Moota woowuupuwelela Soolepa

Neereke nyuwo munniilipihera wuupuwelela yoolepa ya mBiblyani enoosivelani? Pooti weera apaale yoolepa enoolipihani, enookhaviherani owina miyuupuwelo soonanara naari yoolepa muntthunaanyu omoonihera mutthu mukina. (Nsal. 119:11, 111) Moone miruku vakhaani sinrowa wookhaviherani wuupuwelela soolepa iyo.

• Nvariheleke muteko nipuro nlempwale adicionar etiqueta va JW Library^®. Mwarowa nipuro nna nlempwale adicionar etiqueta, nyuwo pooti olepa “Soolepa sinkisivela” avinyaka, mwiikaathi soolepa iyo nipuro nno weera muupuweleleke emaara ekina.

• Muheleke yoolepa nipuro nenno onrowaaya wookhweelakani woona. Mulepeke vapapheloni yoolepa yeeyo muntthunaanyu wuupuwelelaka ni muheleke nipuro munrowaanyu woonaka veeli-veeli. Akina ennahela vakhiviru ni espeeliyu, akina ennapareya vanseleni ni akina ennatirari efootu ya yoolepa avinyaka enhela efootu eyo mutelefoonini naari mukomputadooreni mwaya.

• Mpakeke ni nvariheleke muteko ipaphelo. Mulepeke vapapheloni masu a yoolepa ni ottuli wa epaphelo eyo mulepeke yoolepa ene. Avinyaka musomeke masu a yoolepa ni mweerereke wuupuwelela yoolepa ene, yeeyo eri ottuli wa epaphelo eyo. Naari nweheke yoolepa ni mweerereke wuupuwelela masu a yoolepa eyo, yaawo eri vapapheloni vawo.