Mpatisiwe moohipisa

1. Mathowa heeni ooreera enneeriha opatisiwa?

NEEREKE nyuwo munnamusivela Yehova Muluku, yoowo oovanheni itthu sooreera ohela mpuwa ekumi? Neereke nyuwo munnatthuna omoonihera omusivela wanyu? Mukhalelo wooreera weera mpake eyo, ori wiivaherera wa yoowo ni woonihera eyo mpatisiwaka. Itthu iya, sinooweerihani nyuwo weerela eparte emusi ya Yehova. Yookhumelelaaya, Tiithi anyu ni nthamwene anyu, onoorowa oweettihani ni wookosoopani mwaha wooweera nyuwo munrowa okhala awawe. (Nsal. 73:24; Yes. 43:1, 2) Wiivaherera ni opatisiwa, onimoovahani-tho yooweherera ya okhalano ekumi yoohimala muhoolo. — 1 Ped. 3:21.

2. Etthu heeni ninkelaahu woona mpuwa mwa yoosoma ela?

² Yookhala etthu enwootxeelihani opatisiwa? Wakhala weera aani, nyuwo khamukhanle meekhaanyu. Atthu antxipale ohiya paahi nyuwo, yaatthuneya opaka matxentxo mwa makhalelo aya ni moota yuupuwelaaya weera ekhale oolikaneene opatisiwa. Vano awo ennanvarela Yehova moohakalala ni moororomeleya. Etthu heeni nyuwo muntthuneyaanyu oxuttera ni atthu yaapatisinwe eseekulu yoopatxera? Nrowe noone maxupo yaavirinhaaya ni-tho etthu ninxutteraahu ni ntakihero naya.

ASAMARIYA YAAPATISIWA

3. Asamariya weera epatisiwe yaavirinhe maxupo heeni?

³ Mahiku a Yesu asamariya yaari ekhurupu ya ettiini, ni asamariya antxipale yaakhala waattamela esidade ya osikeni ni oSamariya, oNorte wa oYudeya. Asamariya ehaakunveene opatisiwa, awo wannatthuneya waakhulela masu a Muluku ni oxuttera vantxipale. Asamariya yaakhulela weera, iliivuru suupuxerinwe ni Muluku saari iliivuru 5 soopatxera sa mBiblyani, okhuma Ephattuwelo mpaka Olaleya, ni pooti weeraka yannaroromela eliivuru ya Yehoxuwa. Mwa yeeyo, awo yannaweherera weera Mesiya amphiya, ntoko yoolaihera ya Muluku elempwale va Olaleya 18:18, 19. (Yoh. 4:25) Weera epatisiwe awo wannatthuneya omwaakhulela Yesu ntoko Mesiya yoowo aalaiheriwe. Ni “Asamariya antxipale” yaapaka eyo. (Yoh. 4:39) Pooti weeraka akina wannatthuneya owina mukhalelo wa nthalu, yoowo waakhanle eriyari ya asamariya ni ayuda. — Luka 9:52-54.

4. Moovarihana ni Miteko 8:5, 6, 14, asamariya akina yoonenle moota heeni vaavo Filipe aalalenraawe?

⁴ Etthu heeni yaakhavihenre asamariya opatisiwa? Vaavo Filipe namalaleera aalalenraawe “yawo Kristu,” asamariya antxipale “yàhàkhulela nsu na Muluku.” (Musome Miteko 8:5, 6, 14.) Filipe aayarinwe oYuda, mene awo khayaamukuxenre nthalu. Pooti weeraka awo yuupuwelenle eversu ya Olaleya eliivuru yeeyo yaaroromelaaya enhima weera Muluku khaanoono nthalu. (Ola. 10:17-19) Ehipwatthaka Filipe aakhumawewo, awo ‘yaahiiwelela moomaaleleya ele Filipe aahimaawe’ woohima sa Kristu, ni yaaroromela itthu soonihera weera Filipe annakhaviheriwa ni Muluku. Filipe aapaka miiriira sintxipale ohela mpuwa waalamiha aretta ni woomola minepa soonanara. — Mit. 8:7.

5. Itthu heeni nyuwo muxuttenraanyu ni asamariya?

⁵ Pooti weeraka asamariya yaamurowa waakhulela nthalu, naari ohisuwela waya vantxipale masu a Muluku oweerihaka ohikela vahoolo. Menento awo khayaahiñye eyo yeereyaka. Biblya onhima weera: “Vano okhala wera yàmwìwelela Filipe àvanjelizera yawo omwene wa Muluku ni nsina na Yesu Kristu, alopwana ni athiyana yàbatiziwa.” (Mit. 8:12) Asamariya khayaapinse opatisiwa esuwelakaru weera etthu Filipe aaxuttihaawe yaari ekhaikhai. Neereke nyuwo munnaroromela weera masu a Muluku teekhaikhai ni weera Anamoona a Yehova aawina nthalu ni enniilipihera wooniherana nsivelo neekhaikhai mukina ni mukhwaawe nenno nri ethoonyero ya akristu ekhaikhai? (Yoh. 13:35) Vano mpake yoothanla muroromelaka weera Yehova onimooreelihani.

6. Moota heeni nyuwo munrowaanyu ottottela mureerelo ntakihero na Ruben?

⁶ Ruben a wAlemanha, ahuuwale ni emusi ya Anamoona a Yehova. Menento areene mmiravo, annahovela waari weera Yehova ookhala. Moota heeni owo omalinhaawe ohovela wawe? Oonelelakaru weera khaiwexexa woohima sa mwaha owo, aalakela othola-thola. Owo ohimme ha: “Mwa yoosomaaka, miyo kannatthuna omaliha ohovela waka. Miyo ikwaha sintxipale kannasoma woohima sa soopattuxiwa.” Owo annamusoma liivuru, Existe um Criador Que Se Importa com Você? Liivuru ola aamukhavihera vantxipale Ruben. Owo aahuupuwela muneenaawe eeraka, ‘Ahee! Moohihovela Yehova ookhala.’ Ni vaavo aaronwaawe oxekura Esede Mundial, Ruben aahaatxeerera oxukurela wawe emusi yoowiiraana ya elapo yootheene. Emaara aatthikenlaawe wAlemanha, Ruben aapatisiwa areeneno iyaakha 17. Wakhala weera nyuwo munnahovela woohima sa itthu munxutteraanyu, mmalihe ohovela iwo muthola-tholaka woohima sa irevista sahu. Ohovela pooti omala-malihiwa ni ‘osuwela weekhaikhai.’ (Aef. 4:13, 14) Ni emaara yeeyo muniiwaanyu soohimmwa woohima sa nsivelo ni wiiraana okhanle eriyari ya atthu a Yehova mwa iparte ikina sa mulaponi ni woona muneene anyu mmulokoni, oxukurela wanyu emusi yoowiiraana ya elapo yootheene onimwaatxeerereya.

SAULO OTARSO AAPATISIWA

7. Muupuwelo heeni Saulo aatthuneyaawe oreherera?

⁷ Moone ntakihero na Saulo oTarso. Owo annarowa vahoolo mwa sooxuttiha sa ayuda ni aari oosomaxa vantxipale. (Agal. 1:13, 14; Afil. 3:5) Mwa etempu emoha yeeyo ayuda yaawoonaaya makristu ntoko anamavaanyiha, Saulo annaatthara-tthara. Owo uupuwela weera aapaka yootthuna ya Muluku. (Mit. 8:3; 9:1, 2; 26:9-11) Weera amwaakhulele Yesu ni opatisiwa ntoko mukristu Saulo annatthuneya okhala oolikaneene otthara-tthariwa.

8. (a) Etthu heeni yaamukhavihenre Saulo weera apatisiwe? (b) Moovarihana ni Miteko 22:12-16, moota heeni Ananiya aamukhavihenraawe Saulo? (Nwehe efootu.)

⁸ Etthu heeni yaamukhavihenre Saulo opatisiwa? Vaavo Pwiya Yesu oovuwihiwa aamukhumelenlawe owo, Saulo khaawera woona. (Mit. 9:3-9) Yaavira mahiku mararu amutthunkeene ramasaani ni moohihovela, annuupuwelela etthu ele aavirinhaawe. Mweekhaikhai, Saulo aaroromela weera Yesu aari Mesiya ni weera atthareli awe yaari ettiini yeekhaikhai. Saulo aattharuwa mwaha wooweerela eparte okhwa wa Stefano. (Mit. 22:20) Evirakaru mahiku mararu, mutthareli mmoha yoowo iitthaniwa Ananiya, mooreera murima aamwaattamela Saulo ni aalamiha ohoona wawe ni aamooperera opatisiwa moowaakuveya. (Musome Miteko 22:12-16.) Saulo aahaakhulela moowiiyeviha nikhavihero nno ni aavarexexa mukhalelo awe munyowani wa ekumi awe. — Mit. 9:17, 18.

9. Itthu heeni nyuwo munxutteraanyu ni Saulo?

⁹ Sookhala itthu ninxutteraahu ni Saulo. Owo aamurowa waakhulela wiisunnuwiha naari owoova atthu omootxeelihaka opatisiwa. Mene owo khaakhulenle eyo. Saulo moowiiyeviha aapaka matxentxo vaavo aakhulenlaawe ekhaikhai woohima sa Kristu. Saulo aari oolikaneene okhala mukristu nnaaamweera aasuwela weera aamurowa otthara-tthariwa. (Mit. 26:14, 19) Apatisiwakaru, owo aavirelela omuroromela Yehova weera aamurowa omukhavihera ovilela maxupo. (Mit. 9:15, 16; 20:22, 23) Opatisiwa ntoko Namoona a Yehova pooti okumihera itthu seiyo sinrowa oneerera naari weereriwa nroromelo nahu. (2 Akor. 4:7-10) Menento nyuwo munookhalano nikhavihero. Nyuwo muroromeleke weera munookhalano nikhavihero na Muluku ni na Kristu. — Afil. 4:13.

10. Moota heeni nyuwo munrowaanyu ottottela mureerelo ntakihero na Anna?

¹⁰ Anna ohuuwale emusi yeeyo enkhala nipuro nimoha wEuropa Oriental. Ameyawe epatisiwakaru, aakhuleliwaka ni apapawe Anna aapatxera omusoma Biblya areeneno iyaakha 9. Menento eyo yaakumihera maxupo ni atthu a veemusini vawe, yaawo yaakhala vamoha ni emusi ya Anna mwaha wa sookhovelela saya. Amusi awe khayoona okhala wooreerela mutthu ohiya ettiini ya makholo awe. Vaavo Anna aaraaweno iyaakha 12, owo aahaavekela apapawe weera emwaakhulele opatisiwa. Apapawe yaatthuna osuwela wakhala weera yaari yoothanlaawe naari ookhala mutthu aamunyeserera opaka eyo. Owo aahaakhula, “Miyo kinnamusivela Yehova.” Apapawe yaamwaakhulela owo opatisiwa. Menento Anna aaviriha mikhalelo soovirikana sooveehiwa ni okosoopiwa moohireerela. Mmusi awe mmoha aamweerela: “Waamukhala wooreerela nyuwo okhalano ekumi yoohireerela naari opaha, ohiya okhala Namoona a Yehova.” Moota heeni Anna aavirinhaawe eyo? Owo ohimme ha, “Yehova ookikhavihera okhala oolipa ni ameyaka vamoha ni apapa aakikhavihera vantxipale.” Anna oolepa ikwaha sootheene onnaawe nikhavihero na Yehova mweekumini mwawe. Ikwaha sintxipale owo onnaweha ele olempaawe weera ohittiwale moota Yehova omukhavihenraawe. Wakhala weera nyuwo munnoova otthara-tthariwa, muupuweleke weera Yehova onoorowa wookhaviherani. — Aheb. 13:6.

KORNELIU AAPATISIWA

11. Maxupo heeni Korneliu aavirinhaawe?

¹¹ Biblya onnanivaha ntakihero na Korneliu. Owo aari “kenturioni,” eyo tiiyo, mutokweene aanakhotto oRoma ookwanaka 100. (Mit. 10:1, enoota) Mwaha wa yeeyo, owo pooti weeraka aari oovuwa ni nakhotto oottittimiheya. Owo ‘annakhavihera ni sovaha sintxipale muloko wa atthu.’ (Mit. 10:2) Yehova aamurumiha murummwa Pedru weera amulaleere mitthenka sooreera. Neereke muritti aaraaweno Korneliu waamweeriha opisa opatisiwa?

12. Etthu heeni yaamukhavihenre Korneliu weera apatisiwe?

¹² Etthu heeni yaamukhavihenre Korneliu weera apatisiwe? Biblya onhima weera owo ‘annamoova Muluku vamoha ni vaate vawe vootheene.’ Ni Korneliu annanvekela Yehova vohihiyerera. (Mit. 10:2) Vaavo Pedru aamulalenraawe mitthenka sooreera Korneliu, owo ni emusi awe yaamuroromela Kristu ni yaapatisiwa. (Mit. 10:47, 48) Moohihovela, Korneliu aari oolikaneene opaka matxentxo yaatthuneya weera amukokhoreleke Yehova vamoha ni emusi awe. — Yeh. 24:15; Mit. 10:24, 33.

13. Itthu heeni munxutteraanyu ni Korneliu?

¹³ Hiihaale ntoko Saulo, Korneliu pooti weeraka aamwaakhulela weera muritti aaraaweno omootxeelihe okhala mukristu. Mene owo khahiñye eyo yeereyaka. Neereke waakhulela ekhaikhai onooweerihani nyuwo opaka matxentxo mweekumini mwanyu? Wakhala weera ti hiiho, Yehova onoorowa wookhaviherani. Owo onoorowa oreeliha wiilipihera wanyu weera munvareleke moovarihana ni miruku sa mbiblyani.

14. Moota heeni nyuwo munttottelaanyu mureerelo ni ntakihero na Tsuyoshi?

¹⁴ Tsuyoshi oJapão annatthuneya opaka matxentxo ni muteko awe weera aphwanelele opatisiwa. Owo aamuranttela diretor awe a exikola yeeyo yaaxuttiha atthu oreherera ifuloore. Vaavo diretor awe ahaarowaawe omarironi, Tsuyoshi imaara sintxipale annamuranttela weera ahoolele sookhovelela sa ettiini buda. Menento vaavo Tsuyoshi aaxuttenraawe woohima sa okhwa, yookhovelela ela yannamootxeeliha opatisiwa. Owo aapaka yoothanla muneene awe, ya oheerela eparte sookhovelela iye sa ettiini buda. (2 Akor. 6:15, 16) Tsuyoshi aahuuluma ni adiretor awe woohima sa mwaha owo. Yookhumelelaaya, Tsuyoshi aavirelela ovara muteko aheerelaka eparte sookhovelela sa ettiini buda. Owo aapatisiwa evirakaru eyaakha emoha vaavo aapatxenraawe omusoma Biblya.a Wakhala weera nyuwo munnatthuneya opaka matxentxo a muteko anyu weera mmusivelihe Yehova, muroromeleke weera Yehova onimoovahani itthu nyuwo ni emusi anyu munhaawelaanyu. — Nsal. 127:2; Math. 6:33.

AKORINTO YAAPATISIWA

15. Akorinto yaavirinhe maxupo heeni weera epatisiwe?

¹⁵ Atthu a oKorinto akhalayi, yaasuweliwa mwaha woosiveliwa ni mihakhu ni opaka itthu soonanara. Antxipale a yaawo yaakhalano mukhalelo wa ekumi yoowo Muluku ohinaakhulelaawe. Mwaha wa mukhalelo owo, onooneya weera yaari maxupo wa mutthu aakhulela mitthenka sooreera. Menento, vaavo murummwa Paulo aaphiñyaawe esidade ele ni onalaleya mitthenka sooreera woohima sa Kristu, “Akorinto antxipale yìwalaya nsu, yàhìwelela, enabatiziwa.” (Mit. 18:7-11) Nto Yesu Kristu aamukhumelela Paulo moolohani ni onamweerela: “Kòkhalano muteko mutokotoko mmuttettheni mmo.” Mwaha wa yeeyo Paulo aavirelela olaleera muttetthe ole mpuwa mwa eyaakha emoha ni emeya.

16. Eheeni yaakhavihenre akorinto akina owina maxupo weera epatisiwe? (2 Akorinto 10:4, 5)

¹⁶ Etthu heeni yaakhavihenre atthu oKorinto weera epatisiwe? (Mmusome 2 Akorinto 10:4, 5.) Masu a Muluku ni ikuru sa munepa awe wootteela, waahaakhavihera atthu awo opaka matxentxo matokweene a mweekumini. (Aheb. 4:12) Atthu ooKorinto yaawo yaakhulenle mitthenka sooreera sa Kristu, yaahiya mikhalelo saya soonanara yaakhovelenlaaya ni soopaka saya soonanara ntoko wiiya, ohapaliwa ni okonihana alopwanaru naari athiyanaru. — 1 Akor. 6:9-11.b

17. Eheeni nyuwo munxutteraanyu ni akorinto?

¹⁷ Moone weera nnaamweera atthu akina ooKorinto yaarino sookhovelela soonanara seiyo saari sooxupa otxentxa, awo khayuupuwenle weera waarowa okhala wooxupa okhala akristu. Mwa miruku awo yaahiilipihera ovolowa ephiro yoophureya yeeyo emphwanyiha ekumi yoohimala. (Math. 7:13, 14) Neereke nyuwo munnawanano yookhovelela yoonanara yeeyo enwootxeelihani opatisiwa? Munvekele Yehova munepa awe wootteela weera wookhavihereni owanano ni yootthuna ya opaka etthu yoonanara.

18. Moota heeni nyuwo munrowaanyu ottottela mureerelo ntakihero na Monika?

¹⁸ Monika yoowo onkhala oGeorgia, ohiilipihara vantxipale weera awine mukhalelo woowuuluma masu oohireerela ni matthekulelo oohireerela weera arowe vahoolo mpaka opatisiwa. Owo ohimme ha: “Emaara yeeyo miyo kinnuwaaka etthu yaakikhavihera naari nivekelo. Yehova annasuwela weera miyo kaatthuna opaka etthu yooreera ni owo ikwaha sootheene annakikhavihera ni annakeettiha.” Monika apatisinwe areeneno iyaakha 16. Neereke sookhala itthu nyuwo muntthuneyaanyu owina weera munvareleke Yehova ntoko owo ontthunaawe? Nvireleleke onvekela nikhavihero weera nwere opaka matxentxo. Yehova onnavaha munepa awe wootteela. — Yoh. 3:34.

NROROMELO NANYU POOTI OPHELA MWAAKO

19. Eheeni enrowa wookhaviherani owina maxupo yaawo enkhala ntoko miyaako? (Nwehe efootu.)

¹⁹ Muroromeleke weera Yehova onnoosivelani ni ontthuna weera mweereleke eparte emusi awe. Eyo ekhaikhai woohipwattha maxupo munvirihaanyu weera mpatisiwe. Yesu aahaaleela atthareli awe a eseekulu yoopatxera eeraka: “Wakhala weera munookhalano nroromelo ninlikana ni enuku ya emostarta, munimweerela mwaako, opheleye va weemele vale, ni owo onoopheleya ni khiyaavo etthu eneera yooxupekeni.” (Math. 17:20) Atthu yiiwale masu ale yaari ni Yesu mwa iyaakha vakhaani, mwa yeeyo nroromelo naya naamweera waatxeerereya. Mene Yesu aahaaroromeliha weera, wakhala weera yaamunnuwihera nroromelo, Yehova aamwaakhavihera owina maxupo yaawo enkhala ntoko miyaako. Ni Yehova onimookhaviherani nyuwo-tho opaka etthu emoha-moharu.

20. Moota heeni matakihero akristu a eseekulu yoopatxera ni a mahiku ahu ala ehimmwale mwa yoosoma ene yeela enoolipihaayani?

²⁰ Wakhala weera nyuwo mohoonelela maxupo enwootxeelihani opatisiwa, mpakevo etthu moowaakuveya weera mmalihe maxupo awo. Mphwanye omaaleleya ni ikuru moorweela mwa matakihero a makristu a eseekulu yoopatxera ni a mahikwaano. Matakihero aya yoolipiheni ni eweeriheni wiivaherera wa Yehova ni opatisiwa. Eyo yoothanla yootepa oreera nyuwo muntthuneyaanyu opaka!