka?’ Naahaakhulela ni miyo kaahuupuwela ha: ‘Vala, woona weera khaninroihiwa wÁfrica.’

Avinyaka vaavo naapatxera oxuttera estoniano ni sivirakaru minyeeri vakhaaneene hiyo naawompwa weera navareke muteko wa mutokweene a esirkwiitu. Hiyo nannaxekura miloko 46 ni igrupu wEstônia, oLetônia ni oLituânia nave tho oKaliningrado muttetthe mmoha waakhala oRússia. Nto mwaha wa yeeyo, hiyo nannatthuneya oxuttera muulumo ala: Eletão, elituano ni erusso. Ala yaari maxupo mene asinna yannahakalala ni wiilipihera wahu ni yannanikhavihera. Eyaakha ya 1999 yaahuleliwa efiliyaale ya wEstônia ni miyo kaawompwa weera keereleke eparte ekomisau eyo vamoha ni Toomas Edur, Lembit Reile, ni Tommi Kauko.

Hiyo naahaasuwela asinna yaawo khalayi, yaathaamiherinwe oSibéria. Nnaamweera yaahooxinwene ni yaarakamihelinweene ni amusi aya, awo khayaakhanle atthu oonyoonyiwa ni khayaayelenle ohakalala waya ni wiilipihera waya ovara muteko woolaleera. Ntakihero naya noonixuttiha hiyo weera pooti ovilela ni ohakalala nnaamweera nivirihaka maxupo.

Naavara muteko wa Yehova iyaakha sintxipale ni hiyo khanaarinono mahiku mantxiple oowiitthuuwa. Ti vanto Lesli aapatxera okhulumuwa mene hiyo khanaasuwenle etthu yaamweeriha okhulumuwa, ni naapatxera wuupuwela weera ntthikeleke oCanadá. Mene hiyo naawompwa escola ya Memembro a ekomisau ya eFiliyaale oPatterson, oNova York, wEstados Unidos. Miyo kannahovela waari weera naamwaakhulela nwopelo ole, mene nipakakaru mavekelo naahaakhulela nwopelo ole. Ni Yehova aareeliha yoothanla ahu. Nreene oscola iwe hiyo naahoonelela etthu heeni yaamweeriha Lesli okhulumuwa ni owo aakosoopiwa moophwanelela. Nto mwaha wa yeeyo, hiyo naattikela ovara muteko ntoko naavarelaahu khalayi.

YOOTHANLELIWA YOOTIKHINIHA—YOOROWA OVARA MUTEKOKO WAFRICA

Ohiyu omoha nreene wEstônia, eyaakha ya 2008, kaligareliwa ni eseede Mundia ekikohaka waari weera hiyo naamwaakhulela orowa ovara muteko oCongo. Etthu ele yaakiphannye mootutuxera otepaxa wene hiyo naatthuneya weera naakhule nikoho nne nihuku naattharelana. Miyo nkamulenle Lesli mwaha wooweera miyo kaasuwela weera kamulela vale khaarowa okona ohiyu ole. Mene ti miyo kahaakonne. Kaaviriha ohiyu ole kivekelaka itthu saakivalaveliha kuupuwelaka vale elapo ya wAfrica.

Vaxaakaru miyo kaamulela Lesli ni hiyo naalakela weera “waari weera Yehova oonithanla weera nakhaleke wAfrica, hiyo ninsuwela moota heeni weera khonkela onisivela wo.” Nto ivirakaru iyaakha 16 nreene wEstônia, naaarowa oKinshasa, oCongo. Ebetheli ya iwo yaakhalano ejadim yootepa oreera ni waari woomaleleya. Etthu yoopatxera Lesli aahenlaawe okwaartu yaari ekartau yeeyo owo akhalannnaawe nikhalaka oCanadá. Yeeyo yaahima weera: “Muhakalaleke nipuro nri poothe muraanyu.” Avinyaka vaavo, nahaasuwela asinna ni opakiha soosoma sa Biblya ootheene ni woona moota muteko wa missiyonaariyu waari aya wooreera osivela wahu muteko wa Yehova wahatxeerereya. Evirakaru etempu hiyo naakhalano eparakha yooxekura iBetheli 13 sa wAfrica, eyo yaanikhavihera waasuwela atthu oohiya-hiyana woova kakhalannaaka woopatxerani waamala-mala. Hiyo naamuxukurela Yehova mwaha woonithanlela ovara wAfrica.

Ocongo asinna yannanoonihera sootxa soohiyana-hiyana. Mwa ntakihero, ixiitthu seiyo kuupuwelaaka weera nkaakela owera otxa. Mene noonakaru moota asinna ale saasivelaaya ixiitthu iyo, hiyo-tho naalakela olawiha ni naahoona weera sannasiva.

Hiyo nanneetteetta elapo ele naaroihelaka atthu itthu ni waalipiha. Mapuro ene yaawo yannawaniwa ekhotto ni atoropa yannaahasula athiyana ni anamwane. Asinna antxipale iwe yaari oohaawa. Mene nnaamweera vareene hiiho, yoowehereraaya yoolipa ya ovinyererihiwa wa alipa ookhwa ni omusivela waya Yehova ni ororomela waya mareherero a Yehova wannanivara murima. Ntakihero naya nannanikhavihera hiyo ovirelela onvarela muteko Yehova. Asinna akina yaayeleela impa saya ni imatta saya, eyo yaanoonihera weera itthu sa weerutthuni pooti omala okaphila ni oweha ni weera onthamwene ahu ni Yehova etthu yootepa otthuneya. Nnaamweera evirihaka maxupo mantxipale, awo khayaamakela wiikhupanyera. Moota awo yoonelaaya itthu waanilipiha vantxipale ovirelela oviriha maxupo ahu a eretta ni nroromelo.

NAATHANLELIWA OROWA WÁSIA

Naatikhiniheya tho wa naaveeli. Hiyo naawoompwa orowa ovara muteko eBetheli ya Hong Kong. Hiyo khanintale wuupuwela weera nihuku ti nno naamurowa okhala wÁsia! Noonakaru nsivelo na Yehova ni soothanleliwa sahu sakhalai hiyo naahaakhulela nwopelo ole. Eyaakha ya 2013, ni maithori mmaithoni mwahu naahaahiya asinthamwene ahu ni ooreera wa Africa nihisuwelaka etthu heeni yeera yeereye.

Yaari maxupo matokweene orowa okhala Hong Kong ecidade etokweene yoonyakuleleya, araayawo atthu a makhalelo ootheene. Oxuttera echinês khavakhweñye. Ni asinna a iwo tansivelo ni sootxa saya ti soosiva. Muteko woolaleera wannavirelela okela vahoolo, mene orika wa impa wannavirelela waatxeerereya. Nto Mukuttula Woolamulela waalakela otumiha impa sintxipale sa efiliyaale. Nto eyaakha ya 2015, hiyo naathaamela oCoreia do Sul, weiwo ninvara ahu muteko viinaano va. Mene tho nuulumo na iwo ti nooxupa oxuttera. Mene nnaamweera hiyo nihiweraka nnene eCoreano, asinna ennanittottopela ehimaka weera ninnaxuttera moowaakuveya.

ITTHU HIYO NIXUTTENRAAHU

Waapaka asinthamwene khonkhweya, mene hiyo naahoonelela weera waawopa atthu akina owannyihu waari wootepa okhweya waapaka asinthamwene anyowani. Mene hiyo naahoonelela weera asinna a elapo yootheene toolikana ni weera Yehova oonivaha owera woowoonihera nsivelo asinthamwene ahu ootheene etempu emoharu.—2 Akor. 6:11.

Hiyo ninnoona otthuneya waya waasivela atthu ntoko hiihaale Yehova onaasivelaawe ni weerera woona mathowa anoonihera weera Yehova onnanisivela ni weera onoonivaha miruku mahiku ootheene. Ikwaha sootheene noonaahu weera ninnahovela waari weera asinna ennanisivela hiyo nanniivaha ehuhu weera nisome ikaarta ni ikartau sa asinthamwene ahu. Eyo yannanilipiha, mwa ikwaha sintxipale, naahoona weera Yehova onnaakhula mavekelo ahu ni eyo yannanlipiha nroromelo nahu ni yannaniroromeliha weera owo annanisivela vantxipale.

Evirakaru etempu miyo ni Lesli naahoonelela otthuneya waya okhala vamoha nnaamweera naattelinweene, hiyo-tho naahoonelela weera onnatthuneya otheya vaavo nihinwera ahu wuuluma nnene nuulumo ninxutteraahu. Ohiyu wootheene nannuupuwela etthu enisivenle ni nannamuxukurela Yehova mwaha wa etthu eyo.

Ohima Ekhaikhai miyo nkinnuupuwele ovara ntoko missiyonaariyu naari othaamela elapo ekina. Mene miyo kinnoona moota itthu sootheene sinwereñyaaya ni nikhavihero na Yehova. Miyo kinnuupuwela masu a mprofeti Yeremiya vaavo owo ohimmaawe: “Yahvéh weyo wòkòthera.” (Yer. 20:7) Yehova ookireeliha vantxipale mwa moota miyo kahintalaaka wuupuwelela. Yehova mpaka ookwanihera yootthunaaka ya enamwane aka ya weetta ikwaha ni eviyawu. Hiyo noheetta ikwaha sintxipale ni eviyawu opwaha moota miyo kuupuwelelaka kireene mwaana, hiyo nooxekura ifiliyaale sa ikontinente 5. Nave kinnamuxukurela Lesli, mwaha wookikhavihera mwa soothanleliwa saka sootheene.

Hiyo ninneerera wuupuwelela weera itthu sootheene niwenre mwaha wooweera nannamusivela Yehova. Mareeliho nraahuno yoowoonihera paahi enoonihera itthu ankelaaya waakhela ale enkela okhala mwa mahiku ootheene emaara yeeyo onkelaawe onilamiha mwa iretta sootheene’.—Nsal. 145:16.